کولمبو(نیوزایجنسیاں)سری لنکن ٹیم پاکستان کی جانب سے سکیورٹی انتظامات سے انتہائی متاثر ہوئی ہے اور اب سری لنکا انڈر 19 اور اے ٹیم کو بھی جلد پاکستان بھیجے گا۔کولمبو میں صحافیوں سے گفتگو کرتے ہوئے سری لنکن کرکٹ بورڈ کے چیف ایگزیکٹور ایشلے ڈی سلوا نے کہا کہ ان کی ٹیم قذافی اسٹیڈیم میں سیکیورٹی کے شاندار انتظامات سے بہت متاثر ہوئی ہے، پاکستان میں ہمیں وہی سیکیورٹی فراہم کی گئی جس کا ہم سے وعدہ کیا گیا تھا، اور ہم ان انتظامات سے پوری طرح مطمئن ہیں۔ پاکستان ہمارے فیوچر ٹور پلان میں شامل نہیں، تاہم فوری طور پر اے ٹیم اور انڈر 19 ٹیم کو پاکستان بھیجیں گے۔واضح رہے اس سے قبل سری لنکن کرکٹ بورڈ کے صدر سماتھی پالا نے لاہورآنے پر کہا کہ پاکستان آ کر بہت خوش ہیں، ہم یہاں شائقین کیلئے آئے ہیں اور دوبارہ بھی آئیں گے۔ انہوں نے کہا کہ پاکستان کرکٹ کا ایک بہت بڑا ملک ہے، اسے نظر انداز نہیں کر سکتے، پاکستان کھیلوں سے محبت کرنے والا ملک ہے، یہاں باصلاحیت کرکٹرز موجود ہیں۔سماتھی پالا نے کہا کہ سری لنکا نے 1996 میں ورلڈ کپ یہیں جیتا تھا اور سری لنکن ٹیم جلد دوبارہ بھی دورہ کرے گی۔

دبئی (اے پی پی) بھارت ویمن ٹیم کی کپتان اور سٹار بلے باز میتھالی راج نے انٹرنیشنل کرکٹ کونسل (آئی سی سی) کی تازہ ترین ویمنز ون ڈے پلیئرز رینکنگ میں بلے بازوں میں آسٹریلوی بلے باز میگ لیننگ سے ٹاپ پوزیشن چھین لی، انگلش وکٹ کیپر سیرا ٹیلر دو سیڑھیاں چڑھ کر ٹاپ ٹین میں شامل ہو گئیں، آسٹریلوی باﺅلر میگن سکٹ 13 درجے ترقی کے ساتھ کیریئر بہترین چوتھے نمبر پر آ گئیں۔ آئی سی سی کی طرف سے جاری کردہ تازہ ترین ویمنز ون ڈے پلیئرز رینکنگ میں بلے بازوں میں میتھالی راج نے دنیا کی نمبر ایک بلے باز ہونے کا اعزاز پا لیا، انہوں نے لیننگ سے پہلی پوزیشن چھینی ہے، لیننگ تنزلی کے بعد چوتھے نمبر پر چلی گئیں، آسٹریلیا کی علیزے پری اور نیوزی لینڈ کی ایمی سیٹرتھویٹ ایک، ایک درجہ اوپر چڑھ کر دوسرے اور تیسرے نمبر پر آ گئیں، انگلینڈ کی وکٹ کیپر سیرا ٹیلر دو درجے ترقی کے ساتھ ٹاپ ٹین میں شامل ہو گئیں، باﺅلرز میں جنوبی افریقہ کی مریزن کیپ پہلی پوزیشن پر موجود ہیں۔، جھولن گوسوامی دوسرے اور ویسٹ انڈیز کی سٹیفنی ٹیلر تیسرے نمبر پر موجود ہیں، آسٹریلیا کی میگن سکٹ 13 درجے ترقی پا کر کیریئر بہترین چوتھے نمبر پر آ گئیں جبکہ انگلینڈ کی آنیا شربسول ایک سیڑھی چڑھ کر کیریئر بہترین چھٹی پوزیشن حاصل کر لی۔ آل راﺅنڈرز میں علیزے پری پہلے نمبر پر قبضہ جمائے ہوئے ہیں۔

لاہور(نیوزایجنسیاں) پاکستان کرکٹ بورڈ کے چیئرمین نجم سیٹھی پی ایس ایل تھری کا فائنل کراچی میں کرانے کے خواہاں ہیں، اس حوالے سے حتمی فیصلے کے لئے ڈائریکٹرز سے مشاورت شروع کر دی گئی ہے۔لاہور میں میڈیا سے گفتگو کرتے ہوئے انہوں نے کہا کہ پی ایس ایل کے دو پلے آف لاہور میں کرانے کی تجویز ہے جب کہ فائنل کراچی میں کرانا چاہتے ہیں، اس سلسلے میں پاکستان سپر لیگ کے ڈائریکٹرز سے مشاورت کاسلسلہ شروع کردیا گیاہے، ویسٹ انڈیز کے دورہ کے شیڈول کے حوالے سے انہوں نے بتایا کہ دورے کا اعلان آئندہ دو چار روز میں کر دیا جائے گا۔واضح رہے کہ پی ایس ایل کے تیسرے ایڈیشن کا فروری میں آغاز ہو گا، اس ٹورنامنٹ کے متعدد میچز پاکستان میں کروانے کا پہلے ہی اعلان کیا جا چکا ہے۔ کراچی کے گزشتہ دورے میں نجم سیٹھی نے اعلان کیا تھا کہ پی ایس ایل کے 4 میچز کراچی میں کروائیں گے تاہم اب چیئرمین پی سی بی پی ایس ایل کا فائنل کراچی میں کروانے کے خواہشمند ہیں۔ اور ساتھ ہی 2 پلے آف لاہور میں کرانے کی تجویز ہے۔ایک سوال کے جواب میں نجم سیٹھی کا کہنا تھا کہ بھارت انڈر 19 کپ میں شرکت کرے یا نہ کرے لیکن ٹورنامنٹ اپریل میں پاکستان میں ہی ہوگا۔

لاہور (مانیٹرنگ ڈیسک) سابق ٹیسٹ کرکٹ اکرم رضا نے کہا کہ کرکٹ ٹیم کا ڈومیسٹک ڈھانچہ بس تلے سے ہی چل رہا ہے۔ ٹیم میں کوئی خاص نظم و ضبط نہیں چینل ۵ کے پروگرام گگلی میں گفتگو کرتے ہوئے انہوں نے کہا بے شمار انڈر 19اور انڈر 16 میچز ہوتے ہیں لیکن کوئی باقاعدہ پلان نظر نہیں آتا اور نہ ہی یہ طے کیا جاتا ہے کہ سال میں کتنے میچز ہونگے اور کتنے ماہ کھلاڑیوں کو آرام دیا جائے گا۔ ڈومیسٹک میں جو لوگ کام کررہے ہیں وہ اس کے ذمہ دار ہیں۔ سپورٹس جرنلسٹ نوفل اویس شاہد نے کہا کہ میں نے بھی مشاہدہ کیا ہے کہ پی سی بی کوئی کام پلان کرکے نہیں کرتا اس کے نتیجے میں پاکستان کرکٹ کا مستقبل بہتر ہوتا نظر نہیں آتا جو نوجوان کلب کی سطح پر کھیلتے ہیں ان کو مناسب سامان میسر نہ ہونے سے نیا ٹیلنٹ آگے نہیں آسکتا اگر اتنی ساری تنخواہیں لینے والے ذمہ داری نہیں لے سکتے تو پھر گھر جائیں۔