اسلام آباد: پاکستان تحریک انصاف نے انٹرا پارٹی الیکشن کروانے کا فیصلہ کرلیا۔تحریک انصاف کی جنرل باڈی کا اجلاس ہوا جس میں انٹرا پارٹی الیکشن کی قرارداد منظور کرلی گئی۔ قرارداد پاس ہونے کے بعد سات دن کے اندر اندر انتخابات کروائے جائیں گے۔انتخابات فیڈرل الیکشن کمیشن کی ہدایات کے مطابق اسلام آباد ، کراچی، لاہور سمیت ڈیجیٹلی بھی کروائے جا سکتے ہیں۔اجلاس میں رؤف حسن کو متفقہ طور پر تحریک انصاف کا چیف الیکشن کمشنر مقرر کردیا گیا۔ انٹرا پارٹی انتخابات کے فیصلے تک عمر ایوب پارٹی کے چیف آرگنائزر ہوں گے۔ 31 جنوری 2024 تک پاکستان تحریک انصاف کی رابطہ ایپ پر رجسٹرڈ ممبران ہی الیکشن لڑنے اور ووٹ ڈالنے کے اہل ہوں گے۔پی ٹی آئی کی جانب سے عام انتخابات کے لئے نامزد کردہ امیدوار آزاد نہیں سمجھے جائیں گے بلکہ الیکشن کے بعد بھی پی ٹی آئی کا ہی حصہ ہوں گے۔قرارداد میں مزید کہا گیا کہ عمران خان پی ٹی آئی کے بانی ہیں اور ہمیشہ ہمارے لیڈر رہیں گے۔

اسلام آباد: نیپرا نے عوام پر ایک بار پھر بجلی بم گرا دیا اور قیمت میں 5.62 روپے فی یونٹ مزید اضافہ کرنے کی منظوری دے دی۔بجلی کی قیمت میں 5 روپے 62 پیسے فی یونٹ اضافے کی درخواست پر سماعت چیئرمین وسیم مختار کی سربراہی میں نیپرا ہیڈ آفس میں ہوئی، جس میں دسمبر کی ماہانہ فیول ایڈجسٹمنٹ پر سماعت مکمل ہونے پر نیپرا نے 5.62 روپے فی یونٹ بجلی مہنگی کرنے کی ابتدائی منظوری دے دی۔قیمت میں حالیہ اضافے سے بجلی صارفین پر 49 ارب روپے کا اضافی بوجھ پڑے گا۔ نیشنل الیکٹرک ریگولیٹری اتھارٹی کے مطابق اعداد و شمار کا جائزہ لے کر تفصیلی فیصلہ بعد میں جاری کیا جائے گا۔درخواست کی سماعت کے دوران سی پی پی اے حکام نے بتایا کہ ایف سی اے کی مد میں اضافے کے ساتھ بقایاجات کی مد میں بھی رقم شامل ہے۔ گدو کے 2 ارب 56 کروڑ سے زائد کی انڈیکسشن شامل ہے۔ آر ایل این جی،امپورٹڈ کول اور لوکل کول کی قیمتوں میں استحکام ہے۔ گزشتہ ماہ کے بلوں میں نومبر کا ایف سی اے 4 روپے 13 پیسے لیا گیا۔ دسمبر کے ماہ میں ایف سی اے کی مد میں 5 روپے 56 پیسے کی درخواست ہے، تھرکول سے جو ایورج پیداوار ہے وہ ہو رہی ہے۔ممبر نیپرا نے استفسار کیا کہ سردیوں میں ہائیڈرل کم ہو جاتی ہے باقی پلانٹس کا شیڈول بنایا گیا ؟ ۔ سردیوں میں تو لوگوں پر بوجھ کم ہونے کی توقع ہوتی ہے۔ممبر نیپرا مطہر نیاز رانا نے کہا کہ سب سے کم فیول کاسٹ نیو کلئیر کی ہے۔ ممبر رفیق شیخ نے کہا کہ آپ لوگ مان رہے ہیں کہ فیول پر ریفرنس نہیں بڑھا۔سی پی پی اے حکام نے بتایا کہ آر ایل این کا کمپوننٹ رواں سال آرہا ہے۔ ساؤتھ نارتھ پر مسائل کی وجہ سے بھی امور طے کرنا پڑتے ہیں، جس پر ممبر رفیق شیخ نے کہا کہ ساؤتھ نارتھ پر تو 1970 سے مسائل آ رہے ہیں۔ کب تک ہم لوگ ساؤتھ نارتھ کو دلیل بنا کر پیش کریں گے۔بعد ازاں نیپرا نے بجلی کی قیمت میں اضافے کی ابتدائی منظوری دے دی۔

مالاکنڈ: چیئرمین پیپلز پارٹی بلاول بھٹو کا کہنا ہے کہ پیپلز پارٹی کو کسی الیکشن میں لیول پلیئنگ فیلڈ نہیں ملی اور 2018 کے الیکشن میں پیپلز پارٹی کو انتخابی مہم چلانے نہیں دی گئی۔بٹ خیلہ میں جلسے سے خطاب کرتے ہوئے بلاول بھٹو نے کہا کہ 2018 میں پی ٹی آئی کو دہشت گردوں نے این او سی دیا ہوا تھا، خان صاحب کے تمام مخالف چور تھے لیکن کیا ان کے ساتھ موجود سب فرشتے تھے؟پی پی چیئرمین نے کہا کہ خاں صاحب کو خود توبہ کرنی چاہیے اور جو ہو رہا ہے یہ مکافات عمل ہے۔ پیپلز پارٹی جمہوری جماعت ہے اس لیے بانی پی ٹی آئی کو سزا پر جشن نہیں منا رہی ہے۔بلاول بھٹو نے کہا کہ خیبر پختونخوا میں مسلم لیگ ن اور جمعیت علمائے اسلام دونوں اب تک آپ کے پاس ووٹ مانگنے نہیں آئے لیکن میں آیا ہوں کیونکہ مجھے آپ لوگوں کی فکر ہے۔انہوں نے کہا کہ میاں صاحب کو اپنی بیٹی کے ساتھ انتقام کی سیاست دیکھنا پڑے لیکن کیا ن لیگ والے آج اپنے ووٹ کی عزت کر رہے ہیں۔ پیپلز پارٹی کے علاوہ عوام کی بات کوئی نہیں کرتا۔چیئرمین پی پی نے کہا کہ اگر آپ چاہتے ہو نواز شریف آپ کا چوتھی مرتبہ وزیراعظم نہ بنے تو اس سازش کو ناکام بنائیں اور انتخابات والے روز شیر کے بجائے تیر پر نشان لگائیں۔ تین مرتبہ وزیراعظم بن کر بھی ملک کے حالات نہیں ٹھیک کر سکے تو اب کیا کرنا چاہتے ہیں۔انہوں نے کہا کہ ایسی 17 وزارتیں جو ملکی خزانے پر بوجھ ہیں انہیں کر دوں گا کیونکہ عمران خان اور نواز شریف یہ کام نہیں کر سکے۔ ہم نے سندھ کے ہر ضلع میں مفت علاج کے لیے اسپتال بھی بنائے ہیں، ہم اسی طرح کے اسپتال مالاکنڈ بھی بنائیں گے اور ہیلتھ کارڈ کے نام پر دھوکا نہیں کریں گے۔چیئرمین پی پی نے کہا کہ ہم نے سیاست کو سیاست رکھنا ہے اس کو دشمنی میں تبدیل نہیں کرنا، ان لوگوں کو کہنا چاہتا ہوں ملک اور معیشت کو تباہ نہ کریں۔

خیبر پختون خوا کے ضلع باجوڑ میں پاکستان تحریک انصاف کے نوجوان لیڈر اور قومی و صوبائی نشستوں سے الیکشن میں حصہ لینے والے آزاد امیدوار ریحان زیب خان نامعلوم افراد کی فائرنگ سے جاں بحق ہوگئے۔ڈی پی او باجوڑ کاشف ذوالفقار نے بتایا کہ صدیق آباد پھاٹک بازار مین چوک میں ریحان زیب الیکشن مہم کے سلسلے میں موجود تھے کہ نامعلوم افراد نے ان پر فائرنگ کردی۔ایس ایچ او رشید خان نے واقعے کی تصدیق کرتے ہوئے بتایا کہ ریحان زیب خان این اے 8 اور پی کے 22 سے الیکشن میں حصہ لے رہے تھے۔واقعے کے باعث دونوں نشستوں پر الیکشن ملتوی کردیا جائے گا جس کا باقاعدہ اعلامیہ ریٹرننگ آفیسر جاری کریں گے۔ الیکشن ایکٹ کی شق 73 کے مطابق انتخابی نشانات جاری ہونے کے بعد امیدوار کی موت سے الیکشن ملتوی ہوجاتے ہیں۔

لاہور: پاکستان مسلم لیگ ن کے رہنما میاں شہباز شریف نے کہا ہے کہ پاکستان کو دیوالیہ ہونے سے بچانے کی جنگ میں ہماری مقبولیت کم ہوئی۔ڈیجیٹل میڈیا سے تعلق رکھنے والے افراد سے گفتگو میں سابق وزیراعظم اور پاکستان مسلم لیگ ن کے صدر میاں شہباز شریف کا کہنا تھا کہ 8 فروری کو عوام اپنے ووٹ کی طاقت سے قوم کی تقدیر کا فیصلہ کریں گے۔انہوں نے کہا کہ پی ڈی ایم میں جانے سے ہماری مقبولیت کم نہیں ہوئی، حکومت میں آکر پاکستان کو دیوالیہ ہونے سے بچانے کی خاطر جو ہم نے جہاد کیا، جنگ لڑی، اس سے یقینا ہماری مقبولیت میں کمی ہوئی، اور اگر میں یہ بات نہیں کہوں گا تو یہ حقائق سے آنکھیں چرانے کے مترادف ہے، مگر آج آپ نے خود دیکھا ہے کہ جو تازہ ترین جتنے بھی سروے ہوئے ہیں، ان میں الحمدللہ ن لیگ نواز شریف کی قیادت میں دوبارہ تیزی سے مقبولیت حاصل کررہی ہے۔شہباز شریف کا کہنا تھا کہ اگر ہمیں دوبارہ موقع ملا تو نواز شریف پاکستان کے برے دن بدلنے میں دن رات ایک کردیں گے، ملک کو ترقی کی راہ پر ڈالنے کے لیے کوئی کسر نہیں چھوڑیں گے۔انہوں نے کہا کہ نواز شریف کے دور میں کوئی سیاسی قیدی نہیں تھا اور نہ ہی کسی کو سیاسی بنیاد پر کبھی کوئی نقصان پہنچایا گیا۔لیگی رہنما نے کہا کہ اس وقت پاکستان کو معاشی، معاشرتی اور خارجی چیلنجز کا سامنا ہے۔ قیام پاکستان کے خواب ابھی تک شرمندہ تعبیر نہیں ہو سکے۔ حالات کو درست سمت کی جانب موڑا جائے تو نقصان کا ازالہ ہوگا۔ہم نے ماضی میں بھی زراعت کے میدان میں انقلابی قدم اٹھائے، نوجوان نسل کو کلاشنکوف نہیں بلکہ ان کے ہاتھ میں لیپ ٹاپ دیے گئے ۔ بے روزگار نوجوانوں کو روزگار اسکیموں کے تحت ملازمتوں کے مواقع دیے گئے۔2013 سے 2018 تک کا دور سب کے سامنے ہے۔ اس کے بعد جو کچھ ہوا وہ سب نے دیکھا۔ آر ٹی ایس بٹھانے کے باوجود بھی ہم جیت چکے تھے، مگر پھر سب کو یاد ہوگا کہ رات کو ٹھپے لگائے گئے اور جیت کو شکست میں بدلنے کی بڑی ایک شرمناک سازش کی گئی۔شہباز شریف نے کہا کہ آج جو سب لوگ کہہ رہے ہیں ، اس پر میں کہوں گا کہ یہ سب کچھ ہم نے نہیں کیا، یہ الیکشن کمیشن اور سپریم کورٹ کے فیصلے ہیں۔ سپریم کورٹ کی سماعتیں براہ راست نشر ہوئی ہیں، جس نے پوری قوم نے دیکھا ہے کہ ان سے جو سوالات کیے گئے، اس کے ان کے پاس نہ کوئی ثبوت تھے نہ دستاویزات۔ ایسی بے شمار چیزیں ہیں۔ الیکشن کمیشن کا پورا ایک نظام ہے۔ووٹ کو عزت دو سے متعلق سوال کا جواب دیتے ہوئے شہباز شریف نے کہا کہ ہم اپنے وعدے کے مطابق ایک بار پھر اقتدار میں آکر 20 گھنٹے کی لوڈ شیڈنگ ختم کریں گے اور ماضی میں بھی ہم نے یہی کچھ کیا تھا، جس سے بہتری آئی تھی۔ یہ سب کچھ عوام کی توقعات پوری کرنے سے ہوتا ہے، اور اسی کوووٹ کو عزت دو کہتے ہیں۔انہوں نے کہا کہ اگر میں اسٹیبلشمنٹ کی آنکھ کا تارا ہوتا تو میں نے تو جیلیں بھی کاٹیں، پابندیاں اٹھائیں، نیب کے عقوبت خانے میں بند رہے، اپنے بھائی کے ساتھ جیلوں میں گیا، ہتھکڑیاں لگیں، بکتر بند گاڑیوں میں لائے گئے، کیا یہ سب اسٹیبلشمنٹ کی آنکھ کا تارا ہونے سے ہوتا ہے؟۔انہوں نے کہا کہ ہم نے پنجاب میں بہت اچھا نظام بنا دیا تھا، کرپشن ختم ہو گئی تھی، سرکاری محکموں میں عوام کے کام جلدی ہو جاتے تھے، مگر پھر بدقسمتی سے ایک صاحب آئے اور انہوں نے اس سب کو گالی گلوچ میں بدلنے کی کوشش کی، نوجوان نسل کو بہکانے کے تباہ کن اثرات آج ہمارے سامنے ہیں۔ ہم اقتدار میں آکر پبلک ٹرانسپورٹ میں انقلاب لائیں گے جیسا کہ مسلم لیگ ن نے ماضی میں کیا تھا۔شہباز شریف نے کہا کہ ہماری پارٹی، کارکنوں، رہنماؤں اور اقارب نے جو مشکلات اور قربانیاں برداشت کی ہیں، اس کے بدلے میں ہم صرف یہ ہی چاہتے ہیں کہ انتخابات شفاف ہوں اور ملک کی ترقی کا پہیہ تیزی سے گھومے، تاکہ عوام کی مشکلات دور ہوں،قائداعظم کا خواب شرمندہ تعبیر کرنے کے لیے سب مل کر شبانہ روز کاوشیں کرنا ہوں گی۔