لندن (وجاہت علی خان سے) سابق وزیر داخلہ اور سینٹ کی سٹینڈنگ کمیٹی کے چیئرمین رحمان ملک نے کہا ہے کہ پاکستان کے پانچ بڑے بزنس ٹائیکونز کی انکوائری ایک یورپی ملک میں شروع ہو چکی ہے جلد ان کے نام دنیا کے سامنے آ جائیں گے۔ انہوں نے کہا مجھے علم ہے کہ پاکستان کے کس ادارے یا جماعت نے برطانیہ کی تین خفیہ ایجنسیوں کو بھاری فیسیں دے کر پاکستان کے سیاستدانوں کی معلومات حاصل کی تھیں، رحمان ملک نے لندن میں اپنی رہائش پر ایک پریس کانفرنس سے خطاب کرتے ہوئے کہا مجھے خوشی ہے کہ سابق وزیراعظم اور ان کی فیملی پر بنائی گئی ”جے آئی ٹی“ نے 96 فیصد میری فراہم کی گئی رپورٹس پر فیصلہ کیا۔ انہوں نے کہا جے آئی ٹی نے بہترین کام کیا، پیپلز پارٹی سمجھتی ہے کہ پاکستانی سیاست سے گندگی صاف ہونی چاہیے کیونکہ پاکستان ایک مشکل ترین دور سے گزر رہا ہے میں سمجھتا ہوں کہ عمران خان اور ان کی جماعت کے دیگر افراد ایک دائرے کے اندر رہتے ہوئے سیاست کریں اور گالم گلوچ سے پرہیز کریں۔ انہوں نے کہا ہم جمہوریت کے حامی ہیں اور چاہتے ہیں کہ موجودہ حکومت اپنی آئینی مدت پوری کرے۔ انہوں نے بھارتی وزیراعظم کے دورہ امریکہ کو پاکستان کے خلاف قرار دیتے ہوئے کہا بھارت اسرائیل اور افغانستان کا گٹھ جوڑ خطے کے امن کے لئے شدید خطرہ ہے اور پاکستان حکمرانوں کےلئے لمحہ فکریہ ہونا چاہیے۔ انہوں نے کہا آج محترمہ بےنظیر بھٹو کی روح خوش ہو گی کہ قدرت ان کے سیاسی مخالفین سے خود انتقام لے رہی ہے۔ انہوں نے بلاول بھٹو زرداری کو پاکستان کا مستقبل قرار دیتے ہوئے کہا بلاول بھٹو پارٹی کے بااختیار رہنما ہیں۔ انہوں نے کہا میں نے آج تک جتنی بھی پیشنگوئیاں کی ہیں زیادہ تر سچ ثابت ہوئی ہیں۔ انہوں نے کہا میں پاکستان کا وزیرداخلہ رہا ہوں اور بڑی اچھی طرح جانتا ہوں کون کیا ہے کیا کیا کرتا رہا ہے۔ میں بہت سے رازوں سے پردہ اٹھا سکتا ہوں اس لئے پاکستان کی سیاسی جماعتیں ہوشمندی سے کام لیں اور بلاوجہ اور بے بنیاد الزام تراشیاں بند کر کے اصولوں کی سیاست کریں ورنہ میں نے زبان کھولی تو بات دور تک جائے گی۔ انہوں نے کہا پیپلز پارٹی کے جعلی اقامے سوشل میڈیا پر چلائے جا رہے ہیں یہ لوگ سن لیں کہ ان دنوں سائبرکرائم بڑا جرم ہے۔ انہوں نے کہا پاکستان کی سیاست میں گہرے کالے بادل دیکھ رہا ہوں۔ آنے والے چند ہفتوں میں سیاست میں بڑی تبدیلی آنے والی ہے۔ انہوں نے کہا میں سمجھتا ہوں سپریم کورٹ نے بہترین فیصلہ کیا لیکن احتساب بیورو کریسی، ججز اور جرنیلوں کا بھی ہونا چاہیے۔ انہوں نے کہا میرے بارے میں دئیے گئے جنرل امجد کے بیان میں کوئی صداقت نہیں ہے۔

اسلام آباد ، لاہور ( نمائندگان خبریں ) پیپلز پارٹی کے مرکزی رہنما و سابق وزیر داخلہ رحمان ملک نے کہا ہے کہ میرا فرض ہے پاکستان کے خلاف سازش کہیں بھی ہو اس کے بارے میں قوم کوآگاہ کروں،ریمنڈ ڈیوس کی کتاب کے حوالے سے اتنا کہوں گا کہ” را“ ایجنٹ جانتھن کمار نے 2016 میں ملاقات کی تھی، را ایجنٹ نے ایک گھوسٹ رائٹر دیا تاکہ پاکستان کے خلاف کیچڑ اچھالا جائے ،ریمنڈ ڈیوس نے 2014 میں دوبار خود کشی کی کوشش کی ،مجھے جان کیری کا فون آیا تھا کے ریمینڈڈیوس کے لیے کوئی راستہ نکالا جائے مگر میں نے اسے مسترد کردیا کیونکہ وہ استثنی کا حق دار نہیں تھا ۔وہ جمعرات کو پریس کانفرنس سے خطاب کررہے تھے ۔انہوں نے کہا کہ میرا فرض ہے پاکستان کے خلاف سازش کہیں بھی ہو اس کے بارے میں قوم کو آگاہ رکھوں۔ریمنڈ ڈیوس کی کتاب کے حوالے سے اتنا کہوں گا کہ” را“ ایجنٹ جانتھن کمار نے 2016 میں ملاقات کی تھی۔را ایجنٹ نے ایک گھوسٹ رائٹر دیا تاکہ پاکستان کے خلاف کیچڑ اچھالا جائے ۔ریمنڈ ڈیوس نے 2014 میں دوبار خود کشی کی کوشش کی۔دستاویزاتی ثبوت کے تحت بات کررہا ہوں ۔رحمان ملک نے کہا کہ مجھے جان کیری کا فون آیا لیکن میں اسے مسترد کردیا کیونکہ وہ استثنی کا حق دار نہیں تھا ۔جیسے ہی مجھے پتہ چلا تو میں اس کا نام ای سی ایل میں ڈال دیا تھا۔ایوان صدر میں صدر, حکومت اور عسکری قیادت نے یہ ایک متفقہ فیصلہ تھا کہ کسی بھی صورت ریمنڈ کو استثنی نہیں ملے گا۔اس کے بعد دوسری ملاقات جان کیری سے ایوان صدر میں ہوئی جس میں انہوں نے کہا کہ عدالت سے رجوع کری گے ،ہم نے بھی کہاکہ عدالت جو فیصلہ کرے گی ہم بھی آئین و قانون کے تحت چلے گا ۔انہوں نے کہا کہ ریمنڈ نے جن افراد کو قتل کیا ان کے لواحقین نے دستاویزی طور پر کہاکہ ہم ڈاکٹر عافیہ صدیقی سے اس معاملے کو منسلک کرنا چاہتے ہیں۔جنرل شجاع پاشا پر لگنے والے الزامات کو مسترد کرتا ہوں ہر ڈی جی آئی ایس آئی حکومت کو جواب دہ ہوتا ہے۔ہمیں ریمنڈ ڈیوس کے جھوٹ کے پلندے کو زیادہ اہمیت نہیں دینی چاہیئے۔ سابق وزیرداخلہ نے کہا کہشہباز شریف اس معاملے پر پیچھے نہ ہٹیں بصورت دیگر اس کو پبلک کرسکتا ہوں۔ہم نے بھی چلینجز کا سامنا کیا،پی پی حکومت بھی میموگیٹ سکینڈل میں بھنسی تھی لیکن کبھی حکومت کو ڈیمج نہیں ہونے دیا ۔بھارت اسرائیل تعلقات ہوں یا کلبھوشن کا معاملہ ہوافسوس آج حکومت تنہائی کا شکار ہوگئی ہے ۔پیپلزپارٹی وسطی پنجاب کے صدر قمرزمان کائرہ نے کہا ے کہ کرپشن کے الزامات میں انکوائری ہورہی ہے، مگر حکمران خاندان وکٹری کا نشان بنارہاہے، لاہور ہائیکورٹ بار کے تحت پی پی کے یوم سیاہ پر منعقدہ تقریب سے خطاب میں قمرزمان کائرہ نے کہا کہ وزیراعظم نوازشریف کہتے ہیں ، سازش ہورہی ہے ، ان کی اپنی حکومت ہے ، کون سازشیں کررہاہے، انہیں کھل کر قوم کو بتاناچاہئے، ان کا مزید کہنا تھا کہ 5جولائی کو ایک آمر نے منتخب حکومت کا خاتمہ کیا، یہ ملکی سیاسی تاریخ کا سیاہ ترین دن ہے، آج بلاول بھٹو ملک کی بقاءکی جنگ لڑرہے ہیں، قمرزمان کائرہ نے کہا کہ نوازشریف کہتے ہیں کہ ان کے خلاف کارروائی سے ملکی سیاست کو خطرہ لاحق ہو جائیگا، وہ کہتے ہیں کہ اگر ملک کی سیاست کو کوئی نقصان پہنچا تو پھر وہ کرپشن سے بھی بڑے جرم کے مرتکب قرار پائیں گے، پیپلزپارٹی جنوبی پنجاب کے صدر و سابق گورنر پنجاب مخدوم سید احمد محمود نے کہا ہے کہ پانامہ کیس قومی سلامتی کا مسئلہ نہیں کہ خفیہ رکھا جائے،تحقیقات کھلی ہوتیں تو پتہ چلتا کہ حسین نواز نے کیا جوابات دئیے، تمام حکومتی وزراءاور عہدیداران کو معلوم ہے کہ تالاب میں گندی مچھلیاں ہیں،پکڑے جانے کے خوف سے ان کا جھوٹ پر مبنی ضمیر اندر سے بول رہا ہے۔پارٹی کی فیڈرل کونسل کے رکن عبدالقادر شاہین کے ہمراہ پارٹی میڈیا آفس سے جاری اپنے بیان میں کہا ہے کہ شریف خاندان کی جب سے تفتیش شروع ہوئی ہے انہوں نے عدلیہ سے جنگ کی صورت حال اختیار کرتے ہوئے اسے فتح کرنے کی ٹھان لی ہے اور اس طرح لگ رہا ہے کہ وہ جے آئی ٹی پر حملہ آوار ہو کر عدلیہ پر حملہ کرنے کی اپنی تاریخ دہرانے جارہے ہیں۔