بھارت میں جہاں لوک سبھا کے انتخابات سب کی توجہ حاصل کر رہے ہیں، وہیں اب بھارتی اداکار گووندا سے متعلق خبر بھی گردش کر رہی ہے، جس میں بتایا جا رہا ہے کہ وہ ایک مرتبہ پھر الیکشن میں حصہ لینے کے لیے پُر امید ہیں۔

بھارتی میڈیا کی جانب سے دعویٰ کیا جا رہا ہے کہ معروف بھارتی اداکار ہندو انتہا پسند تنظیم اور سیاسی جماعت شیو سینا کے ٹکٹ پر الیکشن لڑ سکتے ہیں۔

بھارتی میڈیا کے مطابق ذرائع نے دعویٰ کیا ہے کہ گووندا نے حال ہی میں مہاراشٹرا کے وزیر اعلیٰ ایکناتھ شندے سے ملاقات کی ہے، جس میں وزیر اعلیٰ نے انہیں شمال وسطی ممبئی سے لوک سبھا کی سیٹ سے الیکشن لڑنے کی پیشکش کی ہے۔

واضح رہے حال ہی میں وزیر اعلیٰ شندے نے اپنے بیان میں مغل بادشاہ پر تنقید کی تھی، ان کا کہنا تھا کہ نریندر مودی کا مغل بادشاہ اورنگزیب سے موازنہ کرنا مودی کی توہین ہے۔

اس سے قبل گووندا نے کانگریس کے ٹکٹ پر 2009 میں شمال ممبئی سے الیکشن لڑنے کی خواہش کا اظہار کیا تھا، تاہم اُس وقت کانگریس بھارتی اداکار کو بی جے پی کے مخالف امیدوار سے طاقتور نہیں سمجھتی تھی۔

واضح بھارتی الیکشن میں اداکار گووندا کے ساتھ ساتھ اکشے کمار، نانا پاٹیکر اور مادھوری ڈکشت کے الیکشن میں حصہ لینے سے متعلق خبر بھی گردش کر رہی تھی۔

تاہم اکشے کمار اور نانا پاٹیکر نے ایسی تمام خبروں کی تردید کر دی ہے، دوسری جانب مادھوی ڈکشت نے ردعمل دیتے ہوئے لوک سبھا الیکشن میں حصہ لینے سے متعلق کہا کہ انہیں دلچسپی نہیں ہے۔

ماسکو: روسی دارالحکومت میں کروکس کنسرٹ ہال پر دہشتگردوں کے حملے میں 60 افراد ہلاک جب کہ 145 زخمی ہو گئے۔

غیرملکی خبررساں ادارے کے مطابق روس کے دارالحکومت ماسکو میں فوجی وردی میں ملبوس 5 دہشتگردوں نے کروکس سٹی ہال میں فائرنگ کی اور دستی بموں سے حملہ کیا جس کے نتیجے میں 60 افراد ہلاک جب کہ 145 زخمی ہو گئے۔

امریکی میڈیا کے مطابق 5 مسلح افراد نے کروکس سٹی ہال داخل ہوئے اور کنسرٹ شروع ہونے سے قبل جہاں پر 6,200 افراد موجود تھے ان پر خودکار ہتھیاروں سے فائرنگ کی اور ساتھ ہی دستی بموں سے حملہ کیا۔

ایک صحافی جو جائے وقوعہ پر موجود تھا نے بتایا کہ مسلح افراد نے خودکار فائرنگ کی اور دستی بم یا آگ لگانے والا بم پھینکا جس سے آگ تیزی سے کنسرٹ ہال میں پھیل گئی۔ انہوں نے بتایا کہ دہشتگرد ہال میں موجود لوگوں پر تقریباً 20 منٹ تک گولیاں برساتے رہے۔

روسی ریسکیو سروسز نے کروکس سٹی ہال کے تہہ خانے سے تقریباً 100 سے زائد افراد کو نکال کر فوری طبی امداد کے لیے اسپتال روانہ کیا۔ تاہم میڈیا رپورٹس کے مطابق فائر فائٹنگ عملے نے آگ پر قابو پا لیا، جبکہ نیشنل گارڈ فورس حملہ آوروں کی تلاش کر رہی ہے۔

روسی میڈیا کے مطابق کراکس سٹی ہال پر حملے کے بعد ماسکو سمیت مختلف علاقوں میں تقریبات منسوخ کردیں۔

روسی وزارت خارجہ کی ترجمان ماریا زاخارووا نے عالمی برادری سے مطالبہ کیا ہے کہ وہ اس واقعے کو دہشتگردی قرار دے اور اس کی مذمت کرے۔

امریکا کی جانب سے اس حملے میں یوکرین کے ملوث نہ ہونے کے بیان پر روسی ترجمان ردعمل دیتے ہوئے کہا کہ امریکا بغیر تحقیقات کیسے کسی کو بے گناہ قرار دے سکتا ہے، اگر حملے میں یوکرین ملوث ہے تو امریکا کو لازمی پتہ ہوگا تاہم اس حوالے سے ابھی کوئی ثبوت نہیں ملا۔

انہوں نے کہا کہ اگر واشنگٹن کے پاس اس حوالے سے معلومات ہیں تو شیئر کی جائیں اور اگر نہیں تو اس طرح بات نہیں کرنی چاہیے۔

روسی صدر نے حملے پر افسوس کا اظہار کرتے ہوئے کہا ہے کہ اس میں ملوث تمام دہشتگردوں کو اس کی بھاری قیمت چکانا پڑے گی۔

ممبئی: امریکی کمیشن نے بھارت کو انسانی حقوق کے حوالے سے “خصوصی تشویش کا ملک” قرار دینے کی سفارش کردی۔

بھارت میں انسانی حقوق کی صورتحال پر امریکی کانگریس کمیشن کا اجلاس ہوا جس میں سفارش کی گئی کہ بھارت کو انسانی حقوق کے حوالے سے ’خصوصی تشویش کا ملک‘ قرار دیا جائے۔

امریکی کانگریس کمیشن کے اجلاس میں ماہرین کی جانب سے گواہی دی گئی کہ بھارت میں اقلیتوں کے خلاف قوانین کا غلط استعمال کیا جاتا ہے، بھارت میں خاص طور پر مسلمانوں اور عیسائیوں کو بدترین تشدد کا نشانہ بنایا جاتا ہے۔
دورانِ اجلاس ماہرین نے بھارت میں میڈیا اور انٹرنیٹ پر پابندی سمیت دیگر سنگین خلاف ورزیوں پر بھی گواہی دی۔

اجلاس میں ٹام لینٹوس کمیشن کے چیئرمین جیمز پیٹرک میک گورن نے بھارت میں زیادہ تر مسائل اور سنگین حالات کی وجہ بھارتی وزیراعظم مودی کو قرار دیا۔

چیئرمین جیمز پیٹرک میک گورن نے کہا کہ وزیراعظم نریندر مودی بھارت کی سیکیولر جمہوریت کو تبدیل کرکے اسے ہندو قوم بنانے کی کوشش میں ہیں جس کی وجہ سے بھارت میں اقلیتوں کے لیے حالات سنگین ہیں۔

اُنہوں نے مزید کہا کہ اگر فوری طور پر انسانی حقوق کی پامالیوں سے متعلق مسائل کو حل نہ کیا گیا تو بھارت کا مستقبل خطرے میں پڑجائے گا۔

اجلاس میں امریکی کمیشن نے بھارت کو اسلحے کی فروخت کے حوالے سے انسانی حقوق سے متعلقہ معاملات کا جائزہ لینے کی بھی سفارش کی۔