بیونس آئرس(نیوزایجنسیاں) ارجنٹائن کے شہر بیونس آئرس میں 6 اکتوبر سے یوتھ اولمپکس کامیلہ سج رہا ہے جس میں پاکستان شوٹنگ، ریسلنگ اور ویٹ لیفیٹنگ میں حصہ لے رہا ہے۔ تین کھلاڑیوں سمیت سات رکنی دستہ ان مقابلوں میں شرکت کرے گا۔ارجنٹائن کے شہر بیونس آئرس میں 6 اکتوبر سے یوتھ اولمپکس کامیلہ سج رہا ہے، پروگرام کے مطابق تین کھلاڑیوں، تین آفیشلز (کوچز) اور یوتھ ایمبسیڈر پر مشتمل پاکستان کا 7 رکنی دستہ ایونٹ میں شرکت کے لئے 2 اکتوبر کو روانہ ہوگا۔ شوٹنگ میں نوبییرا بابر کا انتخاب ہوا ہے، جو ائر پسٹل فورٹی کیٹگری میں اپنی صلاحیتوں کا مظاہرہ کریں گی۔ گزشتہ سال ایشین چیمپئن شپ میں نوبیرا نے چوتھی پوزیشن حاصل کی تھی۔ ان کے کوچ خالد بن انوار کو یقین ہے کہ نوبیرا بہت باصلاحیت ہیں اور یوتھ اولمپکس میں میڈل جیت سکتی ہیں۔ویٹ لیفیٹنگ کی 85 کلو گرام کیٹگری میں فرحان امجد سے میڈل کی امیدیں وابستہ کی گئی ہیں۔ اور ریسلنگ میں عنایت اللہ 65 کلو گرام ایونٹ میں ملک کے لیے میڈل لانے کی کوشش کریں گے۔

ان تینوں نوجوان کھلاڑیوں کا انتخاب ان گیمز کے لیے مقرر کردہ کوالیفیکیشن پوائنٹس پر ہوا ہے، اور ان کا اعلان آئی او سی نے خود کیا تھا۔18 اکتوبر تک جاری رہنے والے یوتھ اولمپکس میں انٹرنیشنل اولمپک کمیٹی نے بیس بال پلئیر سید عاقب شیرازی کو یوتھ چینج میکر (یوتھ ایمبیسیڈر) مقرر کیا ہے۔ قومی دستے کو ائر ٹکٹ اور رہائش آرگنائزنگ کمیٹی فراہم کررہی ہے جب کہ کیمپ، یونیفارم کے اخراجات اور ڈیلی الانس پاکستان اسپورٹس بورڈ دے رہا ہے۔
یوتھ اولمپکس میں پاکستانی دستے کی شرکت کے حوالے سے اولمپک ہاس لاہور میں ہونے والے اس اجلاس میں تمام انتظامات کو حتمی شکل دی گئی۔ ان گیمز میں مجموعی طور پر 37 کھیلوں میں 165 ممالک شریک ہیں۔

کولمبو)آن لائن )سری لنکن کرکٹ بورڈ کے اینٹی کرپشن یونٹ نے کولمبو میں کھیلے گئے سری لنکا اور بھارت کی ویمن کرکٹ ٹیموں کے درمیان تیسرے ون ڈے میچ کے دوران پانچ بھارتی تماشائیوں کو میچ فکسنگ کے شک میں گرفتار کرلیا ہے، اس حوالے سے سری لنکن کرکٹ بورڈ کے ایک اعلی عہدیدار نے غیر ملکی ایجنسی کو بتایا کہ میچ کے دوران ان پانچ بھارتی شائقین کرکٹ کا رویہ مشکوک تھا جس کے بعد ہم نے انہیں فوری طور پر میدان سے باہر نکال دیا جس کے بعد کولمبو پولیس نے انہیں تحقیقات کیلئے گرفتار کرلیا ہے، اعلی عہدیدار کا کہنا تھا کہ یہ پانچ کے پانچ بھارتی شہری ٹیلی فون پر مشکوک انداز سے گفتگو کر رہے تھے اور ان کی حرکات و سکنات نے انہیں مزید مشکوک بنا دیا تھا جس کے بعد یہ ضروری تھا کہ انہیں میدان سے باہر نکال دیا جائے۔

، اینٹی کرپشن کے ایک عہدیدار کا کہنا ہے کہ ہمیں شک ہے کہ ان بھارتی شہریوں کا غیر ملکی سٹے بازوں کے ساتھ رابطہ ہے اور یہ سری لنکا میں سٹے بازی کا نیٹ ورک چلا رہے ہیں ان کیخلاف پولیس تحقیقات کر رہی ہے اور جیسے ہی کوئی بات سامنے آئی میڈیاکو اس سے آگاہ کیا جائے گا۔

لاہور(نیوزایجنسیاں)ایشین چیمئنز ٹرافی میں پاکستان ہاکی ٹیم کی عدم شرکت کا خطرہ ٹل گیا، اورپی ایچ ایف کی طرف سے مسقط میں ہوٹل بک کروا دیا گیا ہے۔ تفصیلات کے مطابق آئندہ ماہ اومان کے دارالحکومت مسقط میں شیڈول ایشین چیمپئنز ٹرافی میں پاکستان ہاکی ٹیم کی شرکت کا دروازہ کھل گیا ہے، مالی مشکلات کا شکار پی ایچ ایف نے ایشیائی ایونٹ میں شرکت کے لئے قومی ہاکی ٹیم کے لئے مسقط میں ہوٹل بک کروادیا ہے۔ذرائع کے مطابق پاکستان ہاکی فیڈریشن نے ہوٹل بکنگ کی ڈیڈ لائن کے آخری روز مسقط میں ہوٹل کروانے کے بعد ایشین ہاکی فیڈریشن کو بھی قومی ٹیم کی ایشین چیمپئنز ٹرافی میں شرکت کی تصدیق کردی ہے۔ ذرائع کے مطابق پاکستان کی 18 رکنی ٹیم ایشین چیمپئنز ٹرافی میں شرکت کرے گی۔ قومی سکواڈ میں سینئر کے ساتھ جونیئر کھلاڑیوں کو بھی صلاحیتوں کے اظہار کا موقع فراہم کیا جائے گا۔سیکرٹری پی ایچ ایف شہباز احمد سینئر نے میڈیا کو بتایا کہ ایشین ٹرافی کے لئے نہ صرف ہوٹل بک کروا لیا ہے بلکہ کیمپ کے لئے کھلاڑیوں کا اعلان بھی بدھ تک کر دیا جائے گا۔

برج ٹاﺅن (اے پی پی) کولن منرو کی جارحانہ بلے بازی کی بدولت ٹرنبیگو نائٹ رائیڈرز نے کیریبین پریمیئر لیگ 2018ءکا ٹائٹل اپنے نام کر لیا۔ فاتح ٹیم نے فیصلہ کن معرکے میں گیانا امیزن واریرز کو 8 وکٹوں سے شکست دے کر تیسری مرتبہ ٹائٹل جیتنے کا اعزاز حاصل کیا۔ ٹرنبیگو نائٹ رائیڈرز نے 148 رنز کا ہدف 18ویں اوور میں محض 2 وکٹوں پر پورا کیا، منرو نے ڈٹ کر حریف باﺅلرز کا مقابلہ کیا اور 68 رنز کی ناقابل شکست اننگز کھیل کر ٹیم کو فتح دلائی، خاری پائری میچ اور منرو ٹورنامنٹ کے بہترین کھلاڑی قرار پائے۔ کیریبین پریمیئر لیگ کے سلسلے میں کھیلے گئے فائنل میں گیانا امیزن واریرز نے پہلے کھیلتے ہوئے مقررہ اوورز میں 9 وکٹوں پر 147 رنز بنائے، لیوک رونکی 44 رنز بنا کر نمایاں رہے، جیسن محمد 24، شمرون ہٹمائر 15 رنز بنا کر آﺅٹ ہوئے، خاری پائری نے 3 ڈیوائن براوو نے 2 علی خان، فواد احمد اور سنیل نارائن نے ایک، ایک وکٹ لی۔ جواب میں ٹرنبیگو نائٹ رائیڈرز نے مطلوبہ ہدف 17.3 اوورز میں 2 وکٹوں پر پورا کیا، کولن منرو نے 68 رنز کی ناقابل شکست اننگز کھیل کر ٹیم کو کامیابی دلائی، برینڈن میک کولم 39 رنز کے ساتھ دوسرے نمایاں کھلاڑی رہے، گرین اور سیفرڈ نے ایک، ایک وکٹ لی۔

دبئی(نیوزایجنسیاں) قومی کرکٹ ٹیم کے کپتان سرفرازاحمد نے کہا ہے کہ بھارت کیخلاف میچ میں پوری تیاری کیساتھ میدان میں اتریں گے،ویرات کوہلی کی عدم موجودگی کے باوجود بھارتی ٹیم کیخلاف ٹیم ریلکس نہیں ہوگی۔بلے بازوں کو ذمہ دارانہ کھیل کامظاہرہ کرناپڑیگا۔پہلے بیٹنگ کی صورت میں بڑاٹوٹل بورڈپرسجائیں گے تو باﺅلرز کےلئے بھارتی بلے بازوں کو قابوکرناآسان ہوگا۔ہانگ کانگ کیخلاف میچ میںکھیل کے آغاز میں گیند سوئنگ نہیں ہو رہی تھی اور یہ بات پریشانی کا باعث بنی،بھارت سے میچ میں اس پرخصوصی توجہ دیناہوگی۔وایتی حریفوں پاکستان اور بھارت کی کرکٹ ٹیموں کے درمیان ایشیا کپ کا اہم میچ کل دبئی انٹرنیشنل کرکٹ سٹیڈیم میں کھیلا جائیگا۔میچ پاکستانی وقت کے مطابق سہ پہر04:30پرشروع ہوگا۔ میچ پر پاک بھارت سمیت پوری دنیا کے شائقین کرکٹ کی نظریں لگی ہوئی ہیں اور شائقین کی بہت بڑی تعداد یا تو گراﺅنڈ میں جاکر یا پھر ٹی وی پر دونوں روایتی حریفوں کے مابین ہونے والے میچ کو دیکھنے کےلئے بیتابی سے انتظار کر رہی ہے۔ دونوں ٹیموں کے درمیان ہونے والے میچ کے تمام ٹکٹس میچ سے قبل فروخت ہوچکے ہیں۔دوسری جانب بھارت نے اپنی من مانی کے بل بوتے پر سپر 4 مرحلے میں پاکستان کے اپنے ساتھ میچ کے سوا دیگر میچز ابوظہبی میں طے کردیئے۔پوائنٹس پوزیشن کچھ بھی ہو، گرین شرٹس کو اسی وینیو پر کھیلنا پڑے گا۔ذرائع کے مطابق سیکیورٹی معاملات کی وجہ سے ایشیا کپ نیوٹرل وینیو پر کروانے والے بھارتی بورڈ کا کہنا ہے کہ بطور میزبان انہیں میچز کے وینیوز کا فیصلہ کرنے کا حق حاصل ہے۔بی سی سی آئی نے سخت گرمی اورطویل سفرکوبھی اس کاجوازبنایاہے۔