اسلام آباد: (ویب ڈیسک) وزیراعظم شہباز شریف نے موسم گرما میں لوڈ شیڈنگ کم کرنے اور رمضان المبارک کے دوران سحر و افطار میں بجلی بند نہ کرنے کی ہدایت کردی۔
وزیرِ اعظم محمد شہباز شریف کی زیرِ صدارت رواں سال موسمِ گرما میں بجلی کی فراہمی اور پاور سیکٹر کے مختلف منصوبوں پر جائزہ اجلاس ہوا جس میں شہباز شریف نے رواں سال موسمِ گرما میں کم سے کم لوڈشیڈنگ کرنے کی ہدایت کرتے ہوئے کہا کہ رمضان المبارک کے دوران سحور و افطار میں کوئی لوڈشیڈنگ نہ کی جائے جبکہ سرکاری عمارتوں کی سولرآئیزیشن کی رفتار کو تیز کیا جائے۔
وزیراعظم نے تھر مٹیاری پانچ سو کے وی ٹرانسمیشن لائن بچھانے کے عمل میں سست روی پر برہمی کا اظہار کرتے ہوئے کہا کہ یہ کام مقررہ مدت میں پورا کیوں نہیں ہوا، مںصوبے میں غفلت کے مرتکب افسران کے خلاف محکمانہ کارروائی کی جائے۔ شہباز شریف نے این ٹی ڈی سی بورڈ کی ازسر نو تشکیل کی بھی ہدایت کی۔

ساہیوال: (ویب ڈیسک) پاکستان مسلم لیگ ن کی سینیئر نائب صدر اور چیف آرگنائزر مریم نواز نے کارکنوں کو ہدایت کی ہے کہ وہ الیکشن کی تیاری کریں، عوام سے رابطے بڑھائیں۔
مریم نواز نے ساہیوال میں مرکزی تنظیم کے اجلاس میں خطاب میں کارکنوں کو ہدایت کی کہ عوام کو مہنگائی، بے روزگاری اور معاشی تباہی لانے والے کرداروں کے نام بتائیں۔
مریم نے کہا کہ جتنی بڑی تعداد میں خواتین اور نوجوان تنظیمی کنونشنز میں آرہے ہیں، یہ اصل تبدیلی ہے، عوام کو مسائل سے نکالنے میں تاریخی کردار ادا کرنا ہے۔

اسلام آباد: (ویب ڈیسک) وفاقی وزیر برائے تخفیف غربت و سماجی تحفظ شازیہ مری نے کہا ہے کہ بی آئی ایس پی کے تحت ملنے والی سہ ماہی رقم حکومت کی جانب سے سات سے بڑھا کر نو ہزار روپے کر دی گئی ہے، بڑھی ہوئی رقم جنوری 2023ء سے لاگو کر دی گئی، مارچ میں یہ رقم بڑھی ہوئی ملے گی۔
وفاقی وزیر چیئرپرسن بے نظیر انکم سپورٹ پروگرام شازیہ مری نے کہا ہے کہ بی آئی ایس پی 90 لاکھ خان دانوں کی مالی معاونت کر ریا ہے، 28 ہزار سالانہ کی مالی امداد سہ ماہی اقساط کی صورت میں دی جاتی ہے، حکومت نے سہ ماہی قسط 7 ہزار سے بڑھا کر 9 ہزار کرنے کا فیصلہ کیا ہے۔
انہوں ںے بتایا کہ یہ فیصلہ غربت زدہ خان دانوں کو مہنگائی کے اثرات سے محفوظ رکھنے کی کوشش ہے، بے نظیر نشوونما پروگرام کے ذریعے مستحق حاملہ خواتین، بچوں کو دودھ پلانے والی ماؤں کو بھی مدد فراہم کی جاتی ہے۔
ان کا کہنا تھا کہ دو سال کی عمر کے بچوں کو معیاری خوراک کے ساشے مہیا کیے جاتے ہیں، اس کے علاوہ 70 لاکھ مستحق بچوں کو بے نظیر تعلیمی وظائف بھی دئیے جاتے ہیں، تعلیمی وظائف سے اسکولوں میں داخلے بڑھے ہیں اور ڈراپ آوٹ میں کمی آئی ہے۔

اسلام آباد: (ویب ڈیسک) صدر مملکت ڈاکٹر عارف علوی نے خیبرپختونخوا میں انتخابات کی تاریخ کی ایڈوائس واپس لینے کا فیصلہ کر لیا۔
صدر مملکت کے وکیل سلمان اکرم راجہ نے سپریم کورٹ کو آگاہ کیا کہ صدرمملکت نےفیصلہ کیاہے کے پی میں انتخابات کی تاریخ کا نوٹیفکیشن واپس لے لیں۔
انہوں نے بتایا کہ صدر مملکت کا کہنا ہے کہ کے پی میں گورنر نے اسمبلی تحلیل کی تو صوبے میں انتخابات کی تاریخ دینا بھی گورنر ہی کا اختیار ہے۔
جسٹس محمد علی مظہر نے استفسار کیا کہ اب تک صدر مملکت نے کےپی کی حد تک ایڈوائس واپس کیوں نہیں لی؟ اس پر وکیل نے جواب دیا کہ صدر مملکت جلد ایڈوائس واپس لیں گے۔
صدر کے وکیل نے اعتراف کیا کہ صدر کے پاس کے پی میں انتخابات کی تاریخ دینے کا اختیار نہیں تھا، انہوں نے کے پی میں تاریخ دے کر آئینی اختیار سے تجاوز کیا۔
اس پر جسٹس منصور علی شاہ نے استفسار کیا کہ کیا صدر نےتاریخ کا اعلان کرکے ہائیکورٹ کے فیصلے کی توہین نہیں کی؟
وکیل سلمان اکرم راجہ نے کہا کہ صدر مملکت ہائیکورٹ میں فریق نہیں تھے۔

نوشہرہ: (ویب ڈیسک) مسلم لیگ (ن) کے رہنما انجینئر امیر مقام نے کہا ہے کہ لاڈلے کو ریلیف پر ریلیف ملنے سے نظام انصاف پر سوالات تو اٹھتے ہیں۔
نوشہرہ کلاں کے علاقے کابل ریور میں کارنر میٹنگ سے خطاب کرتے ہوئے مسلم لیگ (ن) کے صوبائی صدر اور مشیر وزیر اعظم پاکستان انجینئر امیر مقام نے کہا کہ مسلم لیگ (ن) اور پی ڈی ایم پاکستان کو بچانے کی جنگ لڑ رہے ہیں۔
انہوں نے کہا سیاسی، معاشی اور اقتصادی عدم استحکام کے ذمہ دار عمران خان اور ان کا نااہل ٹولہ ہے، ملک میں کمر توڑ مہنگائی ہے، مہنگائی کی ذمہ داری بھی ان پر عائد ہوتی ہے، عمران خان کی جیل بھرو تحریک جیل ڈرو تحریک بن گئی ہے۔

اسلام آباد: (ویب ڈیسک) پاکستان تحریک انصاف کے رہنما فواد چودھری نے کہا ہے کہ الیکشن 90 دن کے اندر ہر صورت ہونے ہیں، انتخابات کا اعلان کس نے کرنا ہے اس نقطے پر زیادہ بحث رہی۔
میڈیا سے گفتگو کرتے ہوئے فواد چودھری نے کہا کہ یہ پاکستان کی تاریخ کا اہم کیس ہے، ہم بھی چاہتے ہیں سب کا اتفاق رائے ہو، ان کے مطالبات یہ ہیں کہ پہلے عمران خان کو ڈس کوالیفائی کرو پھر نواز شریف کے کیسز معاف ہونے چاہیئں، ان حالات میں کیسے اتفاق رائے ہو گا، شریف فیملی نے اپنے آپ کو جنرل ضیاالحق کا جانشین ثابت کیا ہے، زرداری صاحب جنرل ضیا الحق کو اپنا پیر مان چکے ہیں۔
سابق وزیر اطلاعات نے مزید کہا کہ سپریم کورٹ آئین کی محافظ ہے، آئین کی حفاظت کیلئے سپریم کورٹ نے قدم اٹھایا، مسلم لیگ کی جانب سے سپریم کورٹ کو تقسیم کرنا پرانی اسٹرٹیجی ہے، مسلم لیگ (ن) ججز کو تقسیم کر کے اپنے مقاصد حاصل کرنا چاہتی ہے، عوام سپریم کورٹ کی طرف دیکھ رہی ہے۔
فواد چودھری نے کہا کہ سب کو پتا ہے سپریم کورٹ میں تقسیم بڑھانے میں کون سے گروپ کام کر رہے ہیں، فل کورٹ میٹنگ میں ججز اپنے اختلافات کو دور کریں، ہمارا مطالبہ ہے انتخابات 90 دن سے آگے کسی صورت نہیں جا سکتے۔