لاہور: (ویب ڈیسک) انسداد دہشت گردی عدالت لاہور نے جناح ہاؤس جلاؤ گھیراؤ سمیت دیگر مقدمات میں وائس چیئرمین پی ٹی آئی شاہ محمود قریشی کی عبوری ضمانت میں توسیع کر دی۔
انسداد دہشت گردی عدالت لاہور کے جج اعجاز احمد بٹر نے شاہ محمودقریشی کی تین مقدمات میں عبوری درخواست ضمانت پرسماعت کی، رہنما پی ٹی آئی نےعبوری ضمانت میں پیشی ہو کر حاضری مکمل کروائی۔
عدالت نے شاہ محمود قریشی کی ضمانت میں 7جولائی تک توسیع کر دی۔
یاد رہے کہ رہنما پی ٹی آئی کے خلاف تھانہ سرور روڈ، گلبرگ اور ریس کورس میں مقدمات درج ہیں۔
آج یا کل آئی ایم ایف کا پول کھلنے والا ہے: شاہ محمود قریشی
لاہور کی انسداد دہشتگردی عدالت میں پیشی کے موقع پر میڈیا سے گفتگو کرتے ہوئے پی ٹی آئی کے رہنما شاہ محمود قریشی نے کہا ہے کہ آج یا کل بین الاقوامی مالیاتی فنڈ (آئی ایم ایف) کا پول کھلنے والا ہے۔
انہوں نے کہا کہ جو بجٹ پیش ہوا اور جو پاس ہوا اس میں دن اور رات کا فرق تھا، کوئی پاکستانی قوم کو اس مایوسی سے نکالنے کیلئے منصوبہ بندی اور صف بندی نہیں کر رہا، صف بندی ہو رہی ہے تو صرف حصول اقتدار کے لئے۔
شاہ محمود قریشی کا کہنا تھا کہ ڈار صاحب کو آئی ایم ایف کے آگے گھٹنے ٹیکنے پڑے، پیپلز پارٹی اور مسلم لیگ ن حصول اقتدار کے لئے دبئی میں ہیں۔
وائس چیئرمین پی ٹی آئی نے کہا کہ بلاول بھٹو اور مریم نواز وزارت عظمیٰ کے امیدوار ہیں، بھارت کے وزیرِ اعظم کے بیان پر کسی نے جواب نہیں دیا۔

مکہ مکرمہ: (ویب ڈیسک) نگراں وزیراعلیٰ پنجاب محسن نقوی اور وفاقی وزیر مذہبی امور طلحہ محمود کی منیٰ میں ملاقات ہوئی۔
سینیٹر طلحہ محمود اور وزیرِ اعلیٰ پنجاب محسن نقوی نے پاکستانی حجاج سے ملاقاتیں کیں اور ان کے مسائل سنے۔
اس موقع پر گفتگو کرتے ہوئے نگراں وزیرِ اعلیٰ پنجاب محسن نقوی نے کہا کہ فریضہ حج کے دوران حجاج کرام کی خدمت بھی عبادت سے کم نہیں۔
وفاقی وزیر طلحہ محمود کا کہنا تھا کہ حجاج کے مسائل کے حل کے لیے عوام میں موجود ہوں، پاکستانی حجاج کی خدمت ہماری اولین ترجیح ہے۔

اسلام آباد: (ویب ڈیسک) سمندر پار پاکستانیوں کی جانب سے مسلح افواج سے اظہار یکجہتی کیلئے کار ریلی کا انعقاد کیا گیا۔
سانحہ 9 مئی کی مذمت اور مسلح افواج سے اظہار یکجہتی کیلئے نیدر لینڈ کے شہر روڑرڈیم میں کار ریلی کا اہتمام کیا گیا جس میں بچوں اور جوانوں نے کثیر تعداد میں شرکت کی۔
ریلی کے شرکاء نے پاکستانی جھنڈے اور پلے کارڈ اٹھا رکھے تھے جس پر پاکستان آرمی کے حق میں نعرے درج تھے۔
شرکاء نے سانحہ 9 مئی کے ذمہ داران کو کڑی سزا دینے کا مطالبہ بھی کیا، شرکا کا کہنا تھا کہ اوورسیز پاکستانیوں کا دل پاکستان اور پاک فوج کے ساتھ دھڑکتا ہے، منفی پروپیگنڈہ کرنے والوں کی شدید مذمت کرتے ہیں۔

لاہور: (ویب ڈیسک) مختلف شعبہ ہائے زندگی کے افراد نے جناح ہاؤس لاہور کا دورہ کیا اور شرپسندوں کو سخت سزا دینے کا مطالبہ کیا۔
شرکاء کا کہنا تھا کہ 9 مئی کے واقعے کی پرزور مذمت کرتے ہیں، جناح ہاؤس کی حالت دیکھ کر بہت دکھی اور مایوس ہیں، واقعے کی شرپسندی کو بیان کرنے سے قاصر ہیں، ملک دشمن عناصر جیسا سلوک 9 مئی کے شرانگیزوں کے ساتھ ہونا چاہئے۔
انہوں نے کہا کہ جنہوں نے سرکاری املاک کو نقصان پہنچایا انہیں کیفر کردار تک پہنچایا جائے، ہمارے قائد کے گھر کو نقصان پہنچانے والوں کو قانون کی گرفت سے نہیں نکلنے دینا چاہیے، کیسے انسان ہیں جنہوں نے احتجاج کے نام پر تخریب کاری کی۔
جناح ہاؤس لاہور دورے پر آئے شرکاء کا کہنا تھا کہ ہم مطالبہ کرتے ہیں کہ جنہوں نے یہ گستاخی اور بے حرمتی کی ان کو سخت سزا دی جائے تاکہ کوئی اور ایسا کرنے کا نہ سوچے۔

لاہور: (ویب ڈیسک) پنجاب، خیبر پختونخوا، بلوچستان، کشمیر اور گلگت بلتستان میں آج بھی تیز ہواؤں، آندھی اور گرج چمک کے ساتھ بارش کا امکان ہے۔
جنوبی پنجاب کے مختلف شہروں ملتان، بہاولپور اور ڈی جی خان میں بارش کے بعد کئی علاقوں میں بجلی کی فراہمی معطل رہی، کوہ سلیمان رینج میں موسلادھار بارش کے بعد دھانا سر کے مقام پر لینڈ سلائیڈنگ ہوئی۔
پہاڑی چٹانیں این 50 پر گرنے سے ژوب ڈی آئی خان ہائی وے بند ہوگئی جس کے باعث بلوچستان کا خیبرپختونخوا کے ساتھ زمینی رابطہ منقطع ہوگیا۔
کوئٹہ ژوب ہائی وے پر کار ریلے میں بہہ جانے کے بعد ایک طالب علم کی لاش نکال لی گئی جبکہ 2 کو بچالیا گیا، ڈرائیور کی تلاش کی جاری ہے۔
دوسری جانب کراچی کے علاقوں کلفٹن اور ڈیفنس میں ہلکی بارش ہوئی۔
گزشتہ روز ملک میں سب سے زیادہ بارش لاہور ایئرپورٹ پر 255 ملی میٹر ریکارڈ کی گئی، لاہور کے کئی علاقے پانی میں ڈوبے رہے تاہم بعد میں زیادہ تر علاقوں سے نکاسی کر لی گئی، پری مون سون بارشوں کا سلسلہ 30 جون تک جاری رہے گا۔

دبئی / لاہور: (ویب ڈیسک) دبئی میں پاکستان کی دو بڑی اتحادی جماعتوں کے رہنماؤں کا اکٹھ ، مسلم لیگ (ن) کے قائد نواز شریف اور پیپلزپارٹی کے شریک چیئرمین آصف علی زرداری کے درمیان اہم ملاقات ہوئی ہے۔
میاں نوازشریف اور آصف زرداری کے درمیان دبئی میں ہونے والی اہم ملاقات میں مسلم لیگ ن کی چیف آرگنائزر و سینئر نائب صدر مریم نواز اور پاکستان پیپلزپارٹی کے چیئرمین بلاول بھٹو بھی شریک تھے۔
ذرائع کے مطابق اس اہم بیٹھک میں عام انتخابات کیلئے اسمبلیوں کی تحلیل کی تاریخ، عبوری حکومت اور سیٹ ایڈجسٹمنٹ پر بات چیت کی گئی جبکہ موجودہ سیاسی صورتحال اور آئندہ کے لائحہ عمل پر بھی مشاورت ہوئی ۔
ملاقات میں نواز شریف کی وطن واپسی پر بھی مشاورت ہوئی جبکہ موجودہ اہم سیاسی پیشرفت کا جائزہ بھی لیا گیا جبکہ ن لیگ اور پیپلزپارٹی نے ملاقاتیں جاری رکھنے پر اتفاق کیا۔
ذرائع کے مطابق دونوں جماعتوں کے قائدین کی عید کے بعد دوبارہ ملاقات ہوگی، جس میں اہم فیصلے کئے جانے کا امکان ہے۔
قائد مسلم لیگ ن کی جانب سے سابق صدر آصف علی زرداری کے لئے عشائیے کا بھی اہتمام کیا گیا۔