اسلام آباد: (ویب ڈیسک) پاکستان ٹین پن باؤلنگ چیمپئن شپ کا آغاز لیزر سٹی باؤلنگ کلب جناح پارک راولپنڈی میں 9مارچ سے ہوگا ۔
پاکستان ٹین پن بائولنگ فیڈریشن کے صدر اعجاز الرحمان کاکہنا ہے کہ چیمپئن شپ کی تیاریاں ابھی سے شروع کردی گئی ہیں ، چیمپئن شپ میں ملک بھر سے مرد اور خواتین کھلاڑی حصہ لے رہے ہیں اور چیمپئن شپ میں مینز سنگلز، مینز ڈبلز، ٹیم ایونٹ، ایمچور، ڈیف (مینز اینڈ ویمنز ) اور میڈیا کیٹگریز کے مقابلے رکھے گئے ہیں۔
چیمپئن شپ میں دس لاکھ روپے کی انعامی رقم رکھی گئی ہے ، چیمپئن شپ کی اختتامی تقریب 13 مارچ کو ہوگی اور چیمپئن شپ کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔
انہوں نے مزید بتایا کہ خواتین کے عالمی ڈے کے موقع خواتین ٹین پن باؤلنگ چیمپئن شپ کے بھی مقابلے ہونگے جس میں100سے زائد خواتین حصہ لیں گی۔

لاہور: (ویب ڈیسک) ایچ بی ایل پاکستان سپر لیگ (پی ایس ایل) 8 کے ٹاپ باؤلر اور بیٹر کا اعزاز اب تک ملتان سلطانز کے کھلاڑیوں کے پاس ہے۔
ملتان سلطانز کے نوجوان فاسٹ باؤلر احسان اللہ نے لاہور قلندرز کے شاہین آفریدی، حارث رؤف، اسلام آباد یونائیٹڈ کے حسن علی، شاداب جبکہ کوئٹہ کے محمد حسنین سب کو پیچھے چھوڑ دیا۔
احسان اللہ نے پی ایس ایل 8 میں اب تک 6 میچز میں 14 شکار کر کے سب سے زیادہ وکٹوں کے ساتھ فضل محمود کیپ پر قبضہ جما لیا ہے، ان کی بہترین باؤلنگ 12 رنز کے عوض 5 وکٹیں ہیں۔
اسی طرح بیٹرز اور وکٹ کیپنگ میں بھی ملتان سلطانز کے محمد رضوان کا پہلا نمبر ہے، وہ 6 میچز میں 358 رنز کے ساتھ پہلے نمبر پر رہتے ہوئے حنیف محمد کیپ پر قابض ہیں۔
اسی طرح محمد رضوان 7 کیچز کے ساتھ فیلڈنگ میں بھی سب سے آگے ہیں۔

لاہور: (ویب ڈیسک) پاکستان سپر لیگ میں لاہور قلندرز کے کپتان شاہین شاہ آفریدی نے کہا ہے کہ میں پی ایس ایل میں بہت الرٹ ہوں، میرا کرکٹ میں اچھا کم بیک ہوا ہے، کوشش ہے کہ پہلے اوور کی پرفارمنس برقرار رکھوں۔
شاہین نے کہا کہ میں ایک وقفے کے بعد کھیل رہا ہوں، میری ہمیشہ کوشش ہوتی ہے کہ اپنی بہترین کرکٹ کھیلوں، پھر چاہے ڈومیسٹک ہو یا کلب کرکٹ۔
انہوں نے پشاور زلمی کے خلاف میچ میں محمد حارث کا بیٹ توڑنے کے بعد انہیں بولڈ کرنے اور پھر کپتان بابر اعظم کو بولڈ کرنے کے حوالے سے کہا کہ کوشش یہی ہے کہ پہلے اوور کی پرفارمنس کو برقرار رکھوں، میری کوشش ہوتی ہے کہ ٹیم کو جلد از جلد بریک تھرو دوں، شکر ہے اس میں میں کامیاب ہوں۔
شاہین کا کہنا تھا کہ پی ایس ایل میں لاہور کے مرحلے کے میچز کھیل کر اچھا محسوس ہو رہا ہے، لاہور قلندرز کو ہمیشہ اپنے کراؤڈ سے بہت سپورٹ ملتی ہے۔
ان کا کہنا تھا کہ لاہور کے لوگ کرکٹ کے بہت فین ہیں، اچھی چیز ہے کہ اب ہم مسلسل لاہور میں کھیل رہے ہیں، لاہور قلندرز کی ٹیم اچھا پرفارم کر رہی ہے، امید ہے کہ فینز کو مزید اچھی کرکٹ دیکھنے کو ملے گی۔

اسلام آباد: (ویب ڈیسک) کراچی کنگز کا آج پشاور زلمی سے ٹاکرا ہوگا جبکہ کراچی کے کپتان عماد وسیم ٹورنامنٹ میں کم بیک کیلئے پرعزم ہیں۔
اسلام آباد میں پریس کانفرنس کرتے ہوئے عماد وسیم نے کہا کہ آخری میچ جیتنے کے بعد کافی ایڈوانٹیج ملاہے ورنہ ہم ٹورنامنٹ سے باہر ہو گئے تھے۔
ان کا کہنا تھا کہ ٹیم سلیکشن میں کچھ غلطیاں ہوئی ہیں، ٹورنامنٹ کا اختتام بہتر طریقے سے کریں گے، آخری میچ میں کامیابی کیساتھ کم بیک کیا ہے، چھوٹے مارجن سے میچ ہارے ہیں جبکہ بڑے مارجن سے میچ جیتے ہیں۔
انہوں نے کہا کہ ٹیم کی کارکردگی سے مطمئن نہیں ہوں، نوجوان کھلاڑیوں کے لئے پی ایس ایل اچھا پلیٹ فارم ہے، ڈومیسٹک میں اچھی پرفارمنس دینے کے بعد پی ایس ایل میں طیب طاہر اچھی پرفارمنس دے رہے ہیں، ان کے لئے انٹر نیشنل کرکٹ کے دروازے کھلے ہیں، ملتان سلطانز کا احسان اللہ اچھی باؤلنگ کروا رہا ہے۔
کپتان کراچی کنگز نے کہا کہ ہوم گراونڈ اور ہوم کراؤڈ بارہواں کھلاڑی ہوتا ہے، کراؤڈ کے پریشر میں بھی مزہ آتا ہے، قاسم اکرم مستقبل کا سرمایہ ہیں، اس کی جگہ عرفان نیازی کو لے آئے ہیں۔
عماد وسیم نے کہا کہ ہم دو تین سال سے پنڈی میں میچ کھیل رہے ہیں، پنڈی کرکٹ سٹیڈیم کی وکٹ ٹی 20 میچز کے لئے بہترین ہوتی ہے، چھکے چوکوں کی برسات ہو گی تو شائقین کرکٹ خوش ہوں گے۔
انہوں نے کہا کہ عمران طاہر اور تبریز شمسی کو ٹیم کا حصہ بنانا چاہتے تھے تاہم پہلے میچوں میں عمران طاہر کو موقع دیا گیا۔
عماد وسیم نے کہا کہ تمام فیصلوں کی ذمہ داری لیتا ہوں تاہم کوچز کیساتھ بھی مشاورت کرتا ہوں۔

لاہور : (ویب ڈیسک) پاکستان ویمنز کرکٹ ٹیم کی کپتان بسمہ معروف نے قومی ٹیم کی قیادت سے استعفیٰ دے دیا جو کہ پاکستان کرکٹ بورڈ ( پی سی بی ) کی مینجمنٹ کمیٹی کے چیئرمین نجم سیٹھی کی جانب سے قبول کرلیا گیا ہے۔
سماجی رابطے کی ویب سائٹ ٹوئٹر پر اپنے ایک بیان میں پی سی بی مینجمنٹ کمیٹی کے چیئرمین نے بتایا کہ میں نے پاکستان خواتین کرکٹ ٹیم کی کپتان بسمہ معروف کا استعفیٰ منظور کر لیا ہے، بسمہ نوجوان کھلاڑیوں کے لئے موقع دینا چاہتی ہیں۔
نجم سیٹھی کا کہنا تھا کہ خوشی کی بات ہے کہ بسمہ مستقبل میں پاکستان کے لیے کھیلتی رہیں گی اور اپنے ملک کا نام روشن کریں گی۔
واضح رہے کہ بسمہ معروف کی قیادت میں قومی ٹیم نے 34 میں سے 16 ون ڈے میچز میں کامیابی حاصل کی ہے جبکہ 62 میں سے 27 ٹی ٹوئنٹی جیتے ہیں۔