سری نگر: (ویب ڈیسک) مقبوضہ جموں و کشمیر میں قابض ظالم بھارتی فوج کی بربریت کا سلسلہ 7 دہائیوں سے جاری ہے، مئی کے مہینے میں ظلم کی انتہا کرتے ہوئے 32 کشمیریوں کو شہید کیا۔
کشمیر میڈیا سروس کے مطابق پرامن مظاہرین پر شیلنگ اور پیلٹس کی برسات سے 26 افراد زخمی ہوئے، جبکہ بھارتی پولیس نے 180 نام نہاد سرچ آپریشنز میں 92 افراد کو گرفتار کیا۔
1989 سے بھارت کشمیر میں خون کی ندیاں بہا رہا ہے، اب تک بھارتی جارحیت سے 96 ہزار سے زائد کشمیری شہید ہو چکے ہیں، ایک لاکھ 65 ہزار کے قریب افراد کو قید کیا گیا جن میں سے 7 ہزار 200 بے گناہ کو قید میں موت کے گھاٹ اتار دیا گیا۔

لیبیا : (ویب ڈیسک) افریقی ملک چاڈ میں سونے کی کان میں کام کرنے والے مزدوروں کے درمیان جھڑپوں میں تقریبا 100 افراد ہلاک ہو گئے۔
افریقی ملک چاڈ میں سونے کے کان میں کام کرنے والے مزدوروں کے درمیان ہونے والی جھڑپوں میں تقریبا ایک سو افراد ہلاک اور درجنوں زخمی ہو گئے۔
چاڈ کے وزیر دفاع داؤد یحییٰ ابرایم نے تفصیل بتاتے ہوئے کہا ہے کہ یہ جھڑپیں لیبیا کی سرحد کے قریب واقع کوری بوگودی کے علاقے میں ہوئیں۔یہ جھڑپیں 23 مئی کو سونے کے دو کان کنوں کے درمیان معمولی تنازعہ سے شروع ہوئیں۔
ان کا کہنا ہے کہ اس علاقے میں سونے کی کانوں میں غیرسرکاری طور پر کان کنی کی جاتی ہے۔ حکومت نے متاثرہ علاقے میں کان کنی کے تمام غیرسرکاری منصوبوں کو معطل کرتے ہوئے تحقیقات کا آغاز کر دیا ہے۔
انہوں نے بتایا ہے کہ10 سال قبل اس علاقے میں سونے کی دریافت کے بعد مختلف علاقوں سے کان کنوں نے یہاں آنا شروع کر دیا تھا۔ غیر قانونی کان کنی کے باعث یہاں اکثر تناؤ کی صورتحال رہتی ہے۔

امریکا : (ویب ڈیسک) روس کے ڈونباس میں محاصرہ کرنے کی دھمکی کی وجہ سے یوکرین نے امریکہ سے راکٹوں کی درخواست کی تھی۔ تاہم امریکہ نے کہا ہے کہ وہ یوکرین کو ایسے راکٹ نہیں دے گا جو روس تک پہنچ سکیں۔
ڈونباس سمیت مشرقی یوکرین کے متعدد دیگر شہر اس وقت روس کے اہم اہداف ہیں۔ یوکرینی صدر کا کہنا ہے کہ یوکرین کے دوسرے بڑے شہر خارکیف اور شمال مشرقی سومی کے علاقوں میں بھی گولہ باری کی گئی ہے۔
تاہم امریکی صدر نے وائٹ ہاؤس میں صحافیوں سے بات کرتے ہوئے کہا کہ امریکہ یوکرین کو ایسے راکٹ سسٹم فراہم نہیں کرے گا، جو روس تک مار کر سکیں۔ اس سے قبل یوکرین کے حکام نے اس طویل فاصلے تک مار کرنے والے سسٹم کا مطالبہ کیا تھا۔
جسے ‘ملٹیپل لانچ راکٹ سسٹم’ یا ایم ایل آر ایس کہا جاتا ہے۔ یہ سسٹم ایک ساتھ بہت سے راکٹوں کو سینکڑوں میل فاصلے تک فائر کر سکتا ہے۔
یوکرینی حکومت نے مغرب پر بھی زور دیا تھا کہ وہ اسے زیادہ طویل فاصلے تک مار کرنے والے ہتھیار فراہم کریں تاکہ چار ماہ سے جاری اس جنگ کا رخ موڑا جا سکے۔
تاہم روسی وزیر خارجہ سرگئی لاوروف نے مغربی طاقتوں کو یوکرین کو ایسے ہتھیار فراہم کرنے کے لیے خبردار کرتے ہوئے کہا تھا کہ ایسے اقدام ”ناقابل قبول کشیدگی کی جانب ایک سنگین قدم” ہو گا۔
امریکہ اب تک ہزاروں پورٹیبل طیارہ شکن اور چھوٹے اینٹی ٹینک میزائل کے ساتھ ہی جدید قسم کے ڈرون اور یوکرین کی بری فوج کے لیے ساز و سامان فراہم کر چکا ہے۔

یو اےا ی: (ویب ڈیسک) متحدہ عرب امارات میں پیٹرولیم مصنوعات کی قیمتوں میں 15 فیصد اضافہ ہوگیا۔
یو اےا ی میں فی لیٹر پیٹرول کی قیمت میں 27روپے اضافہ ہوگیا۔ فی لیٹر پیٹرول 4.15 درہم کا ہوگیا،جو 225 پاکستانی روپے بنتے ہیں۔
گزشتہ ماہ فی لیٹر پیٹرول کی قیمت 3.66 درہم یعنی 198 پاکستانی روپے تھی۔ ایک لیٹر ڈیزل 4.14 درہم یعنی 225 پاکستانی روپے میں ملے گا۔
واضح رہے کہ یو اے ای میں جنوری سے اب تک پیٹرول کی قیمت دگنی ہو چکی ہے۔

امریکا : (ویب ڈیسک) امریکا میں فائرنگ کے واقعات میں اضافہ، اسکول کے بعد امریکی ریاست لوزیانا کی یونیورسٹی میں تقریب کے دوران فائرنگ ہوئی۔
فائرنگ سے خاتون ہلاک اور 2 افراد زخمی ہو گئے، امریکا میڈیا کے مطابق ملزم کو گرفتار کر لیا گیا۔ فائرنگ کا واقع یونیورسٹی کے گریجویشن ہال میں ہوا، جہاں ہائی اسکول کی گریجویشن تقریب جاری تھی۔
یا رہے گزشتہ ہفتے امریکہ کی ریاست ٹیکساس کے ایک پرائمری سکول میں فائرنگ کے واقعے میں 19 بچوں سمیت 21 افراد اس وقت ہلاک ہو گئے تھے جب ایک 18 سالہ مسلح لڑکا سکول کی عمارت میں داخل ہوا اور اندھا دھند فائرنگ کر دی۔
ہلاک ہونے والے 19 طلبا میں دوسری، تیسری اور چوتھی جماعت کے طالبعلم شامل تھیں جن کی عمریں سات سے دس سال کے درمیان تھیں۔ اس واقعے میں سکول کے دو اساتذہ بھی ہلاک ہوئے۔
اس معاملے کی تحقیقات سے منسلک ذرائع نے واشنگٹن پوسٹ کو بتایا کہ شوٹر حال ہی میں 18 سال کا ہوا تھا اور اس کا کوئی مجرمانہ ریکارڈ نہیں تھا۔

میکسیکو سٹی: (ویب ڈیسک) میکسیکو میں سمندری طوفان آگاتا نے تباہی مچا دی، مختلف واقعات میں 11 افراد ہلاک اور 20 لاپتہ ہو گئے۔
متاثرہ علاقوں میں 169 کلومیٹر فی گھنٹہ کی رفتار سے چلنے والی ہواؤں سے کئی گھروں کی چھتیں اڑ گئیں۔ لینڈسلائیڈنگ اور بجلی کے کھمبے اکھڑنے سے متعدد علاقوں میں بجلی کی فراہمی معطل ہو گئی۔ نشیبی علاقوں میں بارش کا پانی بھرنے سے نظام زندگی مفلوج ہوکر رہ گیا۔
آگاتا کے باعث آئندہ دو روز میں امریکی ریاست فلوریڈا میں بھی بارشیں متوقع ہیں۔ سمندری طوفان کوآگاتا کا نام دیا گیا ہے جویونانی زبان کا لفظ ہے اور اس کا مطلب سامان کے ہیں۔