جنیوا: (ویب ڈیسک) وزیر اعظم شہباز شریف نے جنیوا میں ازبکستان کے وزیر خارجہ، برطانیہ کے وزیر برائے ترقی اور چیئرمین چائنہ انٹرنیشنل کوآپریشن سے ملاقاتیں کی ہیں۔
وزیر اعظم نے ازبکستان کے وزیرِ خارجہ بختیار سیدوف سے ملاقات میں تجارت کے حجم کو بڑھانے، تجارتی راہداری پر کام کو مزید تیز کرنے اور خطے میں پائیدار امن کیلئے باہمی تعاون کو فروغ دینے پر تبادلہ خیال کیا، ملاقات کے دوران وزیرِ اعظم شہباز شریف نے ازبک صدر شوکت مرزیئوف کیلئے نیک خواہشات کا اظہار بھی کیا اور انہیں پاکستان آنے کی دعوت دی۔
برطانیہ کے وزیر مملکت برائے ڈویلپمنٹ اینڈرو مِچّل سے ملاقات میں وزیراعظم شہباز شریف نے امداد پر شکریہ ادا کیا، ان سے گفتگو میں وزیر اعظم نے کہا سیلاب نے پاکستان میں بے پناہ تباہی برپا کی، زراعت، لوگوں کا روزگار اور معیشت کو شدید نقصان پہنچا، پاکستان کے عوام برطانیہ کے مشکور ہیں، اس موقع پر اینڈرو مِچّل نے متاثرین کی بحالی میں مکمل تعاون کی یقین دہانی کروائی۔
جنیوا میں وزیرِ اعظم محمد شہباز شریف نے چیئرمین چائنہ انٹرنیشنل کوآپریشن لو ژاوہوئی سے ملاقات میں چین اور چینی عوام کا پاکستانی سیلاب زدگان کی امداد پر شکریہ ادا کیا، وزیر اعظم نے اپنی گفتگو میں کہا کہ چین پاکستان کا دیرینہ دوست ہے اور ہر مشکل وقت میں مدد اس دوستی کا منہ بولتا ثبوت ہے۔
وزیر اعظم نے مزید کہا کہ چینی حکومت، چینی کمپنیوں اور چینی عوام نے سیلاب متاثرین کے درد کو سمجھا، اس جذبہ کو پاکستانی قوم کبھی فراموش نہیں کر سکتی، چیئرمین چائنہ انٹرنیشنل کوآپریشن نے وزیرِ اعظم کو سیلاب زدگان کی امداد کی ہر ممکن یقین دہانی کروائی۔

لاہور: (ویب ڈیسک) پاکستان مسلم لیگ ق کے صدر و سابق وزیراعظم چودھری شجاعت حسین سے ان کی رہائش گاہ پر پاکپتن شریف کے گدی نشین دیوان حامد مسعود چستی نے وفد کے ساتھ ملاقات کی۔
ملاقات میں چودھری شجاعت حسین کے صاحبزادے چودھری شافع حسین بھی موجود تھے، ملاقات کے دوران دونوں شخصیات میں علاقائی اور سیاسی صورتحال پر گفتگو ہوئی۔
اس موقع پر چودھری شجاعت حسین نےپاکپتن شریف کے گدی نشین کو مخاطب کرتے ہوئے کہا کہ آپ کا زرعی علاقہ ہے ،آپ اپنی پیداوار بڑھا کر دوسرے علاقوں کو بھی روزمرہ کی اشیاء سے فائدہ دے سکتے ہیں۔

قصور: (ویب ڈیسک) تیزرفتار بس نے موٹرسائیکل اور رکشہ سواروں کو کچل ڈالا جس کے باعث 3 افراد جاں بحق جبکہ 4 افراد زخمی ہوگئے۔
تفصیلات کے مطابق حادثہ مصطفیٰ آباد ٹول پلازہ کے قریب پیش آیا جہاں فیکٹری کی بس بریک فیل ہونے کے باعث موٹرسائیکل اور رکشہ ایک کار کو بری طرح روندھ ڈالا۔
ریسکیو 1122 نے موقع پر پہنچ کر زخمیوں کو طبی امداد فراہم کرنے کے بعد لاشوں اور زخمیوں کو ہسپتال منتقل کردیا۔
ریسکیو ذرائع کے مطابق جاں بحق ہونے والوں میں 17 سالہ وقاص، 20 سالہ رفاقت،38 سالہ ذوالقرنین شامل ہیں جبکہ زخمی ہونے والوں میں 30 سالہ امان اللہ، 22سالہ ارباز اور 19سالہ سیف اللہ شامل ہیں۔

لاہور: (ویب ڈیسک) مسلم لیگ (ن) کے رہنما اور وزیر دفاع خواجہ آصف نے کہا کہ عمران خان کی اصلیت سامنے آنے پر لوگ مایوس ہو رہے ہیں، وہ لوگ اپنے لیے نئی پارٹیاں، نئی پناہ گاہیں ڈھونڈ رہے ہیں، جب کسی پارٹی کی مقبولیت کا گراف گرتا ہے تو لوگ نئی پارٹیوں میں جاتے ہیں۔
لاہور میں میڈیا سے گفتگو کرتے ہوئے وزیر دفاع نے کہا کہ 18ویں ترمیم کے بعد جس کے پاس حکومت ہے وہی آٹا بحران کے ذمہ دار ہیں، آٹا بحران کا سوال ان سے کریں، پنجاب میں تبدیلی ضرور ہو گی، الیکشن وقت پر ہی ہوں گے، پنجاب حکومت کے پاس ووٹ پورے ہیں تو اعتماد کا ووٹ کیوں نہیں لے رہے، پرویزالہٰی ہمارے قریب آئیں اللہ وہ نوبت نہ لائے۔
خواجہ آصف نے مزید کہا کہ عمران خان کے مبینہ ڈاکو کو فارغ تو ہونا ہے، اگر تحریک انصاف کے ووٹ پورے ہیں تو اعتماد کا ووٹ کیوں نہیں لیتے، موقع آنے دیں سب کو پتہ چل جائے گا کون کتنے پانی میں ہے، عدم اعتماد کے ووٹ کے بعد فیصلہ ہو گا کہ پنجاب میں وزیر اعلیٰ کا امیدوار کون ہوگا ، مجھے گنتی نہیں آتی لیکن ہمارے پاس ممبران کی بہت بڑی تعداد ہے۔
وزیر دفاع نے کہا پاور شیئرنگ فارمولے کا کوئی علم نہیں، میرے خیال میں اسمبلی کے اندر ہمارے بے شمار بندے موجود ہیں، نوازشریف کی واپسی کسی چیز سے مشروط نہیں، عدالتی معاملات پر کوئی ریڈ لائن کراس نہیں کروں گا، مریم نواز کو پارٹی کا آرگنائزر لگانا اچھی بات ہے، نواز شریف وطن واپس آئیں گے لیکن اس کا پنجاب حکومت کی تبدیلی سے لنک نہیں ہے۔

لاہور: (ویب ڈیسک) تحریک انصاف کے چیئرمین عمران خان نے کہا ہے کہ 13 جماعتوں پر مشتمل حکومتی ٹولے نے چند ماہ کے اندر معیشت تباہ کر دی ہے، مہنگائی آسمان کو چھو رہی ہے، معیشت کو سنبھالنے کے دعویدار آج خود اغیار کے پاؤں میں گرے ہوئے ہیں۔
اپنے بیان میں عمران خان نے کہا کہ لاؤ لشکر سمیت جینوا جا کر بھیک مانگتے انہیں شرم نہیں آتی، نااہل اور نالائق ٹولہ جینوا سے بھی خالی ہاتھ واپس لوٹے گا، آج معیشت نہ سنبھلی تو کل اس کا نقصان ریاست کو ہوگا، اقتدار کی ہوس میں اندھے حکمران مہنگائی کا طوفان لے کر آئے ہیں۔
زمان پارک میں وزیر اعلیٰ پنجاب پرویز الہٰی سے ملاقات میں گفتگو کرتے ہوئے عمران خان نے کہا کہ پنجاب حکومت کی ڈائریکشن مثبت انداز میں آگے بڑھ رہی ہے۔
پرویز الہٰی کا کہنا تھا کہ ملک پر مسلط بے حس ٹولے نے غریب آدمی کی زندگی اجیرن کر دی ہے، یہ لوگ عوام کے مسائل پر توجہ دینے کے بجائے این آراو کے ذریعے اپنے آپ کو کلیئر کرانے میں لگے ہیں۔

لاہور: (ویب ڈیسک) صوبائی وزیر پارلیمانی امور راجہ بشارت نے کہا ہے کہ آج تاثر دیا جا رہا تھا کہ تحریک انصاف کے پاس اکثریت نہیں، ہمارے ممبران نے اپنی اکثریت کے بل بوتے پر آج 21 بل پاس کیے، جو اپنے ممبران کی کارکردگی دیکھنے ایوان آئے تھے کیا منہ لیکر واپس جائیں گے۔
لاہور میں میڈیا سے گفتگو کرتے ہوئے راجہ بشارت نے کہا کہ آج کا دن پنجاب اسمبلی کے حوالے سے تاریخی دن ہے، 21 بل میں سے کسی ایک بل پر اپوزیشن کی طرف سے ترمیم نہیں آئی، پنجاب اسمبلی کی تاریخ کی سب سے نالائق ترین اپوزیشن ہے، آج پنجاب کےعوام نے ان کی نالائقی کا عملی مظاہرہ دیکھا، قانون سازی کے دوران ان کو شرمندگی کا سامنا کرنا پڑا۔
صوبائی وزیر نے کہا کہ صبح سے (ن) لیگ کی مرکزی قیادت پنجاب اسمبلی میں موجود تھی، وفاقی وزیر داخلہ رانا ثنا اللہ گیلری میں تھے، پاکستان کی تاریخ میں اتنا فارغ وزیر داخلہ نہیں دیکھا، وزیر داخلہ اسمبلی کی کارروائی کو سبوتاژ کرانے کیلئے سارا دن اسمبلی رہا، پنجاب اسمبلی کے تمام ممبران کو مبارکباد پیش کرتا ہوں انہوں نے اپوزیشن کے منصوبے کو ناکام بنایا۔
راجہ بشارت نے کہا کہ اسلام آباد سے آنے والا شخص ان سے ان کی کارکردگی بارے سوال ضرور کرے گا، اگر ہماری اکثریت پر سوالیہ نشان ہوتا تو آج 21 بل پاس نہ کرتے، جب بھی موقع آیا ہم نے اپنی اکثریت کو ثابت کیا، حمزہ کو مشورے دینے والوں کا آج تک منہ ہی کالا ہوا، حمزہ شہباز تو اپنے ساتھ سابق وزیر اعلیٰ کا لفظ بھی نہیں لکھ سکتے، آج ہم نے اپنی اکثریت ثابت کردی ہے۔
صوبائی وزیر نے مزید کہا کہ جب بھی عدالت کہے گی آج کی طرح پھر اکثریت ثابت کریں گے، یہ اپنی اکثریت کے جھوٹے دعوے کر رہے تھے، اپوزیشن کے تو اپنے ممبران پورے نہیں تھے، اپوزیشن کے چند شرپسند نعرے، باقی کاغذ پھاڑنے میں لگے تھے، اپوزیشن کا کردار ہر لحاظ سے قابل مذمت ہے، وزیٹر گیلری میں بیٹھے لوگوں کو خوش کرنے کیلئے ایسا کیا گیا۔
انہوں نے کہا کہ آصف زرداری پہلے بھی پنجاب آئےتھے، اب زرداری صاحب کو سمجھ جانا چاہیے ہر وقت لوگوں کے ضمیر نہیں خریدے جا سکتے، اسمبلی کے حوالے سے جو بھی فیصلہ قیادت کرے گی، وزیر اعظم بیرون ممالک امداد حاصل کرنے کیلئے دربدر ٹھوکریں اور وزیر صوبے میں انتشار کی کوششں کر رہے ہیں، اس محاذ آرائی میں نقصان صرف عوام کو ہو رہا ہے۔
صوبائی وزیر نے مزید کہا کہ محاذ آرائی کی ذمہ دار وفاقی حکومت ہے، وفاق نے پنجاب کے 172 ارب سے زائد دینے ہیں، ہماری کوششوں کے باوجود وفاق پنجاب کو پیسے نہیں دے رہا، وفاقی حکومت کے منفی ہتھکنڈوں کے باوجود آٹے کے مصنوعی بحران کو پیدا نہیں ہونے دیں گے۔