کراچی: (ویب ڈیسک) سربراہ تنظیم ایم کیو ایم پاکستان بحالی کمیٹی فاروق ستار نے کہا ہے کہ کراچی اور حیدر آباد کے مہاجروں اور تمام مظلوموں کو ان کے حقوق واپس دلوائیں گے۔
فاروق ستار نے کہا کہ ہمیں مردم شُماری میں کم گنا جاتا ہے، کراچی اورحیدرآباد میں غیر منصفانہ، متنازعہ حلقہ بندیاں کی گئیں، ہمیں ہمارے بنیادی حقوق سے محروم رکھا گیا ہے، اس ظلم اور ناانصافی کے خلاف بھر پور احتجاج کرنا ہے۔
سربراہ تنظیم ایم کیو ایم پاکستان بحالی کمیٹی کا کہنا تھا کہ کب تک ظلم سہیں، آگے بڑھیں اور طاقتور ایوانوں تک آواز پہنچائیں، مہاجروں اور تمام مظلوموں کو اُن کے حقوق واپس دلوانے ہیں۔

لاہور: (ویب ڈیسک) پاکستان مسلم لیگ ن نے اعتماد کے ووٹ کے مطالبے کی قرار داد پنجاب اسمبلی میں جمع کرا دی، قرار داد 4 لیگی ارکان کے دستخطوں کے ساتھ جمع کرائی گئی ہے۔
قرار داد کے متن میں کہا گیا ہے کہ گورنر نے اعتماد کے ووٹ کے لیے جو حکم دیا ہے اس پر آئین کے مطابق عمل کیا جائے، اعتماد کے ووٹ کا مرحلہ سپیکر یا ڈپٹی سپیکر کے بجائے غیر جانبدار ممبر کی سربراہی میں کرایا جائے۔
قرار داد ایم پی اے محمد ارشد اور علی حیدر گیلانی کی جانب سے جمع کرائی گئی، اپوزیشن نے وزیراعلیٰ کے اعتماد کے ووٹ کیلئے سپیکر، ڈپٹی سپیکر اور پینل آف چیئرمین پر عدم اعتماد کا اظہار کر دیا۔
قرار داد کے متن میں کہا گیا ہے کہ پنجاب اسمبلی میں وزیر اعلیٰ کے انتخاب، اعتماد کے ووٹ کے لیے سپیکر، ڈپٹی سپیکر اور چیئرمین پینل کے بجائے غیر جانبدار افراد کی ذمہ داری لگائی جائے، وزیر اعلیٰ کے اعتماد کا ووٹ اور نئے وزیر اعلیٰ کے انتخاب کے لیے ابزرور مقرر کیا جائے۔

لاہور: (ویب ڈیسک) ترجمان پنجاب حکومت مسرت جمشید چیمہ نے کہا ہے کہ جس دن ہماری حکومت آئے گی والیم 10 کھلے گا، آدھا تتر،آدھا بٹیراب نہیں چلےگا۔
ترجمان پنجاب حکومت نے میڈیا سے گفتگو کرتے ہوئے کہا کہ ملک میں انڈسٹریز بند ہو رہی ہے، جو بکنے والے تھے وہ دفعہ ہو چکے ہیں اب کوئی بکاؤ مال نہیں، یہ سوشل میڈیا کا دور ہے کسی کو شب خون نہیں مارنے دیں گے۔
مسرت چیمہ نے کہا کہ زرداری تین میں نا تیرہ میں، زرداری کمپنی کی مشہوری کے لیے صرف ایک اشتہار ہے، ہم نے ان کے لیے بھی سرپرائز رکھے ہوئے ہیں۔
انہوں نے مزید کہا کہ ملک میں دہشت گردی بڑھ رہی ہے، ہمارے پاس پنجاب اسمبلی کے نمبرز پورے ہیں، ملک دشمن، ہارے ہوئے ٹولے کے پاس اب جانے کو کوئی تیار نہیں۔

لاہور: (ویب ڈیسک) وفاقی وزیر داخلہ رانا ثنا اللہ نے کہا ہے کہ اگر پی ٹی آئی غیر آئینی اقدام کرے گی تو حکومت گورنر راج نافذ کر سکتی ہے۔
رانا ثنا اللہ نے لاہور میں میڈیا سے گفتگو کرتے ہوئے کہا کہ آئین میں لکھا ہے کہ وزیر اعلیٰ اعتماد کا ووٹ نہ لیں تو وہ وزیر اعلیٰ نہیں رہیں گے، گورنر کی مرضی ہے ان سے جب بھی اعتماد کا ووٹ لینے کا کہہ دیں۔
رانا ثنا اللہ نے زور دیا کہ ہمیں معلوم ہے کہ انکے پاس نمبر پورے نہیں ہیں ، اگر ہیں تو ووٹ آف کانفیڈینس لے لیں، حمزہ شہباز ہی وزیر اعلیٰ کے متفقہ امید وار ہیں۔
ایک سوال کے جواب میں انہوں نے کہا کہ میرے علم میں نہیں کہ وزیر اعلیٰ پرویز الٰہی سے کوئی مذاکرات ہو رہے ہیں، اگر یہ غیر آئینی اقدام کریں گے تو حکومت گورنر راج نافذ کر سکتی ہے۔
رانا ثنا اللہ نے مزید کہا کہ الیکشن تو تب ہی ہوتے کہ اسمبلیاں توڑ دی جاتیں، ابھی تو کے پی کے کی اسمبلی توڑنے سے بھی بھاگ رہے ہیں، اگر گورنر راج لگ گیا تو اسکا وقت 6 مہینے تک ہو گا۔
رانا ثنا اللہ کا کہنا تھا کہ عمران خان ملک دشمن ایجنڈے پر کام کر رہا ہے، وہ اور اسکے ورکرز گمراہی کی آخری حد کو پہنچے ہوئے ہیں، ایک مہینے سے اسمبلیاں توڑنے کا رونا رو رہے ہیں اس صورت حال میں گورنر کا حق ہے کہ وہ اپنا اختیار استعمال کریں۔
انہوں نے مزید کہا کہ سوائے عمران خان کے اسٹیبلشمنٹ، عدلیہ، سیاست دان اور قوم یہی چاہتی ہے کہ ملک میں استحکام ہو، عدالت سے عمران خان کو کوئی ریلیف نہیں ملنے والا۔

لاہور: (ویب ڈیسک) وزیراعلیٰ پنجاب چودھری پرویز الہٰی نے کہا ہے کہ نوازشریف اور شہباز شریف شروع سے ہی دو نمبری کے ماہر ہیں، شریف برادران نے کبھی ایک نمبر کام نہیں کیا، کہ جو حکمران بے ایمان ہوگا اس کام میں برکت نہیں ہوگی، عمران خان جیسا سچا اور کھرا لیڈر پاکستان میں نہیں ملنا۔
وزیراعلیٰ چودھری پرویز الہٰی نے سمن آباد موڑ انڈر پاس اور کرکٹ سٹیڈیم کا سنگ بنیاد رکھا، اس موقع چودھری پرویزالہٰی کو میاں اسلم اقبال اور ڈی جی ایل ڈی اے نے منصوبوں کے بارے میں بریفنگ دی، سابق وفاقی وزیر حماد اظہر، اراکین اسمبلی، سیکرٹری اطلاعات، کمشنر لاہور ڈویژن، ڈی جی ایل ڈی اے اور متعلقہ حکام بھی اس موقع پر موجود تھے۔
چودھری پرویز الہٰی نے سنگ بنیاد کی تقریب سے خطاب کرتے ہوئے کہا کہ 400 میٹر طویل سمن آباد انڈر پاس 2 ارب 3 کروڑ روپے کی لاگت سے 6 ماہ میں مکمل کیا جائے گا، سمن آباد انڈر پاس بننے سے سمن آباد، گلشن راوی، توحید پارک، ملتان روڈ، چوبرجی، چوک یتیم خانہ اور ملحقہ علاقوں کے لوگوں کو آمد و رفت میں آسانی ہوگی، سمن آباد کرکٹ سٹیڈیم کی تعمیر پر 66 کروڑ روپے لاگت آئے گی، کرکٹ گراؤنڈ بننے سے نوجوان کھلاڑیوں کو اپنے ٹیلنٹ کے اظہار کا بھرپور موقع ملے گا۔
چودھری پرویز الہٰی کا کہنا تھا کہ ماسٹر پلان کا ذکر اکثر سامنے آتا ہے، ماسٹر پلان پی ٹی آئی کے دور حکومت میں شروع ہوا، ن لیگ کے میڈیا سیل نے ماسٹر پلان کے متعلق منفی مہم چلائی، شہباز اور نوازشریف شروع سے ہی 2 نمبر ہیں، شریف برادران نے کبھی ایک نمبر کام نہیں کیا، مستقبل میں کسی کو پنجاب میں ن لیگ نظر نہیں آئے گی، صرف ہمارے کام نظر آئیں گے۔
وزیراعلیٰ پنجاب نے کہا کہ جو حکمران بے ایمان ہوگا اس کام میں برکت نہیں ہوگی، عمران خان جیسا سچا اور کھرا لیڈر پاکستان میں نہیں ملنا، عمران خان عوام کی بہتری اور بھلائی کے لئے ہر خطرہ مول لے رہے ہیں، ہمیں معلوم ہے عمران خان سچے ہیں اس لئے لوگوں نے ساتھ دیا ہے، جیسے قائداعظم سچے اور کھرے تھے اس ہی طرح عمران خان بھی ہیں۔

اسلام آباد: (ویب ڈیسک) پیپلز پارٹی کے چیئرمین اور وزیر خارجہ بلاول بھٹو زرداری نے کہا ہے کہ جنیوا سے پاکستان کیلئے ایک اچھی خبر ہے۔
سماجی رابطے کی ویب سائٹ ٹویٹر پر اپنے بیان میں بلاول بھٹو زرداری نے کہا کہ سیلاب متاثرین کیلئے جینوا میں کامیاب کانفرنس کے دوران 9 ارب ڈالرز جمع کئے۔
وزیر خارجہ بلاول بھٹو زرداری نے اپنے ٹویٹ میں مزید کہا کہ اقوام متحدہ کے جنرل سیکرٹری سمیت تمام عالمی برادری کے شکر گزار ہیں۔

لاہور: (ویب ڈیسک) چیئرمین پاکستان تحریک انصاف عمران خان نے کہا کہ امریکی جنگ میں شامل ہونے سے نقصان زیادہ، معاوضہ معمولی ملا، اگر نیوٹرل رہتے تو حالات بہت بہتر ہوتے، امریکی جنگ کے اثرات اب تک پاکستان میں موجود ہیں۔
سابق وزیر اعظم عمران خان نے سیمینار سے خطاب کرتے ہوئے کہا کہ دہشت گردی کے واقعات میں اضافہ تشویشناک ہے، اس سے بروقت نہ نمٹا گیا تو اس کے منفی اثرات مرتب ہوں گے، اگر یہ جنگ چل پڑی تو سب سے زیادہ نقصان خیبر پختونخوا کا ہوگا، ہمیں عقل سے چلنا پڑے گا، وفاقی گورنمنٹ کو بیٹھ کر اس معاملے پر مسلسل میٹنگ کرنی چاہئیں۔
چیئرمین پی ٹی آئی عمران خان نے مزید کہا کہ نوازشریف اور آصف زرداری جب ملک کے سربراہ تھے تو 400 ڈرون اٹیک کیے گئے، ہمارے کرائم منسٹر ساری دنیا کو خوش آمد کرتے پھرتے ہیں، پاکستان کا وزیر خارجہ ساری دنیا کے چکر لگا رہا ہے، اس کو افغانستان جانا چاہیے تھا، اگر دہشتگردی کی جنگ شروع ہوگئی تو یہ رکے گی نہیں۔
سابق وزیر اعظم عمران خان نے کہا کہ وزرا غیر ذمہ دارانہ بیان دے رہے ہیں، پروپیگنڈہ کیا جا رہا ہے ہم نے ٹی ٹی پی سے بات کی، یہ لوگوں کو گمراہ نہ کریں، خیبر پختونخوا کے لوگوں نے دہشتگردی سے بہت نقصان اٹھایا، بارڈرز کا کنٹرول وفاقی حکومت کے پاس ہے، انہوں نے بڑھتی دہشتگردی پر توجہ نہیں دی۔
انہوں نے کہا کہ مجھے برا بھلا کہا گیا ،طالبان خان کہا گیا، پاکستان کا سب سے زیادہ نقصان خود کش حملوں نے کیا، قبائلی علاقے کے لوگوں نے جہاد میں شرکت کی، قائداعظم نے 1948میں پاکستانی فوج قبائلی علاقے سے واپس بلوالی تھی، میں کہتا تھا ہمیں امریکا کی جنگ میں نیوٹرل رہنا چاہیے، ہم نے امریکا کی جنگ میں 20سال تک شرکت کی۔
عمران خان نے مزید کہا کہ ہمارے دور میں زراعت میں کسانوں کے اچھے حالات تھے، انہوں نے معیشت پر توجہ نہیں دی، ساری دنیا میں بھیک مانگتے پھر رہے ہیں، ہمیں بیرونی سازش کے ذریعے گرایا گیا، جب آپ گندا پانی کھڑا رہنے کی اجازت دیتے ہیں تو اس میں مچھر آجاتے ہیں۔
اس کے علاوہ اپنے ٹویٹ میں چیئرمین پی ٹی آئی عمران خان نے کہا کہ میڈیا رپورٹس کے مطابق جے آئی ٹی ممبران پر میرے خلاف قاتلانہ حملے کی تحقیقات کرنے والی جے آئی ٹی کے نتائج سے خود کو دور کرنے کیلئے دباؤ ڈالا جا رہا ہے، یہ میرے اس یقین کی مزید تصدیق کرتا ہے کہ مجھ پر قاتلانہ حملے کے پیچھے طاقتور حلقوں کا ہاتھ تھا۔