لاہور کے تاجروں نے کل بروز جمعے سے دوبارہ مارکیٹیں کھولنے کااعلان کردیا ہے ۔ تفصیلات کے مطابق لاہور میں اندرون شہر کے تاجر رہنماؤں نے اسمارٹ لاک ڈاؤن کو معیشت کے خلاف سازش قرار دیتے ہوئے 3 جولائی سے بند مارکیٹیں کھولنے کا اعلان کر دیا۔اسمارٹ لاک ڈاؤن کے باعث اندرون شہر کی بند مارکیٹوں کے تاجر رہنماؤں نے پریس کلب میں پریس کانفرنس کے دوران کہنا تھا کہ اسمارٹ لاک ڈاؤن سے ان کا کاروبار تباہ ہورہا ہے لہٰذا فوری طور پر مارکیٹوں کو کھولا جائے۔تاجر رہنماؤں کا مزید کہنا تھا کہ اندرون شہر اور دیگر علاقوں میں اسمارٹ لاک ڈاؤن کے باعث مارکٹیں بند ہیں اور اس طرح ان کا معاشی قتل کیا جارہا ہے۔
تاجروں نے حکومت سے مطالبہ کیا کہ مارکیٹیں کھولنے کی اجازت دی جائے ورنہ وہ 3 جولائی سے اندرون شہر کی بند مارکیٹیں کھول دیں گے۔واضح رہے کہ حکومت پنجاب کی جانب سے اسمارٹ لاک ڈاؤن میں 15 جولائی تک توسیع کردی گئی ہے جس کے دوران ضروری اشیاء کے سامان والی دکانیں اور اسپتال وغیرہ کھلے رکھنے کی اجازت ہے۔