جدہ : (ویب ڈیسک) مکہ مکرمہ میں پولیس نے کارروائی کے دوران پاکستانی ڈرائیور کو حراست میں لے لیا۔
ترجمان پولیس کا کہنا ہے کہ ملزم نے غیر قانونی طریقوں سے داخل ہونے والے 13 غیر ملکیوں کو سفری سہولت فراہم کی، غیر ملکیوں میں 9 کا تعلق چاڈ، 3 کا صومالیہ اور ایک کا نائیجریا سے ہے۔
ترجمان پولیس کا کہنا ہے کہ ڈرائیور کو 15 سال تک قید اور 10 لاکھ ریال تک جرمانے کی سزا ہو سکتی ہے۔

اسلام آباد: (ویب ڈیسک) پاکستان ڈیمو کریسی موومنٹ (پی ڈی ایم ) کی سٹیئرنگ کمیٹی کا ورچوئل اجلاس طلب کرلیا گیا ، اجلاس میں مدینہ منورہ میں پیش آنے والے واقعے پر احتجاج سے متعلق حکمت عملی طے کی جائے گی ۔
پی ڈی ایم کی سٹیئرنگ کمیٹی کے اجلاس کی سربراہی سیکرٹری جنرل پی ڈی ایم شاہد خاقان عباسی کرینگے ، اجلاس میں مدینہ منورہ میں قومی قیادت کے ساتھ پیش آنے والے واقعے پر مشاورت کی جائے گی اور احتجاج سے متعلق حکمت عملی طے کی جائے گی ۔
پی ڈی ایم کی سٹیئرنگ کمیٹی کے اجلاس مین ملکی سیاسی صوتحال پر بھی تبادلہ خیال کیا جائے گا۔

اسلام آباد: (ویب ڈیسک) سابق وزیراعظم عمران خان نے شریف خاندان کے خلاف کیسز پر وائٹ پیپر جاری کر دیا۔ کہتے ہیں ن لیگ کو این آر او 2 ملنا شروع ہو گیا۔
اسلام آباد میں پریس کانفرنس سے خطاب کرتے ہوئے چیئرمین تحریک انصاف نے کہا ہے کہ شریف فیملی پر 40 سے 45 ارب روپے کے 16 مقدمات چل رہے ہیں ، سارے کیسز ہمارے دور سے پہلے کے ہیں، صرف مقصود چپڑاسی والا کیس پی ٹی آئی دور میں بنا، ن لیگ اورپیپلزپارٹی کی حکومتوں کو دو دو بار کرپشن پر نکالا گیا، نون لیگ اب اپنے مقدمات ختم کرے گی۔
انہوں نے کہا کہ شہبازشریف نے آتے ہی تفتیشی افسران تبدیل کئے، خطرہ ہے ان کے مقدمات کا ریکارڈ غائب کردیا جائے گا۔ ان کی لوٹ مار کی وجہ سے ملک خسارے میں چلا گیا۔ یہ وہ خاندان ہیں جو 30 سال سے ملک کو لوٹ رہے ہیں۔ سازش سے حکومت گرانے پر عوام میں غم و غصہ ہے، یہ جہاں بھی جائیں گے عوام ان پر اپنا غصہ اتاریں گے، شیخ رشید کے بھتیجے کی گرفتاری افسوس ناک اقدام ہے۔
دوسری جانب سابق وزیر داخلہ شیخ رشید نے پریس کانفرنس میں خطاب کرتے ہوئے کہا کہ نون لیگ نے آتے ہی 300 لوگوں کے نام ای سی ایل سے نکالے۔ رانا ثنا اجرتی قاتل ہے۔ عابد شیر علی کے والد کہتے ہیں رانا ثنا نے 18 قتل کئے ہیں۔ یہ مجھے بھی قتل کرنا چاہتے ہیں، میری جان کو خطرہ ہے، تھانہ سیکرٹریٹ میں 7 لوگوں کے نام لکھ کر دے دیئے۔
ان کا کہنا تھا کہ مئی کا مہینہ خطرناک اور خوفناک ہے۔ ملک کے خلاف سازش کی جا رہی ہے۔ ملک کے اہم لوگوں کو درخواست دے دی۔ جیل میرا سسرال اور ہتھکڑی میرا زیور ہے، ضمانت قبل از گرفتاری نہیں کروا رہا۔

اسلام آباد: (ویب ڈیسک) وزیراعظم شہباز شریف نے گورنر پنجاب عمر سرفراز کو ہٹانے کی سمری صدر مملکت کو دوبارہ ارسال کر دی۔
بتایا گیا ہے کہ سمری ایوان صدر کو موصول ہو گئی ہے۔ آئین کے مطابق صدر اگر گورنر پنجاب کو نہیں ہٹاتے تو 10 دن میں گورنر خود ہی فارغ ہو جائیں گے۔ وزیراعظم ساتھ ہی نئے گورنر کیلئے نام بھی صدر مملکت کو ارسال کریں گے۔
ذرائع کا کہنا ہے کہ پنجاب کی گورنر شپ پیپلزپارٹی کو ملنے کا امکان ہے۔

اسلام آباد: (ویب ڈیسک) وفاقی وزیر داخلہ رانا ثنااللہ نے مسجد نبوی میں نعرے بازی کے معاملے پر عمران خان کی گرفتاری کا عندیہ دے دیا۔ کہتے ہیں حکومت نوازشریف کی سزامعطل کرنے پر غور کر رہی ہے، حکومت کو سزا ختم، کم یا معطل کرنے کا اختیارحاصل ہے۔
وفاقی وزیر داخلہ رانا ثنا اللہ نے مسجدِ نبوی میں نعرے بازی کے واقعے میں ملوث افراد کے خلاف قانونی کارروائی کا عندیہ دیتے ہوئے کہا ہے کہ سابق وزیرِ اعظم عمران خان کو بھی گرفتار کیا جا سکتا ہے۔ نجی چینل پر مسجدِ نبوی میں ہونے والے واقعے کی مذمت کرتے ہوئے رانا ثنا اللہ کا کہنا تھا کہ اس طرح کی منصوبہ بندی ماضی میں کبھی نہیں ہوئی اور یہ 100-150 لوگ تھے۔
ان کا کہنا تھا کہ ان افراد کو قطعی طور پر معافی نہیں دی جا سکتی اور وہ اس سلسلے میں وہ سعودی حکام کے ساتھ رابطے میں ہیں۔ ان کا کہنا تھا کہ سعودی عرب میں گرفتار کچھ افراد کو ڈی پورٹ کیا جا رہا ہے اور دیگر کے خلاف کارروائی کی جا رہی ہے۔
رانا ثنا اللہ نے مزید بتایا کہ باقی لوگوں کے خلاف تفتیشی ٹیم سارے ثبوت اکھٹے کرے گی اور جس جس کے خلاف کوئی ثبوت ملے گا، اس کےخلاف قانون اپنا راستہ لے گا۔
اس سوال پر کہ عمران خان کے خلاف مقدمہ درج ہوا ہے، کیا انھیں بھی گرفتار کیا جا سکتا ہے، کے جواب میں رانا ثنا اللہ کا کہنا تھا جی بالکل عمران خان کو گرفتار کیا جا سکتا ہے۔

لاہور: (ویب ڈیسک) پی ٹی آئی رہنما فواد چودھری کا کہنا ہے ابھی تو لانگ مارچ کا اعلان ہوا ہے اور پارٹی قیادت کیخلاف مقدمے درج کرنے کا سلسلہ شروع ہو گیا۔
اپنی ٹویٹ میں فواد چودھری کا مزید کہنا ہے کہ آپ نے اب گھبرانا ہے، عوام کا سمندر آپ کو بہا لے جانے کیلئے تیار ہے، جب دماغ سن ہو جائے تو ایسی اوچھی حرکتیں ہوتی ہیں۔
اُنہوں نے کہا کہ ابھی لانگ مارچ کا اعلان ہوا ہے اور انہوں نے عجیب حرکتیں شروع کر دی ہیں۔

اسلام آباد: (ویب ڈیسک) سعودی عرب نے اسٹیٹ بینک کے پاس موجود 3ارب ڈالر کی واپسی کی مدت میں توسیع کردی۔
وزیراعظم شہبازشریف کے دورہ سعودی عرب کا مشترکہ اعلامیہ جاری کر دیا گیا۔ اعلامیے کے مطابق سعودی عرب نے اسٹیٹ بینک کے پاس موجود 3ارب ڈالر کی واپسی کی مدت میں توسیع کردی۔
پاکستان کی معاشی مدد کے طور پر پیٹرولیم کی فنانسنگ بڑھانے پر اتفاق ہوا۔پاک سعودی سپریم کوآرڈنیشن کونسل کے تحت مختلف امور پر دوطرفہ تعلقات کے فروغ پر اتفاق کیا گیا۔
اعلامیے کی مطابق سعودی عرب نے پاکستان اور اس کی معیشت کی مسلسل حمایت جاری رکھنے کا اعلان کیا ۔پاکستان کی جانب سے سعودی عرب کے بھرپور تعاون کو سراہا گیا۔
دونوں ملکوں کے درمیان تجارت کو فروغ دینے پر اتفاق ہوا۔ نجی شعبے،انڈسٹریز اور کان کنی کے شعبے میں تعاون پر اتفاق کیا گیا۔ اعلامیے کے مطابق اقتصادی شعبے میں تعاون کی نئی راہیں تلاش کی جائیں گی۔
سرمایہ کاری کو فروغ دینے کیلئے پاک سعودی بزنس کونسل کے اجلاس کے انعقاد کا فیصلہ کیا گیا ہے۔زراعت اور خوراک کے شعبوں میں نجی شعبے کی حوصلہ افزائی کی جائے گی۔
اعلامیہ کے مطابق دونوں ملکوں کا ابلاغ عامہ کے شعبے میں تعاون بڑھانے کا فیصلہ بھی کیا گیا ہے۔پاکستان کی جانب سے سعودی عرب کے ماحولیاتی ویژن کو سراہا گیا۔
ماحولیاتی تبدیلی کے چیلنجز سے نبرد آزما ہونے کیلئے نئے معاہدے کرنے پر اتفاق کیا گیا۔دونوں ملکوں کا دہشت گردی اور انتہا پسندی کے خاتمے کیلئے تعاون جاری رکھنے پر بھی اتفاق ہوا۔پاکستان نے سعودی گرین اور مڈل ایسٹ گرین منصوبوں میں تعاون کی پیشکش کی ۔
دونوں ملکوں نے علاقائی اور عالمی سطح پر باہمی دلچسپی سے متعلق امور پر تبادلہ خیال کیا اور ایک دوسرے کے مفاد میں تعاون جاری رکھنے کی اہمیت سے اتفاق کیا۔