لاہور(ویب ڈیسک) ورلڈ ہاکی الیون پاکستان کے ساتھ سیریز کے دوسرے میچ میں حصہ لینے کے لئے لاہور پہنچ گئی، مہمان ٹیم کیلیے علامہ اقبال انٹرنیشنل ایئرپورٹ پر سکیورٹی کے سخت انتظامات کیے گئے تھے۔مہمان ٹیم کو سخت سکیورٹی حصار میں ٹیم کو ایئرپورٹ سے ہوٹل پہنچا دیا گیا۔ دونوں ٹیموں کے درمیان سیریز کا آخری میچ نیشنل ہاکی اسٹیڈیم لاہور میں دوپہر 2 بجے کھیلا جائے گا۔ یاد رہے کہ گزشتہ روز کراچی میں کھیلے گئے پہلے میچ میں ورلڈ الیون نے پاکستان ہاکی ٹیم کو ایک کے مقابلے میں 5 گول سے زیر کیا تھا۔

شارجہ (ویب ڈیسک )بلائنڈ کرکٹ ورلڈ کپ میں بھارت پاکستان کو شکست دے کر چیمپئن بن گیا۔بلائنڈ کرکٹ ورلڈ کپ کے فائنل میچ میں بلو شرٹس نے ٹاس جیت کر بولنگ کو ترجیح دی، گرین شرٹس نے مقررہ 40اوورز میں 8 وکٹو ں کے نقصان پر 308رنز بنائے، بدر منیر57، ریاست خان 48 اور نثار علی 47 رنز کے ساتھ نمایاں اسکورر تھے، بھارت نے ہدف سنسنی خیز مقابلے کے بعد39ویں اوور میں 8 وکٹوں کے نقصان پر عبور کرلیا ، سنیل رامیش 93، اجے ریڈی 62 رنز کے ساتھ نمایاں رہے۔بھارتی بلائنڈ کرکٹ ٹیم دوسری بار عالمی چیمپئن بنی ہے، اس سے قبل پاکستان بھی 2 بار ٹائٹل اپنے نام کرچکا ہے جب کہ جنوبی افریقا ایک بار یہ اعزاز حاصل کرنے میں کامیاب ہوا۔یاد رہے کہ اس سے قبل بھی بھارتی ٹیم نے 13 جنوری کو گروپ میچ میں بھی پاکستان کو 7 وکٹوں سے مات دی تھی۔ بلائنڈ کرکٹ ورلڈ کپ فائنل دیکھنے کےلیے آئی سی سی چیف ڈیوڈ رچرڈسن، سابق پاکستانی کپتان ظہیر عباس اور بھارت کے سابق وکٹ کیپر سید کرمانی بھی مدعو کیا گیا تھا۔

پی ایس ایل (ویب ڈیسک ) فرنچائزز اور بورڈ میں اختلافات کی وجہ سے پاکستان سپر لیگ (پی ایس ایل) تھری کا انعقاد خطرے میں پڑگیا۔ پی سی بی حکام سر جوڑ کر کوئی حل نکالنے کی کوشش کر رہے ہیں۔فرنچائزز اور بورڈ میں اختلافات نے پی ایس ایل تھری کا انعقاد خطرے میں ڈال دیا اور ٹیموں کی جانب سے واجبات ادا نہ کئے جانے پر بورڈ مالی مشکلات سے پریشان ہے۔ ذرائع کے مطابق 6 میں سے 5 فرنچائزز گزشتہ سال نومبر کی ڈیڈ لائن تک واجبات ادا نہیں کر سکی تھیں۔یو اے ای اور پاکستان میں 22 فروری سے 25 مارچ تک شیڈول تیسرے ایڈیشن کیلیے بورڈ کو درکار رقم میں 50 سے 60 لاکھ امریکی ڈالر کم پڑ جانے کا خدشہ ستا رہا ہے۔ اس حوالے سے پی سی بی حکام سر جوڑ کر کوئی حل نکالنے کی کوشش کر رہے ہیں، فرنچائزز کے عدم تعاون کی وجہ سے بظاہر بڑی کامیاب نظر آنے والی پی ایس ایل میں دراڑیں صاف نظر آنے لگی ہیں۔ذرائع کے مطابق اگر فرنچائزز کا واجبات کے معاملے میں یہی رویہ جاری رہا تو بورڈ قانونی چارہ جوئی کے ساتھ ٹیموں کی دوبارہ فروخت پر بھی غور کر سکتا ہے۔ دوسری جانب فرنچائزز کا کہنا ہے کہ پی سی بی سے زرتلافی کا مطالبہ کیا تھا جس پر اس نے دباﺅڈالنا شروع کردیا، ٹی 10 کو سپورٹ کرنے پر بھی پی ایس ایل ٹیموں کے مالکان ناراض ہیں، ان کا کہنا ہے کہ بورڈ خود اس تنازع کو میڈیا میں لے آیا اور پی سی بی کے رویہ کی وجہ سے مالی معاملات خراب ہیں۔