اسلام آباد: (ویب ڈیسک) چین کے عوام اور حکومت سے اظہار یکجہتی کے لیے صدر مملکت ڈاکٹر عارف علوی نے چین کے سفارت خانے کا دورہ کا دورہ کیا۔
صدر مملکت نے 26 اپریل 2022ء کو کراچی میں ہونے والے دہشت گرد حملے میں چینی شہریوں کی قیمتی جانوں کے ضیاع پر دلی تعزیت کا اظہار کیا۔
چین کی ناظم الامور نے سفارت خانے کا دورہ کرنے اور چین کے عوام اور حکومت کے ساتھ اظہار یکجہتی پر صدر مملکت کا شکریہ ادا کیا بعد ازاں صدر مملکت نے سفارت خانے کی وزیٹر بک میں تاثرات بھی تحریر کیے۔
اس موقع پر عارف علوی نے کہا کہ قوم اس افسوس ناک واقعے پر گہرے دکھ اور صدمے میں ہے، ہم چینی بھائیوں اور بہنوں کے غم میں برابر کی شریک ہے، پاکستان چینی شہریوں کے تحفظ کو ہر صورت یقینی بنائے گا اس گھناؤنے جرم میں ملوث عناصر کو انصاف کے کٹہرے میں لایا جائے گا۔
انہوں نے کہا کہ اس واقعے کے پیچھے کچھ ایسے ممالک ہیں جو پاک چین دوستی اور سی پیک منصوبے کو نقصان پہنچانا چاہتے ہیں وہ ممالک اپنے عزائم میں کامیاب نہیں ہوں گے۔
انہوں نے چینی ناظم الامور کو یہ جذبات چینی عوام، کمیونسٹ پارٹی اور صدر شی جن پنگ کے تک چانے کا بھی کہا۔

اسلام آباد: (ویب ڈیسک) سابق وفاقی وزیر داخلہ اور عوامی مسلم لیگ کے سربراہ شیخ رشید نے کہا ہے کہ پی ٹی آئی چیئر مین عمران خان پر اس وقت مشکل وقت ہے، ہر پاکستانی سمجھتا ہے عمران خان سے زیادتی ہوئی،چاہے مارا جاؤں،کپتان کے ساتھ کھڑا ہوں، ایسے میں ساتھ چھوڑنا غداری ہوگی۔
اسلام آباد میں میڈیا سے گفتگو کرتے ہوئے سابق وزیر داخلہ نے کہا کہ عمران خان سے ملکر آرہا ہوں وہ ایسا کوئی کام نہیں کرے گا جس سے ملک کو نقصان ہو، عمران خان ملک کے منافی کوئی قدم نہیں اٹھائے گا۔ میں سیاست سے ریٹائر ہونے جا رہا تھا، اس وقت سابق وزیراعظم پر کڑا وقت ہے،ساتھ چھوڑنا غداری ہو گی۔
اپنی بات کو جاری رکھتے ہوئے عوامی مسلم لیگ کے سربراہ نے کہا کہ ہماری کسی ادارے سے کوئی لڑائی نہیں ہے مگر جس طرح پی ٹی آئی چیئر مین کو دیوار سے لگایا گیا وہ غلط ہے، ہر آدمی یہ سمجھتا ہے عمران خان سے زیادتی ہوئی ہے، میں کوشش کررہا ہوں کہ ان کو واپس لایا جائے۔
شیخ رشید نے کہا کہ ملک کی سیاسی صورتحال کو شدیدخطرات ہیں، موجودہ صورتحال میں خاموش تماشائی بن کرنہیں رہا جاسکتا، سب کو واضح طور پر کہہ رہا ہوں اگر عمران خان نہیں ہےتو پھر آپ بھی نہیں ہونگے، تم لوگ ہمیں سلیکٹڈ کہتے تھے اور اب خود امپورٹڈ ہوگئے ہو۔
مسجدنبوی ﷺ واقعے پر عوامی مسلم لیگ کے سربراہ کا کہنا تھا کہ مسجدنبوی ﷺمیں جو کچھ ہوا نہیں ہونا چاہیے تھا مگر ان لوگوں کی شکلوں سے ہی لوگ نفرت کرتے ہیں، یہ لندن یا دنیا میں کہیں جائیں گے تو ان کو انڈے، ٹماٹر پڑیں گے پہلے سے خبردار کررہا ہوں بعد میں نہ کہنا کہ شیخ رشید نے ایسا بولا تھا۔
شیخ رشید کا مزید کہنا تھا کہ میں اردو میڈیم ہوں، مداخلت اور ساز ش میں کیا فرق ہے؟ اچھی طرح جانتا ہوں، میرے نزدیک مداخلت سازش سےبھی زیادہ خطرناک ہے۔

لاہور: (ویب ڈیسک) پاکستان تحریک انصاف (پی ٹی آئی) کے چیئر مین عمران خان نے اپنی حکومت کے خاتمے کے بعد مئی کے آخری ہفتے میں اسلام آباد کی طرف مارچ کی کال دے دی۔
سابق وزیراعظم نے اپنے ایک ویڈیو بیان میں کہا کہ آج ہماری کور کمیٹی کی میٹنگ ہوئی، میٹنگ کے دوران پوری تفصیل میں اور پوری طرح تبادلہ خیال کیا کہ اسلام آباد میں جو کال دی اس کی نوعیت کیا ہو گی۔ میٹنگ کے دوران ہم نے فیصلہ کیا کہ مئی کے آخری ہفتے میں ہم کال دینے لگے ہیں۔
انہوں نے اپنے پیغام میں مزید کہا کہ تحریک انصاف کو نہیں سب پاکستانیوں کو کال دینے لگے ہیں اور اس لیے کال دے رہے ہیں کہ ہمارے ملک کی توہین کی گئی ہے، بیرون ملک سازش کے تحت ملک کے کرپٹ ترین لوگوں کو ملک کے اوپر مسلط کیا گیا، اس وقت وفاقی کابینہ میں 60 فیصد لوگ ضمانتوں پر ہیں، شہباز شریف کو کرائم منسٹر کہتے ہیں، ایف آئی اے اور نیب میں ان پر 40 ارب روپے کی کرپشن ہے۔ یہ ملک کی توہین ہے۔
عمران خان نے کہا کہ ان تمام چیزوں کو مد نظر رکھتے ہوئے میں چاہتا ہوں کہ ابھی سے تمام لوگ تیاری کر لیں اور ہماری تیاری کا آغاز چاند رات سے ہو گا، میں نوجوانوں کو کہنا چاہتا ہوں کہ آپ نے چاند رات کو بھی خاص طور پر نکلنا ہے، نوجوان جھنڈے پکڑ کر نکلیں۔ اور ساری دنیا کو پیغام دینا ہے کہ پاکستان ایک زندہ قوم ہے، اور اس کے بعد ہمارا اگلا لائحہ عمل ہو گا اس کے بعد ہماری پوری تیاری ہو گی، میرا ایمان ہے اسلام آباد مارچ ملکی تاریخ کا سب سے بڑا مارچ ہوگا اور عوام کا سمندر باہر نکلے گا۔ اور واضح پیغام دنیا کو جائے گا کہ کوئی بیرونی ملک ہمارے اوپر ایک کرپٹ ٹولہ کو مسلط نہیں کر سکے گا۔ ملک کا جو فیصلہ ہو گا وہ پاکستان کی عوام کرے گی

پشاور: (ویب ڈیسک) عوامی نیشنل پارٹی (اے این پی) کے خیبرپختونخوا کے رکن صوبائی اسمبلی وقار خان انتقال کر گئے۔
خاندانی ذرائع نے وقار خان کے انتقال کی تصدیق کرتے ہوئےکہا ہےکہ ان کا انتقال حرکت قلب بند ہوجانے سے ہوا۔
خیال رہےکہ وقار خان 2018 کے عام انتخابات میں پی کے7 سوات سے عوامی نیشنل پارٹی کے ٹکٹ پر رکن منتخب ہوئے تھے۔
وزیراعلیٰ خیبر پختونخوا محمود خان اور عوامی نیشنل پارٹی کے سربراہ اسفند یار ولی نے وقار خان کے انتقال پر اظہار افسوس کیا ہے۔

ریاض: (ویب ڈیسک) وزیراعظم شہباز شریف اور سعودی ولی عہد شہزادہ محمد بن سلمان نے شاہی محل میں ہونے والی ملاقات کے دوران عالمی اور علاقائی دلچسپی کے امور پر بھی تبادلہ خیال کیا گیا۔
سرکاری خبررساں ادارے ’اے پی پی‘ کے مطابق دونوں ممالک کے درمیان دوطرفہ، اقتصادی، سرمایہ کاری اور تجارتی تعلقات کو مزید مضبوط بنانے پر تبادلہ خیال کیا۔
اس سے قبل وزیر اعظم شہباز شریف کا رایل پیلس پہنچنے پر شاندار استقبال کیا گیا جہاں وزیر اعظم کو شاہی اسکوارڈ میں پیلس پہنچایا گیا۔ وزیر اعظم شہباز شریف کا رائل پیلس پہنچنے پر سعودی ولی عہد محمد بن سلمان نے خود استقبال کیا۔ اس موقع پر وزیر اعظم شہباز شریف کو گارڈ آف آنر پیش کیا گیا۔
بعدازاں سعودی ولی عہد محمد بن سلمان نے وزیر اعظم سے اپنی کابینہ اور شہباز شریف نے اپنے وفد کے ارکان کا ولی عہد کے ساتھ تعارف کرایا۔