لاہور (ویب ڈیسک)لاہور ہائی کورٹ نے ہر ہاﺅسنگ سوسائٹی میں فی گھر دو درخت لگانے کو لازمی قرار دے دیا۔جسٹس جواد حسن نے شیخ عاصم کی درخواست پر 78 صفحات پر مشتمل تحریری فیصلہ جاری کیا جس میں درخت نہ لگانے والی ہاﺅسنگ سوسائٹیوں کے نقشے منظور نہ کرنے کا حکم دیا گیا۔عدالتی فیصلے کے مطابق درخت کاٹنے والوں کو بھاری جرمانے ہوں گے اور درخت نہ لگانے والی فیکٹریوں کی این او سی منسوخ کردی جائے گی۔جسٹس جواد حسن نے اپنے فیصلے میں واضح کیا کہ درخواستوں پر نمبر لگانا اور اس کا خیال رکھنا متعلقہ محکموں کے افسران کی ذمہ داری ہوگی اور وہ درخت لگانے کے حوالے سے سالانہ رپورٹ جاری کریں گے۔فیصلے میں حکومت پنجاب سے متعلق کہا گیا کہ پنجاب حکومت زیادہ سے زیادہ درخت لگانے کے حوالے سے آگاہی مہم چلائے اور درختوں کے حوالے سے متعلقہ قوانین میں نظرثانی کریں۔عدالت نے درخت لگانے اور کاٹنے کے لیے متعلقہ اتھارٹی سے رجوع لازمی قرار دیا۔عدالتی فیصلے کے مطابق رجسٹرار کوآپریٹو تمام ہاﺅسنگ سوسائٹیوں میں درخت لگانے کے حوالے سے واضح احکامات جاری کرنے کے پابند ہوں گے اور محکمہ جنگلات اور پی ایچ متعلقہ اداروں کو درختوں کے بارے سہولت فراہم کریں۔جسٹس جواد حسن نے فیصلے میں کہا کہ تعلیمی اداروں، ہسپتالوں، پارکنگ سمیت عوامی مقامات پر بھی درخت لگائے جائیں تاہم غیر ذمہ داری کا مظاہرہ کرنے والوں کے خلاف کارروائی کی جائے۔فیصلے میں کہا گیا کہ پاکستان کے مستقبل کا معاملہ ہےاس لیے زیادہ سے زیادہ درخت لگائے جائیں۔علاوہ ازیں عدالتی فیصلے میں درخت لگانے کے حوالے سے حکومتی پالیسی کو سراہا گیا۔سماعت میں وفاقی حکومت کی جانب سے اسسٹنٹ اٹارنی جنرل اف پاکستان سعدیہ ملک پیش ہوئیں جبکہ محکمہ ماحولیات، پی اینڈ ڈی، ایل ڈی اے اور پی ایچ اے کے نمائندے، سی ای او فاریسٹ اربن پالیسی، ایڈیشنل سیکرٹری جنگلات ،سمیت دیگر افسران پیش ہوئے۔واضح رہے کہ عمران خان نے انتخابات سے قبل پارٹی منشور میں یہ واضح طور پر کہا گیا تھا کہ کامیابی حاصل کرنے پر پارٹی ملک بھر میں 10 ارب درخت لگائے گی۔ملک میں جنگلات ختم ہو رہے ہیں۔ موسمیاتی تبدیلیوں سے محفوظ رہنے اور ماحول کو بہتر بنانے کے لیے شجرکاری مہم ضروری ہے۔پاکستان دنیا کے ان 7 ممالک میں شامل ہے جو ماحولیاتی تبدیلیوں سے سب سے زیادہ متاثر ہیں اور ان کے تباہ کن اثرات سے ہر سال ہلاکتوں میں اضافہ ہوتا جارہا ہے۔پاکستان دنیا کے ان ممالک کی فہرست میں دوسرے نمبر پر ہے جہاں جنگلات تیزی سے ختم ہو رہے ہیں۔پاکستان میں جنگلات صرف 2 سے 5 فیصد حصے پر مشتمل ہیں جو کہ اقوام متحدہ کے تجویز کردہ شرح 12 فیصد سے بہت کم ہے۔ملک کا شمار ان پہلے 6 ممالک میں بھی ہوتا ہے جو گلوبل وارمنگ سے سب سے زیادہ متاثر ہوں گے۔

لاہور (ویب ڈیسک)پاکستان میں محرم الحرام کا چاند نظر آگیا، جس کے ساتھ ہی نئے اسلامی سال 1441 کا آغاز بھی ہوگیا۔کراچی میں مرکزی رویت ہلال کمیٹی کا اجلاس چیئرمین مفتی منیب الرحمٰن کی صدارت میں ہوا، جس میں ملک کے مختلف حصوں سے چاند دکھنے کی شہادتیں موصول ہوئیں، جس کے بعد باقاعدہ اعلان کیا گیا۔مرکزی رویت ہلال کمیٹی کے مطابق یکم محرم الحرام 1441 ہجری اتوار یکم ستمبر کو ہوگی جبکہ یوم عاشور (10 محرم) منگل 10 ستمبر کو ہوگا۔واضح رہے کہ حکومت سندھ نے صوبے میں امن و امان کی صورتحال کو برقرار رکھنے کے لیے 9 اور 10 محرم کو ڈبل سواری پر بھی پابندی عائد کردی تھی۔تاہم اس پابندی کا اطلاق خواتین، 12 سال سے کم عمر بچوں، بزرگ شہریوں، صحافیوں اور باوردی قانون نافذ کرنے والے اداروں کے اہلکاروں سمیت ضروری خدمات فراہم کرنے والے ملازمین پر نہیں ہوگا۔محکمہ داخلہ سندھ کی جانب سے جاری نوٹیفکیشن میں بتایا گیا تھا کہ کرمنل پروسیجر کوڈ کی دفعہ 144 کے تحت یہ پابندی لگائی گئی۔اس کے علاوہ محرم الحرام کے جلوس، مجالس اور تعزیے کے علاوہ 5 افراد یا اس سے زائد کے ایک ساتھ اکٹھے ہونے پر پابندی لگائی گئی ہے، اس کے ساتھ ساتھ قابل اعتراض یا اشتعال انگیز وال چاکنگ، پوسٹرز، بینرز وغیرہ بھی لگانا ممنوع ہے۔علاوہ ازیں صوبائی حکومت نے یکم سے 10 محرم تک پولیس، رینجرز اور دیگر قانون نافذ کرنے والے اداروں کے باوردی اہلکاروں کے علاوہ صوبے میں ہر قسم کے اسلحے کی نمائش پر پابندی عائد کردی تھی۔

مظفرآباد(عبدالحکیم کشمیری سے)بھارت خوراک کی بندش ہتھیار کے طور پر استعمال کرنے لگا،درجنوں افراد اور شیر خوار بچوں کا خوراک اور دودھ کی قلت کی وجہ سے جاں بحق ہونے کی اطلاعات ،اہل جموں کشمیر تاریخ کی بدترین مشکلات کا شکار،طبی موت اور فورسز کی فائرنگ سے مرنے والوں کی بڑی تعداد کو دفنانا ایک المےے کی شکل اختیار کرچکا ہے۔ گھر وںمیں گل سڑی لاشوں کی بو،باہر نکلیں تو فورسز کی گولیاں،بھارتی مقبوضہ کشمیر وادی اور ملحقہ علاقوں میں لاک ڈاﺅن اور کرفیو کے چھبیسویں روز،طبی موت اور فورسز کی فائرنگ سے جاں بحق ہونے والے درجنوں لوگوں کے کفن دفن کا معاملہ سنگین صورتحال اختیار کر گیا۔کئی گھروں میں انسانی لاشوں کی بو کی وجہ سے مکینوں کی زندگی دوہرے عذاب سے دوچار ہے،گھروں میں لاشوں کی بدبو اور باہر نکلیں تو فورسز کی گولیوں کا نشانہ بنتے ہیں،5 اگست 2019 کو بھارت نے سری نگری اور ملحقہ علاقوں میں جو کرفیو لاگایا آج 31 اگست کو اُسے 26 روز ہو جائیں گے،ان 26 ایام میں طبی موت سے جاں بحق ہونے والوں کی الگ بڑی تعداد کو گھروں کے اندر قبریں بنا کر دفنایا گیا جبکہ کئی گھروں میں قبر کھودنے کے اوزار نہ ہونے کی وجہ سے میتوں سے بو آنا شروع ہو گئی ہے جس نے زندہ رہنے والوں کو ایک اور عذاب سے دوچار کر رکھا ہے۔سری نگر سے تعلق رکھنے والے مظفرآباد میں رہائش پذیر ایک شخص نے بتایا کہ اُس کے خاندان کے لوگ اُس پار رہائش پذیر ہیں مظفرآباد سے امریکہ اور امریکہ سے دہلی اور دہلی سے سری نگر سے مختصر وقت کیلئے جو رابطہ ہوا اُس کے مطابق اس وقت تک درجنوں مرنے والوں کو دفنانا زندگی کا مشکل ترین کام بن چکا ہے۔لوگ اپنے پیاروں کو گھروں کے صحن اور ڈرائنگ روم میں امانتاًد فنا رہے ہیں۔خوراک کی عدم دستیابی یا شدید قلت کی وجہ سے ماﺅں کے سینے خشک ہو چکے ہیں،جس کی وجہ سے شیر خوار بچوں کی ایک بڑی تعداد کے مرنے کی اطلاعات ہیں،کئی لوگوں کے گھروں سے جمع شدہ راشن ختم ہو چکا ہے،بھوک نے ڈیرے ڈال رکھے ہیں،سینکڑوں لوگ آہستہ آہستہ موت کے منہ کی طرف جا رہے ہیں،خوف کی ناقابل بیان کیفیت نے سری نگر اور ملحقہ علاقوں کو اپنے حصار میں لے رکھا ہے،اس کے باوجود کئی علاقوں میں شدید مزاحمت جاری ہے،سری نگر سے آنے والے کچھ ویڈیو کلپس یہ ثابت کرتے ہیں کہ کشمیر کی نوجوان نسل بھارتی فوج کے جبر سے خوف زدہ نہیں،انتہائی دلیری سے بکتر بند گاڑیوں کے سامنے آ کر اُن پر پتھر پھینکنا،ڈنڈوں سے گاڑیوں پر حملہ آور ہونا اور گولیوں کی کھن گرج میں سینہ تان کر پتھروں اور ڈنڈوں سے مسلح دشمن پر حملہ آور ہونا معمول ہے،خوفناک صورتحال یہ ہے کہ بھارت خوراک کی بندش کو ہتھیار کے طور پر استعمال کر رہا ہے جس سے ہزاروں لوگ زندگی اور موت کی کشمکش میں ہیں،کرفیو اور لاک ڈاﺅن کے چوتھے ہفتے میں اہل جموں کشمیر کا بھارتی مسلح افواج کے ساتھ ساتھ اب بھوک سے بھی مقابلہ ہے۔

پشاور: (ویب ڈیسک) حکومت خیبر پختونخوا نے اعلان کیا ہے کہ مرکزی رویت ہلال کمیٹی پاکستان کی طرف سے چاند دیکھنے کے اعلان کے بعد یکم محرم الحرام 1441 ہجری کو عام تعطیل ہوگی۔ اس امر کا اعلان حکومت خیبر پختونخوا کی جانب سے جاری کردہ اعلامیہ میں کیا گیا۔ادھر حکومت بلوچستان نے دفعہ 144 کا نفاذ کرتے ہوئے کوئٹہ سمیت صوبہ بھر میں ڈبل سواری پر پابندی عائد کر دی، پابندی کا اطلاق یکم محرم سے 10 محرم الحرام تک ہوگا۔ ڈبل سواری پر پابندی کے علاوہ ہر قسم کے اسلحہ کی نمائش، پوسٹرز اور وال چاکنگ پر بندی عائد کی گئی ہے۔سرکاری اعلامیے کے مطابق ماتمی جلوسوں کی راستے اور امام بارگاہوں کے قریب کی دکانو ں اورمکانات کی انتظامیہ سے اجازت لئے بغیر کرایہ داری پر بھی مکمل پابندی عائد کر دی گئی۔ اعلامیہ میں کہا گیا کہ ہرقسم کے نفرت انگیز مواد، کتابیں، میگزین اور کیسٹس کی فروخت پر بھی پابندی ہوگی۔ماتمی جلوس کے دوران ہر قسم کے بھکاریوں اور بھیک مانگنے پر بھی پابندی ہوگی۔ اس کے علاوہ شعلہ بیانی اور نفرت انگیز تقاریر کرنے والے 4 علماکی کوئٹہ میں داخلے پر بھی 10 دن تک پابندی ہوگی۔