ساہوال‘ سوگودھا (نیا اخبار رپوٹ) سجادہ نشین آستانہ سیال شریف خواجہ محمد حمیدالدین سیالوی نے کہا ہے، پنجاب حکومت سے کسی قسم کی ڈیل نہیں ہو گی۔ رانا ثناءاﷲ کو مستعفی ہونا پڑے گا، چوبیس دسمبر کو شیرانوالہ باغ گوجرانوالہ میں تحفظ ختم نبوت کانفرنس کے انعقاد کا فیصلہ اٹل ہے، کانفرنس ہر صورت ہو گی۔ انہوں نے کہا اپنے اصولی موقف پر قائم ہیں، پنجاب حکومت سے ڈیل کی خبریں ڈس انفارمیشن ہیں، تحفظ ناموس رسالت کے لئے جان کی قربانی دینے سے بھی دریغ نہیں کروں گا۔ انہوں نے کہا ختم نبوت کی شق کو ن لیگی حکومت نے جان بوجھ کر چھیڑا جس سے مسلمانوں کے جذبات مجروح ہوئے، رانا ثناءاﷲ نے قادیانی نواز ثابت کیا ۔ گوجرانوالہ کی کانفرنس فیصل آباد سے بڑؑی ہو گی، تمام عقیدت مندوں مریدین اور پیر بھائیوں سے استدعا ہے کہ وہ ختم نبوت کانفرنس میں شرکت کریں۔ ادھر خواجہ حمید الدین سیالوی نے ملک بھر کے علماءکرام و مشائک عظام کا ہنگامی اجلاس کل سیال شریف میں طلب کر لیا جس میں حکومتی ہٹ دھرمی، استعفیٰ معاملات، گوجرانوالہ کو نشن اور لاہور میں 4 جنوری کے ہونے والے جلسہ عام کے حوالے سے مشاورات کی جائے گی۔ سیالوی خاندان کے ذرائع کے مطابق ن لیگ سے علیحدگی، رانا ثنا اﷲ کے مستعفٰی نہ ہونے اور پیر سیال کے تحفظات دورنہ کرنے پر ملک گیر احتجاجی تحریک کا حتمی فیصلہ باہمی مشاورت سے کیا جائے گا۔ وزیر اعلیٰ پنجاب کو شاں ہیں کہ پیر سیال کے تحفظات دور کئے جائیں جبکہ دوسری طرف پاکستان عوامی تحریک کے قائد طاہر القادری اور پی ٹی آئی کے شاہ محمود قریشی بھی پیر سیال سے رابطے میں ہیں۔ ادھر پیر سیال کے مرید وزیرمملکت مذہبی امور پیر امین الحسنات شاہ اور مستعفی ایم پی اے صاجزادہ نظام الدین سیالوی کے چھوٹے بھائی چیئرمین یونین کونسل سیال شریف صاجزادہ نعیم الدین سیالوی نے اپنے پیر و مرشد کے حکم پر ابھی تک استعفے نہیں دیئے۔

ساہیوال‘ سرگودھا (خصوصی رپورٹ) سجادہ نشین آستانہ عالیہ سیال شریف خواجہ حمید الدین سیالوی نے کہا ہے کہ تحفظ ختم نبوت کے اپنے مو¿قف پر قائم ہوں اور اس معاملے پر کسی قسم کا سمجھوتہ نہیں کرسکتا۔ تحفظ ناموس رسالت کانفرنس آپ گوجرانوالہ میں ہوگی جس میں پھر پانچ استعفے آئیں گے۔ اس بعد گجرات میں ہوگی اور پھر چار جنوری کو لاہور میں ہوگی جہاں مزید لوگ مستعفی ہوں گے۔ اس دن حکومتی تابوت میں آخری کیل ٹھونک دیں گے اور 35 اراکین کے استعفے سپیکر کو پیش کردیئے جائیں گے۔ یہ ملک گیر احتجاج مرحلہ وار جاری رہے گا۔ مسلم لیگ (ن) کی آئندہ انتخابات میں بھرپور مخالفت کریں گے۔ جن ارکان اسمبلی نے مستعفی ہونے کے وعدے کئے اور پھر حکومتی رابطہ پر منحرف ہوگئے وہ پھر سے مستعفی ہونے کی پیشکش کررہے ہیں تاہم اب ان سے استعفے نہیں لئے جائیں گے۔ جو لوگ اقتدار کی خاطر شریف برادران کے گن گا رہے ہیں وقت آنے پر یہ اللہ کی پکڑ میں ہوں گے اور عوام ان کا بے رحم احتساب کریں گے۔ دریں اثنا سابق گورنر پنجاب چودھری محمد سرور نے استعفیٰ دینے والے رکن پنجاب اسمبلی صاحبزادہ نظام الدین سیالوی اور خواجہ حمیدالدین سیالوی کے صاحبزادے قاسم سیالوی سے ملاقات کی اور انہیں تحریک انصاف میں شمولیت کی دعوت دی۔ قاسم سیالوی اگر تحریک انصاف میں شامل ہوجاتے ہیں تو وہ پی پی 37 سرگودھا سے تحریک انصاف کے پلیٹ فارم پر الیکشن میں حصہ لیں گے۔

سرگودھا (خصوصی رپورٹ) پیر آف سیال شریف کے سامنے استعفیٰ کا وعدہ کر کے انکاری ہونے والے ارکان اسمبلی کی سکیورٹی سخت کرنے کی ہدایت۔ تفصیلات کے مطابق تحریک لبیک یا رسول اﷲ ﷺ دھرنے کی حمایت کرنے والے پیر سیال شریف پیر حمید الدین سیالوی کی رہائش گاہ پر ڈاکٹر ذوالفقار علی بھٹی رکن قومی اسمبلی حلقہ این اے 67 اور رانا منور غوث رکن صوبائی اسمبلی حلقہ پی پی 37 نے پیر صاحب سے وعدہ کیا کہ وہ ان کی حمایت کا اعلان کرتے ہوئے اپنے استعفیٰ دینے کی یقین دہانی کروائی جس سے انکاری ہو گئے، ڈاکٹر ذوالفقار علی بھٹی نے پریس کلب میں پریس کانفرنس کی اور کہا کہ دھرنے نے استعفیٰ دینے کا وعدہ نہیں کیا۔ میں تو پارٹی قیادت کے حکم پر پیر صاحب کو راضی کرنے گیا تھا، اسی طرح رانا منور غوث بھی اپنا استعفیٰ دینے سے انکاری ہو گئے تھے۔ ڈاکٹر ذوالفقارر علی بھٹی کی پریس کانفرنس کے بعد عوامی روعمل کے پیش نظر دونوں ارکان اسمبلی کی سکیورٹی سخت کرنے کی ہدایت کرنے کے ساتھ ساتھ غیر ضروری نقل و حمل سے بھی روک دیا گیا ہے۔