لندن، اسلام آباد، کراچی (نمائندگان خبریں) متحدہ قومی موومنٹ لندن کے سینئر رہنما بابر غوری ،شمیم صدیقی اور امبر خان نے پارٹی کی بنیادی رکنیت سے استعفی دے دیا۔متحدہ قومی موومنٹ لندن سے تعلق رکھنے والے سابق وفاقی وزیر پورٹ اینڈ شپنگ بابر غور اور سابق وزیر باقی صفحہ5بقیہ نمبر23مواصلات شمیم صدیقی اور سابق صوبائی وزیر ثقافت و کھیل امبر خان نے پارٹی رکنیت سے استعفیٰ کا علان کرتے ہوئے اپنے استعفیٰ لندن بھجوا دئیے۔ ایک نجی ٹی وی سے خصوصی بات کرتے ہوئے بابر غوری نے کہا کہ پارٹی کی رکنیت سے استعفے کا فیصلہ خالصتاً ذاتی ہے اور ابھی کسی پارٹی یا گروپ میں شامل نہیں ہورہا۔ بابر غوری نے پارٹی کی تمام ذمہ داریوں سے کنارہ کشی کا اعلان کرتے ہوئے کہا کہ پارٹی کی تمام ذمے داریوں سے دستبردار ہو رہا ہوں۔بانی ایم کیو ایم کی 22 اگست 2016 کو پاکستان مخالف تقریر کرنے پر فاروق ستار نے ایم کیو ایم پاکستان کا اعلان کیا جس کے بعد کئی رہنما ایم کیو ایم لندن کے ساتھ جڑے رہے۔ان کا کہنا تھا کہ گزشتہ ایک سال سے پارٹی میں فعال نہیں اور گزشتہ سال پاکستان زندہ باد کا نعرہ لگانے پر اختلافات ہوئے جس پر اب تک قائم ہوں تاہم اب پارٹی کو استعفی بھیج دیا ہے۔انہوں نے کہا کہ ایم کیو ایم ایک ہی ہے جو لندن میں ہے، پاکستان میں جو ایم کیو ایم ہے اس میں کبھی حصہ نہیں رہا۔ بابر غوری نے کہا کہ پہلے سمجھتا تھا کہ پاک سرزمین پارٹی نے غلط فیصلہ کیا لیکن شاید ان کے پاس یہی چوائس تھی جس کے بعد انہیں یہ کرنا پڑا اور اگر پی ایس پی اور ایم کیو ایم پاکستان کا انضمام ہوتا ہے تو اچھی بات ہے،انہوں نے کہا کہ سب کو الیکشن لڑنے کی آزادی ہونی چاہئے اور فیصلہ عوام پر چھوڑ دینا چاہئے ۔ شمیم صدیقی کا بھی کہنا ہے کہ22 اگست کو پاکستان کے خلاف تقریر پر پارٹی میں خاموشی اختیار کی اور ایم کیوایم کی ذمے داریوں سے دستبردار ہونے کا فیصلہ ذاتی ہے اور یہ فیصلہ مہاجرعوام کے حق میں سیاسی اور غیرسیاسی مفادات سے بالاتر ہوکر کیا۔رابطہ کمیٹی ایم کیو ایم لندن کی رکن امبر خان نے بھی پارٹی چھوڑنے کا اعلان کرتے ہوئے کہا کہ ایم کیو ایم لندن اور ایم کیو ایم پاکستان ایک ہی ہیں۔خیال رہے کہ بابر غوری ایم کیو ایم کی مخلوط حکومت میں وزیر پورٹ اینڈ شپنگ تھے اور ان کے دور میں کراچی پورٹ ٹرسٹ میں 900سے زائد غیرقانونی بھرتیوں سے متعلق کیس سندھ ہائی کورٹ میں زیرسماعت ہے۔

اسلام آباد (مانیٹرنگ ڈیسک) مسلم لیگ ن کے باغی کون ہیں، نوازشریف پارٹی پالیسی سےروگردانی کرنے والوں کے خلاف متحرک ہوگئے ۔ پرویزرشید اور خواجہ سعدرفیق کو ذمہ داری سونپ دی۔ ن لیگ نے دو اہم رہنماں کو پارٹی سے فارغ کرنے کا فیصلہ بھی کرلیا۔مسلم لیگ ن کے صدر نواز شریف نے ن لیگ کے باغی ارکان سے نمٹنے کے لیے پرویزرشید اور سعدرفیق کو ذمہ داری دے دی۔ ظفراللہ جمالی اور رضا حیات ہراج کو پارٹی سے فارغ کرنے کا فیصلہ بھی کرلیا گیا۔ پارٹی پالیسی سے روگردانی کے معاملے پر مسلم لیگ ن نے ظفراللہ جمالی اور رضا حیات ہراج کیلئے شوکاز نوٹس تو تیار کیا لیکن ساتھ ہی حتمی رائے بھی قائم کرلی ۔ جس کے تحت دونوں باغی ارکان کو فارغ کرنے کا فیصلہ کرلیا گیا ہے۔ دونوں ارکان کو کسی بھی فورم پر مدعو نہیں کیا جائے گا۔واضح رہے کے انتخابی اصلاحات ترمیمی بل میں ظفر اللہ جمالی نے اپوزیشن کے حق میں ووٹ دیا تھا جبکہ رضا حیات ہراج نے ووٹنگ کے عمل میں حصہ نہیں لیا تھا۔

اسلام آباد (نیا اخبار رپورٹ) مسلم لیگ (ن) کیخلاف اپوزیشن کے گٹھ جوڑ کے معاملات میں تیزی آنے کے بعد اب اپنے منطقی انجام کی طرف بڑھ رہے ہیں۔ علامہ طاہر القادری سے عمران خان، شیخ رشید، آصف علی زرداری اور چودھر شجاعت کی جانب سے اعلان یکجہتی کے بعد تمام اپوزیشن جماعتیں عملی اقدامات پر غور کر ہی ہیں۔ اس حوالے سے اسمبلیوں سے استعفیٰ دینے کے آپشن پر بھی غور کیا جا رہا ہے تا ہم ابتدائی طور پر یہ جمارعتیں مرکزی حکومت کے بجائے پنجاب حکومت پر دباﺅ بڑھانے کیلئے استعفوں کا اعلان کر سکتی ہیں۔ پاکستان پیپلز پارٹی کا موقف ہے کہ وہ جمہوریت کو ڈی ریل نہ کرنے کے موقف کے تحت قومی اسمبلی یا سینیٹ سے استعفیٰ نہیں دے سکتے بلکہ اگر پاکستان عوامی تحریک کو انصاف نہ ملنے کے معاملے پر عملی قدم لینا پڑا تو اس کیلئے کسی مرحلے پر وہ پنجاب اسمبلی سے مستعفی ہونے کا اعلان کر سکتے ہیں، تا ہم کوشش یہ کی جا رہی ہے کہ پنجاب اسمبلی سے استعفیٰ دینے کا فیصلہ ہو تو اس میں پاکستان تحریک انصاف اور جماعت اسلامی کو ساتھ رکھا جائے۔ پنجاب اسمبلی میں تحریک انصاف کی 30، پیپلز پارٹی کی 8 اور جماعت اسلامی کی ایک نشست ہے۔ آزاد ایم پی اے کے ساتھ رابطے کئے جا رہے ہیں، تا ہم ان میں سے ابھی صرف ایک نے آمادگی ظاہر کی ہے اور باقی چار کے ساتھ رابطے جاری ہیں۔ اسی طرح سے ختم نبوت اور رانا ثنااﷲ کے استعفیٰ کے معاملے پر خود مسلم لیگ (ن) کے اندر بھی انتشار ہے اور اس حوالے سے گزشتہ روز فیصل آباد کے جلسے میں 3 ایم پی ایز نے اپنی نشستیں چھوڑنے کا اعلان کر دیا ہے۔ دوسری جانب مرکز میں قومی اسمبلی اور سینیٹ میں بھی غیر اعلانیہ اور غیر تحریری طور پر کچھ باتیں طے ہوگئی ہیں جن کے تحت اب حکومت کو کسی بھی بل یا قانون سازی کیلئے کوئی تعاون فراہم نہیں کیا جائیگا اور حکومتی بینچوں کیلئے بزنس چلانے کو مشکل تر بنایا جائیگا۔ ذرائع کے مطابق جب تک مقرہ وقت پر عام انتخابات کیی کوئی ضمانت نہیں ملتی سینیٹ سے استعفےٰ نہیں دیئے جائیں گے تا ہم کسی اتفاق رائے کی صورت میں قومی اسمبلی سے مستعفی ہونے کا آپش آخری ہو گا۔ حکمت عملی یہی ہے کہ حکومت کیلئے اتنی مشکلات پیدا کر دی جائیں کہ وہ خود حکومت اور اسمبلی توڑنے پر مجبور ہو جائیں۔دریں اثنا مسلم لیگ (ن) میں بھی قبل از وقت انتخابات کا مطالبہ زور پکڑنے لگا ہے۔ اپوزیشن جماعتوں کے بعد حکومتی حلقوں نے بھی اس پر سوچ بچار شروع کر دی ہے کہ قبل از وقت انتخابات سے ن لیگ کو فائدہ ہو سکتا ہے یا نقصان‘ اس حوالے سے سول حساس اداروں سے اہم ن لیگی رہنما رپورٹس بھی منگوا چکے ہیں۔ مصدقہ ذرائع کے مطابق وقت سے پہلے انتخابات کے حوالے سے حکومتی حلقوں کے اندر یہ بات بھی زور پکڑ رہی ہے کہ اپوزیشن کے اس مطالبہ پر ن لیگ کو نقصان ہوتا ہے یا سیاسی فائدہ‘ اس پر غور کر کے فیصلہ کر لینا چاہئے۔ مصدقہ ذرائع کا کہنا ہے کہ اس حوالے سے سول خفیہ اداروں کی رپورٹس میں کہا گیا ہے کہ اگر فوری طور پر انتخابات ہوتے ہیں تو ن لیگ کا کم نقصان ہوگا۔ مخالف سیاسی اور مذہبی جماعتوں کی توجہ انتخابی مہم پر لگ جائے گی اور ن لیگ پر پریشر کم ہو جائے گا۔ رپورٹس میں یہ بھی کہا گیا ہے کہ جوں جوں وقت گزرتا جائے گا مذہبی حلقے بھی حکومت کی مخالفت میں مزید سرگرم ہوں گے اور آئندہ آنے والے دو ماہ میں ن لیگ کے خلاف احتجاجی تحریک بھی چل سکتی ہے جس سے ووٹ بینک میں کمی کے ساتھ ساتھ کئی ن لیگی ارکان اسمبلی بھی ساتھ چھوڑ سکتے ہیں۔ یہ ن لیگ کیلئے سیاسی طور پر انتہائی نقصان دہ ہو گا۔ باوثوق ذرائع کا کہنا ہے کہ اہم حکومتی ذمہ داروں کا ایک گروپ بھی اسی بات پر زور دے رہا ہے کہ جلد سے جلد انتخابات میں جایا جائے تاکہ جو سیاسی ساکھ بچی ہوئی ہے اس سے فائدہ اٹھا کر انتخابات جیتے جا سکیں۔ ذرائع کا کہنا ہے کہ نوازشریف‘ شہبازشریف اور ایک بڑا حکومتی حلقہ تمام رپورٹس سامنے آنے کے باوجود بضد ہے کہ الیکشن وقت پر ہی کرائے جائیں اور اس وقت تک حکومت میں رہ کر کیسز سمیت دیگر معاملات میں فائدہ اٹھایا جائے۔ شریف خاندان کے اندر اور نجی محفلوں میں اس حوالے سے جب گفتگو ہوئی تو دو اہم لیگی ذمہ داروں نے یہ کہا کہ اگر نوازشریف کو ہماری ہی حکومت کے ہوتے ہوئے کیسز میں سزا ہو گئی تو ہم بھرپور انداز میں عوامی عدالت میں نہیں جا سکیں گے۔ اگر نوازشریف کو سزا ہو جاتی ہے اور ہماری ہی حکومت ہوتی ہے تو پھر ہم کس کے خلاف احتجاج کریں گے۔