اسلام آباد(ویب ڈیسک) سپریم کورٹ نے ڈیمز فنڈ میں موجود رقم کی سرمایہ کاری کا فیصلہ کیا ہے۔سپریم کورٹ نے ڈیمز فنڈ میں موجود رقم کی سرمایہ کاری کا فیصلہ کیا ہے، عدالت نے اسٹیٹ بنک کو فنڈ میں موجود 10 ارب 60 کروڑ روپے نیشنل بنک کو منتقل کرنے کا حکم دیا ہے۔ عدالت کے مطابق 19 جون کو ٹی بلز کی نئی بولی کے بعد منافع کی شرح کا اعلان ہوگا، نیشنل بنک سپریم کورٹ کی جانب سے بولی میں حصہ لے گا جب کہ طے شدہ شرح منافع پر ڈیمز فنڈ کی ٹی بلز میں 3 ماہ کے لیے سرمایہ کاری ہوگی۔واضح رہے کہ سپریم کورٹ کی جانب سے حکم جاری ہونے کے بعد وفاقی حکومت نے دو ڈیمز دیامیربھاشا اورمہمند کی تعمیرکے لیے فنڈز قائم کیے تھے جس میں پاک فوج، سرکاری ملازمین، قومی کھلاڑیوں، اداکاروں اور سماجی شخصیات سمیت عام افراد نے پیسے جمع کرائے تھے۔

لاہور (مانیٹرنگ ڈیسک) چینل فائیو کے تجزیوں تبصروں پر مشتمل پروگرام ”کالم نگار“ میں گفتگو کرتے ہوئے سینئر صحافی اعجاز حفیظ خان نے کہا ہے کہ حکومت نے بدترین معاشی حالات میں بہتر بجٹ پیش کیا اپوزیشن بجٹ کے نام پر تحریک نہیں چلاسکتی۔ اپوزیشن تحریک صرف اپنے قائدین کو بچانے کیلئے چلانا چاہتی ے۔ تاہم اس میں ناکام رہے گی۔ پروڈکشن آرڈر کے نام پر جاری ڈرامہ بند ہونا چاہیے اس قانون پر نظرثانی کی جانی چاہیے جو صرف سپریم کورٹ ہی کرسکتی ہے اس قانون سے فائدہ اٹھاکر شہبازشریف صرف 3 دن جیل میں رہے۔ مکے لہرا کر بات کرنے والا مشرف بزدل نکلا اسے عدالت میں پیش ہونا چاہیے اور اس سے پہلے ملک و قوم کو اصل میں برباد کرنے والے ضیا الحق کا بھی ٹرائل ہونا چاہیے کہ دنیا میں ایسی مثالیں موجود ہیں کہ مرنے کے بعد ٹرائل ہوا شیخ رشید نے تحریک انصاف کو بڑا نقصان پہنچایا ہے۔ سینئر تجزیہ کار اشرف عاصمی نے کہا کہ حکمران اشرافیہ کی معاشی دہشتگردی نے زندگی اجیرن کردی۔ اپوزیشن میں تحریک چلانے کی سکت نہیں ہے بڑے بڑے نام والے جیلوں میں بند ہیں مزید پکڑے جارہے ہیں ان سے قوم کی لوٹی دولت واپس لینے میں کامیابی کا امکان نظر آتا ہے معاملات اپنے منطقی انجام کی جانب بڑھ رہے ہیں نیب اور عدلیہ کو کسی دباﺅ میں آئے بغیر لوٹی دولت نکلوانی چاہیے۔ مولانا فضل الرحمان بھی جلد گرفتار ہوجائینگے۔ عمران خان روایتی سیاستدانوں کی طرح منافق نہیں ہے اگر وہ ناکام ہوجاتا ہے تو پورا نظام لپیٹ دیا جائے گا۔ تجزیہ کار راجہ وحید نے کہا کہ احتساب پوری قوم کی خواہش ہے۔ عمران خان نے اعلیٰ سطحی کمیشن بنانے کا بہت اچھا فیصلہ کیا یہ کمیشن پہلے ہی بنادینا چاہیے تھا۔ کوئی شک نہیں کہ بیرون ملک سے بھاری قرضہ لیا گیا اور اسے ہڑپ کرلیا گیا۔ اپوزیشن چاہتی ہے کہ پارلیمنٹ نہ چل سکے۔ اپوزیشن کوئی تحریک چلانے کے قابل نہیں ہے۔ پرویز مشرف کی حالت ایسی نہیں ہے کہ واپسی آکر عدالت میں پیش ہوسکیں۔ سینئر تجزیہ کار عبدالباسط خان نے کہا کہ وزیراعظم عمران خان نے تقریر میں اپوزیشن کو خوب لتاڑا اور 24ہزار ارب قرضہ لینے کی تحقیقات کیلئے اعلیٰ سطحی کمیشن قائم کرنے کا اعلان کیا جو خو ش آئند ہے پروڈکشن آرڈر کا ناجائز استعمال کیا جارہا ہے سیاستدان ابھی جیل بھی نہیں پہنچتے اوراس کا مطالبہ شروع کردیتے ہیں پارلیمنٹ سب سے برتر ہے تاہم یہ برتری تب ہوتی ہے جب وہاں موجود لوگ ضمیر کے مطابق بات کریں اور مفادات کی سیاست نہ کریں۔

لاہور(مانیٹرنگ ڈیسک)حکومت کی طرف سے پیش کردہ بجٹ پر عوامی رائے جاننے کے لئے چینل فائیوے پروگرام نیوز ایٹ سیون کی ٹیم تاجروں اور عام آدمی کے پاس پہنچ گئی۔بجٹ پر مختلف طبقہ ہائے کے لوگوں نے اپنے اپنے تاثرات کا اظہار کیا کچھ نے بجٹ کو عوام دوست جبکہ کچھ نے محض اشرافیہ کو نوازنے کا ذریعہ قرار دیا ۔چھوٹے تاجروں نے کہا غریب کے لئے کچھ بھی نہیں ہم مزید پس جائیں گے آئی ایم ایف کا بجٹ ہے۔چند شہریوں نے بجٹ سے بالکل ہی لاتعلقی کا اظہار کر دیا کہ ہمیں کچھ پتہ نہیں۔شہریوں نے کہا پٹرول کی قیمت سمیت مہنگائی کم ہونی چاہئے پٹرول مہنگا ہونے سے دیگر اشیاءکی بھی مہنگی ہوں گی۔سب کہتے ہیں فلاں نے لوٹا فلاں پیسہ باہر لے گیا جو ہونا تھا ہو چکا اب ہمیں ریلیف دیا جائے۔شہریوں نے کہا وزیراعظم عمران خان کی نیت پر شک نہیں وہ بہت ایماندار ہیں لیکن مہنگائی بڑھی ہے قابو پانا چاہئے دیہاڑی دار آدمی کے مسائل حل کئے جائیں ٹیکسز ضرور لگائیں لیکن غریب آدمی سے ٹیکس نہ لیا جائے۔ایک شہری نے کہا بجٹ پہلے بجٹ سے ہٹ کر ہے لگژری اشیاءپر ٹیکس خوش آئند ہے۔ایک شہری نے کہا پھلوں کی ریڑھی لگاتا ہوں سونا مہنگا ہونے سے میری تو شادی خطرے میں پڑ گئی ۔کچھ شہریوں نے کہا دکاندار اپنے طور پر چیزوں کی قیمتیں بڑھا دیتے ہیں حکومت نوٹس لے۔ایک شہری نے کہا حکومت کو چاہئے عوام کو روزگار فراہم کرے جب تک مجموعی بہتری نہیں آتی معیار زندگی بہتر نہیں ہو گا۔ایک شہری نے کہا ادویات سستی ہونی چاہئیں مجموعی طور پر بجٹ ٹھیک ہے۔کرپشن کا پیسہ واپس آجائے تو ہی بجٹ بنانے میں آسانی ہو گی۔ایک شہری نے کہا لوگوں کو انتظار کرنا چاہئے حالات بہتر ہونگے۔

لاہور (مانیٹرنگ ڈیسک) چینل ۵ کے تجزیوں و تبصروں پرمشتمل پروگرام ”ضیا شاہد کے ساتھ“ میں گفتگو کرتے ہوئے سینئر صحافی و تجزیہ کار ضیا شاہد نے کہا ہے کہ میں نے وزیراعظم عمران خان کا خطاب سنا ہے اور اس میں ریکارڈنگ کی کوئی خرابی بھی تھی۔ کوئی ٹیکنیکل خرابی تھی یا کسی نے شرارت کی کہ وزیراعظم کی تقریر کا یہ حشر کیا جائے دو تین دفعہاس میں رکاوٹ بھی تھی ایک مرتبہ تو سکرین پر تصویر ہی ختم ہو گئی بہرحال اس بارے میں معلوم ہوا ہے اس کی انکوائری کا آرڈر کر دیا گیا ہے دیکھیں کیا نکلتا ہے کہ غیر ذمہ داری دکھائی گئی یا فنی خرابی ہے۔ جو کچھ انہوں نے کیا ان کا بہت سخت لہجہ تھا اور انہوں نے کہا چاہے کچھ بھی ہو جائے چاہے مجھے کتنی ہی تکلیف اٹھانی پڑے میں نے تہیہ کیا ہوا ہے کہ ان لوگوں کو کیفر کردار تک پہنچانا ہے میں کبھی اس سے پیچھے نہیں ہٹوں گا اس سے لگتا ہے کہ پچھلے دنوں بعض چیزیں چل رہی تھیں کہ حکومت کوئی سافٹ کارنر رکھ رہی ہے یا کوئی این آر او کی طرف بات جا رہی ہے حالانکہ وزیراعظم عمران خان کہہ بھی رہے ہیں کہ میرا کوئی اس قسم کا پروگرام کا سوال ہی پیدا نہیں ہوتا۔ میں یہ سمجھتا ہوں کہ اس کے باوجود یہ جو بجٹ کے بعد نیا دور شروع ہوا ہے اور خاص طور پر نواز شریف صاحب واپس جیل چلے گئے حملہ شہباز شریف کو گرفتار کر لیا گیا اور پھر یہ الطاف حسین کو لندن میں گرفتار کر لیا گیا اور اب اگلی شاہد خاقان عباسی کی افوا پھیلی ہوئی ہے۔ معلوم نہیں کس حد تک صحیح ہے لیکن کہا جا رہا ہے کہ اب ان کی باری ہے کچھ اخبارات میں اس بارے خبریں بھی لگ گئی ہیں میں یہ سمجھتا ہوں کہ شاید حکومت کا موقف کمزور ہونے کے بجائے مضبوط ہو گیا ہے۔ جہاں تک تقریر کے دوران جو کچھ ہوا ہے جو بھی حقائق سامنے آئے ہیں ان میں پرویز مشرف کی بات بھی شامل کر لیجئے گا کہ ان کے وکیل کو بولنے نہیں دیا گیا اور کہا گیا ہے کہ آپ کا حق جو ہے سپریم کورٹ ختم کر چکا ہے اب آپ کو صفائی میں کچھ کہنے کا حق بھی حاصل نہیں ہے کافی تناﺅ بڑھ رہا ہے کچھ چیزوں کے بارے میں معلوم ہوتا ہے کہ حکومت بھی فیصلہ کر چکی ہے۔ میں کل بھی بات کر رہا ہے کہ اس کا فیصلہ تو 30 تاریخ کو ہو گا لیکن ایک ہی آ گئی ہے کہ 5 ہزار لوگوں نے ایمنسٹی کے لئے درخواست دی ہے اور اسکا مطلب ہے کہ لوگوں کی تعداد کافی ہے اور رقم کتنی ہے اس میں یہ تو 30جون کو پتہ چلے گا۔ محسوس ہوتا ہے کہ کچھ لوگوں کو محسوس ہو رہا ہے کہ حکومت اس معاملے میں سنجیدہ ہے۔ بجٹ کے حوالہ سے بات کرتے ہوئے ضیا شاہد نے کہا کہ آنے والے چند روز کچھ اور بڑی چیزیں کلیئر ہو کر سامنے آ جائیں گی اور خاص طور پر 30 جون سے پہلے ہی بہت کچھ ہونے والا ہے اور 30 کے بعد بڑے پیمانے پر گرفتاریاں بھی ہونے والی ہیں جو لوگ تعاون نہیں کریں گے اور جن کے اعداد و شمار حکومت کے پاس موجود ہیں عمران خان صاحب کے دعوے کے مطابق تو معلوم ہوتا ہے کہ ان کو قانون کے کٹہرے میں لایا جائے گا۔ اگر میں اپوزیشن کی بڑی عزت کرتا ہوں اپوزیشن جمہوریت کے لئے بڑی ضروری چیز ہے جب تک اپوزیشن مضبوط نہ ہو تو حکومت کبھی صحیح راستے پر نہیں چل سکتی یہ ایک لازمی جزو ہے جمہوریت کا لیکن میں یہ سمجھتا ہوں کہ عید کے بعد یہ ہو جائے گا اور وہ ہو جائے گا اور فضل الرحمن نے یہ کہہ دیا آصف زرداری نے 10 کو لوگوں کو اسلام آباد پہنچنے کا پیغام دے دیا۔ مجھے ان ساری باتوں میں جان نظر نہیں آتی اس لئے کہ جو حقیقت ہے یعنی بلاول بھٹو کا یہ اعلان کہ آج یوم احتجاج منایا جائے گا آپ نے دیکھا کہ پورا ملک جو ہے اس میں ہمیں کوئی بڑے پیمانے پر یوم احتجاج کی کوئی جھلک نظر نہیں آئی۔ سندھ اسمبلی میں زرداری کی گرفتاری پر سندھ اسمبلی کے اندر متفقہ قرارداد منظور ہونے بارے بات کرتے ہوئے ضیا شاہد نے کہا کہ قراردادوں سے بات بہت آگے نکل گئی ہے جب آپ پکڑ دھکڑ پر آ جائیں تو پھر قراردادیں کوئی معنی نہیں رکھتیں۔ الطاف اور زرداری کی گرفتاری کے حوالے سے بات کرتے ہوئے ضیا شاہد نے کہا کہ میں سمجھتا ہو ںکہ یہ ساری چیزیں 30 جون تک بہت ساری باتیں کھل کر سامنے آ جائیں گی۔ بلاول بھٹو کی کریڈیبلٹی پر بات کرتے ہوئے ضیا شاہد نے کہا کہ اپوزیشن کا ایک جگہ پر جمع نہ ہونا ہے کیونکہ رمضان کے دوران جتنی بھی باتیں تھیں کہ عید کے بعد بہت بڑے پیمانے پر احتجاجی مہم چل نکلے گی جس میں ساری اپوزیشن پارٹیاں جمع ہو گئی ہیں کوئی ایسی چیز ابھی تک تو نظر نہیں آئی۔ لگتا ہے یہ کوئی بظاہر مستقبل قریب میں کوئی بظاہر نظر بھی نہیں آ رہی۔ کسی وقت سیاست میں کچھ بھی ہو سکتا ہے تاہم فی الحال اس بات کا بڑا امکان ہر گز دکھائی نہیں دے رہا کہ کسی بڑے پیمانے پر ری ایکشن کا۔ حالانکہ بجٹ میں جو جھٹکے لگتے ہیں عوام کو ظاہر ہے مہنگائی ہوتی ہے ٹیکس نئے آتے ہیں اس کے باوجود اس میں لوگوں کا کوئی فوری ری ایکشن دکھائی نہیں دیتا اس میں گرمی کا موسم بھی ہے۔ یہ کوئی جلسے جلوسوں کا موسم بھی نہیں ہے۔ جہاں تک مریم نواز کے کل کے خطاب کا تعلق ہے باوجود اس کے کہ بہت امید بھی کی جا رہی تھی کوئی آپس میں مذاکرات بھی کئے جا رہے تھے کہ مختلف جماعتوں کے لیکن کسی نہ کسی وجہ سے بات کسی نتیجے پر پہنچ نہیں سکی۔ حتیٰ کہ مولانا فضل الرحمن ملتان چلے گئے اور جو سب سے زیادہ سرفہرست تھے کہ ان کی وجہ سے بہت سارے مختلف الخیال لوگوں کے درمیان بھی اشتراک عمل کی کوئی شکل پیدا ہو جائے گی وہ بھی نہیں ہو گی اور خود انہوں نے بھی زیادہ دلچسپی نہیں لی شاید وہ مایوس ہو گئے یا کسی نئے لائحہ عمل کے انتظار میں ابھی بھی کوئی منتظر ہیں کہ کوئی نئی شکل سامنے آ جائے کیونکہ اب تک کی تیاری توجو تھی تو رائیگاں گئی ہے۔ بانی ایم کیو ایم کی گرفتاری کے بارے میں بات کرتے ہوئے ضیا شاہد نے کہا کہ الطاف حسین کافی دنوں سے بیمار تھے اور جو لوگ ان کو مختلف تقریبات میں دیکھتے بھی رہتے تھے اور پریس کانفرنسوں میں تو ان کا سہارا دے کر چلانا پڑتا تھا اب ان کی 12 گھنٹے کی پوچھ گچھ کی گئی ہو گی اور لگتا ہے کہ جس طرح کہ ان کو منتقل کرنا پڑا ان کی طبیعت خراب ہوئی ہے۔ میں نے ان کی ایسی پریس کانفرنسیں بھی دیکھی ہے کہ ان کو دو دو لوگوں نے ان کو سہارا دے کر بٹھایا ہے۔ اس سے تو لگتا ہے کہ ان کی طبیعت تو پہلے ہی خراب تھی اب پوچھ گچھ سے مزید خراب ہو گئی ہو گی۔
الطاف حسین کی سوالات کے جواب دینا ہی پڑیں گے، حکومت کی جانب سے بھی کوئی پیغام برطانیہ ضرور جائے گا، پاکستان کی جانب سے اس معاملہ پر خاموشی اختیار نہیں کی جائے گی کیونکہ ملک کے خلاف تقاریر کی گئی تھی۔ مشرف کیس میں سپریم کورٹ اور حکومتی حلقوں نے سختی سے کام لینے کا فیصلہ کر لیا ہے، حکومت اس معاملے میں سنجیدہ ہے کہ مشرف عدالت میں پیش ہوں تاہم دوسری طرف سے کہا جا رہا ہے کہ مشرف کی طبیعت ناساز ہے میرے خیال میں پرویز مشرف واپس نہیں آئیں گے اور ان کی غیر موجودگی میں ہی کیس چلایا جائے گا۔ ملزم کی عدم موجودگی میں کیسز چلنے کی مثالیں موجود ہیں سزا بھی سنائی جا سکتی ہے۔ مشرف نے شاید واپس نہ آنے کا فیصلہ کر لیا ہے وہ وہیں رہ کر علاج کرائیں گے اور کیس کا جو بھی نتیجہ سامنے آئے اسے بھگتیں گے۔ کسان اتحاد کے اشتہار دیکھ کر تو لگتا ہے کہ انہوں نے بجٹ کو سراہا ہے اور اس سے مطمئن ہیں ابھی دوسرے فریق محمد انور کا موقف سامنے نہیں آیا۔ بجٹ کا عوام پر بوجھ تو پڑے گا۔ حکومت کا کہنا ہے کہ معیشت کی بہتری کے لئے اسے 8 ماہ مزید چاہئیں۔ ایمنسٹی سکیم میں اگر واقعی 5 ہزار لوگوں نے اپلائی کیا ہے تو اس سے بھی بڑا فرق پڑے گا۔ سابق ادوار میں حکومتیں سیاسی بھرتیاں کرتی رہی ہیں اس لئے ان کے وفادار سرکاری ملازم موجود ہیں۔ وزیراعظم کی تقریر کے دوران جو مسئلہ سامنے آیا وہ کسی کی شرارت بھی ہو سکتی ہے تاہم عموماً تکنیکی خرابی بھی ہو جاتی ہے اور میرے خیال میں ایسا ہی ہوا ہے۔ واقعہ کی تحقیقات کا حکم دے دیا گیا ہے حقیقت سامنے آ جائے گی۔

راولپنڈی(ویب ڈیسک) آرمی چیف جنرل قمر جاوید باجوہ کا کہنا ہے کہ پاک فوج مادر وطن کو درپیش کسی بھی خطرے کا پوری طرح جواب دینے کے لئے تیار ہے۔ پاک فوج کے شعبہ تعلقات عامہ (آئی ایس پی آر) کے مطابق جی ایچ کیو راولپنڈی میں سالانہ فارمیشن کمانڈرز کانفرنس کا انعقاد کیا گیا جس کی صدارت پاک فوج کے سربراہ جنرل قمر جاوید باجوہ نے کی، فارمیشن کمانڈرز کانفرنس میں پاک فوج کے تمام جنرل آفیسرز نے شرکت کی۔کانفرنس میں جیو اسٹرٹیجک اور قومی سیکیورٹی صورتحال کا جائزہ لیا گیا، ملک کی اندرونی سلامتی، درپیش چیلنجز اور ان سے نمٹنے پر تفصیلی غور کیا گیا اور ملک کی اندرونی سلامتی کی صورتحال کا جائزہ لیا گیا جب کہ ملک کو درپیش چیلنجز اور ان سے نمٹنے کے حوالے سے تفصیلی تبادلہ کیا گیا۔آئی ایس پی آر کے مطابق آرمی چیف جنرل قمر جاوید باجوہ نے فروری میں تنازع کے دوران بھارت کو بھرپور جواب دینے کوسراہا اور کہا کہ فروری میں پاک فوج نے بھارت کو منہ توڑ جواب دیا، پاک فوج مادر وطن کے دفاع کو درپیش کسی بھی طرح کے خطرے کا جواب دینے کی صلاحیت رکھتی ہے۔سربراہ پاک فوج نے کہا کہ ملک میں استحکام اور امن آپریشن ردالفساد کی کامیابیوں کے ثمرات ہیں۔

اسلام آباد(ویب ڈیسک) مشیر خزانہ عبدالحفیظ شیخ نے کہا ہے کہ ٹیکس دینے سے کوئی ناراض ہوگا تو اسے ناراض کریں گے۔مشیر خزانہ عبدالحفیظ شیخ نے پوسٹ بجٹ کانفرنس کرتے ہوئے کہا کہ پاکستان میں ہر آدمی کو ٹیکس دینا ہوگا، ہمارے ملک میں امیر لوگ ٹیکس نہیں دے رہے، اگر کوئی ٹیکس دینے سے ناراض ہو گا تو ہم اسے ناراض کریں گے، لیکن کسی صورت میں ٹیکس چھوٹ اب کسی کو نہیں دی جائے گی، امیروں کا ٹیکس نہ دینا قابل قبول بات نہیں ہے۔عبدالحفیظ شیخ نے کہا کہ فائلر اور نان فائلر کا فرق ختم کررہے ہیں، کوئی نان فائلر کچھ بھی خریدے گا اسے فائلر بننا ہوگا، گاڑی اور جائیداد خریدنے والے کو فائلر بننا پڑے گا اور ذریعہ آمدنی بتانا پڑے گا، نان فائلر بننا آسان ہے اور 6 منٹ میں آن لائن کمپیوٹر پر فائلر بن سکتے ہیں، اگر 45 دن میں فائلر نہ بنے گا تو اسکو خودبخود ٹیکس نظام میں لایا جائیگا۔مشیر خزانہ کا کہنا تھا کہ یہ غلط تاثر ہو گا کہ ایکسپورٹ سیکٹر کیلئے کوئی چھیڑ چھاڑ ہوئی، تقریبا 12 سو ارب کی ڈومیسٹک ٹیکسٹائل سیل ہے لیکن اس سیل پر 6 سے 8 ارب ٹیکس ملتا ہے، یہ نہیں ہو سکتا 12 سو ارب کی سیل پر 8 ارب ٹیکس دیا جائے۔ انہوں نے کہا کہ ریفنڈز کے نظام کی بہتری کیلئے ایک اور پریس کانفرنس کریں گے، مانتا ہوں ریفنڈز کے سلسلے میں بہت بہتری کی گنجائش ہے، بنگلہ دیش اور چین کے ریفنڈ نظام کو متعارف کرانیکی کوشش کریں گے۔عبدالحفیظ شیخ نے مزید کہا کہ ہم ماضی کے قرضوں کا سود دینے کیلئے قرض لے رہے ہیں، 5 ہزار 555 ارب ریونیو کلیکشن کا بوجھ میں نے ایف بی آر نہیں اپنے اوپر ڈالا ہے، اس میں سے 3 ہزار ارب تو قرضوں کے سود دینے میں چلے جائیں گے، سابق حکومت نے ٹیکس نظام سے آدھے پاکستان کو خارج کر دیا تھا، ملکوں کے درمیان عزت سے کھڑے ہونے کے لیے ہمیں ٹیکس اکٹھا کرنا ہے، کیا جو شخص ایک لاکھ روپے ماہانہ کما رہا ہے وہ ایک یا دو ہزار بھی ٹیکس نہ دے، اگر یہ غریب ہیں تو پھر ان کا کیا بنے گا جو واقعی غریب ہیں۔