وزیر اعلیٰ خیبرپختونخوا علی امین گنڈاپور نے نو منتخب صدر آصف زرداری کی تقریب حلف برداری میں شرکت سے انکار کرتے ہوئے ملک میں دوبارہ الیکشن کروانے کا مطالبہ کردیا۔

پشاور کے کبوتر چوک میں جلسہ گاہ میں انتظامات کا جائزہ لینے کے موقع پر وزیراعلیٰ خیبر پختونخوا علی امین گنڈا پور کا کہنا تھا کہ 8 فروری کو انتخابات میں مبینہ دھاندلی کے خلاف آج پشاور میں بڑا جلسہ ہوگا، پورے پاکستان میں ہمارا مینڈیٹ چوری ہوا ہے جس کے خلاف آج 2 بجے پرامن احتجاج ہوگا، عدلیہ کو مینڈیٹ چوری کے خلاف ایکشن لینا چاہیئے۔

علی امین گنڈا پور نے چیف الیکشن کمشنر سکندر سلطان راجہ سے فوری استعفیٰ دینے کا بھی مطالبہ کیا۔

انہوں نے مزید کا کہنا ہے کہ سنی اتحاد کونسل کو مخصوص نشستیں نہ دینا آئین سے کھلواڑ کے مترداف بات ہے، الیکشن کمیشن 90 دنوں میں الیکشن کروانے میں ناکام ہوا، آئین کی خلاف ورزیوں کی لمبی فہرست ہے، آرٹیکل 6 کے تحت کارروائی ہو، ہم آئین کا تحفظ کریں گے، اگر ہمیں حق نہ ملاتو اسے کون تسلیم کرے گا، پشاور 13 حلقوں پر پی ٹٰی آئی کے حمایت یافتہ آزاد امیدوار جیت چکے ہیں، ان حلقوں میں ہزاروں جعلی ووٹ ڈالے گئے۔

وزیر اعلیٰ خیبرپختونخوا نے نو منتخب صدر آصف زرداری کی تقریب حلف برداری میں شرکت سے انکار کرتے ہوئے کہا کہ آصف علی زرداری کو صدر ماںتا ہوں نہ ان کی حلف برداری میں جاؤں گا تاہم ان کے کرسی سنبھالنے کے بعد انہیں صدر ماننا ہی پڑے گا، آصف زرداری فارم 45 نہیں 47 والے صدر ہیں، عمران خان نے 25 سال پہلے کہا تھا کہ زرداری اور نواز ایک ہیں۔

علی امین گنڈا پور کا یہ بھی کہنا تھا کہ کہنا تھا کہ سرکاری اجلاسوں میں شرکت کرونگا لیکن مینڈیٹ چوری والوں کو ملک پر مسلط نہ کریں نتائج درست کریں یا دوبارہ الیکشن کرائیں گے، ہم اپنے وسائل کے مطابق عوام کومفت علاج اور دیگر سہولیات دیں گے، ہم کرسی پربیٹھ کرعیاشی کرنے نہیں بلکہ کام کے لیے آئے ہیں، پی ٹی آئی نے ثابت کیا کہ دھاندلی ہوئی ہے۔ بانی پی ٹٰی آئی کو ہٹا کرچوروں نے ملک کوتباہ کیا۔

گلگت بلتستان سے تعلق رکھنے والے ننھے وی لاگر کی خواہش پاک فوج نے پوری کردی۔ کم عمر بچے کے خوابوں سے حقیقت تک کا سفر مکمل ہوگیا، پاک فوج نے ویلاگنگ سے متعلق جدید آلات مہیا کردیے۔

پاک فوج نے ہمیشہ عوام کی فلاح اور بھلائی کو اولین ترجیح دی ہے، سوشل میڈیا پر محمد شیراز نامی کم عمر بچے کی ویڈیو وائرل ہونے پر پاک فوج نے احسن قدم اٹھاتے ہوئے کم عمر بچے کی خواہش پوری کردی۔

گلگت بلتستان سے تعلق رکھنے والے محمد شیراز کا سوشل میڈیا پر ویلاگنگ کا خواب پاک فوج کی بدولت حقیقت میں تبدیل ہوگیا، اب کم عمر شیراز جدید آلات کی بدولت وی لاگنگ کرسکے گا۔

کچھ روز قبل محمد شیراز کی انٹرنیٹ کے خراب ہونے اور دیگر مسائل کی ویڈیو سوشل میڈیا پر وائرل ہوئی تھی، سوشل میڈیا پر وائرل ہونے والی ویڈیو کا پاک فوج نے فوراً نوٹس لیا اور اس کے آبائی گھر پہنچ گئی۔

پاک فوج نے بچے کے گھر پہنچ کر اسکی حوصلہ افزائی کی اور ویلاگنگ سے متعلق جدید آلات مہیا کیے۔ بچے کے والدین نے پاک فوج کا شکریہ ادا کیا اور علاقہ مکینوں نے پاک فوج کے اس اقدام کو سراہا۔

واضح رہے گلگت بلتستان سے تعلق رکھنے والے 7 سالہ وی لاگر محمد شیراز کی ویڈیوز سوشل میڈیا پر وائرل ہیں، کچھ روز قبل محمد شیراز نے ایک ویڈیو سوشل میڈیا پر لگائی جس میں وہ گلگت بلتستان میں انٹرنیٹ کی اسپیڈ کم ہونے کا گلہ کررہے تھے، تاہم ان کی ویڈیو وائرل ہونے پر پاک فوج کی جانب سے ان کو جدید وی لاگنگ آلات اور انٹرنیٹ ڈیوائس تحفہ میں دی گئی، جس پر محمد شیراز خوشی سے نہال ہوگئے۔

پشاور کے علاقے بورڈ بازار کے قریب موٹرسائیکل میں دھماکے سے 2 مبینہ دہشت گرد ہلاک اور ایک زخمی ہوگیا۔

پشاور کے علاقہ بورڈ بازار میں صبح سویرے دہشت گردی کی کوشش ناکام ہوگئی، مبینہ دہشت گرد خود اپنے گھناؤنے منصوبے کا شکار بن گئے۔

دہشت گرد بارودی مواد ایک جگہ سے دوسری جگہ منتقل کر رہے تھے کہ دھماکا ہوگیا، ایک ملزم موقعے پر ہلاک ہوگیا جبکہ دوسرا اسپتال میں دم توڑ گیا۔

دھماکے میں زخمی ہونے والا تیسرا ملزم خیبرٹیچنگ اسپتال میں زیرعلاج ہے، ملزم سے تفتیش میں اہم انکشافات متوقع ہیں۔

پولیس اور قانون نافذ کرنے والے اداروں نے جائے وقوعہ پر پہنچ کر علاقے کو گھیرے میں لے لیا۔

ایس ایس پی آپریشنز کاشف آفتاب عباسی کے مطابق بورڈ بازار ناصر باغ روڈ کی مرکزی شاہرہ پر موٹر سائیکل پر بارودی مواد سے دھماکا ہوا، دھماکے کی نوعیت اور بارودی مقدار کے حوالے سے تفتیش ہورہی ہے۔

کاشف آفتاب عباسی نے مزید کہا کہ جائے وقوعہ سے انسانی جسم کے اعضاء ملے ہیں، دھماکے کی نوعیت کو جانچنے کے لیے ٹیمیں کام کررہی ہیں، دھماکے میں زخمی اور ہلاک ہونے والوں کی تصدیق کررہے ہیں۔

ایس ایس پی آپریشنز کاشف آفتاب عباسی کی میڈیا سے گفتگو
پشاور میں میڈیا سے گفتگو کرتے ہوئے ایس ایس پی آپریشنز کاشف آفتاب عباسی نے کہا کہ بی ڈی یو کی رپورٹ کے مطابق دھماکے میں 4 سے 5 کلو بارودی مواد استعمال ہوا، سفر کے دوران ہی دھماکا ہوا، دھماکا پلان کے مطابق تھا یا نہیں، یہ قبل از وقت ہوگا۔

کاشف آفتاب عباسی نے کہا کہ دھماکے میں 2 ملزمان ہلاک اور ایک زخمی ہے، دھماکا خودکش تھا یا نہیں ابھی نہیں کہہ سکتے، بارودی مواد ایک جگہ سے دوسری جگہ لے جایا جارہا تھا، بارودی مواد کو لے جاتے ہوئے راستے میں ہی دھماکا ہوا، ٹارگٹ کس کو کررہے تھے ابھی کچھ نہیں کہہ سکتے، پولیس مزید تفتیش کررہی ہے، تینوں ملزمان ایک موٹر سائیکل پر سوار تھے۔

وزیراعلیٰ خیبرپختونخوا نے رپورٹ طلب کرلی
دوسری جانب وزیر اعلیٰ خیبر پختونخوا علی امین گنڈا پور نے بورڈ بازار دھماکے کی مذمت کی ہے۔

وزیر اعلیٰ علی امین گنڈا پور نے انسپیکٹر جنرل (آئی جی) پولیس سے دھماکے کی رپورٹ طلب کر لی۔

وزیراعظم کی شدید مذمت
ادھر وزیراعظم شہباز شریف نے بھی پشاور کے بورڈ بازار میں ہونے والے دہشت گرد حملے کی شدید مذمت کی ہے۔

وزیراعظم نے کہا کہ دہشت گردی کو جڑ سے ختم کرنے کے لیے پر عزم ہیں۔