کراچی: (ویب ڈیسک) پاکستان کو آئی ایم ایف کی جانب سے ایک ارب 16 کروڑ ڈالر کی رقم موصول ہو گئی۔
اسٹیٹ بینک نے تصدیق کرتے ہوئے بتایا ہے کہ آئی ایم ایف کی جانب سے پاکستان کو ساتویں اور آٹھویں قسط موصول ہوئی ہے۔
اسٹیٹ بینک کے مطابق اس سے اسٹیٹ بینک کے زرمبادلہ کے ذخائر کو بہتر بنانے میں مدد ملے گی اور کثیر جہتی اور دو طرفہ ذرائع سے دیگر رقوم کی وصولی میں بھی مدد ملے گی۔
آئی ایم ایف کے ایگزیکٹو بورڈ نے گزشتہ دونوں پاکستان کو رقم جاری کرنے کی منظوری دی تھی۔

اسلام آباد: (ویب ڈیسک) سپریم کورٹ نے آئندہ ہفتے کیلئے ججز روسٹر جاری کر دیا۔
اعلامیے کے مطابق آئندہ ہفتے کیلئے ایک تین رکنی جبکہ 2 دو رکنی بینچ تشکیل دیےگئے ہیں۔
چیف جسٹس عمر عطا بندیال کی سربراہی میں جسٹس قاضی فائزعیسیٰ اور جسٹس منصور علی شاہ پر مشتمل تین رکنی بینچ تشکیل دیا گیا ہے۔
دوسرا بینچ جسٹس اعجاز الاحسن اور جسٹس مظاہر علی اکبر جبکہ تیسرا بینچ جسٹس جمال خان مندوخیل اور جسٹس عائشہ ملک پر مشتمل ہو گا۔

اسلام آباد: (ویب ڈیسک) سیلاب سے 24 گھنٹوں میں مزيد 27 افراد زندگى کى بازى ہار گئے جس سے ہلاکتوں کی مجموعی تعداد 1191 ہو گئی، ملک بھر میں 3 لاکھ 72 ہزار سے زائد مکانات تباہ ہوئے جبکہ 5 ہزار کلومیٹر سے زائد سڑکوں کو نقصان پہنچا۔
نیشنل ڈیزاسٹر مینجمنٹ اتھارٹی (این ڈی ایم اے) تازہ ترین رپورٹ کے مطابق گزشتہ 24 گھنٹوں کے دوران سندھ میں 15، خیبر پختونخوا میں 7 ، بلوچستان میں 4 اور پنجاب میں 1 شخص جاں بحق ہوا، بارشوں اور سيلاب سے سندھ میں سب سے زیادہ 422 اموات ريکارڈ ہوئیں، بلوچستان میں 253،خيبرپختونخوا میں 264، پنجاب میں 188، گلگت بلتستان میں 22 جبکہ آزاد کشمیر میں 41 افراد زندگى کى بازى ہار گئے۔، جاں بحق ہونے والوں میں 522 مرد، 246 خواتين اور 399 بچے شامل ہیں۔
این ڈی ایم اے کی رپورٹ میں مزید کہا گیا ہے کہ سیلاب سے مجموعی طور پر ملک کے 80 اضلاع متاثر ہوئے جن میں 3 لاکھ 72 ہزار 823 مکانات تباہ ہوئے جبکہ 5 ہزار کلومیٹر سے زائد سڑکوں کو نقصان پہنچا۔
دوسری جانب بلوچستان میں آج مزید 4 افراد جان کی بازی ہار گئے، صوبے میں جون سے اب تک بارشوں سے 256 افراد جاں بحق ہوئے، جن میں 121 مرد ،61 خواتین اور 73 بچے شامل ہیں، زیادہ تر اموات بلوچستان کے اضلاع کوئٹہ، بولان، ژوب، کیچ، دکی، خضدار، کوہلو، مستونگ، ہرنائی، قلعہ سیف اللہ اور سبی میں ہوئیں۔
مختلف حادثات سے 166 افراد زخمی بھی ہوئے، بارشوں سے 61 ہزار 718 مکانات کو نقصان پہنچا، جن میں سے 17 ہزار 608 مکانات منہدم اور 44 ہزار 110 مکانات کو جزوی نقصان پہنچا، سیلابی صورتحال کی وجہ سے صوبے کے مختلف علاقوں میں 18 پلوں اور 1000 کلو میٹر شاہراہوں کو نقصان پہنچا، 5 لاکھ کے قریب مال مویشی ہلاک ہوئے جبکہ 2 لاکھ ایکر سے زائد رقبے پر فصلوں کو نقصان پہنچا، متاثرہ اضلاع میں پی ڈی ایم اے کی امدادی سرگرمیاں جاری ہیں۔
رپورٹ کے مطابق گزشتہ 24 گھنٹوں میں متاثرہ اضلاع لورالائی، نصیر آباد، جعفر آباد، قلعہ سیف اللہ، پشین اور صحبت پور کے متاثرین میں 1550 ٹینٹ، 350 فوڈ پیکٹس، 900 کمبل، 500 ترپال اور 100 گیس سلنڈر تقسیم کیے گئے۔

اسلام آباد: (ویب ڈیسک) پاکستان میں سیلاب سے ہونیوالے نقصانات پر اظہار افسوس کا اظہار کرنے پر وزیراعظم شہباز شریف نے بھارتی ہم منصب نریندر مودی کا شکریہ ادا کردیا۔
سماجی رابطے کی ویب سائٹ ٹوئٹر پر پیغام جاری کرتے ہوئے وزیراعظم شہباز شریف نے لکھا کہ بھارتی وزیراعظم نریندر مودی نے سیلاب میں جانی ومالی نقصان پر افسوس کا اظہار کیا تھا، پاکستانی عوام اپنے جذبہ ایمانی سے اس قدرتی آفت کے اثرات پر قابو پالیں گے۔
اپنے ٹوئٹ میں انہوں نے مزید لکھا کہ پاکستانی عوام معمولات زندگی اور سماجی سرگرمیاں بحال کرنے میں کامیاب ہوں گے۔

اسلام آباد: (ویب ڈیسک) وفاقی کابینہ نے سیلاب کے باعث پیاز اور ٹماٹر کی درآمد کی اجازت دے دی۔
کابینہ نے سرکولیشن کے ذریعے ٹماٹراور پیاز کی درآمد کی اجازت دی جس کا نوٹیفکیشن جاری کردیا گیا ہے۔
نوٹیفکیشن کے مطابق کابینہ نے موجودہ ہنگامی صورتحال میں ان اشیا کی درآمد پر ٹیکس استثنیٰ دیا ہے۔
کابینہ نے منظوری سیلاب کی صورتحال میں مقامی منڈی میں ان اشیا کی قلت پر قابو پانے کیلئے دی ہے۔

اسلام آباد: (ویب ڈیسک) وزیرخارجہ بلاول بھٹو زرداری نے کہا ہے کہ سیلاب متاثرین کی بحالی کے لیے دن رات کام کرنا ہوگا۔
غیرملکی میڈیا کو انٹرویو دیتے ہوئے انہوں نے کہا کہ سیلاب نے پاکستان میں بڑے رقبے پر تباہی مچائی ہے،مون سون کی بارشوں کا آغاز جون سے ہوا اور اختتام اگست میں ہوا،سیلاب سے سندھ،بلوچستان اور خیبرپختونخوا متاثر ہوئے ہیں۔
ان کا کہنا تھا کہ سندھ کو سیلاب سے بہت زیادہ نقصان پہنچا ہے۔سیلاب میں پھنسے لوگوں کو محفوظ مقامات پر منتقل کیا جا رہا ہے۔سڑکیں پانی میں بہہ جانے سے لوگوں تک پہنچنے میں کچھ مشکلات ہیں۔
انہوں نے کہا کہ عالمی برادری مشکل کی اس گھڑی میں پاکستان کے ساتھ کھڑی ہے۔

اسلام آباد: (ویب ڈیسک) وفاقی حکومت نے سیلاب متاثرین کی امدادی اشیا پر ٹیکس اور ڈیوٹی نہ لگانے کا فیصلہ کرلیا۔
فیڈرل بورڈ آف ریونیو (ایف بی آر) کے مطابق ضروری اشیا کی درآمد پر تمام ٹیکس اور ڈیوٹی کی چھوٹ ہو گی اور تمام اشیا این ڈ ی ایم اے کی تصدیق پر ٹیکس اور ڈیوٹی سے مستثنیٰ ہوں گی۔
ایف بی آر نے بتایا کہ بیرون ممالک سے موصول سامان پر بھی کسٹم ڈیوٹی اور ٹیکس لاگو نہیں ہوں گے۔
ایف بی آر کے مطابق سیلاب سے متاثرہ لوگوں کیلئے بنیادی اشیائے کی فراہمی یقینی بنانے کیلئے اقدام کیا۔