لاہور بار کے سابق صدر اور سپریم کورٹ کے سینئر وکیل شاہد مقبول شیخ انتقال کر گئے۔
مرحوم کی نماز جنازہ کل بروز جمعرات صبح دس بجے عید گاہ میانی صاحب قبرستان ادا کی جائے گی۔
ان کے پسماندگان میں بیوہ، ایک بیٹا اور چار بیٹیاں شامل ہیں۔
مرحوم گزشتہ کچھ عرصے سے برین ٹیومر کے عارضے کے باعث مقامی ہسپتال میں زیر علاج تھے۔
سپریم کورٹ کے سینئر وکیل شاہد مقبول شیخ 32 سال سے وکالت کے شعبے میں تھے اور 1999 سے 2000 تک لاہور بار کے صدر بھی رہے۔
امریکی ٹینس اسٹار سرینا ولیمز ومبلڈن ٹینس چیمپئن شپ کے پہلے ہی راؤند میں باہر ہو گئیں۔
سرینا ولیمز ومبلڈن کے پہلے راؤنڈ کے میچ کے دوران انجری کا شکار ہو گئیں جس کے باعث انہیں میچ ادھورا چھوڑنا پڑ گیا۔
سرینا ولیمز اس وقت انجری کا شکار ہوئیں جب پہلے سیٹ میں مقابلہ تین، تین سے برابر تھا۔
امریکی ٹینس اسٹار ومبلڈن کے پہلے ہی راؤنڈ میں باہر ہونے پر رو پڑیں اور ان کا کہنا تھا کہ میرا دل ٹوٹ گیا ہے، دائیں ٹانگ میں انجری کے باعث مجھے باہر ہونا پڑا۔
یاد رہے کہ 20 برسوں میں یہ پہلا موقع ہے کہ سرینا ولیمز چیمپئن شپ کے پہلے راؤنڈ سے آگے نہ جا سکیں۔
اسلام آباد: وزیراعظم عمران خان نے امریکا کو واضح اور دوٹوک پیغام دیتے ہوئے کہا ہے کہ ہم امن میں تو امریکا کے شراکت دار بن سکتے ہیں لیکن اب کسی بھی تنازع کا حصہ نہیں بنیں گے۔
وزیراعظم عمران خان نے یہ دبنگ بیان قومی اسمبلی کے اجلاس میں اپنے پرجوش خطاب میں دیا۔ انہوں نے اپنے خطاب میں پوری قوم کے جذبات کی ترجمانی کرتے ہوئے کہا کہ مجھ سے پوچھا گیا کہ کیا پاکستان امریکا کو اڈے دے گا؟ میں ان سے کہنا چاہتا ہوں کہ 70 ہزار لوگ جنگ میں ہمارے مارے گئے، کیا امریکا نے اس قربانی کی کبھی تعریف کی، اس نے تو الٹا ہم پر دوغلے پن کا الزام لگا دیا اور ہمیں برا بھلا کہا۔ ہم اب کبھی خوف سے قومی سلامتی پر کمپرومائز نہیں کریں گے۔
انہوں نے کہا کہ افغانستان سے افواج کے انخلا کا مشکل وقت آ رہا ہے، شکر ہے امریکا کو سمجھ آ گئی ہے کہ افغانستان کا مسئلہ جنگ سے نہیں بلکہ بات چیت سے حل ہوگا۔ ہم افغانوں کو جانتے ہیں، وہ ہمارے بھائی ہیں، ہمیں ان کی تاریخ کا پتا ہے، افغانستان نے کبھی دوسروں کی مداخلت کو قبول نہیں کیا۔
انہوں نے ماضی میں قومی سلامتی کیلئے کئے گئے فیصلوں پر دوبارہ عوام کو یاد دلاتے ہوئے کہا کہ جب اپوزیشن میں تھا تو پاکستان نے امریکا کی جنگ میں حصہ لیا، مجھے اس وقت بڑی ذلت ہوئی، اس وقت میری ایک سیٹ تھی لیکن ہمیشہ کہتا تھا کہ افغان جنگ سے ہمارا کیا تعلق ہے؟ غیرت کے بغیر کوئی انسان بڑا کام نہیں کر سکتا نہ کوئی ملک اٹھ سکتا ہے، افغان جنگ میں حصہ لے کر حماقت کی گئی لیکن اس وقت کہا گیا کہ امریکا بڑا ناراض اورمدد کرنی چاہیے۔ پاکستان نے امریکا کی مدد کی لیکن الٹا ہمیں دنیا کا خطرناک ملک قرار دیا گیا، اس کے بعد جو امریکا کہتا رہا پاکستان کرتا گیا، مشرف نے اپنی کتاب میں لکھا کہ اپنے لوگوں کو پیسے لے کر امریکیوں کو پکڑوائے۔
ان کا کہنا تھا کہ ڈرون حملوں بارے حکومت نے جھوٹ بولا، حکومت اجازت دے کر ڈرون حملوں کی مذمت کرتی تھی، امریکی سینیٹر نے ایڈمرل مولن نے کارل لیون کو کہا کہ پاکستان حکومت کی اجازت سے ڈرون حملے کرتے ہیں، ایڈمرل نے کہا کہ پاکستان کی حکومت اپنی عوام سے سچ نہیں بولتی۔
وزیراعظم نے کہا کہ ہم نے اپنے آپ کو خود ذلیل کیا، دوسروں نے نہیں، دنیا میں کوئی مثال بتا دیں، ہم امریکا کی جنگ میں ساتھ دے رہے تھے لیکن وہ ہمارے ہی ملک میں ڈرون حملے کر رہا تھا۔
ان کا کہنا تھا کہ القاعدہ قبائلی علاقوں میں آ گئی تو ہمیں کہا گیا کہ اپنی فوج بھیجو، امریکا ڈرون حملے کرتا تھا تو ہمارے لوگ مارے جاتے تھے، میں اس وقت تنقید کرتا تھا تو مجھے طالبان خان کہا جاتا تھا۔ انہوں نے کہا کہ 30 سال سے ہمارا ایک دہشتگرد لندن میں بیٹھا ہے، کیا ہم اس پر ڈرون حملہ کر سکتے ہیں؟ کیا برطانیہ ہمیں ڈرون حملے کی اجازت دے گا؟ اگر وہ اجازت نہیں دیں گے تو ہم نے پاکستان میں ایسا کرنے کی اجازت کیوں دی؟
اپنے خطاب میں وزیراعظم عمران خان نے تمام اپوزیشن جماعتوں کو انتخابی اصلاحات پر مذاکرات کی دعوت دیتے ہوئے کہا کہ آئندہ دھاندلی کے الزامات کو روکنے کیلئے ہمیں آج یہ اقدام اٹھانا ہوگا۔
سی ای او /ایم ڈی جنرل ٹائر، حسین قلی خان لانچ کے وقت خطاب کرتے ہوئے
دوران سفر جہاں گاڑی کے تمام پارٹس کا بہترین اور کارآمد حالت میں ہونا ضروری ہے وہیں گاڑی کے ٹائرز اس میں کلیدی کردار ادا کرتے ہیں۔ اسی اہمیت کو مد نظر رکھتے ہوئے ان کی تیاری میں مضبوطی، بریکنگ اور روڈ گرپ کا خاص خیال رکھا جاتا ہے۔جنرل ٹائر پاکستان میں تقریباََ تمام اقسام کی گاڑیوں کے ٹائرز بنانے والی سب سے بڑی کمپنی ہے، جو پاکستان میں تیار ہونے والی گاڑیوں، ٹرک، بس اور ٹریکٹرمیں استعمال ہونے والے ٹائرزکی 80فیصدطلب پوری کرتا ہے۔
ویڈیو: TVC کلپ
پاکستان آٹو موٹیو فیکچررز ایسو سی ایشن (PAMA)کی جانب سے جاری کردہ اعداد و شمار کے مطابق، سال 2020 میں پاکستان میں فروخت ہونے والی گاڑیوں کی تعداد 124,000 تھی۔ دراصل یہ ایک ایسا کاروبار ہے جس میں ہر برانڈ ایک دوسرے آگے بڑھنے اور سبقت لے جانے کے لیے مسلسل محنت کرتا ہے۔جنرل ٹائر نے بھی 50 سال سے زائد عرصے اپنی معیار ی پراڈکٹس کے ذریعے نہ صرف کسٹمرز کا اعتماد حاصل کیا ہے بلکہ اپنی اعلیٰ کوالٹی اور بہترین ساکھ کی روایات کو برقرار رکھتے ہوئے آج بھی اسے مزید بہتر بنانے میں مصروف عمل ہے۔
تصویر: جنرل ٹائر کی جانب سے سال1964 میں تیارکئے جانے والا پہلا ٹائر۔
جنرل ٹائرکمپنی کی بنیاد سال 1963 میں رکھی گئی اورآغازمیں اس کی سالانہ پیداواری صلاحیت 120,000 یونٹس تھی جو سال 1985 میں نئے پلانٹ کی تنصیب سے بڑھ کر سالانہ 600,000 ٹائرز تک پہنچ گئی۔ ہرگزرتے دن کے ساتھ اس ادارے نے گاڑیوں کی مختلف اقسام کے ٹائرز تیار کئے اور اپنے اعلیٰ معیار کی وجہ سے یہ اپنے کسٹمرز کا اعتماد جیت کر دنیا کی بہترین ٹائرز بنانے والی کمپنی کی فہرست میں شامل ہوگئی۔ سال 1987میں جنرل ٹائرز نے پاک سوزوکی موٹر کمپنی کو ٹائرز کی فراہمی شروع کی۔
تصویر: 1980میں جنرل ٹائر کی جانب سے تیار کیا گیا فارمولا III ریسنگ کار ٹائر
جنرل ٹائر اس وقت پاکستان بھر میں آٹو مینوفیکچرنگ سے وابستہ تمام برانڈز کو ٹائرز فراہم کررہا ہے۔گاڑیاں تیار کرنے والی ان برانڈز میں سے زیادہ تر کمپنیز اپنے بنیادی اداروں سے منسلک ہیں جہاں ترجیحی بنیاد وں پر نہ صرف پراڈکٹ کے معیار کو جانچا جاتا ہے بلکہ ان کی جانب سے تیار کی جانے والی گاڑیوں میں کسی بھی پارٹ کی تنصیب سے پہلے اس کے خام مال سے لے کر اس کی تیاری تک کے تمام مراحل کے معیار کو یقینی بنایا جاتا ہے۔جنرل ٹائر، پاکستان میں ٹائرزبنانے والا وہ واحد ادارہ ہے جو بین الاقوامی سطح پر طے شدہ معیارپر مکمل طور پر پورا اترتا ہے۔جنرل ٹائرنے سال 2005 میں ISO 9001،سال 2018 میں ISO 14001 اوراسی سالISO 45001 سرٹیفیکیشنز حاصل کیں۔ادارے کی موجودہ پیداواری صلاحیت 4.1 ملین یونٹس سالانہ ہے۔اس کے علاوہ جنرل ٹائرز نے برطانیہ اور سوئیڈن کو فارمولا III ریسنگ کار (FAST) کے لیے ٹائرز بھی برآمد کئے۔
جنرل ٹائر کی ترقی کا سفر یہیں نہیں رکا بلکہ کمپنی نے ترقی کی نئی منازل طے کرنے کے لیے اہم اسٹیک ہولڈرز کے ساتھ شراکت داری کی۔ ادارے کے ساتھ شراکت داری کے اس عمل میں ڈیلرز سے ڈسٹری بیوٹرز، سپلائرز سے مینوفیکچررز اور پارٹنرز شامل رہے جنہوں نے اپنے اپنے شعبوں میں بہترین صلاحیتوں کا مظاہر ہ کیا اور ادارے کی ترقی میں شراکت داربنے۔
جنرل ٹائراپنی اعلیٰ معیار کی پراڈکٹس کی فراہمی اور کسٹمرز کے اسی بھروسے کے ساتھ ترقی کے اس سفر کو آگے بڑھاتے ہوئے مارکیٹ میں اپنی مستحکم لیڈر شپ کے لیے ایک نئی شناخت کے ساتھ خود کو متعارف کرارہا ہے۔
جنرل ٹائر اینڈ ربر کمپنی پاکستان کے سی ای او/ایم ڈی، حسین قلی خان کے مطابقGTR ہمیشہ سے ہی جدید ٹیکنالوجی پر مبنی اور اعلیٰ ترین معیار کی پراڈکٹس تیارکرنے میں سرفہرست رہا ہے۔اس کے تیار کردہ ٹائر ہر لحاظ سے جانچ کے سخت ترین عمل سے گزرکر عالمی معیار کے عین مطابق تیار کئے جاتے ہیں اور اب اس نئی شناخت کے ساتھ ادارہ پر عزم انداز میں ترقی کی نئی منزلوں کی جانب رواں دواں ہے۔
تصویر: GTR کا نیا لوگو
جنرل ٹائرکے تیار کردہ ٹائر ز کی اعلیٰ کارکردگی کو یقینی بنانے کے لیے اسے مقامی اور بین الاقوامی سطح پر کوالٹی کنٹرول کے مختلف مراحل سے گزارا جاتا ہے۔ تاکہ انہیں عالمی معیار کے عین مطابق نہ صرف تیار کیا جاسکے بلکہ پاکستان کے اندر اور باہر موجود گاڑیاں بنانے والی بین الاقوامی کمپنیز کو فراہم بھی کیا جاسکے۔
پاکستان کی سڑکوں کی خراب حالت سے کون واقف نہیں ہے۔ گاڑی میں کراچی سے شمالی علاقہ جات تک سفر کے دوران ہمیں ہر طرح کی سڑک اور زمین کا سامنا کرنا پڑتا ہے اور ان سڑکوں اور ریتیلی اور پتھریلی زمینوں پر گاڑی کے ذریعے سفر کے لیے ٹائرز کا مضبوط اور دباؤ برداشت کرنے کی صلاحیت کا حامل ہونا ضروری ہے۔پاکستان کی سڑکوں پر لگی ہوئی بڑی بڑی کیٹ آئنزبھی ٹائروں کی خرابی کا باعث بنتی ہیں۔جنرل ٹائرز، پاکستان میں موجود ان سڑکوں کو ذہن میں رکھتے ہوئے، عالمی معیارکے عین مطابق ٹائر تیار کرتا ہے۔
جنرل ٹائر ز میں موجود جانچ کا سخت ترین نظام جہاں اس کی تیار کردہ پراڈکٹس کے اعلیٰ معیار کو برقرار رکھتا ہے، وہیں ادارے کی جانب سے ٹائر ز کی تیاری کے لیے خام مال بھی میعار پر کسی بھی قسم کا بغیر کسی سمجھوتے کے انتہائی مستند اداروں سے درآمد کیا جاتا ہے۔یہی وجہ ہے کہ ملک بھر میں مختلف قسم کی گاڑیاں تیار کرنے والے ادارے اپنی گاڑیوں میں جنرل ٹائر ز کے استعمال کو ترجیح دیتے ہیں۔
جنرل ٹائرز کی تیار کردہ پراڈکٹس نے روڈ سیفٹی، بریکنگ اور روڈ گرپ اور اعلیٰ ترین معیار جیسی خصوصیات پر توجہ دیتے ہوئے ملک بھر میں اس صنعت کے طر ز عمل کو یکسر بدل دیا ہے۔
اسلام آباد: وزیراعظم عمران خان نے تمام اپوزیشن جماعتوں کو انتخابی اصلاحات پر مذاکرات کی دعوت دیتے ہوئے کہا ہے کہ آئندہ دھاندلی کے الزامات کو روکنے کیلئے ہمیں آج یہ اقدام اٹھانا ہوگا۔
وزیراعظم عمران خان کا قومی اسمبلی کے اجلاس سے خطاب میں کہنا تھا کہ وقت آ گیا ہے کہ اب سیاسی جماعتیں الیکشن لڑیں تو کسی کو فکر نہ ہو ہمیں دھاندلی سے ہرا دیا جائے گا۔ اگر اب الیکشن ریفارمز نہیں کرینگے تو یہ سلسلہ مستقبل میں بھی چلتا رہے گا۔
ان کا کہنا تھا کہ میں اپوزیشن سے درخواست کرتا ہوں کہ الیکشن پاکستان کا مسئلہ ہے، اپوزیشن کے پاس انتخابی اصلاحات ہیں تو ہم سننے کیلئے تیار ہیں۔
قومی اسمبلی کے اجلاس میں وزیراعظم عمران خان کے متوقع خطاب سے قبل پاکستان پیپلز پارٹی (پی پی پی) کے چیئرمین بلاول بھٹو زرداری اور وزیر خارجہ شاہ محمود قریشی کے درمیان گرما گرمی دیکھنے میں آئی اور ایک دوسرے کے بیان پر جواب دیتے ہوئے سخت جملے استعمال کیے گئے۔
قومی اسمبلی میں خطاب کرتے ہوئے چیئرمین پی پی پی بلاول بھٹو نے کہا کہ اگر حکومت بجٹ پر ووٹنگ میں دھاندلی نہیں کرتی تو دنیا دیکھتی کہ وزیراعظم کے پاس 172 ووٹس بھی نہیں ہیں۔
خیال رہے کہ ایک روز قبل قومی اسمبلی نے نئے مالی سال کے لیے کثرت رائے سے بجٹ منظور کرلیا تھا، اس دوران وزیراعظم صرف 50 منٹ اجلاس میں موجود رہے اور حکومتی اراکین کی تعداد کافی ہونے کے باعث حتمی ووٹ سے قبل ہی ہال سے واپس چلے گئے تھے۔
بلاول بھٹو نے کہا کہ بجٹ پر قوم کے 172 نمائندوں نے ووٹ دے کر اعتماد کا اظہار کیا، اور جب ووٹ کی عزت کی بات آئے تو اپوزیشن اور حکومت دونوں کی جانب سے عزت ملنی چاہیے، یکطرفہ عزت نہیں ہوسکتی۔
پیپلز پارٹی کے چیئرمین بلاول بھٹو زرداری نے قومی اسمبلی کے اسپیکر اسد قیصر کو مخاطب کرکے کہا کہ اگر آپ دھاندلی نہیں کرتے تو وزیر اعظم عمران خان کے پاس فنانس ترمیمی بل کی تحریک کے حق میں 172 ووٹ نہیں تھے۔
بلاول بھٹو نے کہا کہ اگر آپ وقت نہ دیتے تو حکومت کے پاس فنانس ترمیمی بل کی تحریک منظور کرنے کے لیے مطلوبہ تعداد نہ ہوتی لیکن ‘اسپیکر صاحب! آپ نے ہم سے ہمارا حق چھینا ہے’۔
انہوں نے اعتراض اٹھایا کہ ‘اپوزیشن کی ترمیم کو سنے بغیر ہی مسترد کردیا جائے اور وہ بھی ایک غیر منتخب شخص مسترد کردے، حکومت کو ترمیم مسترد کرنے کا جواز پیش کرنا چاہیے تھا’۔
بلاول بھٹو نے اسپیکر قومی اسمبلی کو ایک مرتبہ پھر مخاطب کرکے کہا کہ ‘آپ نے نہ صرف اس مرتبہ بلکہ مختلف مراحل میں پارلیمنٹ کے قواعد کی خلاف ورزی کی ہے اور ہم سمجھتے ہیں کہ یہ بجٹ سیشن ہر پاکستانی کے لیے باعث شرمندگی ہے’۔
انہوں نے کہا کہ رولز کے مطابق اسپیکر قومی اسمبلی اپوزیشن کے چیلنج پر دو مرتبہ وائس آف ووٹ لے سکتا ہے لیکن تیسری مرتبہ تو ووٹوں کی گنتی ہی نہیں کی گئی، یہ جو ووٹ لیے گئے ہیں معاشی تباہی کا باعث بنیں گے۔
بلاول بھٹو زرداری نے کہا کہ اگر آپ گنتی کروا دیتے تو اپوزیشن کے ریکارڈ میں آجاتا اور آخری مرتبہ ووٹ کی گنتی کو چیلنج کرنے کے لیے مجھے اٹھنا تھا لیکن بدقسمتی سے آپ چلے گئے۔
انہوں نے کہا کہ ہمارا کام ہی بجٹ کی مذمت کرنا ہے لیکن آپ نے ہمارے حق کا معمولی سا بھی تحفظ نہیں کیا کیونکہ ہم زیادہ توقع رکھتے ہیں کہ آپ اپنے منصب کے تقدس کو غیر جانبدار رکھیں۔
افغانستان کی صورتحال کے حوالے سے وزیر خارجہ نے بتایا کل اس سلسلے میں اعتماد میں لینے کے لیے پارلیمانی کمیٹی برائے نیشنل سیکیورٹی اور اہم اپوزیشن رہنماؤں کو مدعو کیا گیا ہے جہاں انہیں اعتماد میں لیا جائے گا۔
بلاول بھٹو زرداری کی جانب سے قواعد کی بات کا تذکرہ کرتے ہوئے ان کا کہنا تھا کہ آج اپوزیشن اراکین نے یکے بعد دیگرے اسپیکر کی ذات کو نشانہ بنایا، ان کے طریقہ کار سے اختلاف ہوسکتا ہے جس پر ان کے چیمبر میں ملاقات کی جاتی ہے اسے تضحیک کا نشانہ نہیں بنایا جاتا۔
شاہ محمود قریشی نے چیئرمین پی پی پی کو مخاطب کرتے ہوئے کہا کہ کن پارلیمانی روایات کی بات کرتے ہیں آپ، سندھ میں جہاں آپ کی حکومت ہے وہاں قائد حزب اختلاف کو تقریر کرنے کا موقع نہیں دیا، سندھ کا وزیر خزانہ اختتامی تقریر کیے بغیر رخصت ہوجاتا ہے، کیا سندھ میں اپوزیشن لیڈر کو پبلک اکاونٹس کمیٹ کا چیئرمین بنایا گیا۔
انہوں نے کہا کہ یہاں ہم سے تقاضے کیے جاتے ہیں، جمہوریت کا راگ الاپا جاتا ہے جبکہ سندھ میں قائمہ کمیٹیوں میں اپوزیشن کی نمائندگی ہی نہیں دی گئی۔
ان کا کہنا تھا بجٹ پیش کرنے کے بعد اپوزیشن کو ان کے لیے مختص وقت سے زیادہ بولنے کا موقع دیا گیا جبکہ سندھ میں اپوزیشن کو بولنے کا موقع ہی نہیں دیا جارہا۔
شاہ محمود قریشی نے کہا کہ آپ جو یہاں مطالبے کرتے ہیں بہتر ہوتا کہ ہی بتاتے کہ سندھ میں یہ مثال قائم کی گئی، آئینہ دکھاتے ہیں، دیکھتے نہیں ہیں۔
انہوں نے کہا کہ اپوزیشن نے کٹ موشنز پیش کیے جن پر انہیں بات کرنے کا مکمل موقع دیا گیا اور جواب دیا گیا، ووٹ ہوا اب اس میں شکست ہوگئی تو اسے تسلیم کرلیں یہ بھی پارلیمانی روایت ہے۔
انہوں نے کہا کہ چیئرمین پی پی پی کن پارلیمانی روایات کی بات کرتے ہیں تو روایت تو یہ ہے کہ جب انہیں بات کرنے کا موقع دیا گیا تو بات کا جواب لیں۔
ان کا کہنا تھا کہ یہ کونسی پارلیمانی روایت کی بات کرتے ہیں، اگر آپ سمجھتے ہیں کہ آپ غل غپاڑہ شور شرابا کر کے ہمیں دبا دیں گے تو یہ نہیں ہوگا، اس ایوان کے ماحول کو بگاڑنے کی ابتدا اپوزیشن نے کی اگر وہ عمران خان کو اپنی تقریر کرنے دیتے تو یہ نوبت نہیں آتی۔
انہوں نے خبردار کیا کہ اگر عمران خان کو بات نہ کرنے دی گئی تو نہ بلاول اور نہ ہی شہباز شریف بات کریں گے، میٹھا میٹھا ہپ ہپ کڑوا کڑوا تھو تھو نہیں چلے گا۔
وزیر خارجہ نے کہا کہ اگر آپ روایات پر عمل اور قواعد کی پیروی کرنا چاہتے ہیں تو ہم تیار ہیں لیکن اگر آپ ہمیں دبانا چاہیں گے تو ہم نہیں دبیں گے۔
شاہ محمود قریشی کی تقریر کے بعد بلاول بھٹو نے اسپیکر قومی اسمبلی سے درخواست کی کہ انہیں ذاتی وضاحت کا موقع دیا جائے اور اجازت ملنے پر کہا کہ جہاں جہاں میرا نام لیا گیا ہے میں جواب دوں گا۔
انہوں نے کہا کہ جتنا ہم ملتان کے فاضل رکن کو جانتے ہیں اتنا تو آپ بھی نہیں جانتے، ابھی عمران خان کو معلوم ہوجائے گا کہ یہ کیا چیز ہیں۔
چیئرمین پی پی پی نے کہا کہ انہوں نے بار بار میرا نام لیا لیکن میں انہیں اتنی اہمیت نہیں دیتا کہ ان کا نام لوں اور اگر وہ وزیراعظم کی تقریر کروانا چاہتے تھے تو انہیں چاہیے تھا کہ احترام کے ساتھ میری بات سنتے۔
بلاول بھٹو زرداری نے کہا کہ ہمارے پاس لودھراں سے بہت سی خبریں آرہی ہیں، مجھے بات مکمل کرنےدیں آپ اپنا آرڈر لے کر آئیں ورنہ میں یہاں ہوں عمران خان یہاں آئیں اور تقریر کریں میں دیکھتا ہوں کہ کیسےتقریر کرتے ہیں۔
انہوں نے کہا کہ اراکین کو قواعد کی پاسداری کرنی پڑے گی ورنہ یہ ایوان نہیں چلے گا، فاضل رکن ملتان نے اس پارٹی پر تنقید کی جس نے انہیں وزیر خزانہ، صدر پنجاب بنایا تھا، آپ خان صاحب کو بتائیں کہ اس شخص کو پہچانیں۔
چیئرمین پی پی پی کا کہنا تھا کہ میں انہیں بچپن سے دیکھتے ہوئے آرہا ہوں میں نے انہیں جیے بھٹو کا نعرہ لگاتے ہوئے دیکھا ہے، اپنی وزارت بچانے کے لیے میں نے اس رکن کو ‘اگلی باری پھر زرداری’ کا نعرہ لگاتے دیکھا ہے اور اب آپ دیکھیں گے کہ وہ آپ کے وزیراعظم کے ساتھ کیا کرتے ہیں۔
انہوں نے کہا کہ یہ وہ وزیر خارجہ ہیں جو کشمیر کے سودے میں ملوث ہیں، ایسے وقت میں کہ جب افغانستان سے امریکی انخلا ہورہا ہےتو پاکستان کی اسٹریٹیجک لوکیشن کی وجہ سے ہمارے پر اس کے مرتب ہونے والے اثرات اور ہمارا کردار انتہائی اہمیت کا حامل ہے اور وزیر خارجہ کو یہاں تقریر کرنے کے بجائے وزیراعظم کے لیے امریکی صدر جو بائیڈن کی فون کال کا بندوبست کرنا چاہیے۔
انہوں نے کہا کہ یہ ہمارے ملک کےلیے بے عزتی اور ہمارے لیے شرمندگی کا باعث ہے کہ ہمارا وزیراعظم اتنی اہمیت ہی نہیں رکھتا کہ اسے ایک فون کال کی جائے، وزیر خارجہ کو اپنی آواز سننے کا اتنا شوق ہے کہ وہ اس جماعت اور حکومت کے لیے خطرہ بننے والے ہیں۔
چیئرمین پی پی پی نے کہا کہ فاضل رکن نے جنوبی پنجاب کے اتحاد کے ساتھ پی ٹی آئی کی انتخابی مہم چلائی تھی جس میں صوبہ دینے کا وعدہ کیا تھا، وہ سیکریٹریٹ دے کر اعلان کرچکے ہیں وہ آئندہ مرتبہ انتخابات میں حصہ ہی نہیں لیں گے کیوں کہ نہ وہ صوبہ دے سکیں نہ اپنے علاقے میں چہرہ دکھانے کے قابل ہیں۔
ان کا کہنا تھا کہ صوبہ سندھ سے متعلق بات کی گئی تو اس سے متعلق جو بات ہوتی ہے وہ سندھ اسمبلی میں ہوگی، جب یہاں کے بندروں نے حملہ کرنے کی کوشش کی تو وہاں کے اسپیکر نے کچھ اراکین پر پابندی لگادی لیکن اس کا کوئی فائدہ نہیں کیوں کہ وہ دلچسپی نہیں رکھتے۔
ان کا کہنا تھا کہ جو کارٹونز آپ لے کر ائیں ہیں انہوں نے تاریخ رقم کی ہے ایک کٹھ پتلی نے ایک کٹ موش پیش نہیں کیا گیا جو ان کی سنجیدگی ظاہر کرتا ہے۔
بات کو جاری رکھتے ہوئے بلاول بھٹو زرداری نے کہا کہ میں درخواست کرتا ہوں کہ وزیراعظم کو آئی ایس آئی کو کہنا چاہیے کہ شاہ محمود قریشی کا فون ٹیپ کریں کیوں کہ یہ جب ہمارے وزیر خارجہ تھے تو دنیا میں مہم چلاتے تھے کہ یوسف رضا گیلانی کی جگہ انہیں وزیراعظم بنادیا جائے، اسی وجہ سے انہیں وزارت سے بھی فارغ کیا گیا تھا۔
انہوں نے کہا کہ فاضل رکن نے کہا کہ بجٹ اکثریت سے پاس ہوا وہ جھوٹ بول رہے ہیں جس پر اسپیکر قومی اسمبلی نے وضاحت دیتے ہوئے بتایا کہ بجٹ کو تمام قواعد پر عمل کرتے ہوئے منظور کیا گیا۔
بلاول بھٹو کی بات کے بعد وزیر خارجہ شاہ محمود قریشی نے ایک مرتبہ پھر ایوان میں بات کرتے ہوئے کہا کہ پیپلز پارٹی کے قائد نے کہا کہ یہ مجھے اچھی طرح جانتے ہیں تو میں بھی انہیں اس وقت سے جانتا ہون جب یہ چھوٹے سے تھے۔ ان کا کہنا تھا کہ میں انہیں اس وقت سے جانتا ہوں جب کونے میں کھڑے ہو کو جھڑکیاں کھاتے تھے میں ان کو بھی جانتا ہوں ان کے بابا کو بھی جانتا ہو، یہ مجھے کیا جانتے ہوں گے۔
وزیر خارجہ نے کہا کہ یہ پیپلز پارٹی کی بات کررہے ہیں، آپ بچے کو لکھی ہوئی 2، 4 پرچیاں پکڑا دیتے ہیں اور بچہ آکر آٹو پر آن ہوجاتا ہے، سوئچ آن ہوجاتا ہے آف ہوجاتا ہے ابھی کچھ وقت لگے گا بچے۔
انہوں نے کہا کہ مجھے نہیں معلوم تھا کہ میری ایک تقریر سے بلاول اتنا پریشان ہوجائیں گے،یہ تو ابھی طفلِ مکتب لگتے ہیں ابھی تو بہت سفر طے کرنا ہے، یہ یوسف رضاگیلانی کی بات کررہے ہیں کم از کم انہیں مک مکا سے سینیٹ میں اپوزیشن لیڈر تو نہ بنایا ہوتا۔
شاہ محمود قریشی نے کہا کہ یہ سرکاری ووٹرز ہیں، یوسف رضا گیلانی آج اپوزیشن لیڈر بنے ہوئے ہیں، بلاول اپنے گریبان میں جھانک کر دیکھیں انہیں اپنی اصلیت نظر آجائے گی، انہیں اپنا پتا چل جائے کہ کتنے پانی میں ہیں۔
وزیر خارجہ نے کہا بچہ آج بہت پریشان ہوگیا ہے،میں بچے کی پریشانیوں میں مزید اضافہ نہیں کرنا چاہتا اور کہتا ہوں کہ چلو جانے دیا، پھر کبھی سہی۔
اسلام آباد : شاہد خاقان عباسی نے کہا ہے کہ ایوان کی بدقسمتی ہے 3 سال میں ہاؤس قوانین اور قوائد و ضوابط سے نہیں چلا، ہمارا حق ہے کہ جب بھی ووٹ چیلنج ہوگا گنتی کرائی جائے گی۔
سابق وزیراعظم و رہنما مسلم لیگ نون شاہد خاقان عباسی نے قومی اسمبلی میں اظہار خیال کرتے ہوئے کہا کہ آج خورشیدشاہ، علی وزیر بجٹ اجلاس میں شریک ہیں، کیا یہ اس سے قبل ہاؤس کے ممبر نہیں تھے، خورشید شاہ ہاؤس کے پرانے ترین ممبران میں سے ہیں، جناب اسپیکر ! کیا آپ کو 2 سال خورشید شاہ کی کرسی خالی نظر نہیں آئی ؟ اسپیکر صاحب ! کیا آپ نے پارلیمان کی روایات نہیں پڑھیں ؟ ہم چاہتے ہیں یہ ہاؤس قوانین کے مطابق چلے۔
شاہد خاقان عباسی کا کہنا تھا کہ 3 سال میں یہ ہاؤس آئین کے مطابق نہیں چلا، اپوزیشن لیڈر تقریر نہیں کرسکتے تو شاید قائد ایوان بھی تقریر نہ کرسکیں، ہاؤس کو اس کی روایات کے مطابق چلایا جائے، جس طرح ہاؤس چل رہا ہے یہ پارلیمانی روایات نہیں۔
وٹاوا: ٹھنڈے کینیڈا میں بلا کی غیرمتوقع گرمی سے 84 سالہ ریکارڈ ٹوٹ گیا، درجہ حرارت میں اچانک اور غیرمعمولی اضافہ ہوا، پارہ پہلی بار 49.5 ڈگری سینٹی گریڈ تک پہنچ گیا۔ ہیٹ ویو سے ہلاکتوں کی تعداد 233 سے تجاوز کر گئی۔
اکثر سرد رہنے والے کینیڈا میں شدید گرمی، لوگ جھلس کر رہ گئے۔ ہیٹ ویو سے مرنے والوں کی تعداد میں مسلسل اضافہ ہو رہا ہے۔ حبس اور گھٹن سے دم توڑنے والے افراد میں زیادہ ترمعمر اور بیمار افراد شامل ہیں، گرمی سے کینیڈا کا مغربی علاقہ سب سے زیادہ متاثر ہوا جہاں درجہ حرارت 49.5 ڈگری تک پہنچ گیا۔
حکام کے مطابق برٹش کولمبیا میں 70 سے زائد ہلاکتیں ہوئیں، شدید گرمی کےباعث سب سے زیادہ ہلاکتیں شہر وینکورمیں ہوئیں، وینکور کینیڈا کے سردترین علاقوں میں سے ایک ہے اور اسی لیے لوگوں کے گھروں میں ایئرکنڈیشنر نہیں تھے۔
محکمہ موسمیات کے مطابق درجہ حرارت جمعہ سے بڑھنا شروع ہوا تھا اور مزید کئی روز تک گرمی بڑھنے کا امکان ہے۔
امریکا کے شمال مغربی علاقوں میں بھی گرمی کی لہر شدت اختیار کرتی جا رہی ہے۔ پورٹ لینڈ، اوریگون، سیٹل اور واشنگٹن میں 1940 کے بعد پہلی مرتبہ ریکارڈ درجہ حرارت سامنے آیا۔
عالمی سطح پر گندم کی قیمتوں میں 15 ڈالر فی میٹرک ٹن کمی ہونے سے پاکستان کو 40 لاکھ ٹن گندم کی درآمد میں 9 ارب روپے سے زیادہ کی بچت متوقع ہے۔
بڑی مقدار میں گندم کی درآمد سے ملک میں گندم اور آٹے کی قلت کا خدشہ مکمل ختم ہوگیا ہے جس سے ذخیرہ اندوزوں کو بھاری مالی نقصان ہوگا، تاہم قیمتوں میں اُتار چڑھاؤ کا سلسلہ جاری رہنے کا خدشہ موجود ہے۔
وفاقی وزارت نیشنل فوڈ سیکیورٹی نے گزشتہ روز 40 لاکھ ٹن گندم امپورٹ کرنے کیلیے سرکلر جاری کردیا ہے، 20 لاکھ ٹن گندم ٹریڈنگ کارپوریشن جبکہ 10 لاکھ ٹن وفاقی محکمہ پاسکو امپورٹ کرے گا، نجی شعبہ کو بھی 10 لاکھ ٹن گندم امپورٹ کی اجازت دے دی گئی ہے۔
خیبر پختونخواہ حکومت نے پاسکو سے 10 لاکھ ٹن گندم فراہم کرنے کا مطالبہ کیا ہے جس میں سے 5 لاکھ ٹن امپورٹڈ اور 5 لاکھ ٹن دیسی گندم مہیا کرنے کی درخواست کی گئی ہے۔
پنجاب میں فلورملز کے پاس اس مرتبہ وافر مقدار میں گندم موجود ہونے کے سبب نجی شعبہ کی جانب سے امپورٹ کی جانے والی 10 لاکھ ٹن گندم کی پنجاب میں کھپت نہیں ہوگی ، یہ گندم کراچی کی ملیں خریدیں گی۔
علاوہ ازیں پنجاب حکومت نے سہولت بازاروں میں سستا آٹا فروخت کرنے والی فلورملز کو 1530 روپے فی40 کلوگرام بمعہ باردانہ گندم فروخت کرنے کی اجازت دے دی ہے۔
ہانگ کانگ کے ایک غیرمعروف مال سے آئی ہوئی خبر اور ویڈیو کا ان دنوں بہت چرچا ہے جہاں دنیا کا سب سے بڑا اور اصلی ریوبک کیوب نصب کیا گیا ہے۔ تاہم گھمانے کے لیے خاصی کوشش کی ضرورت ہوتی ہے اور دو سے تین افراد مل کر ایک سائیڈ کو گھماپاتے ہیں۔ اس کی ایک طرف کی لمبائی اور چوڑائی 8 فٹ اور ڈھائی انچ کے برابر ہے۔
اس کی دلچسپ ویڈیو جاری کی گئی ہے جس میں شروع سے ریوبِک کیوب کی تعمیر کو دیکھا جاسکتا ہے۔ قریب ایک درجن سے زائد ماہرین اور انجینیئر نے مل کر اسے ڈیزائن کیا ہے۔ اس کی تیاری میں سب سے بڑا چیلنج تھا کہ مکعب کی تمام افراد آسانی سے گھوم سکیں اور ٹوٹ پھوٹ کی شکار نہ ہوں۔ اس کے لیے اندرونی اور بیرونی مکینزم کو خصوصی طور پر ہلکا پھلکا بنایا گیا ہے۔ ویڈیو کےآخر میں ٹیم کے اراکین اس سے کھیلتے ہوئے دیکھے جاسکتے ہیں۔
اگرچہ یہ ویڈیو 28 مارچ 2021 کی ہے جس میں 2.503 x 2.505 x 2.502 میٹر رقبے کی کیوب کو عملی طور پر دیکھا جاسکتا ہے۔ تاہم اس کی تفصیلات چند روز قبل ہی جاری کی گئی ہیں۔
ویڈیو گنیز بک آف ورلڈ ریکارڈ نے باضابطہ طور پر جاری کی ہے جو اعتراف ہے کہ یہ کیوب اب جسامت میں ایک ریکارڈ قائم کرچکی ہے۔ نینا شاپنگ مال میں نصب اس کیوب کو اب لوگوں کی بڑی تعداد دیکھنے کے لیے آرہی ہے۔ اس سے قبل یہ اعزاز ایک برطانوی انجینیئر کے پاس تھا جس نے اس وقت سب سے بڑا ریوبک کیوب بنایا تھا جس کا رقبہ 6 فٹ سات انچ تھا۔
کراچی: سندھ حکومت کا بڑا فیصلہ، کراچی تجاوزات آپریشن میں گھر سے محروم افراد کو متبادل زمین دی جائے گی۔
تجاوزات کے خلاف آپریشن میں جن کی دکانیں مسمار ہوئیں ان کو بھی متبادل زمین دی جائے گی۔ سندھ حکومت ریٹائرڈ جج کی سربراہی میں انکوائری کمیشن قائم کرے گی۔ کمیشن تجاوزات سے متاثرہ افراد کا جائزہ لیکر متبادل کا فیصلہ کرے گا۔ کمیشن غیرقانونی تعمیرات کی اجازت دینے والے افسران کی نشاندہی کرے گا۔
اپنی ٹوئٹ میں فواد چوہدری نے کہا کہ عدالتی اصلاحات نہ کی گئیں تو ملک اقتصادی بحران سے کبھی باہر نہیں نکل سکے گا، گزشتہ روز ٹک ٹاک پر پابندی لگانے اور نیشنل بینک کے صدر کو ہٹانے کے فیصلے پڑہ کر سر چکرا گیا ہے کہ ہماری عدالتیں کیا کر رہی ہیں ؟ پہلے ہی یہ ملک ایسے جوڈیشل ایکٹوازم کے ہاتھوں اربوں ڈالر کے نقصانات برداشت کر رہا ہے۔
اپنی ایک اور ٹوئٹ میں فواد چوہدری نے کہا کہ کینیڈا میں چندہفتےقبل ایک پاکستانی فیملی کو نسل پرستانہ حملے میں شہید کیا گیا اب دوبارہ ساسکرتون شہر میں ایک اور شہری کاشف پر انتہاپسندوں نے خنجروں سے حملہ کیا ہے، مغربی معاشرے میں اسلاموفوبیا کے بڑھتے واقعات پر تشویش ہے، امید کرتے ہیں کہ ایسے واقعات کے روک تھام کے لئے موثر اقدامات اٹھائے جائیں گے۔
