لاہور (نیا اخبار رپورٹ) لاہور ہائیکورٹ نے صاف پانی کمپنی سمیت 56 کمپنیوں میں اربوں روپے سے زائد کی مبینہ کرپشن کے خلاف درخواست پر کمپنیوں کے وکلاءکو جواب جمع کروانے کے لئے آخری مہلت دے دی۔ جسٹس شاہد کریم نے شہری منیر احمد سمیت دیگر کی درخواستوں پر سماعت شروع کی تو صاف پانی کمپنی سمیت 56 کمپنیوں کے وکلاءنے جواب جمع کروانے کے لئے مزید مہلت دینے کی استدعا کی۔ جس پر عدالت نے برہمی کا اظہار کرتے ہوئے ریمارکس دیئے کہ آئندہ سماعت پر جواب داخل نہ کروائے گئے تو عدالت قانون کے مطابق کارروائی کرے گی۔ درخواست گزاروں کا مﺅقف ہے کہ آئین آرٹیکل 140 اے کے تحت جو کام کمپنیز کو سونپے گئے۔ وہ بلدیاتی نمائندوں کے کرنے کے ہیں۔ 80 ارب سے زائد کی کرپشنکے باوجود ان کمپنیز کا آڈٹ نہیں کروایا ۔لہذا عدالت کمپنیوں میں کرپشن کے حوالے سے نیب کوازسر نو تحقیقات کا حکم دے۔

لاہور (خصوصی رپورٹ) بچوں اور بچیوں کو اونٹ ریس کیلئے اغوا کرنے کے انکشافات کی رپورٹ پولیس و خفیہ اداروں نے اعلیٰ حکام کو پیش کر دی جس کے بعد تفتیش کا دائرہ وسیع کر دیا گیا۔ رپورٹ کے مطابق اغواکاروں کا گروہ لاہور سمیت مختلف شہروں میں متحرک ہے جس میں خواتین بھی شامل ہیں۔ ان کی سرپرستی بیرونی ممالک کے باشندے کر رہے ہیں۔ عیدالفطر کے بعد خلیج میں بڑے پیمانے پر اونٹ ریس ہوتی ہے جس کیلئے بچے اغوا کئے گئے۔ ذرائع نے بتایا کہ ڈیرہ غازی خان‘ بہاولپور اور ملتان کے خانہ بدوش بچوں کو 40 سے 60ہزار میں خرید کر دبئی پہنچا دیا جاتا ہے۔ لاہور سے گزشتہ چند ماہ سے اغوا 11بچے ابھی تک لاپتہ ہیں۔ سندر سے ڈیڑھ ماہ قبل تین بہنوں مناہل‘ رابعہ اور صبا کو اغوا کیا گیا۔ پولیس نے ابتدائی تفتیش میں لکھا شبہ ہے کہ ملزم کالی وغیرہ اور اس کی ساتھی خاتون نازیہ نے اونٹ ریس کیلئے اغوا کر کے آگے فروخت کر دیا۔ مزید پیشرفت نہ ہونے پر فائل بند کر دی گئی۔ شادباغ سے 12سالہ وحید‘ شادمان سے دس سالہ فیصل ایک سال قبل اغوا ہوئے‘ ان کا سراغ نہیں لگ سکا۔ ملت پارک میں 10جولائی 2017ءکو ایک گروہ نے ایڈووکیٹ کے بیٹے ابرار کو اغوا کیا‘ پکی ٹھٹھی کے ایک فلیٹ پر لے گئے۔ ابرار موقع پا کر بھاگ نکلا جس کے بعد پولیس نے ایک ملزم ادریس کو گرفتار کیا‘ دیگر کی گرفتاری کیلئے مختلف شہروں میں چھاپے مارے جا رہے ہیں۔ ایک ملزم نے پولیس کو بتایا وہ بچے اغوا کر کے ڈیرہ غازی خان پہنچاتے ہیں‘ فی بچہ انہیں ایک لاکھ ملتا ہے۔ اس گروہ کی گرفتاری کیلئے پولیس اور وفاقی تحقیقاتی اداروں کو سپیشل ٹاسک دیا گیا ہے۔ ڈائریکٹر ایف آئی اے عثمان انور کے مطابق اونٹ ریس کیلئے بچوں کے اغوا کے واقعات پہلے پیش آتے تھے‘ یہ سلسلہ اب ختم ہو گیا ہے۔
اونٹ ریس

قصور(خصوصی رپورٹ)پولیس نے ابتک معصوم بچوں کی ہلاکت کے شبہ میں 2ہزار سے زائد افراو کو پکڑا جبکہ 600مشتبہ افراد کا ڈی این اے کروایا گیا، 4کو مبینہ مقابلے میں ہلاک کرکے ان پر بچیوں کی ہلاکت کا الزام لگایااس کے بارجود بچبیوں کی ہلاکتیں جاری رہی ، قصورمیں مختلف تنظیموں کے زیراہتمام زینب کی یاد میں معصوم بچی کے والد لواحقین اور چوہدری منظور جنرل سیکرٹری پنجاب پیپلز پارٹی نے شمعیں روشن کیں ،جائے وقوعہ پر انجمن تاجران ،سول سوسائٹی،علاقہ مکینوں کی بڑی تعداد نے ریلی نکالی اور شمعیں روشن کیں ،ریلی کے شرکا نے پولیس کیخلاف نعرے بازی کی ، اس موقع پر طلبا کی ایک کثیر تعداد نے ہاتھوں میں پلے کارڈ اٹھائے زینب کو انصاف دو کے نعرے بھی لگائے ،جمعہ کے خطبات میں علما اکرام اور مختلف تنظیموں نے اپنی تقریروں میں مرکزی ملزم کی گرفتاری تک چین سے نہ بیٹھنے کا اعلان کیا ۔

لاہور (خصوصی رپورٹ) عوامی تحریک کے سربراہ طاہر القادری نے کہا ہے کہ پورے یقین سے کہتا ہوں شہباز حکومت دو ماہ سے بھی پہلے اپنے انجام کو پہنچ جائے گی۔ پیپلز پارٹی اور تحریک انصاف کے ایک دوسرے سے گلے شکوے دور کرانے کی کوشش کرونگا۔ صحافیوں سے غیر رسمی گفتگو میں انہوں نے کہا کہ احتیاطا دو ماہ کی بات کی ہے، سانحہ ماڈل ٹاﺅن کے ذمہ داروں سے بہت پہلے نجات مل جائے گی۔ پیپلز پارٹی اور تحریک انصاف اپنے اپنے موقف پر درست ہیں دونوں جماعتیں شہدا کے قصاص کے لیے ہمارے ساتھ کھڑی ہیں۔ ایم کیو ایم پاکستان رابطے میں ہے اگلے فیز میں ساتھ ہو گی۔ مال روڈ جلسہ ہماری حکمت عملی کے عین مطابق اور کامیاب جلسہ تھا۔ انتخابات کے حوالے سے کبھی اجلاسوں میں ایک بات تک نہیں ہوئی۔ مانیٹرنگ ڈیسک کے مطابق انہوں نے مال روڈ جلسہ میں خالی کرسیوں کو حکمت عملی قرار دیا۔

لاہور (کرائم رپورٹر)چیف ٹریفک آفیسر لاہور رائے اعجاز احمد نے کہاکہٹریفک سگنلز کو گداگری کی لعنت سے پاک کرنے اور چوکوں،چوراہوں میں ٹریفک کی روانی کو بغیر کسی رکاوٹ جاری رکھنے کےلئے عادی گداگروں اور بھکاریوں کےخلاف گرینڈ آپریشن شروع کیا گیا ہے،اس سلسلہ میں ایک ٹریفک رسپانس یونٹ بھی قائم کیا گیا ہے جو شہر بھر کی اہم اور مصروف شاہراﺅں پرایسے افراد کےخلاف کاروائی کر رہا ہے ۔ایک ماہ کے دوران 300سے زائد افراد کو پکڑ کے مقامی پولیس کے حوالہ کیا گیا اور ان کےخلاف مقدمات بھی درج کروائے گئے،جبکہ20سے زائد بچوںکو پکڑ کر چائلڈ پروٹیکشن یونٹ کے حوالے کیا گیا تاکہ وہ ان کے والدین کو بلا کر ان کی اصلاح کریں۔رائے اعجاز احمد نے شہریوں سے اپیل کی کہ وہ گداگری کی لعنت سے پاک معاشرہ کےلئے سٹی ٹریفک پولیس کا ساتھ دیں اورٹریفک سگنلز پر ایسے افراد کو بھیک نہ دیں اور ان کی ہر لحاظ سے حوصلہ شکنی کی جائے ۔ اس سے نہ صرف معاشرے میں بہتری آئےگی بلکہ چوکوں،چوراہوں پر بغیر تعطل ٹریفک کی روانی برقرار رہے گی۔

لاہور (خصوصی رپورٹ) سرکاری سکولوں کی سکیورٹی کی ذمہ داری ضلعی انتظامیہ اور پولیس کے سپرد کر دی گئی۔ بتایا گیا ہے کہ پنجاب بھر کے سرکاری سکولوں میں دہشت گردی کے خدشات کے باوجود سکیورٹی کے ناقص انتظامات کے انکشاف پر چیکنگ کی ذمہ داری سکول ایجوکیشن ڈیپارٹمنٹ کے افسروں سے لے کر کمشنرز اور ریجنل پولیس افسروں کے حوالے کر دی گئی۔ وزیراعلیٰ مانیٹرنگ ٹیم برائے سکول کی رپورٹ میں اس بات کا انکشاف ہوا ہے کہ سکولوں کی مانیٹرنگ اور سکیورٹی ایس او پیز پر عملدرآمد کرانے کیلئے سکول ایجوکیشن ڈیپارٹمنٹ کے افسر ناکام ہو گئے ہیں۔ کئی مرتبہ احکامات کے باوجود ابھی تک سکولوں میں سکیورٹی کے انتظامات کو مکمل نہیں کیا گیا۔ سکیورٹی ایس او پیز پر عملدرآمد کیلئے ڈویژنل کمشنرز اور ریجنل پولیس افسروں کو ذمہ داری دی گئی ہے وہ سکولوں کی مانیٹرنگ کیلئے کمیٹیاں بنائیں۔ مراسلے میں یہ بھی کہا گیا ہے کہ اے اور اے پلس کیٹیگری کے حامل اداروں کے قریبی علاقوں میں کوئیک رسپانس فورس کے دستے بھی تعینات کئے جائیں۔ مراسلے میں اس بات کا خدشہ ظاہر کیا گیا ہے کہ سکولوں میں دہشت گردی کے سنگین خطرات موجود ہیں۔
سکول سکیورٹی