وزیراعلیٰ پنجاب مریم نواز نے مسیحی برادری کو مبارکباد دیتے ہوئے کہا ہے کہ مسیحی برادری کی ملک کے لیے خدمات قابل تعریف ہیں، یہاں آکر بہت خوشی ہوئی، آپ میرے ہیں اور میں آپ کی ہوں۔

شیخوپورہ میں ایسٹر کی تقریب سے خطاب کرتے ہوئے وزیراعلیٰ پنجاب مریم نواز نے کہا کہ مسیحی برادری کو ایسٹر کی بہت بہت مبارکباد، میں آپ کی خوشیوں میں شریک ہونے آئی ہوں، آج جتنی خوشی ہورہی ہے،لفظوں میں بیان نہیں کرسکتی،

مریم نواز نے کہا کہ میرا بچپن سسٹرز اور فادرز کے ساتھ گزرا ہے، وزیراعلیٰ بننے کے بعد ہیڈ مسٹریس کو فون کیا، ہیڈمسٹریس نے کہا کہ دنیا بھر سے مبارکباد کے پیغامات آئے کہ ہمارے اسکول کی اسٹوڈنٹ وزیراعلیٰ بنی، والد نے کئی بار کہا کہ اقلیتوں کے لیے اقلیتوں کا لفظ استعمال کرنا غیرمناسب ہے، میں مائنورٹیز کو اپنے ہیلی کاپٹر میں لے کر آئی۔

وزیراعلیٰ پنجاب کا کہنا تھا کہ میرا خواب ایسا پاکستان ہے جہاں مذہب کی بنیاد پر کوئی آپ کو تکلیف نہ پہنچا سکے، اقلیتوں کی طرف اٹھنے والی ہر نظر اور ہاتھ کو آہنی ہاتھ سے روکوں گی۔

انہوں نے یہ بھی کہا کہ نیب کورٹ جاتی تھی تو مریم آباد کے بورڈ پر نظر پڑتی تھی، جس محبت اور شفقت سے آپ نے استقبال کیا، آپ سب کا شکریہ۔

وزیراعلیٰ پنجاب کی جانب سے مسیحی خاندانوں میں امدادی رقم کی تقسیم
دوسری جانب وزیراعلیٰ پنجاب مریم نواز شریف نے پنجاب بھر کے 10,000 مسیحی خاندانوں میں پہلی بار 50 ملین روپے تقسیم کیے۔

وزیراعلیٰ پنجاب مریم نواز شریف نے پنجاب کی تاریخ میں پہلی بار ایسٹر کے پرمسرت موقع پر پنجاب کے تمام اضلاع کے 10 ہزار مستحق مسیحی خاندانوں میں 50 ملین روپے تقسیم کیے ہیں۔

مریم نواز شریف کی خصوصی ہدایت پر پی ایچ اے نے اس خوشی کی تقریب پر پہلی بار لاہور کے گرجا گھروں کو خوبصورتی سے سجایا اور روشن کیا ہے۔

وزیر اعلیٰ پنجاب مریم نواز شریف کے اس عظیم اقدام پر مسیحی برادری کے اراکین بہت خوش ہیں اور ایسٹر کے موقع پر مسیحی برادری کی خوشیاں بڑھانے کے لیے پیار اور محبت کا اظہار کرنے پر ان کا شکریہ ادا کرتے ہیں۔

مریم نواز کا ایسٹر کے موقع پر پیغام
دوسری جانب وزیر اعلیٰ پنجاب مریم نواز نے مسیحی برادری کے مذہبی تہوار ایسٹر کے موقع پر اپنے پیغام میں کہا کہ ایسٹر ہمیں ہمدردی، معافی اور سب کیلئے محبت کی اقدار سکھاتا ہے۔

ان کا کہنا تھا کہ مسیحی برادری امن پسند اور قابلِ احترام ہے، قیامِ پاکستان سے تعمیرِ پاکستان کی منازل طے کرتے ہوئے مسیحی برادری کا کردار قابلِ ستائش ہے، پاکستان بلا رنگ و نسل، مذہب، ذات اور عقیدے کے ہم سب کا وطن ہے۔

وزیراعلیٰ پنجاب نے مزید کہا کہ ایسٹر کا تہوار معاشرے میں ہم آہنگی اور انسانیت کے جذبے کو فروغ دے گا، دعا ہے کہ ایسٹر خوشی، امن اور خوش حالی لائے۔

اسلام آباد سے کوئٹہ جانے والی پرواز سے پرندہ ٹکرا گیا، پرواز پی کے 325 سے پرندہ ٹکرایا، طیارے میں موجود تمام مسافرمحفوظ رہے جبکہ پی ائی اے حکام کے مطابق اگلی پروازسے مسافروں کو کوئٹہ روانہ کیا جائے گا۔

پی آئی اے حکام کے مطابق قومی ایئر لائن کی پرواز پی کے 325 سے پرندہ ٹکرانے کا واقعہ آج صبح پیش آیا، پرندہ ٹکرانے سے طیارے میں موجود تمام مسافر محفوظ رہے۔

پرواز کو حفاظتی اقدامات کے پیش نظر بحفاطت اسلام آباد اتار لیا گیا، پرواز کو جزوی نقصان پہنچا جس کے بعد متبادل طیارے کا بندوبست کیا جارہا ہے۔

پی آئی اے نے حکام نے مزید بتایا کہ تمام مسافروں کو اگلی پرواز ساڑھے 12 بجے لے کر کوئٹہ روانہ ہو گی۔

پشاور: گورنر خیبرپختونخوا حاجی غلام علی نے صوبے میں سینیٹرز بلامقابلہ منتخب کرنے کا مطالبہ دیا۔

گورنر ہاؤس میں رمضان پیکیج فراہم کرنے کی تقریب سے خطاب کرتے ہوئے حاجی غلام علی نے کہا کہ سندھ ،پنجاب ،بلوچستان کی طرح خیبرپختونخوا میں بھی بلامقابلہ سینیٹرز منتخب ہونے چاہئیں، گورنر ہاؤس مفاہمتی سیاست کے لئے حاضر ہے۔

انہوں نے کہا کہ دہشتگردوں کے خلاف نئی اسٹریٹجی پر وفاقی حکومت جامع پلان تیار کر رہی ہے۔

الیکشن کمیشن آف پاکستان (ای سی پی) نے 2 اپریل کو شیڈول سینیٹ انتخابات کے لیے امیدواروں کی حتمی فہرست جاری کردی جس کے مطابق 18 امیدوار بلامقابلہ منتخب ہوچکے ہیں اور 30 نشستوں پر ووٹنگ ہوگی۔ ان میں پنجاب کی 7 جنرل نشستوں، بلوچستان کی 7 جنرل نشستوں،2 خواتین اور 2 ٹیکنوکریٹ اور علما کی نشستیں شامل ہیں۔

انتخابات میں خیبرپختونخواہ کی 7 جنرل، 2 خواتین اور 2 ٹیکنو کریٹ کی پر بھی مقابلہ ہوگا۔

تاہم الیکشن کمیشن نے خیبرپختونخوا میں سینیٹ انتخابات کو مخصوص نشستوں پر منتخب ارکان اسمبلی کے حلف سے مشروط کردیا ہے۔ الیکشن کمیشن نے ہدایت کی ہے کہ اسپیکر کے پی کے اسمبلی نے اجلاس بلاکر مخصوص نشستوں پر نومنتخب ارکان سے حلف نہ لیا تو صوبے کی حد تک سینیٹ انتخابات ملتوی کر دیئے جائیں گے۔

چار سدہ میں تھانہ عمرزئی کی حدود ترنگزئی میں نو سالہ بچے کی فائرنگ سے ماں جاں بحق ہوگئی۔

تفصیلات کے مطابق پانچویں کلاس کے امتحان میں پاس ہونے کی خوشی میں بچے نے ہوائی فائرنگ کی۔

اس دوران گولی والدہ کو لگی جس سے وہ شدید زخمی ہوگئی اور تشویش ناک حالت میں اسپتال منتقل کیا گیا، جہاں وہ زخموں کی تاب نہ لاتے ہوئے دم توڑ گئی۔

اتوار کی دوپہر ایک بچے تک آخری اطلاعات تک پولیس نے ایف آئی آر تاحال درج نہیں کی ہے، روز نامچہ رپورٹ درج کرکے دفعہ 337 کے تحت تفتیش شروع کی ہے تاکہ اصل حقائق تک پہنچا جا سکے اور اسکے بعد مقدمہ درج کیا جاسکے، جب کہ بچہ تاحال اپنے گھر میں محفوظ ہے، پولیس نے بچے کی گرفتاری نہیں کی۔

سندھ کے وزراء نے صوبے کے مختلف اضلاع میں صورتحال کو بہتر قرار دے دیا ہے، وزیر بلدیات سعید غنی اور وزیر داخلہ ضیا لنجار پریس کانفرنس کر رہے تھے۔

وزیر داخلہ سندھ ضیا لنجار کا کہنا تھا کہ کچے میں ہنی ٹریپ کے 2 واقعات پیش آئے ہیں، مختلف اضلاع میں صورتحال میں بہتری آئی ہے۔

پولیس سے متعلق وزیر داخلہ سندھ کا کہنا تھا کہ مختلف اضلاع میں ایس ایس پیز کا تبادلہ کیا ہے، پولیس نے کامیاب کارروائیوں میں حالات سنبھال لیے ہیں۔

استاد کے قتل پر سختی سے ہدایات جاری کئے ہیں۔ جبکہ انہوں نے واضح کیا کہ ڈاکوؤں کے ساتھ نرمی کا برتاو نہیں کیا جائے گا، سندھ کی عوام سے کہتا ہوں کہ امن و امان جلد قائم ہوگا۔

ڈاکوؤں کے گھروں کو اس وقت مسمار کیا جارہا ہے، نئے آئی جی سندھ کچے کے علاقے میں آپریشن کرنے جارہے ہیں۔

ضیا لنجار کا کہنا تھا کہ کراچی میں اب کوئی بوری بند لاشیں نہیں مل رہی، اب ایس ایچ اوز تک بات نہیں رکے گی، جس علاقے میں جرم ہوگا اس کے اعلی افسر کے خلاف کارروائی ہوگی۔

پریا کناری کیس میں امجد شیخ کو تفتیش سپرد کی ہے، جبکہ وزیر داخلہ کا مزید کہنا تھا کہ سکھرملتان موٹروےپربھی ٹریفک چل رہا ہے۔

جبکہ ایک بار پھر سندھ حکومت نے سندھ میں امن و امان قائم کرنے کا اعادہ کرتے ہوئے کہا کہ سندھ میں امن و امان قائم کرکے دیں گے۔

وزیر داخلہ کا کہنا تھا کہ اسٹریٹ کرائم کے حوالے سے سخت اقدامات کررہے ہیں۔

سیاسی بنیادوں ہر تعینات سفیروں کا مستقبل کیا ہوگا؟ دفترخارجہ نے وزیراعظم شہباز شریف سے ہدایات مانگ لیں۔

ذرائع کے مطابق دفتر خارجہ نے وزیراعظم شہباز شریف کو باضابطہ خط لکھ دیا، خط میں سیاسی بنیادوں پر تعینات سفرا کے حوالے سے ہدایت مانگی گئی ہے۔

ذرائع کا کہنا ہے کہ واشنگٹن میں تعینات مسعود خان کا 2 سالہ کنٹریکٹ اسی ماہ ختم ہوچکا، نیویارک میں مستقل مندوب منیراکرم بھی سیاسی تعیناتی میں آتے ہیں۔

ذرائع کے مطابق امریکا، اقوام متحدہ، ترکی، سری لنکا اور اردن وغیرہ میں سیاسی تعیناتی والے سفراء موجود ہیں، قوانین کے مطابق نئی حکومت آنے پر سیاسی بنیادوں پر تعینات سفرا کوعہدہ چھوڑنا ہوتا ہے۔