اسلام آباد (خصوصی رپورٹ) خیبر پختونخوا میں اقوام متحدہ کے زیرانتظام سکولوں میں طلبہ کو پاکستان مخالف نصاب پڑھانے کا انکشاف ہوا ہے۔ اخبار کے مطابق اقوام متحدہ کے ادارہ برائے مہاجرین (یو این ایچ سی آر) کی جانب سے خیبر پختونخوا میں نصاب تعلیم میں تبدیلی کی گئی ہے، یو این ایچ سی آر کی جانب سے افغان مہاجرین کے کیمپوں میں کمیونٹی پرائمری سکول قائم کیے گئے ہیں جن کا سلیبس صوبائی اور وفاقی حکومت کی اجازت کے بغیر تبدیل کردیا گیا جس پر وفاقی حکومت نے شدید تشویش کا اظہار کیا گیا ہے جبکہ وزارت داخلہ نے خیبر پختونخوا حکومت کے ذریعے یو این ایچ سی آر سے وضاحت طلب کرلی۔ ذرائع کے مطابق سلیبس میں پاکستان کی پالیسی اور نظریے کیخلاف تبدیلیاں کی گئی ہیں۔ معاشرتی علوم کی کتاب میں گلگت، بلتستان اور متنازعہ کشمیر کو بھارت کا حصہ دکھایا گیا ہے، پاک افغان بارڈر کو ڈیورنڈ لائن بتایا گیا ہے اور بھارت کو قریبی دوست ملک لکھا گیا ہے۔ ذرائع کے مطابق انگلش کی کتاب پر افغانستان کا جھنڈا ہر صفحہ پر موجود ہے۔ وزارت داخلہ نے خیبرپختونخوا حکومت کے ذریعے یو این ایچ سی آر سے وضاحت طلب کرلی ہے۔

راولپنڈی (صباح نیوز) بے نظیر قتل کیس میں نامزد اور عدالت کی جانب سے اشتہاری قرار دیئے جانے والے سابق صدر پرویز مشرف کی ضمانت ضبط کرلی گئی ہے۔ ہفتہ کوراولپنڈی کی انسداد دہشت گردی عدالت میں بے نظیرقتل کیس میں نامزد اشتہاری ملزم سابق صدر پرویز مشرف کے خلاف کیس کی سماعت ہوئی، عدالت نے بے نظیر بھٹو قتل کیس میں اشتہاری ملزم پرویز مشرف کی جائیداد ضبط کرنے سے متعلق معاملے کا ازسرِ نو جائزہ لیا اور ملزم کی املاک کی تفصیلات پیش نہ کرنے پر سخت برہمی کا اظہار کرتے ہوئے ملزم کی ضمانت کے 10، 10لاکھ روپے کی رقم ضبط کرنے کا حکم جاری کردیا۔ عدالت نے پرویز مشرف کے اشتہاری ہونے کے بعد یہ رقم بحق سرکاری ضبط کرتے ہوئے کیس کی سماعت 20فروری تک ملتوی کردی۔

واشنگٹن (اے این این) امریکا میں پاکستان کے خلاف شروع ہونے والی حالیہ اشتہاری مہم کے بعد واشنگٹن نے اسلام آباد کو یقین دہانی کرائی ہے کہ وہ ملک کی خود مختاری پر حملہ کرنے والی کسی بھی تنظیم کی حمایت نہیں کرے گا۔ میڈیا رپورٹس کے مطابق واشنگٹن میں پاکستانی سفیر اعزاز احمد چوہدری نے کہا ہے کہ ہم نے آزاد کراچی مہم کا معاملہ اسٹیٹ ڈپارٹمنٹ میں اٹھایا جہاں انہوں نے ہمیں یقین دہانی کرائی کہ پاکستان کی خود مختاری اور اس کے اندرونی معاملات کی ہمیشہ کی طرح حمایت جاری رکھی جائے گی۔ انہوں نے واضح کیا کہ امریکی اسسٹنٹ سیکرٹری آف اسٹیٹ الیس ویلز نے اسلام آباد کے اپنے حالیہ دورے کے دوران بھی پاکستان کو اس بات کی یقین دہانی کرائی تھی کہ امریکا پاکستان کے دشمنوں کو اپنا دشمن سمجھتا ہے۔ سفیر کا کہنا تھا کہ کچھ منفی پوسٹرز اور بل بورڈز کو نیو یارک میں دیکھا گیا ہے جن میں سے چند ٹیکسیوں پر بھی لگائے گئے تھے تاہم پاکستان کی جانب سے احتجاج کیے جانے کے بعد انہیں ہٹایا جاچکا ہے جبکہ واشنگٹن میں بھی کچھ ٹیکسیوں پر اسی طرح کے اشتہارات دیکھے گئے تھے جو کچھ ہی عرصے میں غائب ہوگئے تھے۔ امریکی حکام کا کہنا تھا کہ پاکستان نے اس معاملے کو امریکی اسٹیٹ ڈپارٹمنٹ اور دیگر حکومتی اداروں میں اٹھاتے ہوئے انتہائی سخت رد عمل کا اظہار کیا ہے جس پر امریکا نے پاکستان کو یقین دہانی کرائی کہ اس منفی مہم کے پیچھے تنظیموں کو امریکی ایجنسیوں کی جانب سے حمایت حاصل نہیں ہوگی۔ یہ عناصر امریکا کے آزادی اظہار رائے کے قوانین کا استعمال کرتے ہوئے اپنے خیالات کا پراپیگنڈہ کر رہے ہیں۔ پاکستانی سفیر اعزاز چوہدری کا کہنا تھا کہ اس پروپیگینڈے کے پیچھے ملوث افراد کی کوئی آواز نہیں اور انہیں پاکستان اور نہ ہی دیگر ممالک میں کوئی حمایت حاصل ہے۔ ان خفیہ کاموں کے پیچھے چھپے ہاتھوں کی نشاندہی کرنے پر ان کا کہنا تھا کہ ایسے کام کرنے والے افراد امریکا میں نہیں بلکہ ان کا تعلق ہمارے مشرقی پڑوسی سے ہے۔ انہوں نے کہا کہ بلوچستان میں ایک منتخب حکومت ہے اور وہاں غیر معمولی ترقی جاری ہے جو ان پروپیگنڈوں کے کھوکھلے پن کا اظہار کرتی ہے۔

اسلام آباد ( آن لائن)سابق وزیراعظم اور مسلم لیگ ن کے صدر میاں محمد نواز شریف نے ن لیگ کے دو سینئر رہنماو¿ں چوہدری نثار علی خان اور پرویز رشید کے درمیان لفظی جنگ میں اپنا وزن سینیٹر پرویز رشید کے پلڑے میں ڈال دیا ہے اور وزیر اعلی پنجاب شہباز شریف کے مفاہمتی پیغام کے باوجود نوازشریف نے ہفتہ کو سابق وزیر داخلہ چوہدری نثار علی خان سے ملاقات نہیں کی جبکہ شہباز شریف نے چوہدری نثار علی کو راضی کرلیا تھا کہ وہ نواز شریف سے ملاقات کرکے اپنے پرویز رشید بارے تحفظات سے انھیں آگاہ کریں۔ذرائع نے مزید بتایا کہ پرویز رشید کے حالیہ بیانات پر نواز شریف خوش ہیں اسی لیے ان کی راولپنڈی میں چوہدری نثار سے ملاقات منسوخ ہو گئی زرا ئع نے بتایا کہ اس ملاقات کا اہتمام بھی شہباز شریف نے کیا تھامگر نواز شریف پرویز رشید کو لے کر ہری پور پہنچ گئے اور انہوں نے پرویز رشید کو نثار کے معاملے پر ہتھ ہولا رکھنے کے لیے تو کہا ہے مگر منع نہیں کیا ۔ذرائع نے مزید بتایا کہ اب نواز نثار ملاقات کسی اور وقت میں ہو گی مگر کوئی نیا شیڈول جاری نہیں کیا گیا۔

اسلام آباد (صباح نیوز) لندن فلیٹس ریفرنس کے سلسلے میں نیب لاہور نے نواز شریف کے خلاف ضمنی ریفرنس تیار کرلیا، چیئرمین نیب کی منظوری کے بعد دائر کیا جائے گا۔ذرائع کے مطابق برطانیہ سے ملنے والی اہم معلومات، نواز شریف اور بچوں کے خلاف نئے گواہان کو ضمنی ریفرنس کا حصہ بنایا گیا ہے۔ ضمنی ریفرنس چیئرمین نیب کی منظوری کے بعد احتساب عدالت میں دائر کیا جائے گا۔ اس سے پہلے نیب احتساب عدالت کی جانب سے مریم نواز اور کیپٹن(ر) صفدر کے ریفرنسز میں جعلی دستاویزات کی دفعات نکالنے کے حوالے سے اسلام آباد ہائی کورٹ میں دائر درخواست بھی واپس لے چکا ہے۔ نیب نے موقف اختیار کیا تھا کہ مریم نواز اور کیپٹن صفدر کے خلاف ضمنی ریفرنس دائر کیا جائے گا۔

لاہور (مانیٹرنگ ڈیسک) وزیر اعلیٰ پنجاب شہباز شریف نے بائیس جنوری کو نیب کے سامنے پیش ہونے کا فیصلہ کرلیا ان کا یہ فیصلہ قانونی ٹیم سے مشاورت کے بعد سامنے آیا، اس سے قبل پنجاب حکومت کے ترجمان نے نیب کی جانب سے طلبی کے نوٹس کی تردید کرتے ہوئے کہا تھا کہ وزیر اعلی پنجاب کو آشیانہ ہاوسنگ سکیم کے حوالے سے کوئی نوٹس موصول نہیں ہوا ۔ تین روز قبل نیب لاہور کے ایڈیشنل ڈائریکٹر خاور الیاس کی جانب سے جاری نوٹس میں شہباز شریف کو 22جنوی کو صبح ساڑھے 10 بجے ٹھوکر نیاز بیگ لاہور میں واقع نیب کمپلیکس میں کمبائنڈ انویسٹی گیشن ٹیم کے سامنے پیش ہو کربیان ریکارڈ کرانے کی ہدایت کی گئی تھی ۔ نوٹس میں کہا گیا تھا کہ آشیانہ ہاوسنگ سکیم کے حوالے سے جاری کیس میں پنجاب لینڈ ڈویلپمنٹ کمپنی کی انتظامیہ، افسروں ، عہدیداروں اور لاہور کاسا ڈویلپرز کے مالکان، انتظامیہ اور دیگر نے دوران تفتیش یہ انکشاف کیا ہے کہ شہباز شریف نے بطور وزیراعلیٰ غیرقانونی احکامات جاری کیے ۔شہباز شریف کو جاری کیے گئے خط میں کہا گیا کہ پی ایل ڈی سی بورڈ کے غیرقانونی اقدامات کے باعث قومی خزانے کو بھاری نقصان پہنچا ۔وزیراعلیٰ پنجاب کو کہا گیا تھا کہ آپ نے آشیانہ اقبال سکیم کے ٹھیکے کیلئے کامیاب بولی حاصل کرنیوالی کمپنی لطیف اینڈ سنز کا ٹھیکہ دوسری کمپنی کاسا ڈویلپرز کو دینے کے احکامات جاری کیے جس کی وجہ سے 19 کروڑ 30 لاکھ کا نقصان ہوا ۔نیب نوٹس میں مزید کہا گیا کہ بطور وزیراعلی آپ نے پی ایل ڈی سی کو آشیانہ اقبال منصوبے کا ٹھیکہ لاہور ڈویلپمنٹ اتھارٹی کو دینے کے احکامات جاری کیے جس کے باعث لاہور کاسا ڈویلپرز(جے وی) کو ساڑھے 71 کروڑ روپے کا نقصان برداشت کرنا پڑا اور منصوبہ ناکام ہوا۔ اس نوٹس کی موصولی کے بعد اب وزیر اعلی پنجاب نےاپنے وکلا اور قانونی ماہرین سے طویل مشاورت کے بعد 22 جنوری کے دن نیب کے سامنے پیش ہونے کا فیصلہ کیا ہے اور وہ 22 جنوری کو نیب کی مشترکہ تحقیقاتی کمیٹی کے روبرو اپنا بیان ریکارڈ کروائیں گے ،اس سے قبل ترجمان پنجاب حکومت ملک محمد احمد خان کا کہنا تھا کہ آشیانہ ہاوسنگ سکیم کی تحقیقات کے حوالے سے نیب کی جانب سے وزیر اعلی پنجاب کو کوئی نوٹس موصول نہیں ہوا ۔