لاہور: (ویب ڈیسک) پنجاب حکومت نے صوبے کے ایڈمنسٹریٹر بنیادوں پر مزید اضلاع بنانے کا فیصلہ کر لیا ہے۔
وزیراعلیٰ پنجاب عثمان بزدار نے کہا ہے کہ پنجاب میں 3 نئے اضلاع اور 2 نئی تحصلییں بنانے کی اصولی منظوری دے دی ہے۔
ان کا کہنا تھا کہ لاہور کے 2 اضلاع بنانے کا اصولی فیصلہ کرلیا گیا ہے۔ اس کے علاوہ مری اور تونسہ کو بھی ضلع کا درجہ دیا جائے گا۔
انہوں نے کہا کہ راولپنڈی میں 2 تحصیلیں بنائی جائیں گی۔
عثمان بزدار نے کہا کہ عوام کی فلاح وبہبوداورگڈگورننس کے لیے نئے اضلاع بنائے جارہے ہیں۔ اس پر کافی دیر سے کام کررہے ہیں۔اس کیلئے قائم کمیٹی نے سفارشات پیش کی ہیں۔
ان کا کہنا تھا کہ پسماندہ علاقوں میں طالبات کے لئے نرسنگ کالجز میں داخلے کے لئے 20فیصد کوٹہ مختص کرنے کی منظوری دے دی ہے۔
انہوں نے کہا کہ اس اقدام سے پسماندہ علاقوں کی پڑھی لکھی بچیوں کو روزگار کے مواقع میسر ہوں گے۔

اسلام آباد: (ویب ڈیسک) سابق صدر آصف علی زرداری نے وزیراعظم عمران خان کے مبینہ دھمکی آمیز خط پر ردعمل کا اظہار کیا ہے۔
میڈیا سے گفتگو میں سابق صدر کا کہنا تھا کہ یہ خط کاجائزہ خود لیں نہ لیں، خط بھی جعلی، یہ بھی جعلی ہیں اور ان کا مینڈیٹ بھی جعلی ہے۔
قبل ازیں اسپیکر قومی اسمبلی اسد قیصر نے دھمکی آمیز خط کے معاملے پر قومی سلامتی کمیٹی سے متعلق پارلیمانی کمیٹی اجلاس کا نوٹس جاری کیا جس میں اپوزیشن کو بھی مدعو کیا گیا ہے تاہم اپوزیشن نے اجلاس میں شرکت سے انکار کردیا ہے۔

اسلام آباد: (ویب ڈیسک) پاکستان تحریک انصاف (پی ٹی آئی) کے چیئر مین عمران خان کی ہدایت پر قومی اسمبلی میں منحرف اراکین کیخلاف سخت کارروائی کا آغاز ہوگیا۔
تفصیلات کے مطابق قومی اسمبلی میں پاکستان تحریک انصاف (پی ٹی آئی) کے 22 منحرف اراکین سامنے آئے ہیں جس پر پارٹی کی طرف سے ان اراکین کیخلاف فیصلہ کن کارروائی کے معاملے پر غور کیا گیا۔ مشیر برائے پارلیمانی امور ڈاکٹر بابر اعوان نے پارٹی کے مرکزی سیکرٹریٹ کا دورہ کیا اور رکن قومی اسمبلی عامر محمود کیانی سے خصوصی ملاقات کی۔
ملاقات کے دوران منحرف اراکین قومی اسمبلی کو اظہار وجوہ کے نوٹسز کے اجراء کی حکمت عملی پر تبادلہ خیال کیا گیا، اظہار وجوہ کے نوٹسز کے ڈرافٹ کو حتمی شکل دے دی گئی۔ نوٹسز دستور پاکستان کے آرٹیکل 63-اے کے تحت جاری کئے جارہے ہیں، دستور پاکستان کا آرٹیکل 63-اے اراکین اسمبلی کے فلور کراس کرنے پر کڑی قدغن عائد کرتا ہے، آئین کے تحت پارلیمانی پارٹی کے سربراہ کی جانب سے جاری پارٹی پالیسی سے انحراف کا مرتکب رکن قومی اسمبلی کو اپنی نشست سے ہاتھ دھونا ہوتے ہیں۔
نوٹسز کے مطابق تحریک انصاف کے منحرف اراکین قومی کو یکم اپریل دن 12 بجے تک اپنی پوزیشن واضح کرنے کی مہلت دی جائیگی۔ یکم اپریل دن 12 بجے تک جماعت کو مطمئن نہ کرنے والے اراکین کیخلاف سخت کارروائی عمل میں لائی جائے گی، ملاقات میں پارٹی پالیسی سے کھلے انحراف کے مرتکب اراکین قومی اسمبلی کیخلاف باضابطہ ریفرنسز سپیکر کو بھجوائے جائیں گے۔ تحریک انصاف دستور کے آرٹیکل 63-اے کے تحت سپیکر سے منحرف اراکین کی نشستوں کو خالی قرار دینے کی سفارش کرے گی۔

اسلام آباد: (ویب ڈیسک) الیکشن کمیشن میں سینیٹ الیکشن ویڈیو سکینڈل کیس کی سماعت کے دوران درخواست گزار فرخ حبیب، ملیکہ بخاری، کنول شوزب اور عالیہ حمزہ کے پیش نہ ہونے پر چیف الیکشن کمشنر برہم ہو گئے۔
چیف الیکشن کمشنر نے دورانِ سماعت ریمارکس میں کہا کہ کس بنیاد پر الیکشن کمیشن کو الزام دیا جاتا ہے؟ کیس میں 17 مرتبہ التواء ہو جس میں سے 10 مرتبہ التواء پی ٹی آئی والوں نے لیا۔
یوسف رضا گیلانی کے وکیل نے دلائل میں کہا کہ صرف میڈیا ٹرائل کیلئے کیس لٹکایا جا رہا ہے، گیلانی کیخلاف الیکشن حفیظ شیخ نے لڑا تھا،انہوں نے نہ الیکشن چیلنج کیا نہ میڈیا پر کوئی بیان دیا، تمام درخواست گزار انفرادی حیثیت میں آئے ہیں،تحریک انصاف نے بطور پارٹی درخواست نہیں دی، درخواست گزاروں کا یوسف رضا گیلانی کا حق دعوی ہی نہیں بنتا۔
ان کا کہنا تھا کہ پورے کیس میں گیلانی پر کوئی براہ راست الزام ہی نہیں، فرانزک کے بغیر ارشد ملک کی ویڈیو سپریم کورٹ نے بھی کارروائی نہیں کی۔
الیکشن کمیشن کے ممبر سندھ نثار درانی نے استفسار کیا کہ کیا اسٹنگ آپریشن کو بطور ثبوت تسلیم کیا جا سکتا ہے؟ جس پر گیلانی کے وکیل کا کہنا تھا کہ سٹنگ آپریشن کی کوئی قانونی حیثیت نہیں ہوتی، بغیر اجازت کسی کی بھی ویڈیو بنانا جرم ہے، جج ارشد ملک کی ویڈیو بنانے والے بھی گرفتار ہیں یا ملک سے باہر ہیں۔
ممبر بلوچستان شاہ محمد جتوئی نے استفسار کیا کیا علی حیدر گیلانی نے ویڈیو بنانے پر کارروائی کی؟جس پر وکیل کا کہنا تھا کہ سیاسی نوعیت کا معاملہ تھا شاید علی حیدر نے رابطہ کیا ہو۔
گیلانی کے وکیل نے مزید کہا کہ الیکشن پر اعتراض ہو تو ٹربیونل سے رجوع کیا جا سکتا ہے، تحریک انصاف نے الیکشن ٹربیونل سے رجوع ہی نہیں کیا، اللیکشن کمیشن 60 دن بعد فیصلہ کرنے کا مجاز نہیں۔
اس پر ممبر سندھ نے کہا کہ کیس نمٹانے کی مدت تو نیب قانون میں بھی ہے لیکن فیصلے اسکے بعد ہوتے ہیں،الیکشن کمیشن نے پی ٹی آئی کے جواب الجواب کیلئے کیس 5 اپریل تک ملتوی کر دیا۔

اسلام آباد: (ویب ڈیسک) قومی اسمبلی کا اہم اجلاس شروع ہوتے ہی چند منٹ میں ختم ہوگیا، وقفہ سوالات میں ارکان عدم اعتماد پر ووٹ کا مطالبہ کرتے رہے جس پر ڈپٹی اسپیکر نے اجلاس اتوار تک ملتوی کردیا اور بحث نہ ہوسکی۔
قومی اسمبلی کا اجلاس ڈپٹی اسپیکر قاسم سوری کی زیر صدارت سوا گھنٹہ تاخیر سے شروع ہوا۔ اسپیکر نے وقفہ سوالات شروع کیا اور ارکان سے کہا کہ ایجنڈے کی کارروائی کے مطابق سوالات کریں جس پر ایک کے بعد ایک رکن کھڑے ہوئے اور انہوں نے ایک ہی سوال کیا کہ اسپیکر عدم اعتماد کی ووٹنگ کب کرائیں گے؟
وقفہ سوالات میں پے درپے ہر رکن کی جانب سے ’’ووٹنگ کب کرائیں گے‘‘ کہ سوال پر ڈپٹی اسپیکر نے کہا کہ لگتا ہے کوئی بھی رکن سنجیدہ نہیں ہے اس لیے اجلاس تین اپریل بروز اتوار تک ملتوی کیا جاتا ہے۔
اجلاس ملتوی ہونے کی وجہ سے وزیراعظم کے خلاف پیش کی گئی تحریک عدم اعتماد پر بحث شروع ہی نہ ہوسکی۔
قبل ازیں چند روز قبل منعقدہ اجلاس میں اپوزیشن کی جانب سے قائد احزب اختلاف میاں شہباز شریف نے تحریک عدم اعتماد پیش کی تھی جس پر بحث کے لیے 31 مارچ کی تاریخ مقرر کی گئی تھی جب کہ تین دن یا زائد دن بعد بحث ختم ہوتے ہی اسپیکر ووٹنگ کا اعلان کریں گے۔

اسلام آباد: (ویب ڈیسک) متحدہ اپوزیشن نے وزیراعظم کو فیس سیونگ دینے سے انکار کردیا اور کہا ہے کہ وزیر اعظم کے خلاف تحریک عدم اعتماد پر کارروائی جاری رہے گی انہیں کوئی این آر او نہیں دیا جائے گا۔
متحدہ اپوزیشن نے وزیراعظم عمران خان کو فیس سیونگ دینے سے انکار کر دیا، اہم شخصیات نے اپوزیشن قیادت سے رابطہ کیا اور مختلف تجاویز پر بات چیت کی، اس حوالے سے اپوزیشن جماعتوں کے قائدین کی رات بھر باہمی مشاورت جاری رہی، لندن میں بھی رابطے کئے گئے، تاہم ذرائع کا کہنا ہے کہ اپوزیشن جماعتوں کی قیادت نے کوئی بھی معاہدہ کرنے سے متفقہ طور پر انکار کردیا ہے۔
ذرائع کے مطابق اپوزیشن جماعتوں نے وزیراعظم کے خلاف عدم اعتماد کا عمل جاری رکھنے کا فیصلہ کیا ہے اور اپوزیشن قائدین کا مؤقف ہے کہ عمران خان کے لئے کوئی رعایت نہیں ہوگی، وہ استعفیٰ دیں یا تحریک عدم اعتماد پر ووٹنگ کروا لیں۔
پاکستان مسلم لیگ (ن) کے صدر اور قائد حزب اختلاف شہباز شریف کی رہائش گاہ پر متحدہ اپوزیشن کے قائدین کا اہم اجلاس منعقد ہوا۔ اجلاس میں سیاسی صورتحال اور تحریک عدم اعتماد پر مشاورت کی گئی۔ اجلاس میں متحدہ اپوزیشن اوراس کا ساتھ دینے والی جماعتوں کے 172 ارکان قومی اسمبلی نے شرکت کی۔
اجلاس کے شرکا نے متحدہ اپوزیشن کے پاس نمبر گیم پورے ہونے اور تحریک عدم اعتماد کی کامیابی کے لیے ارکان قومی اسمبلی کی مطلوبہ سے زائد تعداد میں دستیابی پر اطمینان کا اظہار کیا۔
اجلاس کے اعلامیے میں کہا گیا ہے کہ شرکا نے آئین، قانون اور پارلیمانی جمہوری عمل کے ذریعے تحریک عدم اعتماد کو طے شدہ نظام الاوقات کے مطابق منطقی انجام تک پہنچانے کے فیصلے کا اعادہ کرتے ہوئے دو ٹوک الفاظ میں واضح کیا کہ عمران نیازی کو اپوزیشن کوئی این آر او نہیں دے گی، اس ضمن میں ذرائع سے چلائی جانے والی گمراہ کن خبریں متحدہ اپوزیشن کے فیصلے کو تبدیل نہیں کراسکتیں۔
اعلامیے کے مطابق عدم اعتماد کی تحریک کے ذریعے متحدہ اپوزیشن ملک میں نئی جمہوری اور آئینی روایات قائم کرے گی اور ماضی کے غیر جمہوری رویوں کو ہمیشہ کے لئے ترک کرکے نئے جمہوری و آئینی سفر کا آغاز کرے گا۔
اعلامیے کے مطا بق اجلاس نے قرار دیا کہ عمران نیازی اکثریت کھو چکے ہیں اور وزیراعظم کے منصب پر غیر آئینی طور پر قابض ہیں، اقتدار سے چمٹے رہنے کی آمرانہ خواہش میں وہ ایک لاکھ لوگوں کو اسلام آبادلانے کی دھمکیاں دے رہے ہیں اور ملک کو تصادم، انتشار اور افراتفری سے دوچار کرنے پر تُلے ہوئے ہیں۔
مزید کہا گیا ہے کہ ایسے عاقبت نااندیشانہ اقدام کے تمام تر نتائج کے ذمہ دار عمران نیازی ہوں گے، اجلاس حکومتی مشینری بشمول آئی جی اسلام آباد، ضلعی انتظامیہ اور دیگر متعلقہ اداروں پر واضح کرنا چاہتا ہے کہ وزیراعظم نہ رہنے والے شخص کے غیر آئینی اور غیر قانونی احکامات نہ مانیں، ایک سیاسی جماعت کا آلہ کار بننے کی کوشش کرنے والے حکام کو آئین اور قانون کا سامنا کرنا ہوگا۔