اسلام آباد(مانیٹرنگ ڈیسک)شہباز شریف کمر درد میں مبتلا، ڈاکٹرز نے 2ہفتے مکمل آرام کامشورہ دیا۔شہباز شریف کی تمام سیاسی سرگرمیاں ملتوی ہو گئیں۔نوازشریف اور مریم نواز نے شہبازشریف کو فون کرکے خیریت دریافت کی۔نواز شریف کو شہباز شریف کی میڈیکل رپورٹ اور ایکسرے رپورٹ کی تفصیلا ت سے آگاہ کیا گیا۔

لاہور (مہران اجمل خان )پنجاب حکومت کا سرکاری ہسپتالوں میں مفت سہولیات فراہم کرنے کا دعوی چکنا چور،جناح ہسپتال انتظامیہ کی نااہلی ایمرجنسی میں مریض مفت ادویات کو ترس گئے، گزشتہ دنوں سیکرٹری سپیشلائزڈ ہیلتھ کیئر کے دورہ نے جناح ہسپتال میں مفت ادویات کی سہولت کا پول کھول دیا۔سیکرٹری ہیلتھ ڈاکٹر جاوید احمد قاضی کے سوال پر مریضوں کے لواحقین نے شکایات کے انبار لگا ئے ،ناقص سہولیات سے پردہ اٹھنے کے باوجود سیکرٹری ہیلتھ کے سر پرجوں تک نہ رینگی، مریضوں کے مسائل سننے کے باوجود کسی قسم کی انکوائری نہ ہوسکی ۔ تفصیلات کے مطابق چار روز قبل سیکرٹری سپیشلائزڈ ہیلتھ کیئر پنجاب ڈاکٹر احمد جاوید قاضی نے ایڈیشنل سیکرٹری اسٹیبلشمنٹ عثمان خالد کے ہمراہ رات کے وقت جناح ہسپتال لاہور کا دورہ کیا تھا اور وہاں انسداد ڈینگی، کرونا، ایمرجنسی اور دیگر شعبہ جات میں مریضوں کو فراہم کردہ طبی سہولیات کا جائزہ بھی لیا تھا جہاں انہوں نے مریضوں کے لواحقین سے بھی فراہم کی جانیوالی طبی سہولیات سے متعلق دریافت کیا۔ ہسپتال ذرائع کے مطابق سیکرٹری صحت نے جب لیبر روم ایمرجنسی کا دورہ کرتے ہوئے مریضوں کے لواحقین سے ادویات بارے دریافت کیا تو وہاں موجود شہریوں نے مفت ادویات نہ ملنے کے شکوہ بھی کیے ایک شہری کی جانب سے میڈیکل سپرنٹنڈنٹ ڈاکٹر یحیٰی سلطان کی موجودگی میں شکایت کی گئی کہ اس نے اپنی بیوی کے آپریشن کے لئے تین سے چار ہزار روپے کی ادویات باہر سے خریدی ہے جس پر سیکرٹری صحت نے ایم سے انکوائری کرنے کا حکم دیا مگر چار روز گزر جانے کے باوجود بااثر میڈیکل سپرنٹنڈنٹ کی جانب سے مفت ادویا ت کی نہ تو انکوائری کی گئی اور نہ ہی سیکرٹری صحت کو اس بارے آگاہ کیا گیا ۔ہسپتال ذرائع نے بتایا کہ جناح ہسپتال ایمرجنسی میں تا حال مریض مفت ادویات کے حصول کے لئے خوار ہورہے ہیںپنجاب حکومت کی جانب سے سرکاری ہسپتالوں کی ایمرجنسی میں مفت ادویات کے دعویٰ صرف باتوں تک محدود ہو کر رہ گئے ہیں ۔ اس حوالے سے ترجمان سپیشلائزڈ ہیلتھ کئیر کا کہنا ہے کہ اس بات کی تصدیق کی جا رہی کہ لیبر روم میں ادویات فراہم کرنے کی کیا پالیسی ہے ۔

لاہور(نیٹ نیوز) معروف عالم دین مولانا طارق جمیل کی دوسری شادی سے متعلق جعلی خبریں سوشل میڈیا پر پھیلائی جانے لگیں۔ٹویٹر پر اپنے ایک پیغام میں مولانا طارق جمیل نے لکھا کہ سوشل میڈیا پر میری دوسری شادی سے متعلق کچھ یوٹیوب چینلز ویوز اور سبسکرائبرز کی خاطر جھوٹ بول رہے ہیں،اس بات کا حقیقت سے بالکل بھی تعلق نہیں ہے۔اللہ ان کو ہدایت عطا فرمائے۔

لاہور (رپورٹ :اسد مرزا)حضرت علی بن عثمان ہجویری کے 978ویںعرس کے موقع پر داتا دربار کی انتظامیہ اور پولیس کی مجرمانہ غفلت کے باعث مردزائرین خواتین کے احاطے پہنچ گئے جس سے ناصرف مزار کا تقدس پامال ہوا بلکہ خواتین کی بے حرمتی ہو ئی جس سے خواتین زائرین نے احتجاج کیا لیکن خادمائیں اور لیڈی پولیس نے بھی کوئی کارروائی نہیں کی ۔اسی طرح نیاز کی تقسیم سے وہاں دھکم پیل کے دوران کئی خواتین زخمی وبے ہوش ہو گئیں ۔ خواتین نے الزام عائد کیا کہ پولیس اور داتا دربار انتظامیہ ،مبینہ طور پر رشوت لیکر مردوں کوخواتین کے احاطے میں بھجوایا جس کی وجہ سے ایسی صورتحال پیدا ہوئی ۔تفصیلات کے مطابق داتا دربار میں زائرین کے لئے الگ الگ احاطے بنائے ہوئے ہیں لیکن داتا دربار سیکورٹی اور پولیس وہاںمستقل آنے والے مخیر خواتین و حضرات کو نذرانہ لیکر انہیں پروٹوکول دیتے ہیں ۔حضرت علی بن عثمان ہجویری کے 978ویںعرس کے موقع پرزائرین کے رش کی وجہ سے پولیس اور داتاد ربار انتظامیہ کے سیکورٹی بارے فول پروف انتظامات کا پول کھل گیا ۔ بتایا گیاہے گزشتہ رات خواتین زائرین جو داتا دربار کے مزار میں احاطہ غلام گردش میں بیٹھ کر عبادت اور چوکھٹ پر حاضری دے رہی تھیں کہ اچانک وہاں مرد زائرین کی آمد کا سلسلہ شروع ہو اتوخواتین نے شور مچایا تو پولیس اہلکار،دربار سیکورٹی اورخادماﺅں نے کہا کہ یہ افسر ہیں ۔ ایک عینی شاہد خاتون کا کہنا ہے کہ مرد حضرات مینیجر کی پرچی لیکر آتے تھے جن کو خواتین کے احاطے میں داخلے کی اجازت مل رہی تھی ۔خاتون عائشہ کے مطابق اس بارے مینیجر داتا دربار سے شکایت کی تو اس نے ایکشن لینے کی بجائے بات ٹال دی ۔اس بارے داتا دربار انتظامیہ سے رابطہ کرنے کے لئے انکے دفاتر پہنچے تو تمام افسر غائب تھے ،عملے نے بتایا کہ عرس کے موقع پر تھکاوٹ کے باعث تمام افسر جلد دفاتر سے چلے گئے ہیں۔

لاہور (خصوصی ر پورٹر)ایم جی موٹرز مافیا کے خلاف کار ڈیلرز بھی میدان میں آ گئے۔اون مافیا کی جانب سے گاڑی مانگنے پر شہری کی ہلاکت کی شدید الفاظ میں مذمت کرتے ہیں۔ صرف منافع کی خاطر لوگوں کی جان لینا کہاں کا بزنس ہے؟ ڈیلرز خبریں/چینل۵سروے میں پھٹ پڑے۔تفصیلات کے مطابق چند روز قبل پیکجز مال پر ایم جی موٹرز کے عملے کی جانب سے شہری کے ساتھ مارپیٹ کے نتیجے میںشہر ی اس کی ہلاکت پر اب کارڈیلرز بھی سامنے آچکے ہیں جن کا کہنا ہے تھا کہ خبر یں ، چینل ۵ ایک بار بھی مظلوم کی آواز بنا اور جیسا کہ ایم جی موٹر ز پر پیکیجز مال میں واقع غوث نامی شخص کی ویڈیو منظر عام آئی جس میں اس نے اپنے والد کو مبینہ طور پر قتل کرنے کا الزام عائد کیا تھا۔جیل روڈ پر واقع کار شوروم کے مالک عمر سلیم نے کہا کہ کچھ روز قبل ایک ویڈیو میں غوث گوندل نامی ایک نوجوان نے اپنے والد کے لیے انصاف کے حصول میں مدد کے لیے فریاد کرتے ہوئے دکھائی دیا جس پر ان کا الزام ہے کہ ایم جی موٹرز کے عملے نے پیکیجز مال میں قتل کیا تھااور اس کے والد مبینہ طور پر ایک نئی گاڑی خریدنے کے لیے ایم جی شوروم گئے تھے۔میرے خیال میں کسی گاہک کےساتھ صرف وقت پر ڈیلیوری مانگنے پر ایسا سلوک سمجھ سے بالاتر ہے۔ایک کارڈیلر عمیر نے کہا کہ متوفی کے بیٹے کے بیانات کے مطابق ، اس کے والد نے فروری 2021 میں ان کے لیے پیشگی ادائیگی کے ساتھ ایک گاڑی بک کرائی تھی ، اور یہ توقع کی جا رہی تھی کہ وہ یہ کار جولائی 2021 میں وصول کر لیں گے۔لیکن شوروم مالکان اور عملہ کی طرف سے مرحوم کے ساتھ بدتمیزی اور مارپیٹ کی کسی طور اجازت نہیں دی جاسکتی ہے بطور کار ڈیلر یہ ہمارا فرض ہے کہ نہ صرف سے گاہک سے صاف ستھری ڈیل کریں بلکہ جو وعدہ کیا جائے اسے وقت پر پورا بھی کریں۔سمن آباد میں کار شوروم کے مالک نویدنے کہا کہ متو فی کے بیٹے کے مطابق اس دن اس کے والد کو شوروم سے کال آئی کہ وہ آ کر اپنی گاڑی وصول کرے ، اور باقی ادائیگی کرے۔ تاہم جب اس کے والد شو روم میں گئے تو یہ رقم جسے اون کہا جاتا ہے مبینہ طور پر ان سے لی گئی تھی لیکن کار ابھی تک نہیں دی گئی۔یہ ایک سنگین الزام ہے جو ایم جی موٹرز کو وضاحت دینا ہوگی کیونکہ بطور مسلمان بھی ہم پر تاجر کے طور پر فرض ہے کہ گاہک سے سچی اور کھری بات کریں۔