سرگودھا، بچیانہ، ننکانہ صاحب (نمائندگان خبریں) سرگودھا کے نواحی علاقے چک 95میں ایک دربار کے متولی نے گدی پر قبضہ کیلئے مرحوم پیر کے بیٹے سمیت20افراد کو قتل کر دیا30 زخمی ہو گئے۔ پولیس نے ملزم متولی عبدالوحید کو ساتھیوں سمیت گرفتار کرلیا ، ملزم نے لرزہ خیز قتل کی واردات کا اعتراف کر لیا۔ متولی نے مریدوں کو نشہ آور مشروب پلا کر ڈنڈوں اور چھریوں کے وار سے قتل کیا،3مریدوں نے زخمی حالت میں بھاگ کر جان بچائی ،قتل ہونے والوں میں ملزم کے پیر کا بیٹا، 6خواتین اور ایک ہی خاندان کے 5افراد بھی شامل ، میتیں آبائی علاقوں کو روانہ کردی گئیں۔ وزیر اعلیٰ پنجاب نے واقعہ کا نوٹس لے لیا،فوری رپورٹ طلب کر لی ،فرانزک ٹیم اور ماہرین کو طلب کرلیا گیا،واقعہ کا تاحال مقدمہ درج نہ ہو سکا۔ تفصیلات کے مطابق سرگودھا میں مقامی درگاہ گدی نشین نے ساتھیوں سے مل کر مبینہ طور پر ایک ہی خاندان کے پانچ افراد سمیت 20 مریدوں کو قتل اور 30کو زخمی کر دیا۔ سرگودھا کے ڈپٹی کمشنر لیاقت علی چٹھہ کے مطابق نواحی علاقے 95 شمالی میں قائم دربار مبینہ طور پر علی محمد گجرکے گدی نشین عبدالوحید نے اپنے ساتھیوں کے ہمراہ درگاہ پر موجود 6 خواتین سمیت 23 افراد کو کو نشہ آور مشروب پلا کر پہلے بے ہوش کیا گیا اور پھر انہیں ڈنڈوں اور چھریوں کے وار کر کے قتل کیا گیا۔ عبدالوحید کے تین مریدوں نے بھاگ کر جان بچائی، اسپتال میں تینوں زخمی افراد کی حالت تسلی بخش ہے۔ ڈپٹی کمشنر سرگودھا لیاقت علی چٹھہ کے مطابق جاں بحق افراد میں 4 خواتین اور 16 مرد شامل ہیں جبکہ دو خواتین سمیت 4 افراد زخمی ہیں۔ واقعہ کی اطلاع متولی کے تشدد سے بچ کر اسپتال پہنچنے والی خاتون نے دی۔لیاقت علی چٹھہ کا کہنا ہے کہ دربار کے متولی عبدالوحید اور درگاہ کی صفائی کرنے والے نوید سمیت 3 افراد کو گرفتار کر لیا گیا ہے۔ ڈپٹی کمشنر کے مطابق گرفتار عبدالوحید خود کو اعلیٰ پائے کی روحانی شخصیت کہتا تھا۔ ڈپٹی کمشنر سرگودھا کہتے ہیں عبدالوحید مریدوں پر تشدد کر کے کہتا تھا کہ ان کا جسم پاک ہونے لگا ہے۔ واقعے میں گدی نشینی کے تنازع کاپہلو نظرنہیں آتا۔انہوں نے مزید بتایا کہ ملزم عبدالوحید الیکشن کمیشن سرگودھا کا سابق ملازم ہے،اس سے آفس کارڈ بھی برآمدہوا ہے۔ دوسری جانب ترجمان الیکشن کمیشن کا اس حوالے سے کہنا ہے کہ عبدالوحید کا ادارے سے کوئی تعلق نہیں، وہ الیکشن کمیشن کا سابق ملازم اور لاہور میں تعینات تھا تاہم عبدالوحید نے ایک سال قبل الیکشن کمیشن سے ریٹائرمنٹ لے لی تھی۔پولیس کے مطابق قتل ہونے والے افراد کا پوسٹ مارٹم مکمل کر نے کے بعد ان کی لاشیں ورثاءکے حوالے کردی گئیں ہیں۔ قتل ہونے والوں میں ایک ہی خاندان کے 5 افراد بھی شامل ہیں۔ واقعہ کے بعد پولیس کی بھاری نفری نے درگاہ کو مکمل طور پر سیل کر دیا ہے۔ پولیس کا کہنا ہے کہ درگاہ کے متولی عبدالوحید کا ذہنی توازن درست معلوم نہیں ہوتا۔ عبدالوحید مریدین کو برہنہ کر کے دھمال ڈلواتا اور ان سے کہتا کہ اس طرح مریدین گناہوں سے پاک ہو جاتے ہیں۔ ادھر مقامی افراد کا کہناہے کہ عبدالوحید مہینے میں ایک دو بار درگاہ پر آتا تھا۔ مریدوں پر تشدد کر تا تھا، انہیں برہنہ کر کے آگ بھی لگاتا تھا۔ قتل کئے گئے11افراد کا تعلق سرگودھا، 2 کا اسلام آباد،2 کا تعلق لیہ، ایک کا میانوالی، ایک اور شخص کا تعلق پیر محل سے ہے۔ ایک خاتون کی شناخت نہیں ہو سکی کے علاوہ قتل ہونے والے میں ملزم عبدالوحید کے پیر علی محمد گجر کا بیٹا آصف بھی شامل ہے۔ بی بی سی سے گفتگو میں تھانہ صدر سرگودھا میں ڈیوٹی پر موجود پولیس اہلکار محمد احسان نے بتایا کہ ان افراد کو قتل کرنے کا سلسلہ جمعے کی رات سے شروع ہوا تاہم پولیس کو سنیچر کی شب اطلاع ملی۔ انہوں نے بتایا کہ مقتولین کو چھریوں اور چاقوں کے وار کر کے قتل کیا گیا۔ جیسے ہی مرید دربار میں خلیفہ کے پاس پہنچتے تھے وہ انھیں نشہ آور دوائی پلاتا تھا، خلیفہ کا نام عبدالوحید تھا جو تین ساتھیوں سمیت گرفتار ہے اور اس سے تفتیش جاری ہے۔قاتل عبدالوحید نے دورانِ تفتیش پولیس کو بتایا ہے کہ وہ ریٹائرڈ ڈپٹی ڈائریکٹر الیکشن کمیشن پنجاب ہیں اور اب دربار میں بغیر رجسٹریشن نے مریدوں کو اس شک میں قتل کیا ہے کہ وہ علی احمد گجر نامی پیر کو زہر دینے کی سازش کا حصہ تھے۔انھیں شک تھا کہ یہ مرید اسے بھی زہر دے کر مار دیں گے۔ ادھر وزیراعلی پنجاب شہبازشریف نے سرگودھا میں 20افراد کے قتل کے واقعے کے بعد صوبائی وزیر اوقاف زعیم قادری کو موقع پر پہنچنے کی ہدایت کردی اور آر پی او سرگودھا کی سربراہی میں تحقیقاتی کمیٹی تشکیل دیدی ہے۔ وزیراعلیٰ پنجاب نے انکوائری کمیٹی کو ہدایت کی ہے کہ وہ 24گھنٹے میں اپنی رپورٹ پیش کرے۔ انہوں نے سرگودھا واقعے پر گہرے دکھ اور افسوس کا اظہار کیا۔ شہبازشریف نے انتظامیہ کو ہدایت کی کہ زخمیوں کو بہترین طبی سہولیات فراہم کی جائیںاور ملزمان کو فوراً گرفتار کیا جائے۔ مقامی ذرائع ابلاغ کے مطابق علاقے کے لوگوں کا کہنا ہے کہ عبدالوحید مریدوں کو مشروب پلا کر انھیں مبینہ طور پر عریاں کرتا تھا اور پھر ان پر تشدد کرتے ہوئے کہتا کہ اب وہ بالکل “پاک” ہو گئے ہیں۔ بعدازاں لوگوں کے اترے ہوئے کپڑوں کو مبینہ طور پر آگ لگا دی جاتی تھی۔ پاکستان میں جعلی پیروں اور عاملوں کے ہاتھوں لوگوں پر تشدد کوئی غیرمعمولی بات نہیں لیکن کسی ایک ہی جگہ ایسے مبینہ تشدد سے اتنی تعداد میں ہلاکتوں کا یہ واقعہ غیر معمولی تصور کیا جا رہا ہے۔ آری پی او سرگودھا کا کہنا ہے کہ ملزم عبدالوحید ہر بات کا جواب دے رہا ہے۔ ملزم عبدالوحید کا ذہنی توازن بظاہردرست ہے۔ واقعے کا ہرپہلو سے جائزہ لیں گے ملزم نے اعترافی بیان دیا ہے کہ گدی نشیی کا معاملہ ہے۔ انہوں نے بتایاکہ وزیراعلیٰ نے تحقیقاتی ٹیم بنائی ہے، میں کنوینر ہوں جبکہ فرانزک ٹیم اور ماہرین کو طلب کرلیا گیا ہے۔ آر پی او سرگودھا نے کہا کہ تاحال واقعے کی ایف آئی آر درج نہیں ہوئی۔ ادھر ابتدائی رپورٹ میں بتایا گیا ہے کہ مریدین کو گناہ جھاڑنے کیلیے ڈنڈے سے مارنے اورچپ رہنے کا کہا۔ ملزم نے ساری واردات ایک دن میں نہیں دو دن میں وقفے وقفے سے کی ، پولیس رپورٹ کے مطابق سجادہ نشین نے کہا اگر ٹکڑے بھی کر دوں تو صبح صحیح حالت میں لے آﺅںگا، مریدین سجادہ نشین سے عقیدت میں ڈنڈے کھاتے رہے۔ پولیس رپورٹ کے مطابق پہلے جمعے اور ہفتے کی رات تین چار افراد کو مروایا گیا دیگر افراد کو ہفتے اور اتوار کی درمیانی رات مارا گیا۔

تلہ گنگ(نمائندہ خبریں)تحریک انصاف کے سربراہ عمران خان نے کہا ہے کہ پاکستان کا سب سے بڑا مسئلہ کرپشن اور منی لانڈرنگ ہے،خرابی کی جڑ یہ ہی چیزیں ہیں جنہیں قابو کرنا ہوگا،قوم کو خوشخبری سناتا ہوں ملک بدلنے والا ہے۔ کرپشن کا مطلب عوام کا پیسا چوری کرنا ہے ،کرپٹ آدمی کسی بھی پارٹی کا ہو قوم کو اس کے خلاف کھڑا ہونا ہوگا،اقتدار میں آکر قومی بینکوں سے قرضہ معاف کرانا کرپشن ہے ، اقتدار میں آکر حساب لیں گے اتوار کے روز تلہ گنگ میں جلسے سے خطاب کرتے ہو ئے عمران خان کا کہنا تھا کہ کرپشن کا مطلب عوام کا پیسا چوری کرنا ہے ،کرپٹ آدمی کسی بھی پارٹی کا ہو قوم کو اس کے خلاف کھڑا ہونا ہوگااقتدار میں آکر قومی بینکوں سے قرضہ معاف کرانا کرپشن ہے ، اقتدار میں آکر چوروں لوٹیروں سےحساب لیں گے۔کپتان نے کہا کہ خوشخبری سناتا ہوں ملک بدلنے والا ہے تحریک انصاف پورے ملک میں پھیل چکی ہے جبکہ دیگر جماعتیں صوبوں تک محدود ہیں ،پاکستان کی ترقی کی دنیا میں مثالیں دی جاتی تھیںلیکن کرپشنقرضے معاف کرانا اور منی لانڈرنگ جیسے معاملات نے نہ صرف اس ملک کی ترقی روکی بلکہ اسے پیچھے دھکیل دیا،بدقسمتی ہے اللہ نے جتنے وسائل دیئے ہم نے اس کا فائدہ نہیں اٹھایاگیااورآج کی صورت حال ہمارے سامنے ہے۔ عمران خان نے کہا کہ المیہ یہ ہے کہ شرجیل میمن نے5 ارب کی کرپشن کی لیکن جب وہ واپس ملک آیا تو اسے ہار ڈالے گئے، ڈاکٹر عاصم پر460ارب روپے کی کرپشن کا الزام ہے اور مجھے افسوس ہوتا ہے کہ خیبر پختون خوا کا پورا بجٹ ہی 113ارب روپے کا ہے،کرپٹ آدمی کسی بھی پارٹی کا ہو قوم کو اس کے خلاف کھڑا ہونا ہوگا۔آئی جی سندھ اے ڈی خواجہ کے معاملے پر عمران نے کہا کہ پولیس اس وقت ٹھیک ہو گی جب میرٹ پر ٹھیک آئی جی لگے گا سندھ کا آئی جی اس لیے بدلا گیا کہ وہ غلط کام نہیں کرنے دے رہاتھا، پولیس اس وقت ٹھیک ہو گی جب سیاسی مداخلت روکی جائے گی۔خیبر پختونخوا کی پولیس کو ٹھیک کیا، سیاسی مداخلت ختم کی، ایماندار آئی جی لگایا اس نے پولیس کوٹھیک کیا،جوخیبر پختونخوا میں جزا اور سزا کا قانون آیا وہی قانون پورے پاکستان میں لائیں گے۔ چیئرمین تحریک انصاف نے کہا ہے کہ بھارتی وزیر اعظم کرپٹ نہیں بلکہ کرپشن کا مقابلہ کر رہا ہے۔ ہم کرپشن کا مقابلہ کیے بغیر آگے نہیں بڑھ سکتے ان کا کہنا تھا کہ ملک کا مستقبل بچانے کے لیے قوم کو کرپشن کیخلاف اکٹھا ہونا ہو گا۔ انہوں نے کہا کہ نقل مارنے کے لیے بھی عقل چاہیے۔ جب نواز شریف سے پیسوں کے بارے میں سوال کیا گیا تو انہوں نے کہا کہ پیسہ قطری نے دیا۔ اب ہم سابق صدر آصف علی زرداری سے بھی پوچھیں گے کہ سرے محل کہاں سے آیا؟ ان سے کہتا ہوں کہ وہ بھی کسی قطری شہزادے کو پکڑ لیں کیونکہ انھیں بھی ضرورت پڑے گی۔ ان کا کہنا تھا کہ ڈاکٹر عاصم پر 460 ارب روپے کی کرپشن کا الزام ہے جبکہ خیبر پختونخوا کا سارا بجٹ 113 ارب روپے کا ہے۔ شرجیل میمن نے 5 ارب روپے کی کرپشن کی لیکن پاکستان ایسے واپس آیا جیسے ورلڈ کپ جیت کر آیا ہو۔ پاکستان واپسی پر اس کے گلے میں پھولوں کے ہار ڈالے گئے۔ان کا کہنا تھا کہ بھارتی وزیر اعظم نریندر مودی کرپٹ نہیں بلکہ کرپشن کا مقابلہ کر رہا ہے۔ مودی کا بیرون ملک کوئی بزنس نہیں ہے۔ جبکہ دوسری جانب جس کا سب کچھ بیرون ملک ہو وہ پاکستان کیساتھ وفادار نہیں ہو سکتا۔ نواز شریف کا سرمایہ بیرون ملک ہے لیکن وہ دوسروں کو ملک میں سرمایہ کاری کا کہتے ہیں۔عمران خان نے کہا کہ پاکستان تحریک انصاف ایک صوبے کی نہیں بلکہ پورے ملک کی جماعت ہے۔ اکیس سال قبل صرف میانوالی کی ایک سیٹ سے جدوجہد کرنے والی تحریک انصاف پورے ملک میں پھیل چکی ہے۔ باقی ساری جماعتیں سکڑ کر صوبوں تک محدود ہو گئی ہیں۔ عمران خان نے کہا کہ ہم نے 21 سال ملک کو بدلنے کی جدوجہد کی، انشا اللہ ہمارا ملک بدلنے والا ہے، وہ اب وہ وقت زیادہ دور نہیں ہے۔ تحریک انصاف ملک کی واحد جماعت ہے جو پاکستان کے مسئلے حل کرے گی۔ اپنی جدوجہد سے ملک کی تقدیر بدلیں گے۔چیئرمین تحریک انصاف کا کہنا تھا کہ خیبر پختونخوا میں کئی اداروں میں تبدیلی لا چکے ہیں۔ عمران خان نے کہا کہ مسلمان ممالک میں شیعہ سنی کی لڑائی کروائی جارہی ہے بیرونی طاقتوں نے عراق‘ ایران اور عراق کویت کو آپس میں لڑوایا‘ اب وہی طاقتیں ایران اور سعودی عرب کو لڑوانے کی کوشش کررہی ہیں ہمیں مسلمانوں کو اکٹھا کرنے کی ضرورت ہے ۔ انہوں نے کہا کہ پانامہ فیصلے کا سب کی طرح مجھے بھی جلدی سے انتظار ہے‘ نواز شریف ہمیشہ اپنا ایمپائر رکھ کر الیکشن لڑتے ہیں۔ نیوٹرل ایمپائر پہلی بار آپ کا کپتان لایا ہے انہوں نے کہا کہ 21 سال کی جدوجہد سے ملک کو بدلنے کی کوشش کی قوم کو خوشخبری دیتا ہوں ملک بدلنے والا ہے ۔ آج پاکستان میں اڑھائی بچے گندے پانی کی وجہ سے مرتے ہیں ہمارا ملک آج ایسا ہے تو ضروری نہیں کہ ایسا ہی رہے گا ہم اسے بدلیں گے۔ چیئرمین تحریک انصاف نے کہا کہ عام آدمی کو سکول چاہئیں اور ہسپتال چاہئیں۔ کے پی کے میں غیر حاضر رہنے والے اساتذہ اور وہ اساتذہ جو اچھا نتیجہ نہیں دے سکے ہیں ان کو جرمانہ کیا ہے اور پہلی بار ناقص کارکردگی دینے والے اساتذہ کے 19 کروڑ کاٹے ہیں جن مین سے 18 کروڑ ان اساتذہ کو دیے ہیں جنہوں نے محنت کی ہے۔ کے پی کے میں سزا اور جزا کا سلسہ شروع کر رکھا ہے۔ انہوں نے کہا کہ اقتدار میں آکر ذاتی فائدہ لینے والے کرپٹ ہیں۔ ملک کا سب سے بڑامسئلہ کرپشن ہے اقتدار میں آکر اگر نواز شریف کی طرح ایک فیکٹری سے تین فیکٹریاں بنالی جائیں تو یہ کرپشن ہے۔ پاکستان تحریک انصاف کے سربراہ عمران خان نے کہا ہے کہ پاکستان کا سب سے بڑا مسئلہ کرپشن ہے‘ نواز شریف کا پانامہ کیس کرپشن اور منی لانڈرنگ ہے ‘ اقتدار میں آ کر نواز شریف کی طرح ایک فیکٹری سے 30 فیکٹریاں بنانا کرپشن ہے‘5 ارب کی کرپشن کرنے والے شرجیل میمن کو وطن واپسی پر ہار پہنائے گئے ‘ آصف زرداری سے پوچھیں گے کہ سرے محل کہاں سے آیا ‘آصف زرداری آپ بھی کسی قطری شہزادے کو پکڑ لو کیونکہ آپ کو بھی قطری کی ضرورت پڑے گی‘ حکمران خود باہر جا کر سرمایہ کاری کر رہے ہیں اور باہر جا کر کہتے ہیں کہ پاکستان میں سرمایہ کاری کریں‘ تب تک اس ملک میں سرمایہ کاری نہیں آئے گی جب تک اس ملک میں کرپشن ختم نہیں ہو گی،

کراچی(ویب ڈیسک ) سندھ ہائی کورٹ نے اللہ ڈنوخواجہ کو آئی جی کے عہدے پر بحال کرتے ہوئے سردار عبدالمجید کو فوری عہدہ چھوڑنے کا حکم دے دیا ہے۔جسٹس منیب اختر کی سربراہی میں سندھ ہائی کورٹ کے دو رکنی بینچ نے آئی جی سندھ اے ڈی خواجہ کو جبری طور پر ہٹانے پر توہین عدالت کی درخواست کی سماعت کی، درخواست گزار کے وکیل فیصل صدیقی نے موقف اختیارکیا کہ اے ڈی خواجہ کا تقرر مارچ 2016 میں پولیس ایکٹ کے تحت کیا گیا تھا،اس سے قبل بھی اے ڈی خواجہ کو جبری طور پر ہٹایا گیا تھا جس پر سندھ ہائی کورٹ نے حکم امتناع جاری کیا تھا، عدالتی حکم کے باوجود آئی جی سندھ اے ڈی خواجہ کو ایک بار پھر ہٹایا گیا جو کہ توہین عدالت ہے۔سندھ ہائی کورٹ نے آئی جی سندھ اے ڈی خواجہ کو عہدے سے ہٹانے کا نوٹی فکیشن معطل کرتے ہوئے سردار عبدالمجید کو چارج اے ڈی خواجہ کو فوری واپس کرنے کا حکم دے دیا۔ جسٹس منیب اختر نے ریمارکس دیئے کہ آئی جی کے عہدے کے لئے آل پاکستان پولیس سروس سے افسران کی خدمات لی جاتی ہیں،سپریم کورٹ فیصلہ دے چکی ہے کہ آئینی فیصلے کابینہ کے ذریعے کئے جائیں گے

لاہور (حسنین اخلاق) باخبر ذرائع نے ”خبریں“ کو بتایا ہے کہ جنرل (ر) راحیل شریف نے سعودیہ عرب کی حکومت کو مشورہ دیا ہے کہ عرب لیگ جیسے علاقائی فورم کی بجائے او آئی سی کو فعال کرنے کی طرف توجہ مبذول کی جائے جس کے پلیٹ فارم پر تمام اسلامی ملک موجود ہیں تاکہ مستقبل میں ممکنہ طور پر بنایا جانے والا اسلامی اتحاد جس کے زیراہتمام کم از کم پانچ لاکھ مکمل طور پر تربیت یافتہ فوجیوں پر مشتمل فوج کو فوری طور پر تیار کیے جانے کے لیے عسکری امور سرانجام دئیے جاسکیں ۔جنرل(ر) راحیل شریف کا موقف ہے کہ عرب لیگ کو اہمیت دینے سے پہلے بھی سعودیہ عرب کو اسلامی دنیا میں تنہائی کا سامنا کرنا پڑا ہے اور اب بھی اگر سعودی حکومت اس فورم پر توجہ مبذول رکھتی ہے تو اس سے ایک بار پھر دہشت گردی سے لڑنے کے لیے تشکیل دیا جانے والے مذکورہ اسلامی اتحاد کو نقصان پہنچ سکتا ہے کیونکہ او آئی سی میں سب اسلامی ممالک موجود ہیں اور اس تنظیم کو بین الاقوامی قبولیت بھی حاصل ہے اور اگر کسی ملک میں اس حوالے سے کاروائی کے لیے اگر کسی قانونی اقدام کی ضرورت پڑتی ہے تو عرب لیگ یہ قانونی تحفظ فراہم نہیں کرسکتی ہے ۔دوسری جانب ذرائع نے یہ بھی انکشاف کیا ہے کہ اسلامی اتحاد کے لیے تربیت کا کام خیلج عرب میں شروع کیا جاچکا ہے اور اس کا تربیت یافتہ پہلا دستہ اس برس کے آخر تک اپنی ٹریننگ مکمل کرلے گا تربیت کے لیے منتخب افراد میں پہلی فوقیت سپیشل سروسز گروپس سے ریٹائرڈ سابق فوجیوں کو دی جائے گی جو کہ خطہ عرب کو ذہن میں رکھ کر تخلیق کیے گئے سپیشل گیئرز استعمال کریں گے اور یہ فوجی باقاعدہ فوج کی بجائے ٹارگٹڈ کاروائیاں اور آپریشن کریں گے جبکہ باقی ماندہ فوج کوفی الحال اتحاد میں شامل یا جنگ سے متاثرہ خلیج عرب کے ممالک میں حساس مقامات پر حفاظت کے لیے تعینات کیا جائے گاجن میں بالخصوص تیل کے کنویں جن پر قبضے کے لیے دہشت گرد گروپ داعش سب سے زیادہ دلچسپی لیتے ہیں اور اسی وجہ سے عالمی مارکیٹ میں معدنی تیل کی غیرقانونی ترسیل بھی جاری ہے اور اسی رقم کو بعد ازاں دہشت گردی میں استعمال کیا جاتا ہے اس کے علاوہ اہم فوجی تنصیبات جیسے کہ راکٹ لانچنگ سائٹس اور ہوائی اڈے شامل ہیں ۔ذرائع نے یہ بھی بتایا کہ جنرل(ر)راحیل شریف نے سعودی حکومت کو یہ بھی مشورہ دیا ہے کہ اسلامی ممالک میںاپنے سفارتی عملے کو بھی متحرک کیا جائے تاکہ اس اتحاد کے لیے ان ممالک میں موجود مخالفت کو کاﺅنٹر کیا جاسکے اور جو حلقے اس حوالے سے اپنے تحفظات رکھتے ہیں انہیں مطمن کیا جاسکے۔ممکنہ طور پر تشکیل دی جانے والے اسلامی اتحاد میں بڑی تعداد میں پاکستان کے قبائلی علاقوں سے تعلق رکھنے والے افراد کو بھی بھرتی کیا جائے گا جس کے لیے پہلی ترجیح سعودیہ میں موجود افراد کو دی جائے گی۔

لاہور (مانیٹرنگ ڈیسک) سرگودھا کی ایک درگاہ کے گدی نشین نے اپنے ساتھیوں سمیت خنجروں اور ڈنڈوں کے وار کرکے چار خواتین سمیت 20 افراد کو قتل کر دیا۔ گدی نشین عبدالوحید سمیت 8افراد گرفتار۔ وزیراعلیٰ نے 10گھنٹے میں رپورٹ طلب کرلی ہے۔ تفصیلات کے مطابق سرگودھا کے ڈپٹی کمشنر علی چٹھہ کے مطابق نواحی علاقے 95 شمالی میں قائم درگاہ مینہ طور پر علی محمدگجر کے گدی نشین عبدالوحید نے اپنے ساتھیوں سمیت درگاہ میں موجود چھ خواتین سمیت 22 افراد کو نشہ آور چیز کھلا کر بے ہوش کیا پھر ڈنڈوں اور خنجروں کے وار کیے۔ اس دوران درگاہ سے دو خواتین سمیت تین افراد زخمی حالت میں بھاگ کر ڈی ایچ کیو ہسپتال پہنچ گئے۔ اس واقعہ میں چار خواتین سمیت بیس افراد جاں بحق ہوئے۔ ملزم عبدالوحید نے واردات کا اعتراف کرلیا ہے۔ زخمیوں کے ہسپتال پہنچنے کے بعد اس واقعہ کا علم ہوا۔ ڈپٹی کمشنر لیاقت علی چٹھہ کا کہنا تھا کہ ملزم عبدالوحید کی ذہنی حالت ٹھیک نہیں تھی وہ الیکشن کمیشن سرگودھاکا ملازم بھی ہے۔ واقعہ گدی نشینی کا تنازع معلوم نہیں ہوتا۔ دربار علی گجر دو سال قبل آبادی سے دور تعمیرا ہوا تھا۔ ڈپٹی کمشنر سرگودھا کا مزید کہنا تھا کہ عبدالوحید مردوں کو درگاہ پر درس دیتا تھا اور ان پر تشدد بھی کرتا تھا۔ ملزم سے سرگودھا الیکشن آفس کا کارڈ بھی برآمد ہوا ہے۔ قتل ہونے والے افرادمیں دو کا تعلق اسلام آباد ، ایک میانوالی جبکہ باقی تمام مقامی تھی۔ پولیس نے تمام مقتولین کی نعشیں ریسکیو کے ذریعے ہسپتال پہنچا دی ہیں جہاں ان کا پوسٹمارٹم ہو رہا ہے۔ انچارج ریسکیو کاکہنا تھاکہ جب وہ وہاں پہنچے تو تمام نعشیں برہنہ حالت میں تھیں۔ خنجروں اور ڈنڈوں سے بری طرح مسخ تھیں۔ اکثر کی ٹانگیں اور بازوں کی ہڈیاں ٹوی ہوئی تھیں۔ اس واقعہ میں ہلاک19 میں سے 17 افراد کی شناخت ہو گئی ہے جبکہ دو افراد کا ابھی تک علم نہیں ہوسکا۔ ڈپٹی کمشنر کا مزید کہناتھا کہ ملزم مریدوں کو مارتا اور کہتا کہ تمہارا جسم پاک ہو رہا۔ عبدالوحید مہینے میں ایک بار درگاہ آتا۔ ڈاکٹر امتیاز ڈی ایچ کیو ٹیچنگ ہسپتال کا کہنا تھا کہ تین زخمیوں کی حالت خطرے سے باہر ہے۔ زخمی افراد نے بتایاکہ پہلے انہیں کچھ پینے کے لیے دیا گیا تھا، زخمیوں کے جسموں پر تیز دھار آلے اور ڈنڈوں سے زخمی ہونے کے نشان ہیں۔ وزیراعلیٰ پنجاب میاں شہباز شریف نے واقعہ کا نوٹس لیتے ہوئے رپورٹ طلب کرلی ہے۔