اسلام آباد: (ویب ڈیسک) وزیراعظم عمران خان کی سابق اہلیہ ریحام خان نے ایک بار پھر ان پر تنقید کی ہے۔
ریحام خان نے اپنے حوالے سے کی گئی ٹوئٹر صارف کی ایک ٹوئٹ کو ری شیئر کرتےہوئے عمران خان کو تاریخ کا حصہ قرار دیا۔ریحام خان نے اپنی ٹوئٹ میں عمران خان کو تاریخ کا حصہ قرار دیتے ہوئے کہا کہ میرے خیال میں ہم سب کو اپنی توجہ نئے پاکستان میں ان کے پھیلائے گند کو صاف کرنے پر کرنی چاہیے۔
خیال رہے کہ عمران خان کے خلاف عدم اعتماد کی تحریک پیش کیے جانے کے بعد ریحام خان کے وزیراعظم کے خلاف مختلف بیانات سامنے آئے ہیں جن میں انہوں نے سخت الفاظ میں عمران خان پر تنقید کی۔

اسلام آباد: (ویب ڈیسک) اسلام آباد ہائیکورٹ کے چیف جسٹس اطہر من اللہ نے مدثر نارو بازیابی کیس میں ریمارکس دیے کہ جبری گمشدگی بغاوت ہے اور اس پر بغاوت کا مقدمہ بنتا ہے۔
چیف جسٹس اسلام آباد ہائیکورٹ کی سربراہی میں مدثرنارو بازیابی کیس کی سماعت ہوئی جس سلسلے میں ایڈیشنل اٹارنی جنرل اور عدالتی معاون عدالت میں پیش ہوئے۔دورانِ سماعت چیف جسٹس اطہر من اللہ نے ریمارکس دیے کہ آئین کے تحت چلنے والے ملک میں جبری گمشدگیاں ناقابل قبول ہیں، کیا مدثرنارو کو تلاش نہ کر پانا ریاستی اداروں کی ناکامی ہے؟ وفاقی حکومت اور صوبائی حکومتوں نے یہ سب دیکھنا تھا ناں، کیا اُن کی مرضی کے بغیرکسی کو لاپتا کیاجاسکتاہے؟ نہیں کیاجاسکتا۔
جسٹس اطہر من اللہ نے کہا کہ لوگوں کا مسنگ ہوجانا ریاست کی نااہلی ہے، پھر وہ ٹریس بھی نہیں ہوپاتے، جبری گمشدگی پر دہشتگردی کی دفعات لگتی ہیں، اگر ریاستی ادارے ایگزیکٹو کے کنٹرول میں نہیں تو ایگزیکٹو ذمہ دارہے، کیوں نہ چیف ایگزیکٹو کو ذمہ دار ٹھہرائیں؟
چیف جسٹس نے مزید کہا کہ جبری گمشدگی بغاوت ہے، اس پر بغاوت کا مقدمہ بنتا ہے۔

اسلام آباد: (ویب ڈیسک) مسلم لیگ (ن) کے سینئر رہنما خواجہ آصف نے وزیراعظم عمران خان کے قوم سے خطاب پر رد عمل کا اظہار کیا ہے۔
ایک بیان میں خواجہ آصف نے کہا کہ اگر امریکا ہمارے خلاف ہے تو ہمیں آئی ایم ایف کے قرضے نہ ملیں، امریکا واحد طاقت ہے جو ملک کے لیے معاشی مشکلات پیدا کرسکتا ہے۔
انہوں نے کہا کہ وزیر اعظم عمران خان مظلومیت ظاہر کررہے ہیں کہ انہیں ٹارگٹ بنایا جارہاہے۔خواجہ آصف کا کہنا تھا کہ مذہب کے نام پر ملک کو تقسیم نہ کریں، مذہب کو سیاست میں نہ گھسیٹیں، آپ نے 4سال میں ملک کا بیڑا غرق کردیا ہے۔
یاد رہے کہ گزشتہ روز وزیراعظم عمران خان نے قوم سے خطاب میں مراسلے والے ملک کا ذکر کرتے ہوئے ’امریکا‘ کا نام لیا تھااور پھر غلطی کا احساس ہونے پر رکتے ہوئے کہا کہ نہیں باہر سے ملک کا نام مطلب کسی اور ملک سے باہر سے۔

اسلام آباد: (ویب ڈیسک) اسلام آباد ہائیکورٹ کا کہنا ہے کہ وفاقی حکومت ہدایات جاری کرے کہ ملک بھر کے تعلیمی اداروں میں بلوچ طلبہ کو ہراساں نہ کیا جائے۔
قائد اعظم یونیورسٹی کے طلبہ کو ہراساں کرنے کے خلاف کیس کی سماعت چیف جسٹس اسلام آباد ہائیکورٹ جسٹس اطہر من اللہ نے کی۔
دوران سماعت عدالت نے قائد اعظم یونیورسٹی انتظامیہ کو حکم دیا کہ یقینی بنائیں کہ بلوچ طلبہ کو کوئی ہراساں نا کرے۔
اسلام آباد ہائیکورٹ نے وائس چانسلر قائداعظم یونیورسٹی کو معاملے کی انکوائری کرنے کا حکم دیتے ہوئے کہا کہ آئندہ جمعہ تک انکوائری رپورٹ جمع کروائیں۔
لاپتہ حفیظ بلوچ کی بازیابی کے لیے درخواست میں وکیل ایمان مزاری عدالت کے سامنے پیش ہوئے۔
ڈپٹی اٹارنی جنرل نے عدالت کو بتایا کہ گزشتہ روز وزیر داخلہ سے ملاقات کرائی گئی، کل کی وزیرداخلہ سےمیٹنگ کے بعد امید ہے ہراساں نہیں کیا جائےگا جبکہ وکیل ایمان مزاری نے کہا کہ وزیر داخلہ سے ملاقات نتیجہ خیز نہیں رہی، وزیر داخلہ سے ہمیں کوئی امید نہیں اس عدالت سے امید ہے۔
وکیل زینب جنجوعہ نے کہا کہ کل وزیر داخلہ نے کہا کہ میں کچھ نہیں کرسکتا ایک دن کا مہمان ہوں۔
جسٹس اطہر من اللہ نے استفسار کیا کہ جو طالبعلم لاپتہ ہے اس کا کیا بنا، جس پر وکیل درخواست گزار نے بتایا کہ معلوم ہوا ہے طالبعلم خضدار کے تھانےمیں ہے اور اس کے خلاف دہشت گردی کا مقدمہ درج ہے۔
وکیل زینب جنجوعہ نے کہا کہ وائس چانسلر قائداعظم یونیورسٹی کو اسٹوڈنٹس نے لکھا لیکن ان پرکوئی اثرنہیں ہوا، جس پر عدالت نے ریمارکس دیے کہ قائد اعظم یونیورسٹی کے چانسلر سے امید ہےکہ بلوچ طلبہ کی شکایات کا ازالہ کریں گے۔
اسلام آباد ہائیکورٹ نے ریمارکس دیے کہ وفاقی حکومت ہدایات جاری کرے کہ پاکستان بھر میں بلوچ طلبہ کو ہراساں نا کیا جائے۔
عدالت نے طلبہ کو ہراساں کرنے کے خلاف درخواست کی سماعت 8 اپریل تک ملتوی کر دی۔

کراچی : (ویب ڈیسک) کراچی سمیت سندھ، جنوبی پنجاب اور بلوچستان میں ہیٹ ویو کی صورت حال آج بھی برقرار ہےگی۔
محکمہ موسمیات کے مطابق گزشتہ روز کراچی اور نوابشاہ میں پارہ 41 اور مٹھی میں 44 ڈگری سینٹی گریڈ رہا جبکہ ڈی جی خان میں 40 اور سبی میں 43 ڈگری سینٹی گریڈ ریکارڈ کیا گیا۔
شدید گرمی کے باجود ملک کے مختلف حصوں میں بجلی کی لوڈشیڈنگ جاری ہے۔
محکمہ موسمیات کے مطابق 24 گھنٹوں کے دوران کراچی میں موسم گرم اور خشک رہنے کا امکان ہے، شہر میں کم سے کم درجہ حرارت 20.4 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 40 سے 42 ڈگری سینٹی گریڈ تک رہنے کا امکان ہے۔
محکمہ موسمیات کے حکام کا کہنا ہے کہ ہوا میں نمی کا تناسب 12 فیصد ہے، شمال مغرب سے ہلکی رفتار سے ہوائیں چل رہی ہیں۔

اسلام آباد: (ویب ڈیسک) اپوزیشن لیڈر شہباز شریف نے وفاقی سیکرٹری داخلہ کو خط لکھ دیا، جس میں کہا گیا کہ اتوار کے روز قومی اسمبلی میں تحریک عدم اعتماد کی ووٹنگ ہے، فول پروف سیکیورٹی کو یقینی بنایا جائے۔
شہباز شریف نے خط میں وزیراعظم کے ووٹنگ والے دن ایک لاکھ پی ٹی آئی ورکرز لانے کا بھی حوالہ دی۔ خط میں کہا گیا کہ ایم این ایز کی سیکیورٹی کو یقینی بنانے کے ساتھ ساتھ ضلعی انتظامیہ، پولیس آئین اور قانون کے مطابق فرائض سر انجام دے۔ اپوزیشن لیڈر نے خط کی کاپی کمشنر اسلام آباد، ڈی سی اور آئی جی کو بھی ارسال کر دی۔
یاد رہے شہباز شریف نے نئے وزیراعظم کے انتخابات والے دن بھی فل پروف سیکیورٹی کا مطالبہ کر دیا۔

لاہور: (ویب ڈیسک) مسلم لیگ ن نے پنجاب میں موجودہ صورت حال پر مشاورتی اجلاس کیا ہے۔
رکن پنجاب اسمبلی صباءصادق کے مطابق اجلاس میں وزیر اعلیٰ کے لیے حمزہ شہباز کو نامزد کیا گیا ہے، صباءصادق نے بتایا کہ حکمران اتحاد کے نامزد وزیر اعلیٰ پرویز الہٰی کا مقابلہ حمزہ شہباز کریں گے۔
یاد رہے کچھ روز قبل وزیر اعلی عثمان بزدار کے خلاف پنجاب اسمبلی میں تحریک عدم اعتماد جمع کرائی گئی، جس کے بعد تحریک انصاف کی طرف سے ق لیگ کے چوہدری پرویز الہی وزارت اعلی کے امید وار ہیں۔