اسلام آباد(ویب ڈیسک) چیئرمین نیب جسٹس(ر) جاوید اقبال نے کہا ہے کہ نیب ملزمان کی گرفتاری کیلئے کسی امتیازی پالیسی پر یقین نہیں رکھتا۔چیئرمین نیب جسٹس ریٹائرڈ جاویداقبال کی زیرصدارت اجلاس ہوا جس میں بدعنوانی میں ملوث مبینہ ملزمان کی گرفتاری کیلئے بنائی گئی پالیسی کا جائزہ لیا گیا۔اس موقع پر چیئرمین نیب کا کہنا تھا کہ ملزمان کی گرفتاری کیلئے کسی امتیازی پالیسی پر یقین نہیں رکھتے، بلا امتیاز، ٹھوس شواہد اور قانون کے مطابق مبینہ ملزمان کی گرفتاری عمل میں لائی جاتی ہے۔جسٹس (ر) جاویداقبال نے کہا کہ نیب بدعنوانی میں مبینہ ملزم کی گرفتاری کے وقت الزامات کی سنگین نوعیت ،بدعنوانی میں مبینہ کردار سمیت تمام پہلوﺅں کا جائزہ لے کر ملزم کو گرفتار کرتا ہے اور ملزم کی گرفتاری کے بعد اس کو متعلقہ احتساب عدالت میں پیش کرتا ہے۔چیئرمین نیب کا کہنا تھا کہ نیب ملزم پر لگائے گئے الزامات کی مکمل تفصیلات سے احتساب عدالت کوآگاہ کرتا ہے اور مزید تحقیقات کیلئے ملزم کو احتساب عدالت کی جانب سے ریمانڈر پر نیب کے حوالے کیا جاتا ہے جب کہ نیب اس دوران ملزم سے سائنسی بنیادوں پر ٹھوس شواہد اور قانون کے مطابق تحقیقات کرتا ہے۔

کراچی(ویب ڈیسک)عام انتخابات میں کامیاب ہونے والے امیدواروں کی خریدو فروخت کے معاملے پر دیے جانے والے بیان پر سابق کرکٹر جاوید میانداد نے یوٹرن لے لیا۔گزشتہ روز جاوید میانداد کی ایک ویڈیو منظر عام پر آئی تھی جس میں وہ منتخب نمائندوں کو مخاطب کرکے کہہ رہے تھے کہ ’عوام نے تمہیں ووٹ دیا ہے، تم عوام کا ضمیر کیوں بیچ رہے ہو؟‘اس دوران جاوید میانداد آبدیدہ بھی ہوگئے تھے لیکن اب سابق کرکٹر نے اپنے بیان پر ایک اور وضاحتی ویڈیو بیان جاری کیا ہے۔ پاکستان تحریک انصاف کے آفیشل فیس بک پیج سے جاوید میانداد کا ویڈیو بیان جاری کیا گیا ہے جس میں وہ کہہ رہے ہیں کہ انہوں نے جو کل بیان دیا تھا، اس کا غلط مطلب نکالا گیا اور توڑ موڑ کر پیش کیا گیا۔انہوں نے کہا کہ میرا مطلب یہ تھا کہ ایک آدمی نے ’نئے پاکستان‘ کا نعرہ لگایا ہے اور وہ اس مقام پر پہنچ گیا ہے جہاں اسے موقع دینے کی بجائے اس کے خلاف توڑ جوڑ کیا جارہا ہے۔سابق کرکٹر کا کہنا تھا کہ یہ چیزیں نہیں ہونی چاہیے، جو اکثریت میں آجاتا ہے اس سے تو ایڈجسٹمنٹ کی بات ہوتی ہے، میرا مقصد ہرگز کسی پارٹی کو تنقید کا نشانہ بنانا نہیں تھا بلکہ میں نے سوشل میڈیا پر اپنے مداحوں کے لیے ویڈیو جاری کی تھی۔جاوید میانداد کا کہنا ہے کہ میں عمران خان کے ساتھ 20 سال سے ہوں اور میں ان کی ضمانت دیتا ہوں کہ وہ ایک سچا اور صاف آدمی ہے لہٰذا میرے نام سے کوئی بات منسلک نہ کی جائے، میری تحریک انصاف یا کسی جماعت سے کوئی غرض نہیں ہے۔ ان کا کہنا تھا کہ کل جو باتیں کیں تھیں وہ میری اپنی رائے تھی، میں آج کہتا ہوں کہ ایک آدمی جس کو آزمایا ہی نہیں ہے تو میں کیسے اس کے خلاف بات کروں گا، وہ میرا کپتان رہا ہے۔یاد رہے کہ جاوید میانداد کے بیان کا سوشل میڈیا پر کافی چرچا ہوا ہے اور کئی لوگوں نے اس بیان کو بنیاد بناکر ایک سیاسی جماعت کو تنقید کا نشانہ بنایا ہے۔قومی ٹیم کے سابق کپتان نے اپنے بیان میں مزید کہا کہ ان کا کسی پارٹی سے تعلق نہیں ، عام انتخابات میں عمران خان کو اکثریت ملی ہے تو حکومت انہی کو بنانی چاہیے۔

اسلام آباد(ویب ڈیسک) سابق وزیراعظم اور مسلم لیگ نواز کے قائد نواز شریف کے اصرار پر انہیں پمز اسپتال سے اڈیالہ جیل منتقل کیا جارہا ہے۔ نواز شریف کی جانب سے فوری اڈیالہ جیل منتقل کیے جانے کے مطالبے کے بعد انہیں سخت سیکیورٹی میں جیل منتقل کیا جارہا ہے۔ذرائع کا کہنا تھا کہ ڈاکٹرز کا مشورہ تھا کہ نواز شریف مزید کچھ روز اسپتال میں قیام کریں تاہم سابق وزیراعظم کا اصرار تھا کہ انہیں جیل منتقل کیا جائے۔ڈاکٹرز کا کہنا ہے کہ نواز شریف کی حالت ابھی بھی مستحکم نہیں اور ان کے مختلف ٹیسٹوں میں نتائج مختلف آرہے ہیں۔خیال رہے کہ نواز شریف کو سینے میں تکلیف کے باعث اتوار کو پمز اسپتال کے کارڈک سینٹر منتقل کیا گیا تھا۔یاد رہے کہ احتساب عدالت نے 6 جولائی کو ایون فیلڈ ریفرنس کا فیصلہ سناتے ہوئے سابق وزیراعظم کو مجموعی طور پر 11 سال قید کی سزا کا حکم دیا تھا جس کے بعد 13 جولائی کو لندن سے وطن واپسی پر انہیں ایئرپورٹ سے ہی گرفتار کر کے اڈیالہ جیل منتقل کردیا گیا تھا۔دوسری جانب نگران وزیر داخلہ پنجاب شوکت جاوید نے کہا ہے کہ نوازشریف کی میڈیکل رپورٹ میں ایسی تجویز نہیں آئی کہ انہیں علاج کیلئے باہر بھیجا جائے۔ شوکت جاوید نے کہا کہ نواز شریف کو ڈاکٹروں کی ہدایات پرپمز اسپتال میں رکھا گیا ہے، جب تک ڈاکٹرز کہیں گے نوازشریف اسپتال میں رہیں گے۔انہوں نے کہا کہ نواز شریف نے اسپتال جانے میں ہچکچاہٹ کا مظاہرہ کیا، پاکستان میں ہر طرح کا علاج موجود ہے، پاکستان میں دل کے امراض کا بھی بہت اچھا علاج ہوتا ہے، میڈیکل رپورٹ میں ایسی تجویز نہیں آئی کہ نوازشریف کو علاج کیلئے باہر بھیجا جائے۔نگران وزیر داخلہ کا کہنا تھاکہ نواز شریف کی رپورٹیں بہتر ہیں اور مرض کی ہسٹری بنوانا آج کل کوئی مشکل کام نہیں۔

اسلام آباد(ویب ڈیسک ) بلوچستان عوامی پارٹی (بی اے پی) نے وفاق میں پاکستان تحریک انصاف (پی ٹی آئی) کی غیر مشروط حمایت کا اعلان کردیا جبکہ پی ٹی آئی وزیراعلیٰ بلوچستان کے امیدوار جام کمال کو ووٹ دے گی۔اسلام آباد میں بی اے پی کے سربراہ جام کمال نے پی ٹی آئی چیئرمین عمران خان سے ملاقات کے بعد میڈیا سے گفتگو کرتے ہوئے کہا کہ ہم وفاق میں غیرمشروط حمایت کریں گے۔جام کمال نے کہا کہ بی اے پی بلوچستان اور پاکستان کے ترقی کے لیے وفاق میں جس جماعت کے ساتھ چل سکتی ہے تو وہ پی ٹی آئی ہے۔انھوں نے کہا کہ پی ٹی آئی اور بی اے پی کے وڑن میں بہت ساری باتیں مشترک ہیں اس لیے ایک ٹیم اور اتحاد کے ذریعے اور ون یونٹ کے طور پر چلائیں گے اور ہم بلوچستان کی ترقی کے لیے پی ٹی آئی کے ساتھ مل کام کریں گے۔جام کمال نے کہا کہ بی اے پی نے پی ٹی آئی کی غیر مشروط حمایت کا اعلان کیا ہے اوراس طرح بلوچستان کی حکومت کا بھی حصہ بنیں گے اورا بلوچستان کے مسائل کے حل کے لیے ابھی ایک طریقہ کار بنائیں گے۔ان کا کہنا تھا کہ اچھا پیغام لے کر بلوچستان جارہے ہیں اور پی ٹی آئی اور بی اے پی ایک دوسرے کا ساتھ دیتے ہوئے ترقی کے سفر میں آگے جائیں گے۔بی اے پی کے سربراہ نے کہا کہ بلوچستان میں ہماری جماعت سادہ اکثریت سے بھی آگے جا چکی ہے۔اس موقع پر پی ٹی آئی کے وائس چیئرمین شاہ محمود قریشی نے بلوچستان عوامی پارٹی کا خیر مقدم کرتے ہوئے کہا کہ بی اے پی کی جانب سے یکجہتی کے اظہار پر شکر گزار ہیں اور پی ٹی آئی نے بلوچستان میں بی اے پی کے ساتھ ملنے کا فیصلہ کیا ہے۔انھوں نے کہا کہ وفاق میں پی ٹی آئی تسلی بخش اکثریت حاصل کرچکی ہے اور اس میں مزید بہتری کے امکانات موجود ہیں۔شاہ محمود قریشی نے کہا کہ بلوچستان میں ترقی کے لیے کام کریں گے جس کے لیے مرکز اور صوبے کے درمیان تعاون جاری رہے گا۔پی ٹی آئی کے رہنما جہانگیرترین نے کہا کہ بی اے پی کو اکثریت حاصل ہوئی ہے اس لیے ان کا حق ہے کہ وزیراعلیٰ ان کا ہوگا۔انھوں نے کہا کہ بی اے پی نے جام کمال کو بلوچستان کے وزیراعلیٰ کے لیے نامزد کیا ہے اور ہم ان کی حمایت کریں گے۔جہانگیر ترین نے دعویٰ کیا کہ متحدہ قومی موومنٹ (ایم کیو ایم)، پاکستان تحریک انصاف کے ساتھ تعاون کرے گی۔سابق وزیراعلیٰ خیبرپختونخوا (کے پی) پرویز خٹک نے کہا کہ پریشر گروپ چینلز نے بنایا ہے ہم نے نہیں بنایا اور میں اس پروپیگنڈے کو مسترد کرتا ہوں کیونکہ یہ بے بنیاد اور جھوٹی خبر ہے۔انھوں نے کہا کہ عمران خان ہم سب کے لیڈر ہیں وہ جو فیصلہ کریں گے ہم آنکھیں بند کرکے قبول کریں گے۔