اسلام آباد(صباح نیوز)الیکشن کمیشن آف پاکستان نے لودھراں میں ضمنی انتخابات کے جلسہ سے خطاب پر تحریک انصاف کے چیرمین عمران خان سمیت متعلقہ چار اراکین قومی اسمبلی کونوٹسز جاری کر دیئے ۔ ضابطہ اخلاق کی خلاف ورزی پر این اے-154 لودھراں میں جہانگیرترین کے بیٹے تحریک انصاف کے امیدوارعلی ترین کو طلب کرلیا ہے۔ شاہ محمود قریشی، شیخ رشیداحمد اور مراد سعید نے بھی ضابطہ اخلاق کی خلاف ورزی کی ۔ہفتہ کو ای سی پی سے جاری نوٹس میں کہا گیا ہے کہ احکامات کے باوجود جلسہ کرکے ضابطہ اخلاق کی سنگین خلاف ورزی کی گئی ہے۔جہانگیر ترین کی سپریم کورٹ کے فیصلے کی روشنی میں نااہلی کے بعد خالی ہونے والی قومی اسمبلی کی نشست کے لیے ضمنی الیکشن کی مہم کے سلسلے میں ہونے والے جلسے میں عمران خان سمیت پارٹی کی سینیئر قیادت نے شرکت کی تھی۔ ضمنی انتخاب میں جہانگیر ترین کے بیٹے علی ترین امید وار ہیں جن کو الیکشن کمیشن نے آج 11 فروری کو ضلعی الیکشن کمیشن میں پیش ہونے کا حکم دیا ہے۔ ای سی پی کی جانب سے اراکین قومی اسمبلی عمران خان شاہ محمود قریشی، شیخ رشیداحمد اور مراد سعید کی کی شرکت کا نوٹس لیا ہے واضح رہے کہ ای سی پی نے عمران خان کو جلسے میں شرکت سے روکتے ہوئے کہا تھا کہ رکن اسمبلی ضمنی انتخاب کی مہم میں شرکت نہیں کرسکتا ہے تاہم عمران خان کے علاوہ شیخ رشید اور دیگر نے نہ صرف جلسے میں شرکت کی بلکہ حکومت سمیت مخالف سیاسی جماعتوں کے خلاف دھواں دھار تقاریر کیں

واشنگٹن(صباح نیوز)پاکستان پیپلز پارٹی کے چیئرمین بلاول بھٹو زرداری نے کہا ہے کہ آئندہ انتخابات پیپلزپارٹی تنہا لڑے گی، الیکشن کے بعد اتحاد کی بات ہو سکتی ہے، دہشت گردی اور انتہا پسندی کا اسلام سے کوئی تعلق نہیں، امریکا کے اسکولوں میں بھی دہشت گردی کے واقعات ہوتے ہیں، دہشت گردی اور انتہا پسندی عالمی مسئلہ ہے، ہمیں مل کر انتہا پسندی اور دہشت گردی کو ختم کرنا ہوگا، یہ ایک طویل مدتی جنگ ہے ، امریکا بتائے اس کا کیا منصوبہ، کیا حکمت عملی ہے؟ کیا امریکا ہمیشہ افغانستان میں رہے گا؟ اور کیا افغانستان پرامن ہوگا تو پاکستان پرامن ہوگا، موجودہ صورتحال بہت خطرناک ہے اور نیشنل ایکشن پلان پر اس کی روح کے مطابق عمل نہیں ہورہا، کراچی میں تھوڑی بہتری آئی ہے مزید بھی آجائےگی۔واشنگٹن میں میڈیا سے گفتگو کرتے ہوئے بلاول کا کہنا تھا کہ سندھ حکومت نے اپنے وسائل سے انڈرپاسز، سڑکیں بنائیں، وفاق بھی کراچی پر توجہ دے جبکہ مشرف دور میں کراچی کو خصوصی پیکج دیا جاتا تھا۔انہوں نے مزید کہا کہ امریکا ہمیں بتائے کہ اس کا کیا منصوبہ، کیا حکمت عملی ہے؟ کیا امریکا ہمیشہ افغانستان میں رہے گا؟ اور کیا افغانستان پرامن ہوگا تو پاکستان پرامن ہوگا، اپنی کوتاہیوں کو چھپانے کے لیے الزام تراشی نہ کی جائے۔ان کا کہنا تھا کہ 4 سال سے پاکستان کا کوئی وزیر خارجہ نہیں تھا، جس کی و جہ سے دنیا کے سامنے اپنا موقف موثر انداز میں پیش نہیں ہو سکا۔بلاول نے کہا کہ دہشت گردی اور انتہا پسندی کا اسلام سے کوئی تعلق نہیں جبکہ امریکا کے اسکولوں میں بھی دہشت گردی کے واقعات ہوتے ہیں۔انہوں نے بتایا کہ دہشت گردی اور انتہا پسندی عالمی مسئلہ ہے، ہمیں مل کر انتہا پسندی اور دہشت گردی کو ختم کرنا ہوگا، یہ ایک طویل مدتی جنگ ہے جبکہ موجودہ صورتحال بہت خطرناک ہے اور نیشنل ایکشن پلان پر اس کی روح کے مطابق عمل نہیں ہورہا۔

اسلام آباد (آن لائن) عوامی مسلم لیگ کے سربراہ شیخ رشید احمد نے کہا ہے کہ سینٹ الیکشن کے لئے ہر صوبے کے الگ ہی ریٹہیں بلوچستان میں سیٹ ایک ارب روپے جبکہ عمران خان کو خیبر پختونخوہا سے سیٹ کے لئے 40کروڑ روپے کی پیشکش ہوئی ہے۔ ایم کیو ایم میں چپقلش کے باعث پیپلز پارٹی سینٹ میں بازی لے جائے گی۔ ہفتہ کے روز نجی ٹی وی کو انٹرویو دیتے ہوئے عوامی مسلم لیگ کے سربراہ شیخ رشید احمد نے کہا ہے کہ جذبات میں آکر قومی اسمبلی کی سیٹ سے استعفے دینے کا فیصلہ نہیں کیا تھا بلکہ مجھے امید تھی میرے بعد تحریک انصاف بھی استعفے پیش کر دے گی۔ مجھے کسی کا خوف نہیں تھا اور پنڈی میں نہ ہی کوئی ضمنی الیکشن کا ڈر تھا کہ مقابلہ کرنا پڑ جائے گا۔ عمران خان نے مجھے کہا کہ تین دن رہ گئے ہیں دفعہ کرو استعفیٰ نہ دو تب میری عقل کو بات لگی۔ پتہ نہیں آئندہ دو ماہ کے بعد ملک میں الیکشن ہوں گے یا سلیکشن بد تمیز انسان ہر صبح اداروں کو گالیاں دے رہا ہے اور ملک کا وزیراعظم عدلیہ کے فیصلے ردی کی ٹوکری میں پھینکنے کی بات کرتا ہے۔ نواز شریف اور مودی ایک انٹرنیشنل ایجنڈے پر کام کرر ہے ہیں کشمیر جا کر مودی کا نام تک نہیں لیا۔ یہ پاک فوج کو توڑنا چاہتے ہیں۔ فوج جمہوریت اور آئین کے ساتھ کھڑی ہے۔ نواز شریف کو نواز شریف بنانے میں میرا بہت بڑا رول ہے۔ میں نے سات سال جیل میں گزارے نواز شریف کے پاس پیسہ تھا۔ لوگوں کو شہرت چاہیئے میڈیا میں آکر ہم سیاست دان اپنی اوقات بھول گئے ہیں۔ دبئی سے عمران خان کو کے پی کے سے سینٹ کی سیٹ کے لئے 40کروڑ روپے کی آفر کی ہے۔ ہر صوبے ک اسینیٹ کی سیٹ کے لئے الگ ریٹ ہے۔ بلوچستان میں ایک ارب روپے کا ریٹ چل رہا ہے سینٹ کے الیکشن میں پیپلز پارٹی زیادہ سیٹیں حاصل کر لے گی۔ رضا ربانی نواز شریف کو سپورٹ کرے گا۔ انہوں نے کہا کہ نواز شریف جی ایچ کیو کے گیٹ نمبر4کی پیداوار ہیں ضیاءالحق ہاتھ پکڑ کر لے کر آئے اور میں ان کے ساتھ ہوتا تھا۔ جب نواز شریف وزیراعلیٰ پنجاب تھے ایک جنرل صاحب باوردی ہمارے ساتھ بیٹھ کر بات چیت کرتے تھے فوج نے اب تک نالائق سیاست دان کی سپورٹ کی ہے۔ اچھا نمائندہ فوج آج تک نہیں لا سکی۔ جمالی صاحب ایک ووٹ سے وزیراعظم بنے۔ انہوں نے کہا کہ نواز شریف کے کیس کا فیصلہ تین مار کو آ رہا ہے۔ دیکھنا ہوگا جج صاحب ریٹائر ہوں گے یا ان کی مدت میں اضافہ ہو گا۔ نواز شریف کیس میں بچ نہیں سکتے۔ آرٹیکل62ون ایف کے تحت نواز شریف تاحیات نا اہل ہوں گے

اسلام آباد (خصوصی رپورٹ) قومی احتساب بیورو اور اس کے سربراہ کے لئے حقیقی آزمائش کا وقت آگیا ہے۔ احتساب بیورو جوروزانہ سیاست دانوں سے زور آزمائی کرتا رہا ہے اب اسلام آباد ہائی کورٹ کی تازہ ہدایت پر بیورو کو جنرل (ر) پرویز مشرف کے خلاف کارروائی آگے بڑھانے کے لئے کہا ہے۔ اس سے قبل یہ نوگو ایریا تصور ہوتا تھا۔ اسلام آباد ہائی کورٹ نے گزشتہ جمعہ کو پرویز مشرف کے خلاف دوران صدارت مبینہ کرپشن پر کارروائی آگے بڑھانے کی ہدایت کی تھی۔ یہ ہدایت جسٹس اطہر من اللہ اور جسٹس میاں گل اورنگزیب پر مشتمل اسلام آباد ہائی کورٹ کی ڈویژن بنچ نے دی تھی۔ اس طرح نیب اور اس کے سربراہ کو حقیقی آزمائش میں ڈال دیا گیا ہے۔ پرویز مشرف کو نظرانداز کرنے پر سپریم کورٹ پہلے ہی نیب کو تنبیہ کرچکی ہے۔ اب دیکھنا یہ ہے کہ نیب اور اس کے سربراہ اسلام آباد ہائی کورٹ کی ہدایت پر عمل کرتے ہیں یا اسے چیلنج کیا جاتاہے۔ کیونکہ گزشتہ برسوں سے انٹی کرپشن اسٹیبلشمنٹ نے پرویز مشرف کے خلاف کارروائی میں تذبذب کا مظاہرہ کیا ہے۔ صرف حال ہی میں پرویز مشرف کا نام لئے بغیر سپریم کورٹ نے حدیبیہ پیپرز ملز کیس میں نیب کو خود اپنا قانون یاد دلایا کہ بیورو کی تحقیقات میں رکاوٹ والے کے لئے دس سال قید کی سزا ہے۔ اس بات پر افسوس ظاہر کیا گیا کہ جنہوں نے شریف برادران کو جلاوطن کرکے نیب تحقیقات کو خطرے میں ڈالا، ان کے خلاف کوئی کارروائی نہیں کی گئی۔ یہ قابل سزا جرم ہے جس کے تحت 10سال قید بامشقت کی سزا دی جاسکتی ہے۔ جن لوگوں نے مدعا علیہان نمبر ایک اور دو نوازو شہباز شریف کو جلا وطن کیا تھا، سمجھا جاتا ہے کہ انہوں نے قانونی عمل میں رکاوٹ ڈالی، ناکام بنایا اور اس پر سمجھوتا کیا۔ یہ بات حدیبیہ کیس میں سپریم کورٹ کے تفصیلی فیصلے میں کہی گئی۔ تاہم نیب نے ان کے خلاف استغاثہ کے تحت کوئی کارروائی نہیں کی اور اس جانب سے اپنی آنکھیں بندکئے رکھیں اور اپنا سیاست دانوں کا شکار جاری رکھا۔ دلچسپ امر یہ ہے کہ نیب کے نہ صرف سابق سربراہان اور نہ ہی موجودہ چیئرمین جسٹس (ر) جاوید اقبال نے پرویز مشرف کے خلاف کسی بھی معاملے میں کوئی کارروائی نہیں کی۔ چند ماہ قبل اس نمائندے نے پرویز مشرف کے خلاف شکایات کے بارے میں مخصوص سوالات کے ساتھ نیب سے رابطہ کیا۔ یہ کہا گیا کہ پرویز مشرف کے خلاف شکایات پر کوئی کارروائی شروع نہیں کی جاسکی کیونکہ نیب کے لیگل ونگ کے خیال میں اس کے قوانین قانونی اور آئینی رکاوٹوں کے باعث پرویز مشرف کا احاطہ نہیں کرتے۔ یہ بھی کہا گیا کہ نیب نے ماضی میں دو وجوہ سے پرویز مشرف کے خلاف تمام شکایات کو ختم کیا۔ (1)اول انہوں نے آرمی چیف کی حیثیت سے جو کچھ کیا، جس میں فوجی اراضی کی سیاست دانوں سمیت سویلینز کو تقسیم شامل ہے۔ نیب قانون کے تحت بیورو اس لئے کارروائی نہیں کرسکتا کیونکہ کرپشن یا فوجی و عدالتی اختیار کے غلط استعمال پر کارروائی اس کے تحت نہیں آتی۔ (2) دوسرے صدر پاکستان کی حیثیت سے پرویز مشرف نے جو کچھ کیا، آئین کے آرٹیکل 248کے تحت انہیں صدارتی استثنی حاصل رہا۔ گو کہ نیب قانون کی تعریف کے تحت عوامی عہد ےکے حامل صدر کا دفتر بھی شامل ہے۔ بیورو کے سرکاری ذرائع کا کہنا ہے کہ نیب کے قانونی ماہرین پرویز مشرف کے خلاف شکایات پر کارروائی یا تحقیقات کو روکنے کے لئے مذکورہ آئینی آرٹیکل کا حوالہ دے رہے ہیں۔نیب کی پرویز مشرف کے خلاف کارروائی سے ہچکچاہٹ اس وقت واضح ہوگئی جب حدیبیہ کیس میں نیب کو عدالت عظی کے انتباہ کے باوجود وہ سابق آمر کے خلاف کارروائی نہیں کررہا۔ اب اسلام آباد ہائی کورٹ نے بیورو کو واضح ہدایت دے دی ہے کہ وہ مبینہ کرپشن پر پرویز مشرف کے خلاف جب وہ صدر پاکستان تھے، ان کے خلاف کارروائی کی جائے۔

اسلام آباد، لاہور (نمائند گان خبریں) تحریک انصاف کے چیئرمین عمران خان نے پارٹی کے اندر احتساب سیل قائم کر دیا ۔چیئرمین تحریک انصاف عمران خان نے رکن قومی اسمبلی شفقت محمود کو سیل کا سربراہ مقرر کرنے کا نوٹیفکیشن جاری کردیا ۔احتساب سیل پارٹی چیئرمین کو ذمہ داروں کے خلاف کارروائی کی سفارش کرے گا۔ بنی گالہ اسلام آباد میں سینئر اینکرز پرسنز کی چیئرمین تحریک انصاف عمران خان سے ملاقات ہوئی۔اس موقع پر ملک امین اسلم نے بلین ٹری سونامی پر بریفنگ دی۔ چیئرمیں تحریک انصاف نے اینکرز پرسنز سے بات کرتے ہوئے کہا کہ بلین ٹری سونامی اپنی نوعیت کا منفرد منصوبہ ہے۔ ایک ارب سولہ کروڑ درخت لگائے گئے اور پانچ لاکھ لوگوں کو روزگار فراہم ہوا۔ عمران خان نے مزید کہا کہ ماحولیاتی تبدیلی سے متاثر ممالک میں پاکستان ساتویں نمبر پر ہے۔پنجاب میں راجن پور، چیچہ وطنی،چھانگا مانگا اور کندیاں کے جنگلات ختم ہو چکے ہیں۔بدقسمتی کی بات ہے حکومت پنجاب نے اس اہم ترین مسئلے پر توجہ نہیں دی۔ یہ واحد منصوبہ ہے جس سے آنے والی نسلوں کو ماحولیاتی تبدیلی سے محفوظ کیا جاسکتا ہے۔ بلین ٹری سونامی واحد منصوبہ ہے جس کی کامیابی پر عالمی ماحولیاتی اداروں نے مہر تصدیق ثبت کی۔اگلے مرحلے میں دیگر شہروں میں بھی یہ منصوبہ شروع کیا جائے گا۔ اس موقع پر ترجمان تحریک انصاف فواد چوہدری، سربراہ مرکزی میڈیا ڈیپارٹمنٹ افتخار درانی اور چیئرمین کے پولیٹیکل سیکرٹری عون چوہدری بھی موجودتھے۔

لاہور(صباح نیوز) وزیراعلیٰ پنجاب شہباز شریف صاف پانی کیس کی سماعت کے سلسلے میں آج سپریم کورٹ لاہور رجسٹری میں پیش ہوں گے۔ہفتہ کو چیف جسٹس آف پاکستان جسٹس ثاقب نثار کی سربراہی میں سپریم کورٹ لاہور رجسٹری میں صاف پانی سے متعلق کیس کی سماعت ہوئی تھی ،عدالت نے وزیراعلیٰ پنجاب کو فوری طور پر عدالت میں طلب کرلیا اور ریمارکس دیئے کہ شہباز شریف وضاحت پیش کریں کہ گندے پانی کی نکاسی کے لیے کیا اقدامات کیے جا رہے ہیں۔