لاہور(خصوصی رپورٹ)وزیر قانون پنجاب رانا ثنا اللہ نے کہا ہے پنجاب حکومت نے سانحہ ماڈل ٹاون کے متاثرین کو 10 کروڑ معاوضہ ادا کرنے کی پیشکش کی تھی ،عوامی تحریک کی جانب سے کہا گیا کہ آپ ہمیں بیرون ملک ادائیگی کر دیں جس کے بعد ہمارے اور ان کے مذاکرات ٹوٹ گئے ، عوامی تحریک کی ڈھٹائی کی وجہ سے معاملہ کھٹائی میں پڑ گیا۔ انہوں نے کہاعوامی تحریک کی جانب سے کبھی بھی سانحہ کے حوالہ سے سنجیدگی ظاہر نہیں کی گئی جس کا ثبوت ڈیڑھ سال بعد ان کی جانب سے آنے والا استغاثہ تھا جس میں انہوں نے ایک ایسے خیالی اجلاس کو بنیاد بنایا جس میں نوازشریف، شہبازشریف سمیت حکومت کے تمام ذمہ دار اور خود اپنی جماعت کے خرم نواز گنڈاپور سے ملاقات کا حوالہ دیااور کہا گیا کہ انہیں دھمکیاں دی گئیں، دنیا کی کوئی ایجنسی ایسی کسی ملاقات کی تصدیق نہیں کر سکتی،عوامی تحریک کی آل پارٹیز کانفرنس سانحہ ماڈل ٹاون کے متاثرین کیلئے نہیں سیاست چمکانے کیلئے ہے ، اسلام آباد دھرنا میں بھی طاقت کے استعمال کے خلاف تھے ،اگر آپریشن کیا جاتا تو دو تین گھنٹے میں مکمل کر لیا جاتا ایسا نہیں ہوا جس کے نتیجہ میں زاہد حامد کو استعفی دینا پڑا لیکن پنجاب میں ایسا نہیں ہو گا ۔ پنجاب اسمبلی کے کیفے ٹیریا میں میڈیا سے گفتگو کرتے ہوئے انہوں نے کہا عمران اور زرداری وہ شکاری ہیں جو خود نہیں قادری کو کنٹینرپر بٹھاناچاہتے ہیں ،ان شکاریوں کا ایجنڈا ملک میں انتشار اور افراتفری پھیلانا ہے ،فوج کے پیرائے میں ڈی جی آئی ایس پی آر میجر جنرل آصف غفور کا بیان بالکل درست ہے ،خواجہ سعد رفیق اور خورشید شاہ کے بیان کی بھی مکمل حمایت کرتاہوں، سعد رفیق نے فوج کے متعلق کوئی ایسی بات نہیں کی،سانحہ ماڈل ٹاون کا فیصلہ عدالت نے کر ناہے ،سڑکوں چوراہوں پر نہیں ہوگا، شہبازشریف کا دورہ سعودی عرب مسلم امہ کے معاملات سے متعلق ہے ، اس وقت مسلم امہ کے اتحاد کی اشد ضرورت ہے ، نواز شریف پاکستان کے ہی نہیں امت مسلمہ کے لیڈر ہیں، سعودی عرب میں کوئی این آر او نہیں ہورہا،یہ کنویں کے مینڈک ہیں جو این آر او کا واویلا کر رہے ہیں،علامہ حمید الدین سیالوی کی مدد نہیں کرسکتا ،دعاگو ہوں اللہ ان کی مشکلات حل کرے ، سینیٹ اور عام انتخابات اپنے اپنے وقت پر ہونگے ،پنجاب میں افراتفری کی صورتحال پیدا کرنے کی کوشش کی جا رہی ہے ،نواز شریف کو حکومت سے علیحدہ کرنے کے باوجود ان کی مقبولیت کم نہیں ہوئی۔ دریں اثنا دوسری جانب عوامی تحریک کے رہنما خرم نواز گنڈا نے رانا ثنا کے الزامات کو مسترد کرتے ہوئے انہیں جھوٹا قرار دیا۔ انہوں نے کہا قاتل حکومتی ٹولہ شہداءکے غریب ورثاءکا جوتا بھی نہیں خرید سکتا۔ پریس کانفرنس کرتے ہوئے رانا ثناءاللہ نے کہا سعد رفیق نے پاک فوج کے خلاف بات نہیں کی۔ پاک فوج پاکستان کا فخر اور ہماری نظریاتی و جغرافیائی سرحدوں کی محافظ ہے۔سعدرفیق نے کسی کے خلاف بیان نہیں دیا۔ ان کا موقف ہمارا ہے۔ باقر نجفی رپورٹ عوام کے لئے جاری کردی۔ اگر رپورٹ سے کچھ نکلتا ہے تو طاہر القادری عدالت جائیں‘ عدلیہ آزاد اور خودمختار ادارہ ہے۔ کچھ شکاری طاہر القادری کا کندھا استعمال کرنا چاہتے ہیں۔ دھرنے والے نہیں چاہتے کہ ملک سے لوڈشیڈنگ اور دہشت گردی کا خاتمہ ہو۔ پنڈی کا شیطان روز کچھ نہ کچھ کہتا اور شکوک و شبہات پیدا کرتا ہے۔ سینٹ الیکشن اور عام انتخابات وقت پر ہوں گے۔ میری وزارت کا فیصلہ وزیراعلیٰ نے کرنا ہے۔

سرگودھا(اے این این)حکومت پنجاب اور پیر حمید الدین سیالوی کے درمیان مذاکرات ناکام ہو گئے ، حکومتی کمیٹی نے رانا ثناءاللہ کے استعفے پر اپنیمعذوری ظاہر کردی جبکہ پیرحمید الدین اپنے موقف پر چٹان کی طرح ثابت قدم ہیں۔ذرائع کے مطابق حالات کو اپنی مخالفت میں جاتا دیکھ کر حکومت پنجاب نے پیر حمید الدین سیالوی سے مذاکرات کیلئے دو رکنی کمیٹی بنائی تھی جو پیر حمید الدین سیالوی کے ساتھ اندرون خانہ مذاکرات کررہی تھی تاہم تازہ ترین اپ ڈیٹ کے مطابق دونوں جانب سے ایک بار پھر معاملات طے نہیں ہوسکے اور پنجاب حکومت کی جانب سے بھیجے گئے نمائندوں کی جانب سے رانا ثناءاللہ کے استعفے پر معذوری ظاہر کی گئی جس پر پیر حمید الدین سیالوی نے کہا کہ وہ رانا ثناءاللہ کے استعفے کے مطالبے سے ایک انچ پیچھے نہیں ہیں گے اور جب تک رانا ثناءاللہ استعفیٰ نہیں دیتے ہمارا احتجاج جاری رہے گا ۔ذرائع بتایا کہ قادیانیوں کے حق میں بیان کے بعد حکومتی اتحاد ی پیر حمید الدین سیالوی نے حکومت سے علیحدگی کا اعلان کر رکھا اور حکومت کو سوچ بچارکے لیے کچھ وقت بھی دیا تھا لیکن حکومت پیر حمید الدین سیالوی کے مطالبات پورے کرنے میں بھی تک ناکام نظر آرہی ہے اور پیر حمید الدین سیالوی صوبائی وزیر قانون کے استعفے پر ڈٹ گئے۔

اسلام آباد (مانیٹرنگ ڈیسک) وزیر خزانہ اسحاق ڈار نے کہا ہے کہ کسی کےلئے کوئی این آر او نہیں ہونا چاہیے، اگر دامن صاف ہو تو کسی این آر او کی ضرورت نہیں ہوتی۔ عمران خان الزامات لگانے کے پرانے عادی ہیں، جو الزام لگائے وہ جھوٹے اور بے بنیاد ہیں، مجھ پر ایک روپے کی بھی کرپشن ثابت ہو جائے تو پھانسی دیدی جائے۔ نجی ٹی وی سے خصوصی گفتگو کرتے ہوئے اسحاق ڈار نے کہا کہ جنوری کے پہلے ہفتے ہسپتال داخل ہونا ہے، علاج کے سلسلہ میں میری گردن پر ٹیکے لگنے ہیں۔ خواہش ہے کہ جلد صحت یاب ہو کر وطن واپس پہنچ جاﺅں۔ 2002سے 2004 تک میں پاکستان میں ٹیکس نان ریذیڈنٹ تھا کیونکہ میں یو اے ای میں تھا اسی دوران میرے بیٹے نے جو وہاں پر پراپرٹی، ٹریڈنگ کا کاروبار کرتا ہے نے 2007میں ولاز خریدے نہیں تھے بلکہ بک کئے تھے پھر انہیں بیچ دیا گای تھا۔ کاروباری لوگ جانتے ہیں کہ اس طرح کے سودوں میں خریدے بغیر بھی کام کیا جا سکتا ہے۔ میں یواے ای میں تھا اسی لئے ڈائریکٹر کی حیثیت سے دستخط کئے مجھے علی ڈار کے بزنس کی تفصیل معلوم نہیں اس لئے اس سے پوچھا تو پتہ چلا۔ عمران خان نے چار سال سے ملک میں تماشہ لگا رکھا ہے۔ شریف فیملی سے میرا کوئی کاروباری تعلق نہیں ہے۔ ان کی بیٹی میری بہو ہے۔ میرے دونوں بیٹے یواے ای میں قانون کے مطابق کاروبار کرتے ہیں۔ جس کا باقاعدہ آڈٹ ہوتا ہے۔ اسحاق ڈار نے کہا کہ کوی این آر او نہیں ہونا چاہیے نہ ہی اس کی ضرورت ہونی چاہیے۔ شہباز شریف سعودیہ گئے ہیں نواز شریف بھی میڈیا کے بقول جا رہے ہیں تو یہ محض اتفاق بھی ہو سکتا ہے۔ میری کئی دن سے نواز شریف سے بات نہیں ہوئی اس لئے لاعلم ہوں۔ نواز شریف ہی ہمارے صدر و وزیراعظم ہیں، شہباز کووزیراعظم کےلئے نامزد کرنا پارٹی کا اختیار ہے۔

اسلام آباد(آن لائن) پیپلز پارٹی اور تحریک انصاف میں شریف خاندان کے خلاف حدیبیہ کیس میں نظر ثانی اپیل دائر کرنے پر اتفاق ہوگیا۔۔ ذرائع کے مطابق دونوں جماعتوں کے سینئر رہنماو¿ں میں غیر رسمی مشاورت ہوئی جس میں اکٹھے یا الگ الگ نظر ثانی کے لئے سپریم کورٹ سے رجوع کرنے پر غور کیا گیا۔پیپلز پارٹی ذرائع کے مطابق اس معاملے پر دونوں جماعتوں کا یکساں موقف ہے اور کوئی بھی عدالت جا سکتا ہے، اس حوالے سے جلد فیصلہ ہو جائے گا، گڑھی خدا بخش جلسے میں اعتزاز احسن بھی اس بارے میں اشارہ دے چکے ہیں اور انہوں نے قانونی پہلو اٹھایا تھا کہ فوجداری مقدمہ کبھی بھی کھل سکتا ہے۔ذرائع کے مطابق اعتزاز کی تقریر سے پہلے آصف زرداری نے انہیں یہ بات کہنے کی خاص ہدایت بھی کی تھی۔ آج طاہر القادری اور آصف زرداری کی ملاقات ہوگی جس میں حدیبیہ کیس بھی ایجنڈے میں شامل ہے۔ آصف علی زرداری نے طاہرالقادری سے ملاقات سے پہلے پارٹی کا مشاورتی اجلاس طلب کرلیا ہے اور بلاول ہاو¿س میں پی پی پی قیادت مشاورت کرے گی۔ مشاورتی اجلاس میں خورشید شاہ , قمرزمان کائرہ، رحمن ملک، سردار لطیف کھوسہ اور منظور وٹو شریک ہوں گے۔واضح رہے کہ رواں ماہ سپریم کورٹ نے شریف خاندان کے خلاف حدیبیہ کیس کو دوبارہ کھولنے سے متعلق نیب کی اپیل مسترد کردی تھی۔