کراچی: (ویب ڈیسک)سجل علی اور صبور علی کا شمار پاکستان کی بہترین اداکاراؤں میں کیا جاتا ہے، جبکہ بہنیں ہونی کی وجہ سے اکثر و بیشتر دونوں کے کام کا موازنہ ایک دوسرے سے بھی کیا جاتا ہے۔خاص طور پر صبور علی سے ہمیشہ سجل کے حوالے سے متعدد سوال پوچھے جاتے اور ان کی اداکاری کو سجل کے کام سے بھی ملایا جاتا، جس کی وجہ یہ ہے کہ صبور انٹرٹینمنٹ انڈسٹری کا حصہ اس وقت بنی جب سجل پہلے سے ہی ایک کامیاب اداکارہ بن چکی تھیں۔اس موازنے کے حوالے سے ایک انٹرویو کے دوران صبور علی سے سوال پوچھا گیا تو اداکارہ نے کہا کہ انہیں تعجب ہوتا ہے جب لوگ یہ پوچھتے یا سوچتے ہیں کہ سجل کے حوالے سے سوالات انہیں ناراض کردیں گے۔فوشیا میگزین کو دیے ایک ویڈیو انٹرویو کے دوران صبور علی کا کہنا تھا کہ ’لوگ پوچھتے ہیں کہ جب لوگ سجل کی بہن کے طور پر متعارف کراتے ہیں تو مجھے برا نہیں لگتا؟ تو میں بس یہی سوچتی ہوں کہ سجل پاکستان کے لیے ایک بڑا نام ہے، ہمیں فخر ہے اس پر، اس نے بےحد اچھا کام کیا ہے‘۔یاد رہے کہ سجل علی نے رواں سال جون میں اعلان کیا تھا کہ انہوں نے احد رضا میر کے ساتھ منگنی کرلی ہے اور منگنی کی ایک تصویر بھی اپنے سوشل میڈیا اکاؤنٹ پر شیئر کی۔جبکہ احد رضا میر نے بھی وہی تصویر اپنے انسٹاگرام پر شیئر کی تھی۔تاہم ان دونوں اداکاروں نے اس تصویر کے علاوہ اپنی منگنی کے حوالے سے اور کوئی تفصیل مداحوں کے ساتھ شیئر نہیں کی۔انٹرویو کے دوران صبور علی سے جب ان دونوں کی منگنی کے حوالے سے پوچھا گیا تو اداکارہ نے کھل کر ساری کہانی بیان کی۔اس موقع پر صبور سے سوال کیا کہ کیا سجل نے خود انہیں اپنے اور احد کے بارے میں بتایا یا انہیں خود ان کے تعلق کا پتا چلا تو اداکارہ نے بتایا کہ ’سجل کو محسوس ہوتا تھا کہ وہ احد پر یقین کر سکتی ہیں، لیکن شاید وہ اس وقت تیار نہیں تھی، میں نے سجل کو اس رشتے پر قائل کیا، سچ بات یہ ہے کہ ان دونوں نے کوئی ڈیٹ وغیرہ نہیں کی، شروعات سے ہی خاندان ملے اور بس رشتہ طے ہوگیا‘۔اداکارہ کے مطابق ’احد بھائی نے سب سے پہلے سجل سے بات کی تھی جس پر اس نے کہا کہ میرے والد سے بات کریں جس کے بعد احد اور ان کے والدین نے ہمارے والد سے بات کی اور سب طے ہوگیا‘۔صبور کا مزید کہنا تھا کہ ’میں پہلے احد بھائی کو صرف احد بلاتی تھی، ہم نے فیصلہ کیا تھا کہ جس دن آپ کا رشتہ آفیشل ہوجائے گا میں اس دن سے ان کو احد بھائی بلاؤں گی’۔اپنی شادی کے سوال پر صبور کا کہنا تھا کہ وہ مردوں میں سب سے پہلے ان کے بات کرنے کا انداز غور کرتی ہیں، جس کے بعد وہ اپنے ہاتھ پیر دیکھتی ہیں کیوں کہ ان کے لیے لڑکوں کے ہاتھ اور پیر صاف ہونے چاہیے۔منگنی کے سوال پر اداکارہ نے کہا کہ ’میں منگنی نہیں کروں گی، کروں گی تو سیدھا شادی کروں گی، میں منگنی پر یقین نہیں رکھتی‘۔اس پر پوچھا گیا کہ کیا وہ سجل اور احد کی منگنی کی طرف اشارہ کررہی ہیں تو ان کا کہنا تھا کہ ’ایسا کچھ نہیں، سجل اور احد کی صورتحال ایسی تھی کہ انہیں منگنی کرنی پڑی‘۔صبور علی نے یہ بھی انکشاف کیا کہ سجل علی اور احد رضا میر کی شادی جلد ہونے والی ہے۔صوبر علی اس وقت ’نقب زن‘ نامی ڈرامے میں کام کررہی ہیں جو ہم ٹی وی پر نشر ہورہا ہے۔اس ڈرامے میں ان کی اداکاری کو خوب سراہا جارہا ہے۔

کراچی: (ویب ڈیسک)وزیراعظم عمران خان کی اقوام متحدہ کی جنرل اسمبلی میں کی گئی تقریر کی گونج صرف پاکستان میں نہیں بلکہ دنیا کے کونے کونے تک سنائی دی۔ وزیراعظم کی دبنگ تقریر گزشتہ روزپاکستان میں ٹاپ ٹرینڈ اور دنیا بھر میں ٹرینڈنگ میں رہی۔ وزیراعظم کی تقریر کو جہاں پوری قوم نے سراہا وہیں فنکار برادری نے بھی عمران خان کی جنرل اسمبلی میں کی جانے والی تقریر کو شیر کی دہاڑ سے قرار دیتے ہوئے کہا کہ آج وزیراعظم عمران خان نے پوری قوم کا سر فخر سے بلند کردیا۔پیرس فیشن ویک میں شریک اداکارہ ماہرہ خان نے وزیراعظم کی تقریر سننے کے بعد ٹوئٹر پر اپنے جذبات کا اظہار کرتے ہوئے کہا ہے کہ بالآخر میں نے وزیراعظم کی تقریر دیکھ لی۔ عمران خان آپ نے ہم سب کے سر فخر سے بلند کردئیے۔ہمایوں سعید نے وزیراعظم کی تقریر کو سراہتے ہوئے انہیں ایک سچا اور متحرک لیڈر قرار دیا۔ انہوں نے کہا وزیراعظم نے اپنا پیغام بہت ہی واضح اور بلند آواز میں دنیا تک پہنچایا مجھے عمران خان پر بے حد فخر ہے۔حمزہ علی عباسی نے کہا کہ ہم اللہ کا شکر ادا کرتے ہیں کہ انہوں نے عمران خان کے روپ میں نعمت سے نوازا، جنہوں نے آج ثابت کردیا کہ وہ صرف پاکستان اور کشمیر کے لیڈر (قائد) نہیں ہیں بلکہ دنیا بھر کے مسلمانوں کے لیڈر ہیں۔ اس کے علاوہ وہ انسانیت اور اسلام کی سب سے بڑی آواز ہیں۔ اللہ عمران خان کو سلامت رکھے۔اداکار شان شاہد اقوام متحدہ میں وزیراعظم کی جانب سے مسئلہ کشمیر کو جاندار انداز میں پیش کرنے اور بہترین تقریر کرنے پر جذباتی ہوگئے، اور کہا کہ وزیراعظم کی تقریر سن کر خوشی کےمارے ان کے آنسو چھلک پڑے۔ انہوں نے تالیاں بجاکر عمران خان کو سراہا اور  کہا انہیں آج بے حد فخر محسوس ہورہا ہے۔  آپ نے اقوام متحدہ میں اس مٹی کا سچا بیٹا بن کر تقریر کی جو ناصرف ایک سچا لیڈر ہوتا ہے بلکہ اپنی عوام کی خوشحالی اورامن کا بھوکا ہوتا ہے۔ آپ نے کسی شیر کی طرح اقوام متحدہ میں تقریر کی ایسا شیر جو آخری سانس تک آزادی کے لیے لڑتا ہے۔ پوری قوم آپ کے پیچھے کھڑی ہے۔اداکارہ مہوش حیات نے بھی وزیراعظم کی تقریر پر خوشی کا اظہار کرتے ہوئے کہا ہم خوش قسمت ہیں کہ ہمیں آپ جیسا لیڈر ملا جس نے فصاحت کے ساتھ ہمارا مقدمہ دنیا کے سامنے رکھا۔ اقوام متحدہ کو کشمیر میں جاری آپریشن کو ختم کرنا ہوگا۔گلوکار و اداکار فرحان سعید نے کہا مجھے فخر ہے کہ میں نے عمران خان کو ووٹ دیا، مجھے فخر ہے کہ آپ میرے قائد ہیں، مجھے فخر ہے کہ آپ پاکستان کے وزیراعظم ہیں، مجھے فخر ہے کہ ہمارے پاس آپ ہیں، مجھے فخر ہے کہ میں پاکستانی ہوں، واہ کیا تقریر تھی، کیا وژن تھا۔اداکار ہارون شاہد نے لکھا وزیراعظم کی تقریر سن کر میری آنکھوں میں آنسو آگئے۔ ہم کس طرح وزیراعظم کی اس تقریر کا حق اداکرسکتے ہیں جو انہوں اقوام متحدہ میں ہماری نمائندگی کرتے ہوئے کی۔ سلام ہے عمران خان آپ پر۔گلوکار، اداکار اور میزبان فخر عالم نے وزیراعظم کی تقریر کو شیر کی دہاڑ سے تشبیہ دیتے ہوئے کہا عمران خان نے مودی کے جھوٹوں کو کلین بولڈ کرکے تنقید نگاروں کے منہ پر چھکا دے مارا۔ ان کی تقریر کا آخری جملہ شیرکی دہاڑ تھا۔ ان کا پیغام بہت واضح تھا کہ ہم امن چاہتے ہیں لیکن اگر ہم پر جنگ مسلط کی گئی تو سامنے والے کو ایسا حریف ملے گا جو آپ کی بنیادیں ہلا دے گا۔

لاہور::(ویب ڈیسک) انٹرنیشنل برانڈ پیرس لورئیل برائیڈل ویک میں جہاں معروف فیشن ڈائزائنرز کے تیار کردہ دلفریب عروسی ملبوسات کو سراہا جارہا ہے وہیں ریمپ پر واک  کرتی ماڈلز اور اداکارائیں اپنے غیر پیشہ ورانہ انداز کے لیے سوشل میڈیا پر تماشا بنی ہوئی ہیں۔برائیڈل ویک میں ریمپ پر واک کرتی ایک ماڈل کا چلنے کا انداز ایسا تھا جیسے اسے زبردستی بھاری لباس پہناکر ریمپ پر دھکا دے دیا گیا ہو اور دھمکاتے ہوئے واک کرنے کا کہا گیا ہو۔پاکستان ڈراما انڈسٹری کی اداکارہ سارہ خان ڈیزائنر احمد سلطان کا لباس زیب تن کرکے شو اسٹاپر کے روپ میں جلوہ گر ہوئیں۔ بلاشبہ سارہ خان کا لباس برائیڈل ویک کے چند بہترین لباسوں میں سے ایک تھا لیکن سارہ خان اس لباس کے ساتھ انصاف نہیں کرپائیں۔اتنا بھاری لباس زیب تن کرکے سارہ خان ریمپ پر واک کرتی ہوئی کافی کنفیوژ اورعدم اعتماد کا شکارنظرآئیں، ایسا محسوس ہورہاتھا کہ سارہ اس لباس کو سنبھال نہیں پارہی ہیں۔ ایک شو اسٹاپر ڈیزائنر کا چہرہ ہوتا ہے لہذا اسے پُر اعتماد نظر آنا چاہیئے لیکن سارہ خان اس میں بری طرح ناکام نظر آئیں۔اداکارہ ماورہ حسین بھی پیرس لورئیل برائیڈیل ویک کے دوران طیب معظم اسٹوڈیو کی شو اسٹاپر کے روپ میں جلوہ گر ہوئیں۔ تاہم ماورہ ریمپ پر واک کرنے کے دوران دیگر ماڈلز کے برعکس بلاوجہ ہنستی رہیں۔ اس کے علاوہ ایک موقع پر وہ اپنے لباس کو سنبھالتی ہوئی بھی نظر آئیں۔سوشل میڈیا صارفین نے ماورہ کے اس انداز کو تنقید کا نشانہ بناتے ہوئےاسے غیر پروفیشنل قرار دیا اور کہا کہ شو اسٹاپر کے لیے ہمیشہ کسی پروفیشنل ماڈل کے بجائے کسی اداکار یا اداکارہ کا انتخاب کیاجاتاہے جو انتہائی غیر پروفیشنل انداز میں ہاتھ ہلا ہلاکر اور ہنستے ہوئے ریمپ پر واک کرتے ہیں۔ ان کی نسبت اگر  پروفیشنل ماڈلز کو شو اسٹاپر بنایاجائے تو وہ ان سے بہتر انداز میں ریمپ پر واک کریں گی۔

اس کے علاوہ ایک ماڈل کے لباس پر بھی سوشل میڈیا پر تنقید کی جارہی ہے اور کہا جارہا ہے کہ کیا ہمارے معاشرے میں اس طرح کے لباس کی اجازت ہونی چاہئے۔