اسلام آباد (آن لائن) پیپلز پارٹی کے رہنما سینیٹر اعتزاز احسن نے کہا ہے کہ سپریم کورٹ نے خود نیب کو اپیل دائر کرنے کی ہدایت کی حدیبیہ کیس نہ کھولنے کے فیصلے پر حیرانگی ہوئی۔ جہانگیر ترین اور نواز شریف کے کیس میں فرق ہے۔ نواز شریف نے ایک کاغذ بھی پیش نہیں کیا۔ جہانگیر ترین نے مکمل منی ٹریل دی تھی۔ عمران خان نے بھی منی ٹریل دی۔ نواز شریف ملکیت کا ثبوت بھی دیتے تو بات بن سکتی۔ بند گلی میں پھنسے نواز شریف اور مریم نواز دیوار توڑ کر نکلنا چاہتے ہیں۔ وکلاءتحریک کے مثبت اثرات بہت ہیں۔ مگر منتشر وکلاءاور متکبر ججز کے 2منفی اثرات بھی ہوئے جہانگیر ترین کے اپیل میں بچنے کے امکانات عمران خان پھنس سکتے ہیں۔ نجی ٹی وی کو انٹرویو میں اعتزاز نے کہا کہ ججز نے فیصلے میرٹ پر کرنے ہوتے ہیں ۔ نیب 20بار بھی تفتیش کرنا چاہے تو اسے روکا نہیں جا سکتا۔ انہوں نے کہا کہ جہانگیر ترین نے منی ٹریل دی انہیں بھی گھر بھیجنے کی ضرورت نہیں تھی نواز شریف نے منی ٹریل نہیں دی۔ ایک کاغذ بھی پیش نہیں کیا تھا۔ نواز شریف کے پاس بچت کا کوئی راستہ نہیں یہ دیوار توڑ کر نکلنا چاہتے ہیں۔ جہانگیر ترین کا کیس نواز شریف سے بہت بہتر ہے۔ انہوں نے کہا کہ عمران خان کا کیس بھی مختلف ہے۔ عمران خان نے بھی منی ٹریل دکھائی کہ جمائما کے ذریعے پیسے پہنچے۔ انہوں نے کہا کہ آئین کے62اور63میں ترمیم کی تجویز دی تھی مگر نواز شریف نہیں مانے تھے۔ اب بھی ترمیم ہو تو کوئی حرج نہیں ۔ انہوں نے کہا کہ جہانگیر ترین کی ریویو پٹیشن ٹھوس ہو گی۔ عمران خان کے کیس میں ریویو کی کامیابی کے امکانات کم ہیں۔ مگر وہ پھنس بھی سکتے ہیں۔ ان کا کہنا تھا کہ اقامہ منی لانڈرنگ سے زیادہ سخت کیس ہے کیا کوئی یہ سوچ سکتا ہے کہ برطانیہ کا وزریاعظم یا امریکی صدر پاکستان یا سعودی عرب میں کسی کمپنی کا ملازم ہے۔ یہ بڑا جرم اور آرٹیکل 6کا جرم ہے۔ انہوں نے کہا کہ سپریم کورٹ نے شریف برادران سے بہت نرمی برتی ہے۔ انہوں نے کہا کہ مریم نواز کے گالم گلوچ بریگیڈ میں وکلاءشامل نہیں۔ انہوں نے کہا کہ ہر ادارے کو اپنی حدود میں رہ کر کام کرنا چاہیے۔ آرمی چیف کو فوج آئی بی کو پولیس ، چیف جسٹس کو عدلیہ کو ٹھیک کرنا چاہیے۔ انہوں نے کہا کہ آصف زرداری صدر رہے۔ انہیں پارٹی سے بالکل لا تعلق نہیں رکھا جا سکتا۔

اسلام آباد (مانیٹرنگ ڈیسک) پیپلزپارٹی کے رہنما اعتزازاحسن نے کہا ہے کہ قومی اسمبلی میں تقریرکے دوران کیپٹن ریٹائرڈ صفدر کا اشارہ آرمی چیف کی طرف تھا۔ آرمی چیف اسلام اور پاکستان کی جنگ لڑ رہے ہیں۔ پیپلزپارٹی کے رہنما اعتزازاحسن نے میڈیا سے گفتگو کرتے ہوئے بتایاکہ یہ لوگ عیسائیوں کو گالیاں بھی دیتے ہیں اور اپنے بچے بھی ادھر پڑھاتے ہیں۔ عیسائیوں اور احمدیوں کو گالیاں دینے والے لندن میں گھر والوں کا علاج بھی کرواتے ہیں۔ انہوں نے کہا کہ یہ ہمیں آزمائش میں ڈال رہے ہیں کہ ہم ان کے ساتھ نبرد آزما ہوں۔ اعتزازاحسن نے کاکہنا تھا کہ فوج اسلام کے دفاع کی جنگ لڑرہی ہے، اسے متنازعہ بنانا احمقانہ ہے۔ نئے چئیرمین نیب جسٹس ریٹائرڈ جاوید اقبال کے حوالے سے ان کا کہنا تھا کہ نئے چئیرمین نیب محنتی اور قانون کو جاننے والے ہیں۔ انہیں ان سے کچھ زیادہ توقعات تو نہیں کیونکہ وہ ماضی میں بھی دباﺅ کا مقابلہ نہیں کرسکے لیکن اگر جاوید اقبال اسے زندگی کی آخری اننگز سمجھ کرکھیلیں تو توقعات پر پورا اتر سکتے ہیں۔

اسلام آباد(مانیٹرنگ ڈیسک) بیرسٹر اعتزاز احسن نے کہا ہے کہ مسلم لیگ ن اراکین بوکھلا گئے ہیں، شریف برادران30 سال سے حکمرانی کررہے ہیں اور کہتے پھرتے ہیں مجھے کیوں نکالا، تاثر دیا جارہا ہے کہ یہ سب سازش ہے، انہوں نے کہا کہ قائداعظم نے کہا تھا کہ آپ جو بھی ہوں ریاست کا اس سے تعلق نہیں، کیپٹن(ر) صفدر کہتے ہیں اقلیتوں کو نکال دیں، روز گار واپس لے لیں جسٹس(ر) بھگوان داس اگر معاہدہ کرلیتے تو منتقل ہوجاتے کیپٹن(ر) صفدر کے بیانات نواز شریف کی پالیسی ہیں، انہوں نے کہا کہ آرمی چیف اسلام کی جنگ لڑ رہے ہیں اور سپہ سالار ہو کر فرنٹ لائن پر جنگ لڑ رہے ہیں بدھ کو ایوان بالا میں عوامی اہمیت کے معاملے پر بات کرتے ہوئے اپوزیشن لیڈر چوہدری اعتزاز احسن نے کہا کہ کالعدم تنظیموں سے رابطے رکھنے والے افراد کی لسٹ میں ظاہر کرنا قابل اعتراض ہے۔ ان کا کہنا تھا کہ تمام پارٹیوں کے ممبران پر مشتمل کمیٹی بنائی جائے جو اس لسٹ کے سچے یا جھوٹے ہونے کی تحقیقات کرے۔ بند کمرے میں کام کرنے والی کسی کمیٹی پر یقین نہیں کیا جاسکتا ۔ اس لسٹ میں ہمارے ملک کے وزیر قانون کا نام بھی موجود ہے۔ جو کہ میری نظر میں قطعاً ایسے شخص نہیں جو دہشت گردوں سے رابطے میں ہوں۔ اپوزیشن لیڈر نے اس موقع پر آئی بی کی طرف سے جاری کی گئی اس لسٹ کو اپنے پروگرام میں ہونے کے جرم میں ارشد شریف پر مقدمے کے اندراج کی مشترکہ الفاظ میں مزمت کرتے ہوئے کہا کہ آئی بی کی رپورٹ واپس لینے یا اس سے انکار کرنے کے عمل پر یقین نہیں رکھتے۔ ہم اس موع پر ارشد شریف کے ساتھ کھڑے ہیں وہ بنیادی طور پر شریف اور قابل بھروسہ صحافی ہیں۔

لاہور، اسلام آباد، کراچی (نمائندگان خبریں) پیپلز پارٹی کے مرکزی رہنما سنیٹر اعتزاز احسن نے کہا ہے کہ سیاسی حالات سمیت ملک کی مجموعی صورتحال پر گہری نظر ہے، حکمران جماعت پانامہ جے آئی ٹی کے معاملے پر ہر روز نیا پتہ پھینک رہی ہے لیکن ہر چال اور تدبیر ان کے اپنے گلے پڑ رہی ہے ۔ ایک انٹر ویو میں انہوں نے کہا کہ وفاقی وزراءایک منصوبے کے تحت آنکھوں پر پٹی باندھ کر جے آئی ٹی کیخلاف بیانات داغ رہے ہیں جس ے ان کا اصل چہر ہ قوم کے سامنے بے نقاب ہو رہا ہے۔ انہوںنے کہا کہ پہلے دن ہی کہہ چکا ہوں کہ پانامہ لیکس حکمرانوں کے گلے کا طوق بن چکا ہے اور یہ کسی صورت بھی اس سے پیچھا نہیں چھڑا سکتے ۔اعتزاز احسن نے کہا کہ وفاقی وزراءنے ریاست کا حلف اٹھایا ہے لیکن بد قسمتی سے سار ے وزراءاپنی قیادت کی کرپشن بچانے میں لگے ہوئے ہیں ۔ دوسروں پر کرپشن کے بے بنیاد الزامات لگاکر پگڑیاںں اچھالنے والے اربوں کی کرپشن پر آج خود پکڑ میںآ چکے ہیں ۔ انہوں نے کہا کہ حکمران خاندان اور وزراءایک سوچے سمجھے منصوبے کے تحت ایسی فضاءکو فروغ دے رہے ہیںجس سے افرا تفری کا گماں ہوں لیکن عوام ان کی کسی چال کو کامیاب نہیں ہونے دیں گے۔ پیپلزپارٹی کے رہنما قمرالزماں کائرہ نے کہا کہ پانامہ کیس میں سپریم کورٹ کے ججوں کی کارروائی کے دوران مسلم لیگ ن کے وزراءکی زبان بہت ہتک آمیز تھی اور جب جے آئی ٹی کی کارروائی شروع ہوئی تو ابتدا میں انہوں نے مٹھائی بانٹی لیکن جب ان سے سوالوں کا سلسلہ شروع ہوا تو ان لوگوںکو پتہ چلا کہ آخر ہوا کیا ہے تو ان لوگوں نے شور کرنا شروع کر دیا اور اس کیس کو سازش کہنا شروع کر داب یہ مانیں یا نہ مانیں جے آئی ٹی کو اس سے فرق نہیں پڑتا جے آئی ٹی نے اپنی رپورٹ سپریم کورٹ میں جمع کرا دینی ہے وزیراعظم کو اب جانا ہے لیکن اب یہ شہبازشریف اوار مریم نواز کو بچانے کی کوشش کر رہے ہیں۔ پیپلزپارٹی لاہور کے صدر عزیز الرحمن چن نے کہا ہے کہ پیپلزپارٹی مسلم لیگ ن کو بادشاہت قائم نہیں کرنے دے گی پچھلے ادوار میں وزیراعظم نوازشریف اور امیر المومنین بننے کے خواب میں جدہ پہنچ گئے تھے انہوہں نے ہوش کے ناخن نہ لئے تو اس بار جیل سے جدہ نہیں بلکہ تختہ دار پر جائیں گے۔ انہوں نے کہا کہ حکومت سپریم کورٹ کے لئے دھمکی آمیز رویے سے گریز کرے۔ پیپلزپارٹی نے مسلم لیگ (ن) کے وزراءکی جانب سے ہفتہ کے روز جے آئی ٹی کی رپورٹ کو مسترد کرنے کی دھمکیوں کہ اگر قطری شہزادے کا بیان پاناما لیکس میں نہیں ریکارڈ کیا گیا تو وہ اس رپورٹ کو مسترد کر دیں گے کی مذمت کرتے ہوئے کہا ہے کہ حکمران خاندان ابتدا ہی سے بھاگنا چا رہا تھا۔ سابق چیرمین سینٹ اور پاکستان پیپلز پارٹی کے مر کزی  سیکرٹری جنرل سید نیر حسین بخاری نے وفاقی وزیر دفاع کے ہمراہ وفاقی وزراء کی  قومی حساس ادارے کی ساکھ متاثر کرنے کی کوشش اور حکومتی وزرا کی سرکاری خرچ پر سرکاری ملازمین کو خطاب میں ٹکراو اور تصادم کی فضائ   کوخطرناک  قرار دیتے ہوئے کہا ہے کہ آئینی عہدوں اور سرکاری فرائض کے قانونی تضاضوں کو مد نظر رکھا جانا چاہیے ممبران پارلیمنٹ اور بلخصوص اراکین پنجاب اسمبلی کی پانامہ پیپرز سے لاتعلقی دراصل جعلی شہزادوں کے تخت لاہور کے گرنے کااعلان ہے۔ سابق وزیر مملکت انصاف و پارلیمانی امور مہرین انور راجہ نے کہا ہے کہ پنجاب میں ہمارے کارکنان پرپولیس تشدد کر رہی ہے، حکومت پیپلزپارٹی کے کارکنان سے خوف زدہ ہے، سابق ایم پی اے امجد میو پر تشدد کی پرزور مذمت کرتے ہیں۔

لاہور (خبرنگار)پاکستان پیپلز پارٹی نے پاناما کیس کی جے آئی ٹی کارروائی کی ویڈیو ریکارڈنگ منظر عام پر لانے کا مطالبہ کر تے ہوئے کہا ہے کہ اگر کارروائی کی ویڈیو ریکارڈنگ سامنے نہ لائی گئی تو مشترکہ تحقیقاتی کمیٹی کی کارروائی مشکوک رہے گی ۔تفصیلکے مطابق سینٹ میں قائد حزب اختلاف اور پیپلز پارٹی کے سینئر رہنما سینیٹر اعتزاز احسن نے کہا ہے کہ حکومت جے آئی ٹی کو دھمکیاں دے رہی ہے ، ویڈیو ریکارڈنگ سامنے نہ لانے سے جے آئی ٹی کی کارروائی مشکوک رہے گی۔سینیٹر اعتزاز احسن کا کہنا تھا کہ ویڈیو منظر عام پر نہ لانے کی وجہ سے الزامات لگتے رہیں گے، وہ نہیں سمجھتے کہ سرکاری افسران نے نواز شریف کے بچوں کے ساتھ کوئی سختی برتی ہو گی، ویڈیو ریکارڈنگ سامنے لانے سے شریف خاندان کے جے آئی ٹی پر الزامات کی حقیقت بھی معلوم ہو جائے گی۔اعتزاز احسن کا کہنا تھا کہ اگر شریف خاندان کے پاس جے آئی ٹی سوالات کے جواب ہوتے تو یہ 3 اپریل 2016 کو ہی دے دیتے،جے آئی ٹی کے معاملے پر حکومت ٹوپی ڈرامے کر رہی ہے۔ انھوں نے دعوی کیا کہ حکومت جے آئی ٹی کو دھمکیاں دے رہی ہے۔

لاہور(ویب ڈیسک) پاکستان پیپلزپارٹی کے رہنما اعتزاز احسن کا کہنا ہے کہ بہت مشکل ہے کہ جے آئی ٹی قانونی تقاضے پورے کر سکے جب کہ ڈی جی آئی ایس آئی کی مریم نواز سے قریبی رشتہ داری ہے۔لاہور ہائی کورٹ کے باہر میڈیا سے بات کرتے ہوئے پاکستان پیپلزپارٹی کے رہنما اعتزاز احسن کا کہنا تھا کہ جے آئی ٹی آزاد نہیں ہو سکتی، پاناما کیس میں جے آئی ٹی پر عدالت خود ہی عدم اعتماد کا اظہار کر چکی ہے بہت مشکل ہے کہ جے آئی ٹی قانونی تقاضے پورے کر سکے گی۔پیپلز پارٹی کے رہنما کا کہنا تھا کہ کہ ڈی جی آئی ایس آئی کی مریم نواز سے قریبی رشتہ داری ہے اور جب شریف خاندان نے اپنی جائیداد تسلیم کر لی ہے تو پھر جے آئی ٹی بنانے کا کیا مقصد ہے۔