کراچی: ذرائع کے مطابق مذکورہ واقعہ جمعہ کو پیش آیا جس میں قومی ایئرلائن کی کراچی سے لاہور جانے والی پرواز پی کے 306 نے مختصر وقت کے لیے بھارتی حدود استعمال کی۔ جس وقت جہاز لاہور کے قریب پہنچا تو اس وقت جہاز کے اپنے مقررہ روٹ پر سفر جاری رکھنے کے لیے موسم سازگار نہیں تھا۔

غیرمعمولی موسمی حالات کے پیش نظر اور مسافروں کی قیمتی جانوں کے تحفظ کی وجہ سے قوانین کے تحت جہاز کے عملے کو بھارتی حدود کا استعمال ناگزیر ہوگیا تھا۔

ذرائع کے مطابق پرواز کو بغیر بھارتی حدود استعمال کیے ایک متبادل راستہ بلوچستان کے ذریعے پشاور ائرپورٹ پر لینڈنگ کے بھی موجود تھا تاہم اس میں راستے کی طوالت کے پیش نظر اضافی ایندھن کی ضرورت تھی۔

ترجمان پی آئی اے کے مطابق دوران پرواز جہاز کے کپتان نے لاہور اور دہلی ایئر ٹریفک کنٹرول سے کلیئرنس حاصل کی جبکہ دونوں ممالک کے مابین موجود ہاٹ لائن پر مبنی ایلفا کنٹرول، ائرڈیفنس کلیئرنس بھی موجودتھی۔

ترجمان پی آئی اے کے مطابق قومی ائر لائن کا جہاز پیشگی اطلاع کے بعد 8 منٹ تک بھارتی فضائی حدود میں رہا، جہاز کو بھارتی حدود سے گزار کر اسلام آباد ائرپورٹ پر اتارا گیا۔

ترجمان سول ایوی ایشن کے مطابق خراب موسم یا ایمرجنسی میں انٹرنیشنل قوانین کے تحت پرواز کسی بھی ملک کی طرف موڑی جا سکتی ہے، ایمرجنسی میں بین الاقوامی ایوی ایشن آرگنائزیشن رکن ممالک پر معاہدوں کی  پاس داری لازم ہے۔

اسلام آباد:  کورونا وائرس سے 23 افراد جاں بحق ہوگئے، جس کے بعد اموات کی تعداد 22 ہزار 254 ہوگئی۔ پاکستان میں کورونا کے تصدیق شدہ کیسز کی تعداد 9 لاکھ 56 ہزار 392 ہوگئی۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 735 نئے کیسز رپورٹ ہوئے، پنجاب میں 3 لاکھ 46 ہزار 36، سندھ میں 3 لاکھ 36 ہزار 507، خیبر پختونخوا میں ایک لاکھ 37 ہزار 831، بلوچستان میں 27 ہزار 83، گلگت بلتستان میں 6 ہزار 60، اسلام آباد میں 82 ہزار 619 جبکہ آزاد کشمیر میں 20 ہزار 256 کیسز رپورٹ ہوئے۔

اسلام آباد: ملک بھر میں گیس کا بحران بڑھنے سے پاور پلانٹس کو گیس کی فراہمی بند، وزارت توانائی نے بجلی کی پیداوار برقرار رکھنے کے لیے پاور پلانٹس کو فرنس آئل درآمد کرانے کے لیے این او سی جاری کردیا۔

ایکسپریس نیوز کے مطابق ملک میں جاری گیس بحران کی وجہ سے بجلی بنانے والے پاور پلانٹس کو گیس کی فراہمی بند ہونے سے بجلی کی رسد میں کمی ہوسکتی ہے، جس سے نمٹنے کے لیے پیٹرولیم اور پاور ڈویژن نے کابینہ کی قائمہ کمیٹی برائے توانائی کی مشاورت سے فرنس آئل درآمد کرنے کی اجازت دے دی ہے۔

وزارت توانائی کے ذرائع کے مطابق پاور پلانٹس کو فرنس آئل پر چلا نے سے بجلی کے بحران پر قابو پانے میں مدد ملے گی جب کہ فرنس آئل پر پیدا ہونے والی مہنگی بجلی کی کا بوجھ بھی ماہانہ فیول پرائس کی مد میں بوجھ بھی صارفین برداشت کریں گے، یاد رہے کہ کے الیکٹرک کو اکتوبر 2020 میں بھی 50 ہزار میٹرک ٹن فرنس آئل امپورٹ کی اجازت دی گئی تھی۔

اسلام آباد   پاکستان پیپلزپارٹی کی رہنما شازیہ مری نے وزارت اطلاعات ونشریات کیلئے نیا نام تجویز کر دیا ، حکومت کو مشورہ دیا کہ وزارت اطلاعات و نشریات کا نام تبدیل کر کے وزارت پروپیگنڈا رکھ دیں ۔

قومی اسمبلی کے اجلاس میں اظہار خیال کرتے ہوئے شازیہ مری نے کہا کہ صحافی عزیز میمن کیس میں سندھ حکومت کی جانب سے کہیں بھی غفلت کا مظاہرہ نہیں کیا گیا، صحافیوں کے تحفظ کا بل کی اپوزیشن مکمل حمایت کرتی ہے

بعد ازاں میڈیا سے گفتگو کرتے ہوئے شازیہ مری نے کہا کہ پی ٹی آئی کو ووٹ دینے والے اپنا انگوٹھا کاٹنے کو تیار ہیں ، لوگ پہلے ہی گھبراتے تھے کہ بچیوں کی شادی کرنی ہے اور سونا چاندی کتنا مہنگا ہے ، انہوں نے اس پر بھی 15فیصد ٹیکس عائد کر دیا،زراعت کے شعبے کے ساتھ بھی بے وفائی کی گئی ، یہ ہمارے زخموں پر نمک چھڑکتے ہیں ۔

اسلام آباد:  افغانستان سے امریکی انخلاء کے بعد کی صورتحال کے پیش نظر پاکستان کی سیاسی قیادت اہم فیصلوں کے لیے یکم جولائی کو سر جوڑ کر بیٹھے گی۔ سپیکر قومی اسمبلی اسد قیصر نے خطے کی بدلتی صورتحال کے جائزہ کیلئے پارلیمانی کمیٹی برائے قومی سلامتی کا اجلاس بلالیا۔

پارلیمانی کمیٹی برائے قومی سلامتی کا اجلاس بجٹ منظوری کے فوری بعد یکم جولائی کو پارلیمنٹ ہاؤس میں ہوگا جس میں اعلی عسکری و سول حکام افغانستان کی موجودہ صورتحال پر ان کیمرہ بریفنگ دینگے۔ پاک بھارت تعلقات، بھارت کے غیر قانونی زیر قبضہ جموں کشمیر کی صورتحال، فضائی اڈے دینے کے امریکی مطالبے پر غور ہوگا۔ اپوزیشن لیڈر شہباز شریف، چیئرمین پیپلز پارٹی بلاول بھٹو زرداری سمیت تمام پارلیمانی جماعتوں کے سربراہان کو اجلاس میں شرکت کی دعوت دی گئی ہے۔

چیئرمین سینیٹ صادق سنجرانی اور ڈپٹی سپیکر قاسم سوری خصوصی دعوت پر اجلاس میں شریک ہوں گے۔ وفاقی وزراء شاہ محمود قریشی، پرویز خٹک، اسد عمر، فواد چودھری، شوکت ترین، مشیر پارلیمانی امور بابر اعوان و دیگر شرکت کرینگے۔ پارلیمانی کمیٹی برائے قومی سلامتی کے اجلاس میں قومی سلامتی سے متعلق اہم امور پر مشاورت کے بعد فیصلے کیے جائیں گے۔ متعلقہ وزارتوں کے سیکرٹریز اور مشیر قومی سلامتی میعد یوسف بھی شرکاء کو بریفنگ دیں گے۔

 وزیرا عظم عمرا ن خان نے کہا کہ کلین اینڈ گرین پاکستان کے ویژن پر مکمل عمل کررہے ہیں، ہم نے پاکستان کی بہتری کے لئے وہ اقدامات کرنے ہیں آئندہ نسلیں ہماری شکر گزار ہوں ، افسوس کے پچھلی نسلوں نے ایسا کچھ نہیں کیا ور ہمارے بزرگ اس ملک سے انصاف نہیں کر سکے۔

تفصیلات کے مطابق وزیرا عظم عمران خان نے ناران کا دورہ کیا جہاں انہیں سیاحت کے حوالے کئے جانے والے اقدامات کے حوالے سے بریفنگ دی گئی۔

اس موقع پر تقریب سے خطاب کرتے ہوئے وزیرا عظم عمرا ن خان کا کہنا تھا کہ میں ساری دنیا پھر اہوں پاکستان جیسی خوبصورتی پوری دنیا میں نہیں ہے، کاغان کو اللہ تعالیٰ نے بہت خوبصورتی سے نواز ہے ، ہمیں چاہئے کہ اس خوبصورتی کو برقرار رکھنے کے لئے اللہ کا شکر ضروری ہے اور ہمیں چاہئے کہ ہم اس کی حفاظت کریں۔

ان کا کہنا تھا کہ پہلےناران آتے تھے تو اس علاقے میں درخت کٹے ہوئے ملتے تھےماضی میں درختوں کی تباہی کی گئی، لیکن اب سارا علاقہ دیکھا درخت لگانے پر بہت خوش ہوں،یہاں درختوں کی حفاظت کے لئے مقامی لوگوں کا چناو کیا جائے کیوں کو وہ پوری طرح واقف ہیں، پاکستان میں سیاحت تیزی سے بڑھ رہی ہے، ہم سیاحت کے حوالے سے جوقانون بنا رہے ہیں اس پر عمل ہونا چاہئے۔

وزیرا عظم نے کہا کہ دین اسلام میں صفائی کو بہت اہمیت حاصل ہے، یہاں گندگی کا پھیلاو روکا جائے، دریائے کنہا ر میں بھی گندگی کا پھیلاﺅ روکا جائے، گندگی پھیلانے والے کو سخت سزائیں دی جائیں، ہم نے اپنے ملک کو صاف کرنا ہے، یہ نئے پاکستان کی سوچ ہے پہلے اس بارے کوئی نہیں سوچتا تھا۔

عمران خان نے کہا کہ سوئزرلینڈ 80ارب ڈالر سیاحت سے کما ر ہا ہے اور ہم 25ارب بھی نہیں کما سکے، اب ہم نے سارے سیاحتی مقامات کا دھیان رکھنا ہے ،سیاحت کے حوالے سے کئے جانے والے اقدامات پر خیبر پختونخوا حکومت کو خراج تحسین پیش کرتا ہوں۔حکومتی اقدامات کی و جہ سے سیاحت میں اضافے کے باعث جو پیسہ آئے گا اس سے یہاں ڈیولپمنٹ کی جائے گی، مقامی لوگوں کو سیاحت کی وجہ سے نوکریاں ملیں گی۔

اسلام آباد  سپیکر قومی اسمبلی اسد قیصرنے پارلیمانی کمیٹی برائے قومی سلامتی کا اجلاس پارلیمنٹ ہاوس میں یکم جولائی کو 3بجے طلب کرلیا۔ا جلاس میں اعلیٰ عسکری وسول حکام افغان صورتحال پران کیمرہ بریفنگ دیں گے۔

نجی ٹی وی دنیا نیوز کے مطابق سپیکر اسد قیصر کی زیر صدارت ہونے والے قومی سلامتی کے اجلاس میں چیئرمین سینیٹ صادق سنجرانی، وزیر داخلہ شیخ رشید ، وزیر دفاع پرویز خٹک اور وزیر خارجہ شاہ محمود قریشی شرکت کریں گے۔

اجلاس میں اپوزیشن لیڈر شہباز شریف، چیئرمین پیپلز پارٹی بلاول بھٹو، ن لیگی رہنماخواجہ آصف اورسیینٹ میں قائد حزب اختلاف یوسف رضا گیلانی بھی شریک ہوں گے جبکہ غفور حیدری اورمولانا اسعد محمودکو بھی اجلاس میں شرکت کی دعوت دی گئی ہے۔

اسلام آباد:  بابر اعوان نے اوورسیز پاکستانیوں کے حوالے سے شہباز شریف کا پلان فراڈ قرار دے دیا۔ انہوں نے کہا کہ ووٹ کا اختیار سمندر پار پاکستانیوں کا بنیادی حق ہے، حزب اختلاف آئین سے کھلواڑ نہ کرے، اپوزیشن لیڈر پارلیمنٹ میں آکر بات کریں، پتلی گلی سے نہ نکلیں، مذاکرات کیلئے درواز کھلے ہیں۔

وزیراعظم کے مشیر برائے پارلیمانی امور ڈاکٹر بابر اعوان نے اسلام آباد میں پریس کانفرنس کرتے ہوئے کہا کہ شہباز شریف نے 2 بار پارلیمان کی بالادستی کو ماننے سے انکار کیا، حکومت پارلیمنٹ کو سپریم سمجھتے ہوئے قانون سازی کرنا چاہتی ہے، پاکستانی جس بھی خطے میں ہو ووٹ اس کا حق ہے، شہباز شریف چاہتے ہیں ایک کروڑ پاکستانیوں کو ووٹ کے حق سے محروم کر دیا جائے۔

بابر اعوان کا کہنا تھا کہ اوورسیز پاکستانیوں سے متعلق غیر مناسب بات کی گئی، تارکین وطن سے عمران خان کا وعدہ تھا ووٹ کے حق میں شریک کریں گے، اپوزیشن سودے بازی چھوڑ دے۔

وزیر مملکت فرخ حبیب نے کہا کہ شہباز شریف نے کہا تھا میں گارنٹر ہوں، نواز شریف کو واپس لاؤں گا، آپ دوسروں کو نصیحت، خود میاں فصیحت بنے ہوئے ہیں، شہباز شریف کے پاس کوئی اخلاقی جواز نہیں کہ اپوزیشن لیڈر رہیں، ان کو اصلاحات، صاف شفاف انتخابات میں کوئی دلچسپی نہیں، ان کو سب سے بڑی رکاوٹ وزیراعظم نظر آتے ہیں، یہ عدالتی فیصلوں کو بھی نہیں مانتے، نواز شریف متحدہ بانی تو بن سکتے ہیں، نیلسن منڈیلا نہیں بن سکتے۔

مظفرآباد: پاکستان پیپلز پارٹی (پی پی پی) کے چیئرمین بلاول بھٹو زرداری نے وزیر اعظم عمران خان پر جوہری پروگرام ختم کرنے کا الزام لگاتے ہوئے کہا ہے کہ وہ کشمیر کے بجائے گرفتار بھارتی جاسوس کمانڈر کلبھوشن یادیوکے سفیر اور وکیل بن گئے ہیں۔

 کوٹلی اور پونچھ اضلاع کے 4 شہروں میں بڑے اجتماعات سے خطاب کرتے ہوئے انہوں نے وزیر اعظم عمران خان پر ‘کشمیر کے معاملے میں سمجھوتہ’ کرنے کا الزام لگایا۔

بلاول بھٹو زرداری نے کہا کہ مسئلہ کشمیر کا حق خود ارادیت ہی واحد قابل عمل حل ہے یہی وجہ ہے کہ ان کی جماعت اقوام متحدہ پر مسئلہ کشمیر کے حل کے لیے دباؤ ڈال رہی ہے۔

بلاول بھٹو زرداری نے الزام لگایا کہ ‘اور اب وہ ملک کے جوہری پروگرام کو ختم کرنا چاہتے ہیں’۔

انہوں نے بھارت کے 5 اگست 2019 کے اقدام کو ‘تاریخی حملہ’ قرار دیتے ہوئے کہا کہ وزیر اعظم عمران خان نے ‘کچھ دوسرے اہم اقدامات کے علاوہ ملک کے نقشے میں بھی تبدیلی کی ہے۔

بلاول بھٹو زرداری نے کہا کہ یہی وجہ ہے کہ کشمیر میں ہر ایک بچہ، پارلیمنٹ میں اپوزیشن اور ہم نعرے لگارہے ہیں کہ کشمیر بیچنا ناقابل قبول ہے۔

انہوں نے کہا کہ ‘عمران خان نیازی کشمیر پر خاموش رہ سکتے ہیں لیکن کشمیری نہیں مانیں گے’۔

بلاول بھٹو زرداری نے کہا کہ 25 جولائی کو آزادکشمیر کے عوام پوری دنیا کو یہ پیغام دیں گے کہ وہ کسی کٹھ پتلی کے ساتھ نہیں بلکہ جمہوریت اور پیپلز پارٹی کے ساتھ ہیں۔

انہوں نے کہا کہ ہم آزاد کشمیر میں ایک ایسے وزیر اعظم کو دیکھنا چاہتے ہیں جو کٹھ پتلی نہ ہو، وہ کشمیر پر کوئی غلطی نہ کرے اور وہ مودی اور عمران خان نیازی دونوں کا مقابلہ کرسکے۔

بلاول بھٹو زرداری نے مزید کہا کہ پیپلز پارٹی آزاد جموں و کشمیر کے حقوق کی ضمانت نہیں دے گی بلکہ لیکن بھارت کے زیر قبضہ علاقے میں کشمیری بھائیوں کی حمایت بھی بنیں گے۔

انہوں نے کہا کہ یہ بات ریکارڈ پر ہے کہ ہماری کسی بھی قیادت نے نریندر مودی سے کبھی ملاقات نہیں کی اور اکیلے میں کبھی ان سے ہاتھ نہیں ملایا، ہم ان کے ساتھ اسی طرح برتاؤ کریں گے جیسے وہ کشمیریوں کے ساتھ کرتےہیں۔

لاہور (سیاسی رپورٹر سے )وزیراعلیٰ پنجاب سردارعثمان بزدارنے کہا کہ اپوزیشن کا شرانگیز بیانیہ بری طرح پٹ چکا ہے ۔ اپوزیشن عناصر کا دامن کرپشن سے آلودہ ہے ، مایوسی کا شکار یہ ٹولہ عوام کو گمراہ نہیں کرسکتا۔ بدقسمتی سے اپوزیشن نے قومی مفادات کو پس پشت ڈالا ، اپوزیشن نہیں چاہتی کہ پاکستان ترقی وخوشحالی کی منزل طے کرے ۔ اپنے بیان میں انہوں نے کہا کہ ترقی کے سفر میں رکاوٹ ڈالنے کے مذموم عزائم کبھی کامیاب نہیں ہوں گے ۔سازشیں کرنے والے پہلے بھی ناکام رہے اورآئندہ بھی ناکام رہیں گے ۔وزیراعلیٰ پنجاب نے کہا کہ 560 ارب روپے کے سالانہ ترقیاتی پروگرام پر عملدرآمد کیلئے مانیٹرنگ یونٹ بنایا جائے گا۔محکموں کو 31 جولائی تک غیر منظور شدہ سکیموں کو منظور کرانے کی ہدایت کر دی ۔