واشنگٹن (ویب ڈیسک)امریکا کی سٹیزن شپ اور امیگریشن سروسز (یو ایس سی آئی ایس) کے افسران کو سوشل میڈیا میں جعلی اکاﺅنٹس کے ذریعے ویزا، گرین کارڈز اور شہریت کے تلاش میں سرگرداں غیر ملکیوں کی نگرانی کی اجازت دے دی گئی۔خبرایجنسی اے پی کی رپورٹ کے مطابق ہوم لینڈ سیکیورٹی ڈپارٹمنٹ نے جولائی 2019 میں پرائیویسی کے حوالے سے عائد پابندی کا جائزہ لینے کے بعد افسران کو جعلی پروفائل بنانے پر عائد پابندی کا فیصلہ واپس کردیا۔یو ایس سی ایس سے جاری بیان میں وضاحت کردی گئی ہے کہ فراڈ یا سیکیورٹی خدشات اور کسی بھی غیر ملکی کو امریکا میں داخلے کی اجازت دینے کے حوالے سے ثبوت حاصل کرنے کے لیے تفتیش کاروں کو جعلی اکاﺅنٹس اور جعلی شناخت سے آسانی ہوگی۔رپورٹ کے مطابق پالیسی میں تبدیلی سے پہلے اسٹیٹ ڈپارٹمنٹ کی جانب سے دیگر اقدامات بھی لیے گئے تھے جس میں امریکا کے ویزے کے حصول کے لیے درخواست دینے والے امیدواروں کو اپنا سوشل میڈیا اکاﺅنٹ میں زیر استعمال نام بھی جمع کرنا لازمی قرار دیا گیا تھا۔امریکی انتظامیہ نے امیگریشن اور امریکا میں داخل ہونے والے غیر ملکیوں پر نظر رکھنے کے لیے اپنی پالیسی میں سختی برتنے کے لیے ایسے اقدمات اٹھائے ہیں۔رپورٹ کے مطابق اس فیصلے سے تاحال یہ واضح نہیں ہے کہ فیس بک اور ٹویٹر میں جعلی سوشل میڈیا اکاﺅنٹس کس طرح فعال ہوں گے کیونکہ یہ دونوں سوشل میڈیا پلیٹ فارمز نے وضاحت کردی ہے کہ کسی طرح کی اصلی نام کے بجائے نقالی کو قواعد کی خلاف ورزی قرار دیا جائے گا۔ٹویٹر اور فیس بک نے حال ہی میں چینی حکومت کی جانب سے جعلی شناخت کے تحت چلائے جانے کے شبہات میں کئی اکاﺅنٹس کو معطل کردیا تھا۔ٹویٹرنے اپنے بیان میں کہا تھا کہ ‘جعلی شناخت اور کسی فرد کی نگرانی کے لیے دستاویزات کا استعمال ہماری پالیسیوں کے خلاف ہے اور ہمیں امید ہے کہ یو ایس سی ایس کے مجوزہ اقدامات ہمارے قواعد کے مطابق ہوں گے ’۔فیس بک نے امریکی انتظامیہ کے تازہ فیصلے کے حوالے سے فوری طور پر کوئی بیان جاری نہیں کیا۔

قندوز (ویب ڈیسک)افغان شہر قندوز میں خودکش دھماکے کے نتیجے میں 10 افراد ہلاک اور متعدد زخمی ہوگئے۔افغان حکام کے مطابق خودکش حملہ آور نے افغان سیکیورٹی فورسز کو نشانہ بنایا، ہلاک ہونے والوں میں قندوز پولیس ترجمان بھی شامل ہیں۔حکام کے مطابق خودکش دھماکے میں قندوز پولیس چیف زخمی ہیں جبکہ حملے کی ذمے داری طالبان نے قبول کرلی ہے۔خیال رہے کہ طالبان نے جمعے کی شب 1:30 بجے کے قریب قندوز پر چار جانب سے حملہ کیا اور متعدد سرکاری عمارتوں پر قبضہ کرلیا۔افغان فورسز طالبان کا حملہ پسپا کرنے کیلئے زمینی و فضائی آپریشن کررہی ہے، جھڑپوں میں 8 افغان فوجیوں کی ہلاکتوں کی اطلاعات سامنے آئی ہیں جبکہ افغان فورسز نے 35 طالبان جنگجوﺅں کی ہلاکت کا دعویٰ کیا ہے۔امریکی نمائندہ خصوصی برائے افغان عمل عمل زلمے خلیل زاد نے قندوز حملے پر ردعمل ظاہر کیا ہے۔ اپنے بیان میں انہوں نے کہا کہ طالبان سے دوحا میں جاری مذاکرات میں قندوز حملے کا معاملہ اٹھایا ہے۔زلمے خلیل نے کہا کہ طالبان کو بتایا کہ قندوز حملے جیسے واقعات رکنے چاہئیں، جنگ اسی صورت میں ختم ہوگی جب تمام فریقین اسے ختم کرنے پر راضی ہوں گے۔انہوں نے کہا کہ سیاسی مفاہمت اور جامع جنگ بندی کیلئے تمام افغانوں کو مذاکرات میں آنا ہوگا۔یاد رہے کہ افغان طالبان اور امریکا کے درمیان امن مذاکرات کا نواں دور قطر کے دارالحکومت دوحا میں جاری ہے جس سے متعلق افغان طالبان نے دعویٰ کیا ہے کہ مذاکرات کامیاب ہوگئے ہیں اور ان کے 98 فیصد مطالبات تسلیم کرلیے گئے ہیں۔

کیرالہ (ویب ڈیسک)بھارتی ریاست کیرالہ کے کالج میں طالب علموں نے پاکستانی پرچم لہرادیا۔میڈیا رپورٹس کے مطابق کیرالہ کے پیرامبرا سلور کالج میں پاکستانی پرچم لہرانے کا واقعہ پیش آیا، شکایت ملنے پر پولیس نے 30 طلبا کیخلاف مقدمہ درج کرلیا ہے۔رپورٹس کے مطابق مسلم اسٹوڈنٹس فرنٹ نامی طلبہ تنظیم سے تعلق رکھنے والے طالب علموں نے کالج الیکشن کے حوالے سے نکالی جانے والی ایک ریلی کے دوران کالج کیمپس کے اندر پاکستانی پرچم لہرایا۔بھارتی میڈیا کے مطابق اس واقعے میں کیرالہ اسٹوڈنٹس یونین بھی شامل ہے اور ان دونوں تنظیموں کو کانگریس کی حمایت حاصل ہے۔پولیس کا کہنا ہے کہ 30 طالب علموں پر تعزیرات ہند کی دفعہ 143، 147، 153 اور 149 کے تحت مقدمہ درج کرلیا گیا ہے۔دوسری جانب مسلم اسٹوڈنٹ فرنٹ کا کہنا ہے کہ ان کا پارٹی پرچم پاکستان کے پرچم سے مشابہہ ہے، پرچم اتنا بڑا تھا کہ آدھا حصہ چھپ گیا اور جو حصہ نظر آیا وہ پاکستانی پرچم سے مشابہہ تھا، حکام نے غلط فہمی کی بنیاد پر طلبا پر کیس درج کیا ہے۔