چارسدہ: (ویب ڈیسک) جماعت اسلامی کے مرکزی امیر اور سینیٹر سراج الحق نے کہا ہے کہ الیکشن کمیشن آزاد نہیں ہے اور حکومت کے اشاروں پر چل رہا ہے۔
اپنے ایک بیان میں امیر جماعت اسلامی سراج الحق نے کہا کہ الیکشن کمیشن اپنے فرائض میں ناکام ہوچکا ہے، ان کا کام سپریم کورٹ کر رہا ہے، سپریم کورٹ الیکشن کا ایک ساتھ اعلان کرے۔
انہوں نے کہا کہ پی ڈی ایم اور پی ٹی آئی کی لڑائی ذاتی مفادات کیلئے ہے، پی ڈی ایم اور تحریک انصاف آئی ایم ایف کے غلام ہیں، یہ دونوں سیاسی دہشت گرد ہیں۔
سراج الحق کا مزید کہنا تھا کہ مہنگائی اس نہج پر پہنچ چکی ہے کہ لگتا ہے سانس لینے پر بھی ٹیکس لگ جائے گا، خیبرپختونخوا میں سکیورٹی کی صورت حال خراب ہے، بھتہ خوری جاری ہے۔

اسلام آباد: (ویب ڈیسک) توشہ خانہ کیس میں چیئرمین پاکستان تحریک انصاف عمران خان کے ناقابل ضمانت وارنٹ گرفتاری جاری کر دیئے گئے۔
عدالتی احکامات کے باوجود عمران خان سیشن کورٹ پیش نہیں ہوئے، جس پر ایڈیشنل ڈسٹرکٹ اینڈ سیشن جج ظفر اقبال نے وارنٹ جاری کیے ہیں، عمران خان کو عدالت نے آج طلب کر رکھا تھا۔
ناقابل ضمانت وارنٹ گرفتاری جاری کیے جانے کے بعد پی ٹی آئی کارکن سیشن کورٹ کے باہر جمع ہونے لگے ہیں۔
قبل ازیں اسلام آباد کی ڈسٹرکٹ اینڈ سیشن کورٹ میں سابق وزیراعظم کیخلاف توشہ خانہ ریفرنس سے متعلق فوجداری کیس کی سماعت ہوئی جس میں ان کے وکیل علی بخاری عدالت میں پیش ہوئے جبکہ الیکشن کمیشن کی طرف سے سعد حسن بطور وکیل پیش ہوئے۔
دورانِ سماعت الیکشن کمیشن اور عمران خان کے وکیل کے درمیان تلخ کلامی ہوئی جس میں سابق وزیراعظم کے وکیل نے الیکشن کمیشن کے وکیل سے کہا کہ آپ الیکشن کمیشن کے وکیل ہیں، وکیل ہی رہیں، ترجمان نہ بنیں۔
علی بخاری نے عدالت کو بتایا کہ عمران خان کچھ دیر پہلے لاہور سے نکل پڑے ہیں، انہیں آج جوڈیشل کمپلیکس کی دو عدالتوں میں پیش ہونا ہے، وہ آج اس عدالت میں پیش نہیں ہو سکیں گے۔
عمران خان کے وکیل نے سماعت 5 دن کے لیے ملتوی کرنے کی استدعا کی تو جج نے برہمی کا اظہار کرتے ہوئے کہا کہ یہ کونسا طریقہ ہے، عمران خان 11 کورٹس میں پیش ہو سکتے ہیں، کچہری میں نہیں، عمران خان جوڈیشل کمپلیکس پیش ہوجائیں گے اِدھر کے لیے ٹائم نہیں بچے گا، یہ کونسا طریقہ ہے، ادھر فرد جرم عائد ہونا ہے ادھر آجائیں، فرد جرم عائد ہو جائے پھر چلے جائیں۔
جج کے ریمارکس پر علی بخاری نے کہا کہ خواجہ حارث اس کیس میں عمران خان کے وکیل ہیں، آج یہاں اس عدالت میں پیش ہونے کے لیے وہ دستیاب نہیں ہیں۔
بعدازاں سیشن کورٹ نے عمران خان کی حاضری سے معافی کی درخواست مسترد کرتے ہوئے نا قابل ضمانت وارنٹ گرفتاری جاری کر دیئے۔

لاہور: (ویب ڈیسک) پاکستان تحریک انصاف (پی ٹی آئی) کے کارکنان اور ضلعی انتظامیہ کی ٹیموں کے درمیان عمران خان کی رہائش گاہ زمان پارک کے باہر سے بینرز اتارنے پر تصادم ہوا ہے۔
زمان پارک میں عمران خان کی رہائش گاہ کے باہر اس وقت ہنگامہ آرائی کی صورت حال پیدا ہوئی جب ضلعی انتظامیہ کی ٹیمیں بینرز اتارنے کیلئے پہنچیں، اس دوران تحریک انصاف کے کارکنان بھی وہاں ڈنڈے لے کر پہنچ گئے۔
تحریک انصاف کے کارکنوں نے بینرز اتارنے کیلئے آنے والی ٹیموں پر حملہ کر دیا، جوشیلے کارکنان کی جانب سے بینر اتارنے والی ضلعی انتظامیہ کی ٹیموں پر ڈنڈے برسائے گئے، ضلعی انتظامیہ نے سڑک پر موجود کرسیاں گاڑیوں میں لوڈ کیں جنہیں کارکنان نے نیچے اتار لیا۔
کارکنان اور ضلعی انتظامیہ کی ٹیموں کے درمیان ہنگامہ آرائی کے باعث کینال روڈ اور ملحقہ سڑکوں پر ٹریفک سست روی کا شکار ہوگئی۔

اسلام آباد: (ویب ڈیسک) پاکستان پیپلز پارٹی کی رہنما اور سینیٹر شیری رحمان نے کہا کہ عمران خان عدالت پر اثر انداز ہونے اور گرفتاری سے بچنے کیلئے جلوس اور مظاہرے کے ساتھ پیش ہو رہے ہیں۔
سماجی رابطے کی ویب سائٹ ٹوئٹر پر اپنے پیغام میں سینیٹر شیری رحمان نے کہا کہ پہلے لاہور اور آج اسلام آباد ہائی کورٹ میں تماشہ لگایا جا رہا ہے، تحریک انصاف کی جانب سے جوڈیشل کمپلیکس میں مظاہرہ اور توڑ پھوڑ قابل تشویش اور توہین عدالت کے مترادف ہے۔
انہوں نے کہا کہ عدالت اس منظم مظاہرے اور حملے کا نوٹس لے، عدالت کو ہر بار ایک ثابت شدہ چور کی پیشی کیلئے انتظار نہیں کرنا چاہیے۔
شیری رحمان کا مزید کہنا تھا کہ واضع طور پر عمران خان کو خصوصی مراعات دی جا رہی ہیں، عدالت عام مجرم اور خاص مجرم کا تاثر پیدا کر رہی ہے جس کی وجہ سے پورے نظام عدل پر سوالات اٹھ رہے ہیں۔

کراچی: (ویب ڈیسک) پاکستان پیپلز پارٹی (پی پی پی) کے سینئر رہنما منظور وسان نے کہا ہے کہ سابق وزیراعظم عمران خان کے خلاف پرانے کیسز کھلیں گے اور وہ جیل بھی جائیں گے۔
اپنے ایک بیان میں رہنما پیپلز پارٹی منظور وسان نے چیئرمین پی ٹی آئی عمران خان کی مارچ میں نااہلی کی پیش گوئی کرتے ہوئے کہا کہ عمران خان جیل بھی جائیں گے۔
تحریک انصاف کی جیل بھرو تحریک کے حوالے سے منظور وسان نے کہا کہ یہ تحریک چلانا کوئی آسان کام نہیں ہے، عمران خان جیل جانے سے ڈر رہے ہیں۔
مہنگائی پر بات کرتے ہوئے ان کا کہنا تھا کہ مہنگائی سے سرکاری ملازمین اور مزدور طبقہ پریشان ہے، سرکاری ملازمین کی تنخواہیں 70 فیصد بڑھائی جائیں، مزدوروں کی بھی مزدوری میں اضافہ کا اعلان کیا جائے۔

اسلام آباد: (ویب ڈیسک) پنجاب اور خیبرپختونخوا میں انتخابات کے معاملے پر پیپلزپارٹی، (ن) لیگ اور جے یو آئی نے فل کورٹ کی درخواست واپس لے لی۔
سپریم کورٹ میں پنجاب اور خیبرپختونخوا میں انتخابات کے معاملے پر پیپلزپارٹی، (ن) لیگ اور جے یو آئی نے پہلے 9 رکنی لارجر بینچ پر اعتراض کرتے ہوئے فل کورٹ بنانے کا مطالبہ کیا تھا تاہم لارجر بینچ سے 4 ججوں کے علیحدہ ہونے کے بعد تینوں جماعتوں نے فل کورٹ کی درخواست بھی واپس لے لی۔
سپریم کورٹ میں اس حوالے سے کیس کی سماعت کے موقع پر پی پی کے وکیل فاروق نائیک نے عدالت کو بتایا کہ سیاسی جماعتوں نے مشترکہ ہدایت کی ہے کہ فل کورٹ کی درخواست نہیں چلائیں گے، چیف جسٹس نے 5 رکنی لارجربینچ جو بنایا ہے وہی کیس سنے۔

کراچی: (ویب ڈیسک) کورنگی زمان ٹاؤن کے علاقے میں بیوی نے اپنے آشنا کے ساتھ مل کر شوہر کو چھریوں کے پے در پے وار کر کے موت کے گھاٹ اتار دیا، مقتول کے 7 بچے تھے جن کا پیٹ پالنے کیلئے وہ رکشہ چلاتا تھا۔
مقتول کی بیوی ریحانہ کے اپنے شوہر کے بھتیجے علی گل کے ساتھ ناجائز تعلقات تھے، ریحانہ نے اپنے شوہر کو راستے سے ہٹانے کیلئے حیدرآباد سے ملزم علی گل کو بلایا اور پھر دونوں نے مل کر 12 فروری کو اسے بے رحمی سے مار ڈالا۔
رپورٹس کے مطابق ملزمہ ریحانہ نے پولیس کو گمراہ کرنے کیلئے مقدمے میں 3 غیر متعلقہ افراد کو نامزد کیا، ان 3 افراد کے ساتھ ملزمہ کا پلاٹ کے معاملہ پر جھگڑا چل رہا تھا، پولیس نے شک کی بنیاد پر ریحانہ کو حراست میں لے کر تفتیش کی تو اس نے اعتراف جرم کر لیا۔

اسلام آباد: (ویب ڈیسک) چیئرمین پی ٹی آئی عمران خان جوڈیشل کمپلیکس پہنچ گئے.
چیئرمین پاکستان تحریک انصاف (پی ٹی آئی) عمران خان 4 مختلف مقدمات میں پیشی کے لیے اسلام آباد پہنچ گئے۔ عمران خان جوڈیشل کمپلیکس پہنچے ہیں جہاں وہ عدالتوں میں پیش ہوں گے۔
عمران خان کی پیشی کے موقع پر بدںطمی دیکھنے میں آئی۔ پی ٹی آئی کارکنان جوڈیشل کمپلیکس کے احاطے میں داخل ہو گئے۔پی ٹی آئی کارکنان جوڈیشل کمپلیکس کا دروازہ بھی توڑ دیا۔
چیئرمین پی ٹی آئی لاہور میں اپنی رہائش گاہ زمان پارک سے بذریعہ سڑک اسلام آباد پہنچے، اس سے قبل عمران خان نے طیارے سے جانا تھا تاہم بعد ازاں روانگی کا پروگرام تبدیل کرکے بذریعہ موٹروے جانےکا فیصلہ کیا گیا۔
چیئرمین تحریک انصاف عمران خان انسداد دہشت گردی،بینکنگ کورٹ سمیت سیشن عدالت کے 2 کیسز میں پیش ہوں گے۔