وفاقی وزیر برائے منصوبہ بندی اسد عمر نے کہا ہے کہ رواں مالی سالترسیلا زر میں 34 فیصد اضافہ ریکارڈ ہوا ہے جس سے یہ ثابت ہوتا ہے کہ رواں مالی سال معاشی گروتھ مضبوط رہی ہے۔

تفصیلات کے مطابق پریس کانفرنس کرتے ہوئے وفاقی وزیر برائے منصوبہ بندی اسد عمر نے کہا ہے کہ دوہزار چار اور دوہزار پانچ کے بعد رواں سال معیشت میں سب سے زیادہ اضافہ ہوا ہے۔

اسد عمر کا کہنا تھا کہ کورونا کی وجہ سے صنعتیں بری طرح متاثر ہوئی ہے لیکن حکومت کی جانب سے صنعتوں کیلئے پیکج کے اچھےاثرات سامنے آئے ہیں۔

وفاقی وزیر نے بتایا ہے کہ سالانہ منصوبہ بندی کمیٹی میں آئندہ سال کے پلان کی منظوری دے دی گئی ہے اور یہ پلان آئندہ ہفتے وزیر اعظم کے پاس اقتصادی کونسل میں پیش کیا جائے گا۔

 اسد عمر نے کہا ہے کہ آئندہ مالی سال کیلئے معاشی گروتھ 4.8 فیصد رکھنے کا ہدف ہے، تعمیراتی شعبے میں بھی آئندہ مالی سال کے دوران گروتھ میں اضافہ ہو گا ۔

ان کا کہنا تھا کہ آئندہ مالی سال کے دوران 26 ارب 80 کروڑ ڈالر برآمدات کا ہدف ہے جبکہ آئندہ مالی سال ترسیلات کا ہدف 31 ارب تیس کروڑ ڈالر ہوگا۔

اسٹیٹ بینک آف پاکستان کی جانب سے نئی مانیٹری پالیسی کا اعلان آج کیا جائیگا۔

تفصیلات کے مطابق اسٹیٹ بینک مانیٹری کمیٹی کا اجلاس آج ہوگا جس میں آئندہ 2 ماہ کے لئے نئی مانیٹری پالیسی کے حوالے سے مشاورت کی جائیگی۔

بعد اجلاس اسٹیٹ بینک آف پاکستان کی جانب سے  بذریعہ پریس ریلیز نئی مانیٹری پالیسی کا اعلان کیا جائیگا۔

خیال رہے کہ اس وقت ملک میں شرح سود 7 فیصد پر ہے۔

وزیر اعظم عمران خان کا کہنا ہے کہ پاکستان کا مستقبل صنعت میں ہے جس کے بغیر ملک ترقی نہیں کر سکتا۔

نوشہرہ میں رشکئی اسپیشل اکنامک زون کے سنگ بنیاد کی تقریب سے خطاب کرتے ہوئے وزیر اعظم نے کہا کہ ‘پاکستان کا مستقبل صنعت میں ہے، ملک کی ترقی صنعت کے بغیر نہیں ہوسکتی’۔

انہوں نے کہا کہ ‘رشکئی اکنامک زون سی پیک کے اندر ہے جو خوش آئند بات ہے اور یہ خوش آئند اس لیے ہے کیونکہ آج چین، دنیا بھر میں سب سے زیادہ تیزی سے ترقی کرنے والا ملک ہے، اس کی ترقی سے ہم سب سے زیادہ سیکھ سکتے ہیں، مغربی ممالک کی صنعتیں پرانی ہیں اس لیے پاکستان ان سے زیادہ نہیں سیکھ سکتا’۔

عمران خان نے وزیر اعلیٰ خیبر پختونخوا کو رشکئی اکنامک زون کے متعلق انتباہ کرتے ہوئے کہا کہ ‘اس کی زمین کسی صورت فروخت نہ کی جائے بلکہ کم قیمت پر لیز پر دیا جائے، کیونکہ یہ زمین فروخت کی گئی تو یہ ریئل اسٹیٹ بننے کا خطرہ ہے’۔

ان کا کہنا تھا کہ ‘پاکستان میں برآمدات میں اضافے کے لیے صنعتیں لگانے کی ضرورت ہے، چین کی برآمدات میں اضافہ صنعتیں لگانے سے ہوا اور جب تک برآمدات میں اضافہ نہیں ہوتا ملک ترقی نہیں کرے گا’۔

وزیراعظم نے کہا کہ ‘اسپیشل اکنامک زون میں سرمایہ کاروں کو سہولت دیں گے، سرمایہ کاروں کے لیے جتنی آسانیاں ہوں گی اتنی زیادہ سرمایہ کاری ہوگی’۔

انہوں نے کہا کہ ‘ہم نے ملک کو مشکل وقت نکالا ہے اور جب اس مشکل وقت سے معیشت کو نکال رہے تھے تو کورونا آگیا، مجھ پر لاک ڈاؤن کے لیے دباؤ ڈالا گیا، اگر مکمل لاک ڈاؤن لگا دیتا تو آج ملک کا بھارت جیسا حال ہوتا’۔

ان کا کہنا تھا کہ ‘ملک ترقی کے راستے پر چل پڑا ہے اور اچھا وقت آنے والا ہے، صنعت بھی چل پڑی ہے، بیرون ملک پاکستانیوں نے ریکارڈ ترسیلات زر بھیجی ہیں، اب ملک میں ڈالر زیادہ آرہے ہیں اور باہر کم جارہے ہیں’۔

کراچی:  وزیر داخلہ شیخ رشید نے کہا ہے کہ وزیراعظم سندھ میں مداخلت نہیں کرنا چاہتے، سندھ حکومت چاہے تو رینجرزکی مدد دینے کو تیار ہیں، کراچی میں آپریشن ہو گا نہ گورنر راج لگے گا۔

کراچی میں پریس کانفرنس کرتے ہوئے ان کا کہنا تھا کہ وزیراعظم یا وزارت داخلہ کا آپریشن سے کوئی تعلق نہیں، ڈاکو راج کا خاتمے کیلئے تمام ادارے ایک پیج پر ہیں۔ اگر سندھ حکومت مدد کے لیے کہے گی تو کریں گے۔

ان کا کہنا تھا کہ وزیراعظم کی ہدایت پر کراچی آیا ہوں، یہاں تمام اداروں کے سربراہان سے ملاقات ہوئی۔ وفاق اور صوبائی حکومت مل کر ڈاکوؤں سے نمٹیں گے۔ امن وامان کا قیام صوبے کا مسئلہ ہے۔ سندھ حکومت چاہے تو رینجرز کی مدد دینے کو تیار ہیں۔ رینجرز کن علاقوں میں چاہیے یہ صوبائی حکومت کی صوابدید ہے۔

انہوں نے کہا کہ سندھ پولیس کو جتنا اسلحہ چاہیے فراہم کریں گے۔ ڈاکو راج ختم کرنے کیلئے ڈرون سمیت ہر قسم کا اسلحہ دیں گے۔ وزیراعلیٰ سندھ شکار پور کی صورتحال سے خود نمٹنا چاہتے ہیں۔ سندھ حکومت کو جہاں مدد کی ضرورت پڑی کریں گے۔

اس سے قبل وفاقی وزیر داخلہ شیخ رشید کی وزیراعلیٰ سندھ سے اہم ملاقات میں صوبہ میں امن وامان کی صورتحال پر بات چیت کرتے ہوئے اس بات پر اتفاق کیا گیا ہے کہ کچے کے علاقوں میں ڈاکوؤں کے خاتمے کیلئے آپریشن ہوگا۔

وزیراعلیٰ سندھ مراد علی نے بتایا کہ پاکستان خطرناک ممالک کی فہرست میں چھٹے نمبر پر تھا، اب 126 پر آ گیا ہے۔ سندھ میں پہلے کانوائے کے ساتھ سفر کرتے تھے، 2007ء میں پیپلز پارٹی کی حکومت نے سخت آپریشن کرکے ہائی وے کلئیر کروائے۔ کراچی میں امن و امان خراب ہونے کی وجہ سے نوگو ایریا بن گئے تھے۔

مراد علی شاہ کا کہنا تھا کہ پورا سندھ گڈو سے کوٹری بیراج تک کچا ہے۔ 5 سے 6 کلومیٹر گھنا جنگل ہے۔ 23 مئی کو پولیس نے 8 مغویوں کو بازیاب کرانے کیلئے شکار پور میں آپریشن کیا۔ بکتر بند گاڑی خراب ہونے کے باعث ڈاکوؤں نے حملہ کیا، جس میں 2 پولیس اہلکار شہید ہوئے۔

وزیراعلیٰ سندھ نے شیخ رشید سے مکالمہ کرتے ہوئے کہا کہ آپ وزیر داخلہ ہیں، جب چاہیں آ جائیں، ہم مل کر کام کریں گے، آپ کو سندھ میں ویلکم کرتے ہیں۔

اس پر وزیر داخلہ شیخ رشید نے کہا کہ کسی بھی چیز کی ضرورت پڑے، وزارت داخلہ مہیا کرے گی، رینجرز حاضر ہے، جب چاہے سندھ حکومت ان کی آپریشن میں خدمات لے سکتی ہے۔

مراد علی شاہ نے کہا کہ کچھ حساس ساز و سامان چاہیے، ان کا بندوبست سندھ حکومت کر رہی ہے، ہم جلد کچے کے ایریا سے ڈاکؤوں کا صفایا کر دیں گے۔

شیخ رشید کا کہنا تھا کہ امن و امان سندھ حکومت کی ذمہ داری ہے، ہم مدد کرنے کیلئے تیار ہیں، ڈاکوؤں کے خلاف دہشتگردی کے مقدمات درج کرائے جائیں۔