اسلا م آ با د (ویب ڈیسک)آئل اینڈ گیس ریگولیٹری اتھارٹی (اوگرا) نے پیٹرولیم مصنوعات کی قیمتوں میں 11 روپے 91 پیسے فی لیٹر تک اضافی کی تجویز پیٹرولیم ڈویڑن کو ارسال کردی۔پیٹرولیم ڈویڑن کو بھیجی گئی سمری کے مطابق پیٹرول کی فی لیٹر قیمت میں 11 روپے 91 پیسے فی لیٹر اضافے کی تجویز دی گئی ہے۔اسی طرح ہائی اسپیڈ ڈیزل کی قیمت میں 11 روپے 17 پیسے جبکہ مٹی کے تیل کی قیمت میں 6روپے 65 پیسے اضافے کی تجویز دی گئی ہے۔اوگرا کی جانب سے آئندہ ماہ کے لیے لائٹ ڈیزل آئل کی قیمتوں میں 6 روپے 49 پیسے اضافے کا کہا گیا ہے۔پیٹرولیم مصنوعات کی قیمتوں میں اضافے سے متعلق حتمی فیصلہ وزیر اعظم عمران خان کریں گے جبکہ 31 مارچ کو وزارت خزانہ آئندہ ماہ کے لیے ان قیمتوں کا اعلان کرے گی۔خیال رہے کہ پیٹرولیم ڈویڑن کو بھیجی سمری اگر منظور ہوجاتی ہے تو ہائی اسپیڈ ڈیزل کی قیمت11 روپے 17 پیسے اضافے سے 111 روپے 43 پیسے سے بڑھ کر 122 روپے 60 پیسے فی لیٹر ہوجائے گی۔اسی طرح پیٹرول کی قیمت 11 روپے 91 پیسے کے بعد 92 روپے 89 پیسے سے بڑھ کر 104 روپے 80 پیسے ہوجائے گی۔

ژوب (ویب ڈیسک ) وزیر اعظم عمران خان نے بلوچستان میںژوب ڈبل کیرج وے اور بلوچستان ہیلتھ کمپلیکس کا سنگ بنیاد رکھ دیا۔اپنے دورہ بلوچستان کے دوران وزیر اعظم عمران خان کوئٹہ پہنچے، جہاں گورنر اور وزیر اعلیٰ بلوچستان نے ان کا استقبال کیا۔ جس کے بعد وزیر اعظم عمران خان نے گورنر،وزیر اعلیٰ بلوچستان اور اہم وفاقی وزرا کے ہمراہ کوئٹہ کینٹ پہنچے، جہاں آرمی چیف جنرل قمر جاوید باجوہ نے آرمی ایوی ایشن بیس پر ان کا استقبال کیا۔بعد ازاں وزیر اعظم نے ڑوب ڈبل کیرج وے اور بلوچستان ہیلتھ کمپلیکس کا سنگ بنیاد رکھا، اس دوران بلوچستان کی صوبائی قیادت اور آرمی چیف بھی موجود تھے۔اس موقع پر منعقدہ تقریب سے خطاب میں وزیر اعظم عمران خان کا کہنا تھا کہعمران خان کا کہنا تھا کہ بلوچستان خوش قسمت ہے کہ انہیں ایسا وزیر اعلیٰ ملا، پاکستان میں تبدیلی کی سوچ ہے اور پرانے طریقوں سے چلنے والا پاکستان آگے نہیں جاسکتا۔انہوں نے کہا ہم اپنے پرانے قرضوں پر صرف سود 6 ارب روپے دے رہے ہیں، ملک جس طرح چل رہا تھا وہ تبادہی کی طرف جارہا تھا۔ایک کتاب کا حوالہ دیتے ہوئے ان کا کہنا تھا کہ ملکوں کو کس طرح مقروض کیا جاتا اس کتاب میں بتایا گیا ہے، جس طرح اشرافیہ کو خریدا جاتا اسے کرپٹ کیا جاتا اور ملک کا پیسا باہر لے جاتا۔وزیر اعظم کا کہنا تھا کہ ریاست کا کام عوام کو تحفظ، تعلیم، پانی، صحت، روزگار فراہم کرنا ہے اور یہ ہر شہری کے بنیادی حقوق ہے جبکہ بلوچستان کا ایک خصوصی معاملہ ہے کیونکہ یہاں سیاست صرف انتخابات جیتنے کے لیے ہوتی ہے۔انہوں نے کہا کہ ہمارے سابق وزرا اعظم نے 5 سال کے دوران بلوچستان سے زیادہ لندن کے دورے کیے کیونکہ یہ اقتدار میں آنے کے لیے بلوچستان کی ضرورت نہیں ہوتی، یہاں صرف انتخابات کا سوچا جاتا لوگوں سے اتحاد کرلیا جاتا اور جو رقم عوام کو ملنی تھی وہ انہیں ملا ہی نہیں۔اپنے خطاب میں ان کا کہنا تھا کہ دنیا بھر میں لوگ 2 چیزوں سے زیادہ مرتے ہیں، ایک امراض قلب اور دوسرا کینسر، بلوچستان میں کوئی امراض قلب کا ادارہ نہیں تھا اور لوگوں کو کراچی جانا پڑتا تھا لیکن میں آرمی چیف کا مشکور ہوں کہ انہوں نے یو اے ای سے رابطے کے ذریعے اس ادارے کے لیے فنڈنگ کی۔انہوں نے کہا کہ اس منصوبے کا ہونا بہت ضروری تھا، اس کے لیے پاک فوج اور صوبائی حکومت کو خراج تحسین پیش کرتے ہیں، اس منصوبے سے یہ میڈیکل سٹی بن جائے گا اور ہمارا منصوبہ ہے کہ ہم فوج اور صوبائی حکومت کے ساتھ مل کر ایک کینسر کا ادارہ قائم کریں۔پاک چین اقتصادی راہداری کے حوالے سے ان کا کہنا تھا کہ خوشی ہے کہ 305 کلو میٹر کے مغربی روٹ کا سنگ بنیاد رکھا گیا، یہ کوئٹہ سے ڑوب 305 کلو میٹر ہے، یہ منصوبہ یہ ایک گیم چینجر ہے یہ بلوچستان کو نہ صرف پورے پاکستان سے ملائے گا بلکہ تمام پسماندہ علاقوں کو بھی جوڑے گا، ہمیں مغربی روٹ کو پہلے بنانا چاہیے تھا کیونکہ چین کے لیے سی پیک کی بڑی وجہ یہ تھی کہ ان کا مغربی حصہ پیچھے رہ گیا تھا لہٰذا ہمیں بھی کوشش کرنی چاہیے تھی کہ مغربی روٹ کو پہلے بنائیں۔کا کہنا تھا کہ اس منصوبے کے ساتھ بڑی تبدیلیاں آئیں گی، اس کے علاوہ ہم منصوبہ کر رہیں ہیں کہ کوئٹہ سے تافتان ایران تک ایک ریلوے ٹریک بنے اور وفاقی وزیر ریلوے شیخ رشید اس سلسلے میں بات کر رہے ہیں۔کوئٹہ کے ماسٹر پلان کے حوالے سے انہوں نے کہا کہ ملک کے تمام شہروں کے ماسٹر پلان نہیں ہے، جب تک ماسٹر پلان نہیں ہوگا شہریوں کو سہولیات فراہم نہیں ہوسکیں گی۔اپنی بات چیت جاری رکھتے ہوئے وزیر اعظم کا کہنا تھا کہ بلوچستان کے لوگوں کو سب سے بڑا مسئلہ یہ ہے کہ ہم اقلیت رہ جائیں گے، اس کا سب سے بڑا حل یہ ہے کہ یہاں تربیتی ادارے ہوں اور مقامی لوگوں کی صلاحیتوں کو نکھارا جاسکے۔بلوچستان کی ترقی کے بارے میں عمران خان نے کہا کہ یہاں ایک مضبوط بلدیاتی حکومتی نظام لانا ہوگا، اس کے لیے پنجاب اور پختونخوا کی طرز کا بلدیاتی نظام لانا چاہیے۔انہوں نے کہا کہ ہماری حکومت اگلے الیکشن جیتنے کے لیے نہیں آئی، بلوچستان ترقی کرے گا تو پاکستان کی ترقی ہوگی اور یہ آگے بڑھے گا۔واضح رہے کہ اپنے دورہ بلوچستان میں وزیر اعظم گوادر بھی جائیں گے جبکہ جہاں وہ گوادر ایکسپو کی 2 روزہ اختتامی تقریب میں بھی شریک ہوں گے۔خیال رہے کہ گوادر میں بین الاقوامی ایئرپورٹ کے منصوبے پر خصوصی توجہ دی جارہی ہے کیونکہ پاک چین اقتصادی راہداری (سی پیک) میں گوادر کافی اہمیت کا حامل ہے۔بلوچستان کے دورے میں وزیر اعظم گوادر ریلوے لائن منصوبے کا افتتاح بھی کریں گے اور وہاں کے سیاسی و قبائلی عمائدین سے بھی ملاقات متوقع ہے۔

کراچی (ویب ڈیسک ) کراچی میں احتجاج کرنے والے اساتذہ پر پولیس کے تشدد اور مطالبات کی حمایت میں اساتذہ نے سندھ بھر میں تدریسی عمل کا بائیکاٹ کرتے ہوئے مطالبات کی منظوری تک احتجاج جاری رکھنے کا اعلان کردیا۔گزشتہ روز کراچی پریس کلب کے بابر تقریباً 2 ہزار احتجاجی اساتذہ جمع ہوئے تھے اور گورنمنٹ اسکول ٹیچرز ایسوسی ایشن (گسٹا) کے عہدیداران نے مطالبات تسلیم کیے جانے کے حق میں تقریریں کیں جس کے بعد اساتذہ نے وزیر اعلیٰ ہاﺅس کی جانب مارچ شروع کیا۔پولیس نے مظاہرین کو روکنے کے لیے لاٹھی چارج کیا جس کے نتیجے میں مظاہرین اور پولیس کے درمیان معمولی جھڑپ بھی ہوئی اور متعدد اساتذہ کو گرفتار کر لیا گیا جنہیں رات گئے وزیر اعلیٰ سندھ مراد علی شاہ کی ہدایت پر رہا کردیا گیا تھا۔کراچی میں پولیس کی جانب سے پرامن مظاہرہ کرنے والے اساتذہ پر پولیس تشدد اور مطالبات تسلیم نہ کیے جانے کے خلاف گسٹا کی اپیل پر سکھر سمیت سندھ بھر میں اساتذہ نے آج سے تدریسی عمل کا بائیکاٹ کردیا ہے اور اسکولوں میں کلاس رومز کو تالے لگا دیے ہیں۔بائیکاٹ کے سبب جمعہ کو سندھ کے اکثر سرکاری اسکولوں میں طلبا کی تعلیم متاثر رہی جبکہ اساتذہ کی تعداد بھی نہ ہونے کے برابر تھی۔گسٹا رہنماﺅں نے اعلان کیا ہے کہ اگر ان کے مطالبات نہ مانے گئے تو وہ نہ صرف تدریسی عمل کا بائیکاٹ جاری رکھیں گے بلکہ یکم اپریل سے سندھ کے تعلیمی بورڈز کے زیر انتظام ہونے والے نویں اور دسویں جماعت کے سالانہ امتحانات کا بھی بائیکاٹ کردیں گے۔واضح رہے کہ احتجاج کرنے والے اساتذہ کی جانب سے کل 8مطالبات کیے گئے ہیں جن میں این ٹی ایس اساتذہ کو مستقل کرنے، مینجمنٹ کیڈر کے سبب اساتذہ میں پائی جانے والی بے چینی ختم کرنے، ایس ایل ٹی، ایچ ایس ٹی اور جے ایس ٹی اساتذہ کا فی الفور پروموشن، کے ایس ٹی اور مساوی گریڈ کے اساتذہ کو 17 اور ایچ ایس ٹی اور مساوی گریڈ کے اساتذہ کو 20ویں گریڈ کے معاہدے کے تحت ٹائم اسکیل شامل ہیں۔