کابل: (ویب ڈیسک) افغانستان کی حکومت نے ماہِ شوال 1443 ہجری کا چاند نظر آنے کا اعلان کرتے ہوئے کل ملک بھر میں عید الفطر منانے کا اعلان کردیا۔
افغان میڈیا رپورٹ کے مطابق افغانستان کے مختلف علاقوں سے ماہِ شوال کے چاند کی شہادات موصول ہوئیں جس کے بعد حکومت نے کل عید الفطر منانے کا اعلان کیا۔
افغان طالبان کے ترجمان ذبیح اللہ مجاہد نے بھی چاند نظر آنے کا اعلان کردیا۔
امارات اسلامیہ افغانستان کے چیف جسٹس اور رویت ہلال کمیٹی کے سربراہ شیخ الحدیث مولوی عبدالحکیم حقانی نے بروز اتوار ملک بھر میں عید الفطر منانے کا اعلان کیا۔
انہوں نے عید الفطر کی آمد پر امت مسلمہ اور افغان قوم کو مبارک باد بھی پیش کی۔

لندن: (ویب ڈیسک) برطانوی اخبار نے دعویٰ کیا ہے کہ روس کے صدر ولادیمیر پیوٹن کی کینسر کی سرجری جلد متوقع ہے اور اس دوران یوکرین جنگ کا اختیار روسی خفیہ ایجنسی کے سابق چیف کو سونپے جانے کا امکان ہے۔
برطانوی اخبار ڈیلی میل کی رپورٹ کے مطابق کریملن کے قریبی ذرائع نے بتایا ہے کہ ولادیمیر پیوٹن کی جلد کینسر کی سرجری متوقع ہے اور چند دنوں کیلئے یوکرین جنگ کے حوالے سے فیصلوں کا اختیار روسی سکیورٹی کونسل کے سربراہ اور خفیہ ایجنسی KGB کے سابق چیف، پیوٹن کے دوست نکولائی پیٹروشیف کو دیا جاسکتا ہے۔
رپورٹ کے مطابق ولادیمیر پیوٹن میں 18 ماہ قبل پیٹ کے کینسر اور دماغی بیماری پارکنسنز کی تشخیص ہوئی تھی جبکہ ان میں شیزوفرینیا کی علامات بھی ہیں۔
ذرائع کا کہنا ہے کہ پیوٹن نے سرجری میں تاخیر کی ہے اور اب سرجری جنگ عظیم دوئم میں روس کی کامیابی کی یاد میں منائے جانے والے وکٹری ڈے کے بعد ہی ممکن ہے۔ وکٹری ڈے 9 مئی کو منایا جاتا ہے۔
ذرائع کا کہنا ہے کہ سرجری اپریل میں ہونی تھی لیکن پیوٹن نے اسے مؤخر کیا لیکن اب ڈاکٹرز کا کہنا ہے کہ مزید تاخیر کرنا خطرناک ہوسکتا ہے۔
خیال رہے کہ روسی صدارتی محل ہمیشہ سے پیوٹن کی خرابی صحت کے حوالےسے خبروں کی تردید کرتا رہا ہے۔
پیوٹن کی جانب سے اختیارات نکولائی پیٹروشیف کو سونپے جانے کی اطلاعات پر ناقدین نے تشویش کا اظہار کیا ہے کیوں کہ آئین کے تحت صدر کی غیر موجودگی میں اختیارات وزیراعظم کے پاس جاتے ہیں۔
کچھ عرصہ قبل یہ خبریں بھی سامنے آئی تھیں کہ ڈاکٹر نے انہیں مغربی ممالک سے منگوائی جانے والی دوائی شروع کرنے کا کہا تھا۔ ڈیلی میل کے مطابق پیوٹن نے جب یہ دوائی کھانا شروع کی تو ان میں شدید سائیڈ افیکٹس دیکھے گئے اور ان کی کمزوری اور چکر میں اضافہ ہوگیا۔
رپورٹس کے مطابق جس ڈاکٹر نے دوائی تجویز کی تھی بعد ازاں اسے پیوٹن کے علاج کے عمل سے فارغ کردیا گیا اور غیر دوست ملک سے امپورٹ کی گئی دوا کی بھی جانچ کی گئی۔
روس کے ایک جلا وطن صحافی نے حال ہی میں دعویٰ کیا ہے کہ پیوٹن کو تھائیرائیڈ کینسر ہے اور ہر وقت بہترین ڈاکٹرز کی ٹیم ان کے ساتھ رہتی ہے۔
حال ہی میں کچھ ویڈیوز بھی سامنے آئی تھیں جن میں پیوٹن کے ہاتھ کو لاشعوری طور پر تھرتھراتے ہوئے دیکھا گیا تھا جس سے انہیں پارکنسنز کی بیماری ہونے کی خبروں کو تقویت ملی تھی۔
ڈیلی میل نے ایک تصویر جاری کی ہے جس میں روسی وزیر دفاع سرگئی شوئیگو کے ساتھ ملاقات میں پیوٹن کو میز کو پکڑ کر بیٹھے ہوئے دیکھا جاسکتا ہے جبکہ اس میٹنگ کی تصویر میں پیوٹن کے چہرے پر سوجن کی بھی نشاندہی کی گئی ہے۔

کیلیفورنیا: (ویب ڈیسک) امریکا کی ریاست کیلیفورنیا کے شہر لیور مور میں 72 سالہ بزرگ شہری کی جان بچانے پر مقامی پولیس نے پاکستانی نوجوان بلال شاہد کو ایوارڈ دینے کا اعلان کیا ہے۔
رپورٹس کے مطابق امریکی شہر لیورمور میں 72 سالہ شہری واک کرتے ہوئے فٹ پاتھ پر گر پڑے اور بے ہوش ہوگئے، اس دوران وہاں سے فیملی کے ہمراہ گزرنے والے پاکستانی نوجوان بلال شاہد گاڑی روک کر بے ہوش شہری کی مدد کو پہنچے۔
بزرگ شہری کو سانس لینے میں دشواری ہو رہی تھی اور ان کی نبض بھی ڈوب گئی تھی جس پر بلال نے میڈیکل ایمرجنسی کیلئے ہیلپ لائن پر فون کیا اور شہری کی حالت کا بتایا۔
اس دوران فون پر آفیسر نے پاکستانی نوجوان کو بزرگ شہری کو دل کی دھڑکن اور سانس کو بحال کرنے کے ہنگامی طریقہ کار (سی پی آر) کو بروئے کار لاتے ہوئے طبی امداد دینے کا کہا تاہم پاکستانی نوجوان کو ہنگامی طبی امداد کا علم نہ تھا۔
اس دوران فون پر ہی آفیسر نے طریقہ سمجھایا اور بلال شاہد نے اس طریقے پر عمل کیا اور اتنی دیر میں میڈیکل ٹیم بھی موقع پر پہنچ گئی جہاں بزرگ شہری کو فوری طبی امداد فراہم کی گئی۔
امدادی ٹیم کے کیپٹن کے مطابق بلال شاہد کی جانب سے شہری کو موقع پر سی پی آر دینے کے باعث اسپتال لے جاتے ہوئے نبض بحال ہوئی اور ان کی جان بچانا ممکن ہوا۔
جان بچانے پر بزرگ شہری کے اہلخانہ نے سوشل میڈیا کے ذریعے پاکستانی نوجوان کو تلاش کیا اور ان کے گھر تحائف اور تہنیتی پیغام بھیج کر شکریہ ادا کیا۔
اُدھر سوشل میڈیا پر بھی پاکستانی نوجوان کی جانب سے بزرگ کی جان بچانے کو سراہا جا رہا ہے۔
خیال رہے کہ کراچی سے تعلق رکھنے والے بلال شاہد امریکا کے شہر لیورمور میں کئی سالوں سے مقیم ہیں۔

نئی دہلی: (ویب ڈیسک) بھارت نے رقوم کی غیر قانونی بیرون ملک منتقلی پر چینی اسمارٹ فون کمپنی ژیاومی کے بینک اکاؤنٹس سے 72 کروڑ 50 لاکھ ڈالرز ضبط کرلیے۔
عالمی میڈیا کے مطابق بھارتی حکام نے بتایا کہ ایک تحقیقات میں پتہ چلا کہ چینی اسمارٹ فون کمپنی نے مالک کمپنی کو ادائیگی (royalty payments) کی آڑ میں غیر قانونی طور پر بیرون ملک رقم بھیجیں۔
بھارت کی مالیاتی جرائم کی تحقیقاتی ایجنسی نے فروری میں کمپنی کی تحقیقات شروع کیں اور کہا کہ اس نے فرم سے رقم اس وقت ضبط کی جب پتہ چلا کہ ژیاومی نے تین غیر ملکی اداروں رقوم غیر قانونی طور پر منتقل کیں۔
انفورسمنٹ ڈائریکٹوریٹ نے اپنے بیان میں کہا کہ رائلٹی کے نام پر اتنی بڑی رقم ژیاومی کے چینی مرکزی گروپ کمپنیوں کی ہدایات پر بھیجی گئیں۔
دوسری جانب AFP کی درخواست پر ژیاومی نے مذکورہ بالا الزام پر فوری طور پر کوئی تبصرہ نہیں کیا ہے۔ اسی طرح ہواوے سمیت بھارت میں دیگر چینی اسمارٹ فون کمپنیوں پر بھی چھاپے مارے جاچکے ہیں۔