اسلام آباد: (ویب ڈیسک) وفاقی وزیر دفاع خواجہ آصف نے کہا ہے کہ پنجاب اور کے پی میں کچھ لوگ ہیں جو نہیں چاہتے اسمبلیاں ٹوٹے۔ پی ٹی آئی کے کچھ لوگ رابطے میں ہیں۔
دنیا نیوز سے خصوصی گفتگو کرتے ہوئے وفاقی وزیر دفاع نے کہا کہ اسمبلیاں تحلیل کرنے کے معاملے پر پاکستان تحریک انصاف (پی ٹی آئی) کے چیئر مین اور سابق وزیراعظم عمران خان کا فیصلہ آنے دیں، اس کے بعد حکمت عملی بنائی جاسکتی ہے۔
انہوں نے کہا کہ تحریک انصاف کا حتمی فیصلہ ایک دو روز یا جمعہ تک آ جائے گا، اس سے پہلے میں کیا پیش گوئی کرسکتا ہوں، اگر کوئی حکمت عملی ہماری ہے تو وہ میں میڈیا پر تو نہیں بتاؤں گا۔ پی ٹی آئی کے کچھ لوگ رابطے میں ہیں۔
خواجہ آصف نے مزید کہا کہ پنجاب اور کے پی میں کچھ لوگ ہیں جو نہیں چاہتے اسمبلیاں ٹوٹے، ظاہر بات ہے پارلیمنٹرین تو نہیں چاہتے وقت سے پہلے ان کی چھٹی ہو جائے۔
خیال رہے کہ چند روز قبل سابق وزیراعظم عمران خان نے اعلان کیا تھا کہ ہم اس نظام کا حصہ نہیں رہیں گے، اسمبلیوں سے باہر نکلنے کا فیصلہ کیا ہے۔ اسمبلیاں تحلیل کرنے کی تاریخ جلد دے دیں گے۔

لوئراورکزئی: (ویب ڈیسک) لوئراورکزئی کے علاقے ڈولی میں کوئلےکی کان بیٹھ گئی جس کے باعث 9 کان کن جاں بحق ہوگئے۔
پولیس کے مطابق کوئلے کی کان میں دھماکا گیس بھر جانے سے ہوا جس کے بعد کان بیٹھ گئی۔
ریسکیو حکام کا کہنا ہے کہ واقعے میں 9 کان کن جاں بحق اور 4 زخمی ہوگئے جنہیں طبی امداد کیلئے اسپتال منتقل کردیا گیا۔
حکام نے بتایا کہ حادثے کے وقت کوئلےکی کان میں 13 افراد موجود تھے۔

اسلام آباد: (ویب ڈیسک) وزیراعظم شہبازشریف سے چیئرمین جوائنٹ چیفس آف اسٹاف کمیٹی جنرل ساحر شمشاد مرزا اور  آرمی چیف جنرل عاصم منیر نے ملاقات کی ہے۔
چیئرمین جوائنٹ چیفس آف اسٹاف کمیٹی جنرل ساحر شمشاد مرزا اور آرمی چیف جنرل عاصم منیر کی عہدہ سنبھالنے کے بعد یہ وزیراعظم سے پہلی ملاقات ہے۔
وزیراعظم نے آرمی چیف اور چیئرمین جوائنٹ چیفس آف اسٹاف کمیٹی کو تعیناتی پر مبارکباد دی۔
وزیراعظم اور آرمی چیف کی ملاقات میں پاک فوج کے پیشہ وارانہ امور پر بات چیت کی گئی۔
وزیراعظم کا کہنا تھاکہ پاک فوج کی قیادت کرنا ایک بڑا اعزاز ہے، عوام اورفوج کےدرمیان اعتماد اور محبت کے رشتے مزید مضبوط ہوں گے اور امید ہےکہ آپ کی قیادت میں مسلح افواج ملکی سکیورٹی کو درپیش چیلنجز کا مزید بہترطریقے سے مقابلہ کریں گی۔
انہوں نے کہا کہ پاک فوج کی پیشہ وارانہ صلاحیتوں پر پورا اعتماد ہے، مادر وطن کے تحفظ و سلامتی اور دہشت گردی کے عفریت سے نمٹنے میں پاک فوج کے کردار پر پوری قوم کو فخر ہے۔

اسلام آباد: (ویب ڈیسک) وفاقی وزیر برائے قانون و انصاف سینیٹر اعظم نذیر تارڑ نے کہا ہے کہ پاکستان متحدہ عرب امارات کے ساتھ تعلقات کو قدر کی نگاہ سے دیکھتا ہے۔
متحدہ عرب امارات کے وزیر انصاف عبداللہ بن سلطان بن عواد النعیمی سے ان کی ٹیلیفونک بات چیت ہوئی۔
اس دوران باہمی دلچسپی اور دوطرفہ تعلقات کو مزید فروغ دینے، دونوں ممالک کے درمیان باہمی قانونی معاونت کے امور، پاکستان کے ایف اے ٹی ایف گرے لسٹ سے نکلنے کے مراحل پر بھی تبادلہ خیال کیا گیا۔
وفاقی وزیر برائے قانون وانصاف اعظم نذیر تارڑ نے متحدہ عرب امارات کا پاکستان میں سیلابی صورتحال کے دوران معاونت پر شکریہ ادا کرتے ہوئے کہا کہ پاکستان اپنے برادر ملک متحدہ عرب امارات کی معاونت کے لیے ہر وقت تیار ہے۔
انہوں نے کہا کہ پاکستان متحدہ عرب امارات کے ساتھ اپنے تعلقات کو قدر کی نگاہ سے دیکھتا ہے، متحدہ عرب امارات ہمارا برادر اسلامی ملک ہے، متحدہ عرب امارات نے ہمیشہ مشکل حالات میں پاکستان کا ساتھ دیا ہے۔

لاہور: (ویب ڈیسک) وزیر اعظم شہباز شریف کے معاون خصوصی عطا اللہ تارڑ اور مسلم لیگ (ن) پنجاب کی ترجمان عظمیٰ بخاری نے کہا ہے کہ پنجاب اسمبلی تحلیل ہونے کا خدشہ موجود ہے، سوشل میڈیا پر اداروں کے خلاف مہم کی بھرپور مذمت کرتے ہیں، پاک فوج ہمارے ملک کا فخر ہے، پنجاب اسمبلی کو اپنے ذاتی مقاصد کے لئے استعمال کیا جا رہا ہے، 12 کروڑ عوام کے صوبے کا مینڈیٹ ختم کرنے کی کوشش کی جا رہی ہے، پنجاب اسمبلی کسی کی ذاتی ملکیت نہیں، وزیر اعلیٰ پرویز الٰہی عمران خان کے کہنے پر صوبائی حکومت چلا رہے ہیں، جمہوری روایات سے رو گردانی نہیں کرنی چاہیے۔
پاکستان مسلم لیگ (ن) پنجاب کی ترجمان عظمیٰ بخاری کے ہمراہ پریس کانفرنس کرتے ہوئے عطا تارڑ نے کہا کہ سننے میں آیا ہے کہ پنجاب کا ایک وزیر ہمیں انصاف کی فراہمی میں رکاوٹ بنا ہوا ہے جس کی وجہ سے ہمیں انصاف نہیں مل رہا لیکن ہمیں پوری امید ہے کہ عدلیہ سے انصاف ملے گا، ہم اراکین کی معطلی کے کیس میں متفرق درخواست دائر کر رہے ہیں، متفرق درخواست میں کہا گیا ہے کہ صوبے کی اسمبلی تحلیل ہونے کا خدشہ موجود ہے، کسی رکن کو ووٹ کے حق سے محروم نہیں رکھا جا سکتا، پاک فوج ایک منظم ادارہ ہے جس کے خلاف تنقید قابل مذمت ہے، پنجاب اسمبلی میں پی ٹی آ ئی کے اکثریتی اراکین صوبے کی اسمبلی کو تحلیل کرنے کے حق میں نہیں ہیں۔
انہوں نے مزید کہا کہ عمران خان جس شخصیت کے خلاف بد زبانی کر رہے ہیں انہوں نے خود ہی ان کی مدت ملازمت میں توسیع دی تھی، عمران خان کو اپنے دور میں جو سپورٹ ملی تھی وہ کسی اور لیڈر کو نہیں ملی، عمران خان کے خلاف احتساب کے معاملے میں ہماری کوتاہی ہے کہ اتنی بڑی چوریاں سامنے آنے کے بعد وہ عدالتی حکم امتناع لے آتے ہیں، عمران خان ہر مرتبہ اپنی ٹیکنیکلٹی کو استعمال کر کے احتساب سے بچ جاتے ہیں۔
ان کا کہنا تھا کہ پاکستان میں چاروں صوبوں میں الیکشن بیک وقت کرائے جاتے ہیں، یہ کیسی منطق ہے کہ دو صوبوں میں الیکشن کروا دیئے جائیں اور باقی صوبوں کو نظر انداز کر دیا جائے، عوام کے مینڈیٹ کا احترام کرنا چاہیے، پنجاب میں مسلم لیگ (ن) واحد سب سے بڑی سیاسی جماعت تھی اور ہے، اسمبلیوں کو کی اپنی آئینی مدت پوری کرنی چاہیے، ہم جمہوری پراسیس کو ڈی ریل نہیں ہونے دیں گے، پی ٹی آئی کے لوگ جو غیر قانونی کاموں میں ملوث ہیں ان کو قانون کا سامنا کرنا پڑے گا۔
ایک سوال کے جواب میں عطا تارڑ نے کہا کہ پنجاب میں کوئی گفت و شنید ہونے کا امکان ہے نہ ہو گی، اگر مذاکرات کرنے ہوتے تو کورٹ نہ آتے اور دیگر آپشنز پر بھی غور نہ ہوتا، عمران خان نے کہا تھا کہ پرویز الٰہی پنجاب کے سب سے بڑے ڈاکو ہیں اور اب پرویز الٰہی اور ان کے بیٹے نے پنجاب کے سب سے بڑے ڈاکو ہونے میں کوئی کسر نہیں چھوڑی، پنجاب میں پرویز الٰہی نےغیر قانونی طریقے سے وزارت اعلیٰ حاصل کی۔
اس موقع پر میڈیا سے گفتگو کرتے ہوئے مسلم لیگ (ن) پنجاب کی ترجمان عظمیٰ بخاری نے کہا کہ پنجاب اسمبلی کو اپنے ذاتی مقاصد کے لئے استعمال کیا جا رہا ہے، پنجاب حکومت کی کوشش ہے کہ اسمبلی میں جتنے بھی 10 سے 15 ایم پی ایز ہیں انہیں ایکسپیل کیا جائے تا کہ ہمارے نمبرز پورے نہ ہو سکیں، پی ٹی آئی والے اپنے ذاتی مقاصد کیلئے پرویز الٰہی کو استعمال کر رہے ہیں، ہم بار بار گزارش کرتے ہیں مگر ہماری شنوائی نہیں ہو رہی، عمران خان کے کہنے پر پرویز الٰہی 12 کروڑ عوام کے صوبے پر شب خون مارنے کی کوشش کر رہے ہیں حالانکہ وزیر اعلیٰ پرویز الہی کا اپنا الیکشن ہی غلط ہے۔
عظمیٰ بخاری نے مزید کہا کہ ہم اعلیٰ عدلیہ کا ہمیشہ احترام کرتے آئے ہیں، ہمارا حق سننا اور اس کا تحفظ کرنا عدلیہ کی ذمہ داری ہے، ہماری پٹیشن التوا کا شکار ہے، پنجاب اسمبلی کو تحلیل کرنے کی منصوبہ بندی ہو رہی ہے اور ہمارا کام اس کو روکنا ہے جس کے لئے ہمارا ہاؤس میں جانا اور عدم اعتماد لانا ضروری ہے اور اس کے لئے جتنے بھی آئینی طریقے موجود ہیں ان کو استعمال کرنا ہمارا آئینی حق ہے، اعلیٰ عدلیہ سے مطالبہ کرتے ہیں کہ ہماری پٹیشنز پر جلد سماعت کی جائے اور استدعا ہے کہ ہمیں انصاف فراہم کیا جائے، ہم ہائیکورٹ سے اپیل کرتے ہیں کہ ہماری پٹیشن پر جلد سماعت کی جائے، عدم اعتماد پیش کرنے کیلئے ہمارا پنجاب اسمبلی کے اجلاس میں شرکت کرنا ضروری ہے، پنجاب حکومت کو جمہوری روایات سے رو گردانی نہیں کرنی چاہیے۔

لاہور: (ویب ڈیسک) پاکستان تحریک انصاف (پی ٹی آئی) کے سابق رہنما فیصل واوڈا نے فواد چودھری کی امریکی سفیر سے ملاقات پر سوال اٹھاتے ہوئے پوچھا کہ کیا اب یہ ڈونلڈ لو ٹھیک ہو گیا ہے؟۔
خیال رہے کہ گزشتہ روز پی ٹی آئی رہنما فواد چودھری نے امریکی سفیر ڈونلڈ بلوم سے ملاقات کی تھی جبکہ پی ٹی آئی نے سازش کے ذریعے اپنی حکومت ختم کرنے کا الزام ڈونلڈ لو پر عائد کیا تھا۔
سماجی رابطے کی ویب سائٹ ٹوئٹر پر پیغام جاری کرتے ہوئے فیصل واوڈا نے لکھا کہ کیا یہ وہی امریکی سفیر ڈونلڈ لو ہے جس نے سازش سے پی ٹی آئی کی حکومت گرائی؟ کیا اب یہ ڈونلڈ لو ٹھیک ہو گیا ہے؟ کیا اب ڈونلڈ لو سازش سکے ذریعے پی ٹی آئی کی حکومت واپس لانے والا ہے؟۔
اپنے ٹوئٹ میں سابق وفاقی وزیر نے مزید لکھا کہ حکومت گرانے کا بیانیہ پہلے ٹھیک تھا یا اب والا؟ بھائی یہ ماجرا کیا ہے؟۔