مسلم لیگ (ن) کے رہنما عطاء اللہ تارڑ نے بانی تحریک انصاف (پی ٹی آئی) عمران خان اور ان کی اہلیہ بشریٰ بی بی کو توشہ خانہ کیس میں سزا سنائے جانے پر تبصرہ کرتے ہوئے کہا ہے کہ آج پاکستان کی تاریخ میں ایک اہم دن ہے، احتساب کا عمل آگے بڑھا ہے۔

لاہور میں پریس کانفرنس کرتے ہوئے عطاء اللہ تارڑ نے کہا کہ عمران خان اور بشریٰ بی بی نے توشہ خانہ سے تحائف خریدے، خود کو مسٹر کلین کہنے والے کرپشن کرتے رہے۔

انہوں نے کہا کہ ریاستِ مدینہ کے نام پر کرپشن کی داستانیں رقم کیں، بانی پی ٹی آئی کے اقدامات سے پاکستان کا تاثر خراب ہوا اور جگ ہنسائی ہوئی۔

عطاء اللہ تارڑ نے مزید کہا کہ بانی پی ٹی آئی نے بیرون ملک سے آنے والے تحائف بلیک مارکیٹ میں فروخت کیے، عمران خان اور بشریٰ بی بی نے تحائف اونے پونے داموں خریدے، اونے پونے داموں خریدے تحائف کو مارکیٹ میں بیچا گیا۔

انہوں نے کہا کہ تحائف کی مالیت کم ظاہر کرکے بلیک مارکیٹ میں مہنگے داموں بیچا، برطانوی کمپنی گراف کے تحائف پر آج سزا ہوئی ہے، گراف کے سیٹ کا تخمینہ 3 ارب تھا۔

ان کا کہنا تھا کہ تحائف کی اربوں روپے قیمت کہیں اور سے وصول کی جاتی تھی، سعودی ولی عہد کی جانب سے دی گئی گھڑی کو بلیک مارکیٹ میں فروخت کیا گیا، جو تحائف دوست ممالک کی جانب سے ملیں وہ فروخت کرنے کیلئے نہیں ہوتے، دوست ممالک کےتحائف کی روایتی اقدار ہوتی ہیں۔

انہوں نے کہا کہ ان کے جرائم بے شمار ہیں، تحائف کی ویلیو کم لگوائی گئی، آپ نے خانہ کعبہ کے ماڈل والی گھڑی کو بھی نہیں بخشا اسےبھی بیچ دیا، نایاب تحفہ مارکیٹ میں دستیاب نہیں ہوتا، گھڑی کی قیمت 90 کروڑ سے ایک ارب تک لگی، گھڑی میں جوہیرے جواہرات ہیں ان کی ایک اپنی ویلیو ہے، گھڑی کی قیمت مقامی سطح پر 10 کروڑ روپے لگوائی گئی اور 5 کروڑ جمع کرایا گیا، گھڑی کو بلیک مارکیٹ میں 90 کروڑ کا بیچا گیا۔

لاہور کی انسداد دہشت گردی عدالت نے سابق پی ٹی آئی رہنما فواد چوہدری کو اشتہاری قرار دینے کا حکم کالعدم قرار دے دیا۔

انسداد دہشتگردی عدالت کے جج محمد نوید اقبال نے فواد چوہدری کی درخواست پر فیصلہ جاری کیا۔ فواد چوہدری کے وکیل ظفر اقبال ایڈوکیٹ نے دلائل دیے۔

درخواست میں مؤقف دیا کہ فواد چوہدری کو پیش نہ ہونے کی بنیاد پر دو مقدمات میں اشتہاری قرار دیا گیا۔

ماڈل ٹاؤن تھانہ کے مقدمہ نمبر 366/23 میں 9 دسمبر 2023 کو اور مقدمہ نمبر 367/23 میں 12 دسمبر 2023 کو اشتہاری قرار دیا گیا۔

فواد چوہدری 4 نومبر 2023 سے اڈیالہ جیل راولپنڈی میں قید ہیں اور زیر حراست ملزم کو اشتہاری قرار نہیں دیا جا سکتا ہے۔

درخواست میں استدعا کی گئی کہ عدالت دونوں مقدمات میں اشتہاری قرار دینے کے حکم کو کالعدم قرار دے۔

دوسری جانب، عدالت نے فواد چوہدری پر درج تمام مقدمات میں ایک ساتھ گرفتاری ڈالنے کا حکم دیتے ہوئے 9مئی کی جے آئی ٹی کے سربراہ کو تمام مقدمات کی تفصیلات فراہم کرنے کا حکم بھی دیا۔

درخواست میں مؤقف تھا کہ پولیس نے نو مئی کے بعد مختلف مقدمات درج کیے ہیں اور ایک مقدمے سے ضمانت پر دوسرے میں گرفتار کر لیا جاتا ہے، ایک مقدمے کے بعد دوسرے مقدمے میں گرفتاری ڈال دی جاتی ہے۔

استدعا کی گئی کہ عدالت 9 اور 10 مئی کے مقدمات کی تفصیلات فراہم کرنے کا حکم دے اور فواد چوہدری پر درج تمام مقدمات میں ایک ساتھ گرفتاری ڈالنے کا حکم دے۔

سینٹرل جیل میں قیدیوں سے اہل خانہ کی ملاقات کا نظام آن لائن کردیا گیا ہے۔

حکام کے مطابق جیل کا نظام جدید خطوط پر استوار کرنے کا سلسلہ جاری ہے، جس میں گزشتہ روز قیدیوں کی عدالت میں ویڈیو لنک کے ذریعے پیشی کے نظام کا افتتاح گزشتہ روز کیا گیا تھا اور اب قیدیوں سے ملاقات کا نظام آن لائن کیے جانے کے بعد موبائل ایپلی کیشن کی معاونت سے اپوائنٹمنٹ لے کر قیدیوں کے اہل خانہ ملاقات کر سکیں گے۔

قیدیوں کے اہل خانہ آن لائن اپوائنٹمنٹ لے کر ملاقات کے لیے جیل آ سکیں گے۔

سینٹرل جیل کراچی میں نیا نظام متعارف کرانے کے لیے خصوصی موبائل ایپلی کیشن تیار کی گئی ہے۔

دور دراز سے آنے والے ملاقاتی یا رش کی وجہ سے عوام یہ سہولت استعمال کرسکتے ہیں۔

ملاقات کے لیے آنے والا شخص ایپ کے ذریعے اپنے کوائف درج کر کے ملاقات کا وقت حاصل کرے گا۔

اسسٹنٹ سپرنٹنڈنٹ جیل مصباح الدین کا کہنا ہے کہ بیورو آف انٹرنیشنل نارکوٹکس اینڈ لا انفورسمنٹ ایجنسی امریکا کے تعاون سے یہ پروگرام تیار کیا گیا ہے۔

وزیر داخلہ سندھ نے آن لائن اپوائنٹمنٹ سے متعلق بنائے گئے منصوبے کا افتتاح کردیا۔

ملاقات کے لیے آنے والے افراد کی رہنمائی اور ویری فکیشن کے لیے جیل کے مرکزی دروازے کے قریب 5 بوتھ بھی بنائے گئے ہیں۔

وزیر داخلہ سندھ بریگیڈیئر (ریٹائرڈ) حارث نواز کا اس حوالے سے کہنا ہے کہ آئی این ایل کے تعاون سے اس منصوبے کا آغاز ہوا ہے، جس پر ہم اس کے شکر گزار ہیں۔ انہوں نے کہا کہ یہ منصوبہ بہت پہلے بنانے کی ضرورت تھی۔ قیدیوں کے لواحقین کو بہت زیادہ تکلیف تھی ۔ 4 سے 5 گھنٹے انتظار کرنا پڑتا تھا ۔

انہوں نے کہا کہ ملاقات کے لیے آنے والوں کو 2 دن پہلے ٹائم لینا ہوگا ، اور وہ اپنی ضروری تفصیلات درج کروا کر ٹائم لے سکتے ہیں۔ اس سے سینٹرل جیل میں قیدیوں سے ملاقات کے لیے آنے والوں کی مشکلات کم ہوں گی۔ ہم دیگر جیلوں تک بھی اس منصوبے کو توسیع دیں گے۔

اسلام آباد: پاکستان نے گیس سیکٹر میں 30 ارب ڈالر کی ملکی و غیر ملکی سرمایہ کاری کیلیے راہ ہموار کردی۔

گیس سیکٹر میں 30 ارب ڈالر کی ملکی و غیر ملکی سرمایہ کاری کی راہ ہموار کرنے کیلیے مشترکہ مفادات کونسل ( سی سی آئی) نے گیس سیکٹر سے متعلق پالیسی میں اہم تبدیلیوں کی منظوری دے دی، جس سے گیس سیکٹر میں ملکی و غیر ملکی سرمایہ کاری لانے کی راہ ہموار ہوگی۔

گیس سیکٹر سے متعلق پالیسیوں میں تبدیلی کا مقصد توانائی کے شعبے کے امپورٹ بل کو کم کرنا ہے، جو کہ اگلے سات سالوں میں ڈبل ہو کر 31 ارب ڈالر تک پہنچنے کا اندیشہ ہے، اگر اس پر عمل ہوجائے تو یہ انرجی سیکٹر میں سی پیک کے منصوبوں سے بھی بڑی سرمایہ کاری ہوگی، واضح رہے کہ سی پیک کے تحت انرجی منصوبوں میں 20 ارب ڈالر کی سرمایہ کاری کی گئی ہے۔

وزیرتوانائی محمد علی نے اس حوالے سے کہا کہ پاکستان کے پاس 235 ہزار ارب کیوبک فیٹ گیس کے ذخائر موجود ہیں، جن میں سے 10 فیصد کو 25 سے 30 ارب ڈالر کی سرمایہ کاری سے اگلے دس سالوں کے دوران ایکسپلور کیا جاسکتا ہے جس سے گیس کی گرتی ہوئی پیداوار پر قابو پا کر گیس کی امپورٹ سے بچا جاسکتا ہے۔

انھوں نے کہا کہ مشترکہ مفادات کونسل نے اس مقصد کیلیے سرمایہ کاروں کو راغب کرنے کیلیے گیس سیکٹر سے متعلق پالیسیوں میں تبدیلیوں کی منظوری دی ہے، وزیر توانائی نے کہا کہ 30 ارب ڈالر کی سرمایہ کاری سے قدرتی گیس، ٹائٹ گیس، شیل گیس، آف شور گیس اور کروڈ آئل کی پیداوار کے ذریعے 165 ارب ڈالر کا فائدہ ہوگا۔

توقع ہے کہ آف شور آئل اور گیس کی پیداوار کیلیے رواں سال جون میں نیلامی کا انعقاد کیا جائے گا، جس کے لیے حکومت نے بنیادی تیاریاں مکمل کرلی ہیں، انھوں نے بتایا کہ سی سی آئی نے پیٹرولیم ڈویژن کی تجاویز کی منظوری بھی دے دی ہے۔

سی سی آئی نے پیٹرولیم پالیسی 2012 کے تحت ٹائٹ گیس ایکسپلوریشن کیلیے مراعات میں اضافہ کرتے ہوئے 40 فیصد پریمیم کی منظوری بھی دی ہے، جبکہ منظور کی گئی نئی پالیسی کا اطلاق موجودہ لائسنس یافتگان اور نئے سرمایہ کاروں دونوں پر یکساں ہوگا۔

وزیر توانائی نے کہا کہ موجودہ پالیسی میں پیراڈائم شفٹ لاتے ہوئے کمپنیوں کو اپنی پیداوار کا 35 فیصد پرائیویٹ سیکٹر کو فروخت کرنے کا اختیار بھی دیا گیا ہے، جو کہ پہلے محض 10 فیصد تھا، اس کا مقصد سوئی گیس ڈسٹریبیوشن کمپنیوں کی اجارہ داری کو ختم کرنا ہے، نیچرل گیس ویل ہیڈ پرائس ریگولیشن 2009 میں بھی ترمیم کی گئی ہے۔

کویت فارن پیٹرولیم ایکسپلوریشن کمپنی کے کنٹری مینیجر علی طحہٰ التمیمی نے کہا کہ 2023 میں پاکستان کا انرجی امپورٹ بل 17.5 ارب ڈالر تھا، جو کہ 2031 تک بڑھ کر 31 ارب ڈالر ہونے کا تخمینہ ہے، جبکہ 2048 تک یہ 60 ارب ڈالر ہوجائے گا، پاکستان اس وقت اپنی ضروریات کا 29 فیصد گیس، 85 فیصد آئل، 20 فیصد کوئلہ اور 50 فیصد ایل پی جی امپورٹ کرتا ہے۔

ماڑی پیٹرولیم کے منیجنگ ڈائریکٹر فہیم حیدر نے کہا کہ گشتہ تین سالوں کے دوران پیداوار میں 350 ایم ایم سی ایف ڈی کا اضافہ ہوا ہے جبکہ صرف ایک سال کے دوران ہی اتنی کمی واقع ہوچکی ہے، سیکریٹری پیٹرولیم مومن آغا نے کہا کہ مقامی گیس کی قیمت امپورٹڈ گیس کے مقابلے میں نصف ہے۔

توشہ خانہ ریفرنس میں عمران خان اور بشریٰ بی بی کو سزائیں سنائے جانے کے بعد اڈیالہ جیل کی سیکورٹی بڑھا دی گئی ہے۔

راولپنڈی پولیس نے اڈیالہ جیل کی بیرونی سیکورٹی میں مزید اضافہ کردیا ہے۔

جیل کے اطراف میں مزید سیکورٹی اہلکار تعینات کردیے گئے ہیں۔

عمران خان اور بشریٰ بی بی ’کینگروٹرائل‘ سے گزرے، پی ٹی آئی

اڈیالہ جیل کے اطراف گشت کو بھی مزید مؤثر بنایا گیا ہے۔

سینئر افسران وقتاً فوقتاً سیکورٹی انتظامات کا جائزہ لے رہے ہیں۔

پاکستان تحریک انصاف (پی ٹی آئی) کے رہنما بیرسٹر گوہر علی خان کا کہنا ہے کہ احتساب عدالت نے ماضی میں ایسا فیصلہ کبھی نہیں دیا، یہ ظلم ہوا ہے۔

بیرسٹر گوہر کا کہنا تھا کہ ایک لیڈر کو خوش کرنے کے لیے سزائیں دی جارہی ہیں، وکیل کے ہوتے ہوئے جرح کی اجازت نہیں دی گئی۔