حسان خاور نے کہا ہے کہ قومی صحت کارڈ تحریک انصاف کی حکومت کا تاریخ ساز منصوبہ ہے۔

ترجمان پنجاب حکومت حسان خاور نے ایڈمنسٹریٹر کراچی مرتضیٰ وہاب کی پریس کانفرنس پر رد عمل دیتے ہوئے کہا ہے کہ مرتضیٰ وہاب کا بیان فیڈریشن کو نقصان پہنچانے کے مترادف ہے۔

انہوں نے کہا کہ پیپلز پارٹی کو سندھ کے عوام کا احساس ہے نہ مریضوں کا ، سندھ میں آج بھی اسپتالوں میں لوگ بے یارو مددگار نظر آتے ہیں ، تھرمیں بچوں کی ہلاکتیں پیپلز پارٹی کی سندھ حکومت کی نااہلی اور نالائقی کا بڑا ثبوت ہے۔

حسان خاور نے کہا ہے کہ مرتضیٰ وہاب نیا پاکستان قومی صحت کارڈ پر تنقید کرنے سے پہلے سندھ کے تباہ حال ہیلتھ سسٹم کو دیکھ لیں ، نیا پاکستان قومی صحت کارڈ تحریک انصاف کی حکومت کا تاریخ ساز منصوبہ ہے۔

ترجمان پنجاب حکومت نے کہا کہ پاکستان کی تاریخ میں آج تک کوئی حکومت ایسا انقلاب آفرین پروگرام نہیں دے سکی ، وزیراعلیٰ عثمان بزدار کی قیادت میں مارچ تک پنجاب کے ہر خاندان کو نیا پاکستان قومی صحت کارڈ کے تحت مفت علاج کی سہولت ہوگی۔

انہوں نے کہا کہ پنجاب حکومت نے کورونا کی ریکارڈ ویکسینیشن کی ہے ، پنجاب میں ہر صوبے سے مریض علاج معالجے کے لئے آتے ہیں ، پنجاب نے ہمیشہ بڑے بھائی کی حیثیت سے دکھی انسانیت کے زخموں پر مرہم رکھا ہے ، کبھی دعویٰ نہیں کیا کہ ہم نے سندھ یا دیگر صوبوں کے اتنے مریضوں کا علاج کیا ہے۔

حسان خاور نے کہا ہے کہ آج تک ہم نے صوبائیت کی سیاست کی ہے نہ کریں گے ، مرتضیٰ وہاب یاد رکھیں کہ پنجاب میں سندھ،بلوچستان،خیبرپختونخوا، گلگت بلتستان اور آزاد کشمیر سے آنے والے مریضوں کو علاج معالجے کی بہترین سہولتیں فراہم کی جاتی ہیں ، یہ کسی پر احسان نہیں بلکہ ہر پاکستانی کاحق ہے۔

ترجمان پنجاب حکومت نے کہا کہ مرتضیٰ وہاب نے چھوٹی بات کر کے ثابت کیاہے کہ پیپلز پارٹی کی سندھ حکومت کی سوچ انتہائی محدود ہے ، وزیراعلیٰ عثمان بزدار کی قیادت میں پنجاب حکومت نے ہمیشہ چھوٹے صوبوں سے پورا تعاون کیاہے۔

واضح رہے کہ مرتضیٰ وہاب نے پریس کانفرس کرتے ہوئے کہا تھا کہ کورونا کی حالیہ صورتحال پر وزیر اعلیٰ سندھ نے کورونا ٹاسک فورس کا اجلاس منعقد کیا تھا جس کا مقصد اومیکرون وائرس صورتحال کا جائزہ اور آگے کا لائحہ عمل طے کرنا تھا۔

ان کا کہنا تھا کہ کیسز میں بہت تیزی سے اضافہ ہوا ہے، 24 گھنٹوں میں مثبت کیسز کی شرح 6 فیصد سے بڑھ گئی ہے، ایک ماہ پہلے یہ نمبر ایک فیصد سے کم تھا، ہم اس وقت سختی کرنا نہیں چاہتے شہری احتیاط کریں، اومیکرون سے بچنے کا سب سے موثر طریقہ ماسک ہے۔

انہوں نے کہا تھا کہ 29 ملین لوگ اب تک پہلی اور دو ڈوز ملا کر سندھ میں ویکسین کروا چکے ہیں، خدارا صورتحال ابھی قابو میں ہے حکومت نہیں چاہتی کے وہ سخت فیصلے کرے، سماجی تقاریب میں اگر ایس او پیز کا خیال رکھیں گے تو مزید احسن انداز میں اس سے نمٹ سکیں گے۔

ایڈمنسٹریٹر کراچی کا کہنا تھا کہ انہوں نے اگر اپنے اسپتالوں کو ٹھیک کیا ہوتا تو آج یہ صورتحال نہیں ہوتی، یہ مریض ملک بھر سے سندھ نہیں آرہے ہوتے، گھمبٹ انسٹیٹیوٹ کو سالانہ ساڑھے 4 ارب دیتی ہے۔

انہوں نے کہا تھا کہ پیپلز پارٹی فخریہ کہتی ہے کے یہاں کڈنی اور لیور کا مفت ٹرانسپلانٹ کیا جا رہا ہے، پہلے لوگ جگر کی پیوندکاری کے لئے بھارت کا رخ کرتے تھے، جگر کی اب تک ساڑھے 5 سو لوگوں کا ٹرانسپلانٹ ہو چکا ہے، ایک مریض پر لاگت 40 لاکھ آتی ہے۔

ان کا کہنا تھا کہ ہم اپنے اسپتالوں کو اس قابل کرتے ہیں کے آئیے علاج کروائیں، اس میں 52 فیصد کا تعلق سندھ باقی 48 فیصد افراد کا تعلق دیگر صوبوں سے تھا۔

بیرسٹر مرتضیٰ وہاب نے کہا تھا کہ فخریہ سندھ حکومت کہتی ہے کہ ہم وفاق میں نہیں لیکن سارے پاکستان کی خدمت کرتے ہیں، آزاد کشمیر سے سال 2021 میں 5 ہزار سے زائد مریض این آئی سی وی ڈی آئے ان کا مفت علاج ہوا۔

ایڈمنسٹریٹر کراچی بیرسٹر مرتضیٰ وہاب کا مزید کہنا تھا کہ بلوچستان سے 1 لاکھ 25 ہزار سے زائد مریض سندھ آئے، کے پی کے سے 8 ہزار سے زائد مریضوں نے سندھ کا رخ کیا، پنجاب سے 51 ہزار سے زائد مریض آئے جن کا مفت علاج کیا گیا۔

وزیر خارجہ نے کہا ہے کہ پاکستان وزیر اعظم عمران خان کی قیادت میں وژن وسط ایشیا، کو عملی جامہ پہنانے کیلئے پوری طرح پر عزم ہے۔

وزیر خارجہ مخدوم شاہ محمود قریشی کی زیر صدارت وزارتِ خارجہ میں وزیر اعظم عمران خان کے وژن وسط ایشیا کے حوالے سے اعلیٰ سطحی اجلاس ہوا ۔

دوران اجلاس وسط ایشیائی ریاستوں کے ساتھ زمینی و  ہوائی روابط کو مزید مستحکم بنانے کیلئے مختلف تجاویز پر غور کیا گیا۔

اجلاس کی صدارت کرتے ہوئے شاہ محمود قریشی نے کہا کہ اقتصادی سفارت کاری کے اہداف کے حصول کیلئے زمینی و ہوائی روابط کا مؤثر ہونا ناگزیر ہے۔ پاکستان وزیر اعظم عمران خان کی قیادت میں وژن وسط ایشیا، کو عملی جامہ پہنانے کیلئے پوری طرح پر عزم ہے۔

وزیر خارجہ مخدوم شاہ محمود قریشی کا مزید کہنا تھا کہ وسط ایشیائی ممالک کے ساتھ اقتصادی و تجارتی تعاون کے حجم میں اضافے کیلئے تمام وسائل بروئے کار لانے کیلئے کوشاں ہیں۔

اجلاس میں وزیر خزانہ شوکت ترین، وزیر ہوا بازی سرور خان، مشیر تجارت رزاق داؤد سمیت اہم شخصیات نے شرکت کی۔

وزیرداخلہ شیخ رشید کا کہنا ہے کہ اپوزیشن ٹولے کے ہاتھ سے وقت ریت کی طرح نکلتا جارہا ہے۔
وزیراعلیٰ پنجاب عثمان بزدار سے وفاقی وزیر داخلہ شیخ رشید نے ملاقات کی، جس میں سیاسی امور اور امن عامہ کی صورتحال پر تبادلہ خیال کیا گیا، راولپنڈی میں فلاح عامہ کے جاری منصوبوں پر پیشرفت پر بات چیت کی گئی۔ وزیرداخلہ شیخ رشید کا کہنا تھا کہ پنجاب حکومت راولپنڈی کے عوام کے مسائل کو ترجیحی بنیادوں پر حل کررہی ہے۔
وزیرداخلہ کا کہنا تھا کہ اللہ تعالیٰ کے کرم سے امن وعامہ کی صورتحال اطمینان بخش ہے، حکومت عوام کے جان ومال کے تحفظ کے لئے ہر ممکن اقدام کررہی ہے اورکرتی رہے گی، وزیراعظم عمران خان کی قیادت میں حکومت پہلے سے زیادہ مضبوط ہے اور مدت پوری کرے گی-
شیخ رشید کا کہنا تھا کہ 23مارچ کو مارچ کا اعلان کرنے والوں کو ہوش کے ناخن لینے چاہیے، قانون ہاتھ میں لینے کی کسی کو اجازت نہیں دی جاسکتی، اپوزیشن ٹولے کے ہاتھ سے وقت ریت کی طرح نکلتا جارہا ہے۔
اس موقع پر وزیراعلیٰ پنجاب عثمان بزدار کا کہنا تھا کہ سیاست میں رواداری،برداشت اوربھائی چارے کے قائل ہیں، شرافت، شفافیت اور دیانت کے اصولوں پر چلتے ہیں، نفاق کے بیج بونے والوں کو پہلے اپنے گریبان میں جھانکنا چاہیئے، ماضی میں سیاسی انتقام کے کلچر کو پروان چڑھایا گیا، الزامات لگانا اور دشنام طرازی ہمارا شیوہ نہیں، ہماری حکومت نے سیاسی انتقام کی منفی سیاست کو ختم کیا ہے، منفی رویے اور انتشار کی سیاست ملک کی یکجہتی اور استحکام کیلئے نقصان دہ ہیں۔

بالی وڈ کے سپراسٹار سلمان خان نے ہروقت بریسلٹ پہننے کی وجہ بتا دی۔
سلمان خان نےایک انٹرویومیں بریسلٹ پہننے کی وجہ سے پردہ اٹھا دیا۔ سلمان خان نے فیروزہ کے بریسلٹ کو اپنے لئے خوش قسمت قراردیتے ہوئے کہا کہ
فیروزہ پتھرسےمزین بریسلٹ انہیں حادثات سے بچاتا آیا ہے اوراگرکچھ غلط ہونے والا ہوتو بریسلٹ میں موجود فیروزہ پتھرمیں باریک دراڑ پڑجاتی ہے۔
سلمان خان نے انکشاف کیا کہ وہ اب تک 3 مرتبہ بریسلٹ میں لگے فیروزہ تبدیل کرچکے ہیں۔
سلمان خان کا کہنا تھا وہ بچپن سے اپنے والد سلیم خان کوایسا ہی بریسلٹ پہنے دیکھ کرجوان ہوئے۔ بڑے ہونے پروالد نے انہیں بھی بریسلٹ بنوادیا۔جب سے وہ بریسلٹ کوکبھی نہیں اتارتے۔

سندھ کے وزیر اطلاعات سعید غنی نے وفاقی حکومت پر تنقید کرتے ہوئے کہا کہ پتہ نہیں یہ کیا کھا کر یا نشہ کر کے آتے ہیں جو کہتے ہیں کہ سندھ میں اگلی حکومت ان کی ہو گی۔
کراچی میں پریس کانفرنس کرتے ہوئے سعید غنی کا کہنا تھا پتا چلا ایک صاحب کو پی ٹی آئی سندھ کا صدر بنایا گیا ہے، خوشی ہے کہ جو بچی کچھی پی ٹی آئی ہے اب وہ بھی ختم ہو جائے گی۔
سعید غنی کا کہنا تھا پی ٹی آئی کا سندھ سے صفایا ہو چکا ہے لیکن پتا نہیں یہ کیا کھا کر یا نشہ کرکے آتے ہیں جو کہتے ہیں کہ سندھ میں اگلی حکومت ان کی ہو گی۔
ان کا کہنا تھا فردوس شمیم نقوی نے اسمبلی میں استعفیٰ دینے کا اعلان کیا تھا، ہم انتظار کر رہے ہیں کہ فردوس شمیم کب استعفیٰ دیں گے۔
صوبائی وزیر کا کہنا تھا کہ پی ٹی آئی کی نالائقیوں کی وجہ سے ملک کو خطرہ ہے، یہ جن کاندھوں پر بیٹھے ہیں وہ بھی ان کی نالائقیوں کا بوجھ اٹھا اٹھا کر تھک چکے ہیں۔
بلدیاتی ترمیمی بل کے حوالے سے سعید غنی کا کہنا تھا کہ گورنر سندھ کے اعتراضات کے بعد قانون میں ترمیم بھی کی گئی، جن کو اعتراض ہے وہ اسمبلی میں ترامیم لائیں، دلائل دیں، ہو سکتا ہے کہ ہم آپ کی بات مان لیں۔