اسلام آباد(صباح نیوز، مانیٹرنگ) پاکستان تحریک انصاف کے چیئرمین عمران خان نے سابق وزیراعظم نوازشریف کو ٹویٹر پر مخاطب کرتے ہوئے کہا ہے کہ ضیا الحق کے تربیت یافتہ کا پی ٹی آئی کو جمہوریت پر لیکچر دینا قیامت کی نشانی ہے۔پی ٹی آئی کے چیئرمین عمران خان نے نواز شریف کی ضیا الحق کے ساتھ گولف کھیلنے کی تصویر سماجی رابطے کی ویب سائٹ پر ٹوئٹ کردی ہے اور انہیں مخاطب کرتے ہوئے کہا ہے کہ ضیا الحق کے تربیت یافتہ کا پاکستان تحریک انصاف کو جمہوریت پر لیکچر دینا قیامت کی نشانی ہے۔واضح رہے کہ نواز شریف کو نااہل قرار دیئے جانے کے بعد عمران خان کی جانب سے قبل از وقت انتخابات کا مطالبہ کیا جارہا ہے جب کہ مسلم لیگ (ن) اسے جمہوریت کے خلاف ایک سازش قرار دے رہی ہے۔ تحریک انصاف کے رہنما معروف قانون دان بابر اعوان نے کہا ہے کہ اسحاق ڈار کو دل کی نہیں نیت خرابی کی بیماری ہے، لندن میں جندال سے ملاقاتیں کررہے ہیں، یہ انکشاف انہوں نے نجی ٹی وی سے گفتگو کرتے ہوئے کیا، انہوں نے کہا کہ میڈیا پتہ لگائے کہ اسحاق ڈارکہاںغائب ہے، کیونکہ اب کوئی بیماری نہیں نہ ہی وہ کسی ہسپتال میںہے، حدیبیہ کیس ہر صورت کھلے گا، اسحاق ڈار اب حدیبیہ کیس میں گواہ کے طور پر پیش ہوگا،انحراف پر اسے جیل ہوگی، شریف خاندان اب کہیں جلسے جلوس یا الیکشن کمپین کرنے کے قابل ہی نہیں رہا، یہ لوگ اب عوام کا سامنا نہیں کرسکتے۔ اچھل اچھل کر تقرریں کرنے والے وزرا زرا عوام میں نکل کر تو دکھائیں، ختم نبوت قانون میں ترمیم سوچا سمجھا منصوبہ تھا، ساری حکومت اس کی ذمہ دار ہے، قوم سے فراڈکیا جارہا ہے، الیکٹورل رول1974ءکنڈکٹ آف جنرل الیکشن آرڈر2002ءکو حذف کردیا گیا ہے، حدیبیہ کیس بارے جسٹس کھوسہ کا بیان بالکل ٹھیک ہے۔

لاہور(محمد علی سے )ہائر ایجوکیشن کمیشن (ایچ ای سی) کی غفلت اعلی تعلیم کے بڑھتے ہوئے کاروباری غیرتسلیم اداروںکی بھر مار،طلبہ کا مستقبل داﺅ پر لگ گیا اربوں روپے کے فنڈ ملنے کے باوجود ایچ ای سی نمایاں کارکرگی دکھانے میں ناکام غیر تسلیم شدہ اعلی تعلیمی اداروں کی تعداد 165سے تجاوز کر گئیں۔ ذرائع کے مطابق پاکستان میں ایچ ای سی کی جانب سے تسلیم شدہ سرکاری اداروں کی تعداد ایک سو تین ہے جبکہ 74 غیر سرکاری اعلیٰ تعلیم کیلئے ادارے ہیں۔جبکہ ملک میں غیر تسلیم شدہ اعلیٰ تعلیمی اداروں کی تعداد 165 سے تجاوز کر گئی ہے جو کہ ایچ ای سی کے دعوﺅں کے بالکل برعکس ہے۔۔ بڑھتے ہوئے کاروباری غیر تسلیم شدہ ادار وں کو نہ روک کر ایچ ای سی کی طرف سے بھر پور غفلت کا مظاہرہ کیا جارہا ہے۔جس سے نہ صرف اعلی تعلیم کا معیار متا ثر ہورہا ہے بلکہ طلبہ کے مستقبل سے بھی کھلواڑ کیا جا رہا ہے ،زرائع سے مزیدمعلوم ہوا ہے کہ ایچ ای سی کو اعلی تعلیم کو بہتری کے لیے اربوں روپے کے فنڈزمختص کیے گئے مگر ایچ ای سی کی جانب سے فنڈ ز کو استعمال میں نہ لا تے ہوئے سرکاری اور نیم سرکاری یونیورسٹیوں میں سہولتوں کے فقدان کودورنہیں کیا گیا جس کی وجہ سے طلبہ ان کاروباری طرز کی یونیورسٹیوں میں داخلے لینے پر مجبو ر ہوجاتے ہے جن کا مشن اعلی تعلیم دینے کے بجائے والدین سے مال بٹورنا ہے جبکہ ان غیر تسلیم شدہ اعلی تعلیم کے اداروں میں غیر منظور شدہ ڈگریوںکے کورسز بھی بے دریغ پڑھائے جاتے ہیں جس کی وجہ سے ماضی میں تعلیم مکمل کرنےوالے طلبہ کو ڈگری نہ ملنے اور اسے حکومتی سطح پر تسلیم نہ کرنے کے حوالے احتجاج بھی ہوئے تھے مگر ایچ ای سی کی طرف سے ان کے تدارک کے لیے غیر سنجید ہ اقدامات اور ناقص مانیٹرنگ کی وجہ سے ان میں روز بروز اضافہ ہورہا ہے جس کے لیے ایچ ای سی اور حکومت وقت کو سنجیدگی سے اس معاملے پر توجہ دینے اور ہنگامی بنیادوں پر ان غیر تسلیم شدہ اعلی تعلیم کے اداروں کے خلاف کاروائی کرنے کی ضرورت ہے کیونکہ پاکستان کو اعلیٰ تعلیم ہی اعلیٰ مقام دلوا سکتی ہے۔

لاہور (کرائم رپورٹر) غازی آباد میں سسرالیوں کا داماد پر انسانیت سوز تشدد، متاثرہ شخص کو گن پوائنٹ پر یرغمال بنا کر آدھا سر، آدھی مونچھیں اور بھوئیں مونڈھ ڈالیں، پولیس نے دہشتگردی کی دفعات کے مطابق مقدمہ درج کرتے ہوئے پانچ ملزمان کو گرفتار کر لیا۔ بتایا گیا ہے کہ غازی آباد میں پیش آیا ایک ایسا واقعہ جسے دیکھ کر انسانیت بھی کانپ اٹھے بیوی کو طلاق دینے سے انکار پر سسرالیوں نے داماد کو وحشیانہ تشدد کا نشانہ ڈالا۔ مذاکرات کے بہانے دلاور کو سسرالیوں نے بلایا اور گن پوائنٹ پر گھر کے سامنے نجی سکول میں یرغمال بنا لیا اور پھر ایسا ہوا کہ زمانہ جاہلیت کی یاد تازہ ہوگئی۔ ملزمان نے داماد کا آدھا سر، آدھی مونچھیں اور بھوئیں مونڈ ڈالیں۔ اور پھر منہ کالا کر کے گدھے پر بٹھا کر گلیوں میں پھیرایا۔ اپنے ہی داماد کی عزت کا ایسے جنازہ نکالا کہ ملزمان کے سوا، سب دیکھنے والے توبہ توبہ کرتے رہے۔ پولیس نے واقعہ کا مقدمہ دہشتگردی سمیت دیگر سنگین دفعات کے مطابق درج کر لیا ہے۔ پولیس نے جائے وقوعہ سے تشدد میں استعمال ہونےوالے آلات برآمد کرلئے ہیں، دیگر ملزمان کی گرفتاری کےلئے چھاپے مارے جا رہے۔

قصور(بیورورپورٹ) قصورشہر میں ایک اور معصوم بچی کو مبینہ طور پر جنسی درندگی کا نشانہ بنا ڈالا گیا بتایا گیا ہے کہ کوٹ اعظم خاں کے (ا)کی سات سالہ معصوم بیٹی گزشتہ روز گلی میں کھیلتے ہوئے اچانک غائب ہوگئی جس کی تلاش کے لیے شہر کی مختلف مساجد میں ناصرف اعلانات کرائے گئے بلکہ اہلخانہ اور محلہ دار بچی کی تلاش میں گلی گلی بھٹکتے رہے تاہم ساری رات تلاش کے باوجود بچی (ک)کا کچھ پتہ نہ چل سکا جس پر بچی کے رشتہ داروںنے پولیس تھانہ اے ڈویژن کو بھی اطلاع کی بتایا گیاہے کہ صبح کے وقت بچی بیہوشی کی حالت میں لکڑی کے ایک ٹال کے گردمیں ملی جسے فوری طور پر ڈسٹرکٹ ہسپتال قصور پہنچایا گیا بتایا گیا ہے کہ بچی کے جسم پر تشددکے نشان ہیں اور اسے نامعلوم ملزمان نے اغواءکرنے کے بعد مبینہ طور پر زیادتی کا نشانہ بنایا ہے اور اس امر کی تصدیق میڈیکولیگل میں بھی ہوگئی ہے پولیس ترجمان کے مطابق پولیس نے اغواءاور زیادتی کامقدمہ درج کرکے نامعلوم ملزمان کی تلاش شروع کر دی ہے جبکہ ایک درجن سے زائد بچوں کے اغواءزیادتی اور قتل کے واقعات میں ہونیوالے ایک اور واقعہ کے اضافہ نے شہر میں پھر سے خوف وہرا س پھیلا دیا ہے۔

اسلام آباد (مانیٹرنگ ڈیسک) عدالت نے سیاسی رہنماﺅں نے بیرون ملک جائیدادوں کی تفصیلات طلب کرلی ہے۔ مریم نواز پر توہین عدالت لگ چکی ہے آج سماعت ہوگی۔ کراچی میں ہونے والے سارے ڈرامے کے پیچھے نوازشریف اور زرداری ہیں۔ مفتاح اسماعیل ڈاکٹر عاصم کیس میں نیب ہیڈکوارٹر میں تفصیلی بیان میں اہم انکشافات کرچکے ہیں۔ تحریک لبیک یارسول اللہ کی آڑ میں فساد پھیلانے کی کوشش ہوسکتی ہے۔ یہ انکشافات سینئر تجزیہ کار نے نجی ٹی وی پروگرام میں گفتگو کرتے ہوئے کئے۔ انہوں نے کہا کہ مفتاح اسماعیل کو نیب ہیڈکوارٹر جاکر بیان دیا۔ نیب کے مطابق بڑے اہم انکشافات ہوئے ہیں۔ جن سے ڈاکٹر عاصم کیس کے حل کرنے میں مدد ملے گی۔ نوازشریف کل پیشی پر کیا لب و لہجہ اختیار کرتے ہیں یہ بات اہم ہے کیونکہ پچھلی بار تو ان کے بیان پر چیف جسٹس نے جواب دیا تھا۔ حکومت تحریک لبیک یارسول اللہ کے سوالوں کا جواب نہیں دے پارہی اور بھاگ رہی ہے اب یہ پلان ہی ہے کہ رینجرز کے ذریعے تحریک لبیک والوں کو ہٹایا جائے یعنی خود باہر رہیں اور دوسروں کو لڑا کر فساد کرائیں کراچی میںمتحدہ پاکستان اور پی ایس پی میں جھگڑا کرانے والے نوازشریف اور زرداری ہیں۔ جتنے دن جھگڑا چلا زرداری بڑی خاموشی سے کراچی میں موجود رہے۔ نوازشریف وزیراعظم شاہد خاقان عباسی پر بالکل اعتماد نہیں کرتے۔ آصف زرداری بھی دباﺅ میںہیں کہ ڈاکٹر عاصم کیا بیانات دیکر آئے ہیں۔

لاہور (کرائم رپورٹر) جائیداد کا تنازع یا کچھ اور ماجرا، بادامی باغ کے رہائشی 65سالہ محمد خورشید پر بیوی بچوں کا مبینہ تشدد، شوگر کا مریض ہونے کی وجہ سے زخمی ٹانگ کٹ گئی، معذور شہری کو بیوی بچے مکان بیچنے پر مجبور کرتے رہے، انکار پر تشدد کر کے بیہوش کرنے کے بعد انگوٹھے لگوا کر گھر سے نکال دیا، ایس ایچ او سے سی سی پی او لاہور تک کوئی بھی داد رسی نہ کروا سکا، سخت سردی میں فٹ پاتھ پر سونے پر مجبور، داد رسی کیلئے روز نامہ خبریں کے آفس آپہنچا، حکام بالا سے عمر کے آخری حصہ میں دربدر ہونے سے چانے کی اپیل۔ تفصیلات کے مطابق بادامی باغ کے علاقہ ظفر پارک گلی نمبر 12مکان نمبر 15کا رہائشی 65سالہ محمد خورشید بادامی باغ اور شادباغ تھانوں میں دادرسی کی درخواستوں کے علاوہ ڈی ایس پی بادامی باغ اور سی سی پی او لاہور کے دفاتر میں بھی حصول انصاف کے کیلئے دھکے کھانے کے بعد دادرسی نہ ہونے پر آخر کار روز نامہ خبریں کے دفتر پہنچ گیا۔ متاثرہ شہری نے خبریں کو آپ بیتی بتاتے ہوئے کہا کہ میں راوی انجینئرنگ میں کام کرتا تھا جہاں سے جب ریٹائرڈ ہوا تو ریٹائرڈ منٹ کے پیسوں سے میں نے2004ءمیں اپنی بیوی کوثر بیگم کو لکھو ڈیر کے علاقہ میں واقع ایک ہاﺅسنگ سوسائٹی میں ایک کنال کا پلاٹ لیکر دیا جبکہ بادامی باغ میں بھی ایک 7مرلے کا مکان ہے جو میرے اپنے نام پر ہے۔ اس نے مزید بتایا کہ میرے 7بچے ہیں جن میں 4بیٹیاں اور 3بیٹے ہیں، تیسرے نمبر والی بیٹی صباءجو کہ ایڈوکیٹ ہے اور چوتھے نمبر والا بیٹا محمود جو کہ گارمنٹس کا کام کرتا ہے نے میری بیوی کوثر بیگم کے ساتھ ملکر 2015ءکو بادامی باغ والا مکان بیچنے کی ضد کرنا شروع کر دی جس پر میں نے کہا کہ میں اپنے بڑھاپے کا سہارا کسی صورت نہیں گنواﺅں گا جس پر اپریل 2015ءکو اسکی بیوی، بیٹی صباءاور بیٹے محمود نے سوتے ہوئے میری بائیں ٹانگ پر کوئی بھاری چیز سے وار کیا جس سے میری ٹانگ پر شدیدگہرا زخم آگیا جس کے بعد مجھے ہسپتال لیجایا گیا جہاں حادثہ بتاتے ہوئے مجھے داخل کروایا گیا لیکن شوگر کی وجہ سے زخم اس قدرخراب ہوگیا کہ 28جون 2015ءکو میری ٹانگ گھٹنے تک کاٹنی پڑی اور میں تاحیات ایک ٹانگ سے معذور ہوگیا۔ میری ٹانگ کے زخمی ٹھیک ہونے میں کافی عرصہ لگا جس کے بعد 2016میں میری بیوی اور بچوں نے مجھے مکان فروخت کرنے یا بیوی کے نام پر کرنے کی رٹ لگا دی جس پر میری جانب سے صاف انکار پر مجھے میری ایڈوکیٹ بیٹی صباءنے 10لاکھ روپے کا تقاضا کر دیا جس پر میں نے کہا کہ 10ہزار روپے بھی ہوں تو میں نہیں دے سکتا 10لاکھ کہاں سے دوں جس پر میری بیوی نے بچوں کے ساتھ ملکر مکان کے 2حصے گروی دے دیے اور جب تیسرا حصہ دینے لگے تو میں نے منع کر دیا جس پر تمام نے شادباغ کے علاقہ میں ایک مکان کرائے پر لیا اور مجھے زبر دستی اپنے ساتھ وہاں لے گئے۔ 13اگست 2017کو میری بیوی اور بچوں نے سیف الماری کو توڑ کر رجسٹریاں نکال لیں جس پر میں نے تھانہ شادباغ میں ان تینوں کے خلاف درخواست دی جس پر تھانہ میں تعینات اے ایس آئی فاروق نے ملزمان سے مبینہ رشوت لیکر پیش رفت ہی نہیں کی جس کے بعد 19ستمبر 2017کو میں دوبارہ اپنے مکان بادامی باغ آگیا اور پھر بیوی بچے بھی میرے پیچھے پیچھے سامان لیکر آگئے اور اسی رات تقریباً12بجے کے قریب میری بیوی، بیٹی صباءاور بیٹے محمود نے ملکر مجھے شدید تشدد کا نشانہ بناتے ہوئے ھبہ نامہ پر دستخط کرنے کا دباﺅ ڈالا جس کا میں نے صاف انکار کر دیا۔ اس موقع پر میری بیوی میرے منہ میں اپنا ڈوپٹہ ٹھونستی رہی تاکہ میری چیخ و پکار باہر محلہ والوں تک نہ پہنچ سکے جبکہ میری بیٹی کھانا بنانے والے چمچ سے جبکہ میرا بیٹا مکوں اور گھونسوں سے تشدد کرتے رہے اور بار بار میرا انگوٹھا کاغذات پر لگوانے کی کوشش کرتے رہے اور میری جانب سے زبردست مزاہمت کے بعد میری گردن پر گھونسے مارنے شروع کر دیے جس سے میں نیم بیہوش ہو گیا اور انھوں نے میرے انگوٹھے لگوالئے اور مجھے صحن میں پڑی چارپائی پر پھینک دیا ۔ اس تشدد کے حوالے سے میں نے تھانہ بادامی باغ میں اندراج مقدمہ کیلئے درخواست دی جو سب انسپکٹر مولوی سرور کو مارک ہوئی جس نے میری بیوی اور بچوں سے ملکر مجھے بتائے بغیر میری جانب سے عدم پیروی کی بنیاد بناتے ہوئے داخل دفتر کردی۔ 9اکتوبر 2017ءکو یہی درخواست لیکر ڈی ایس پی کے پاس گیا جنہوں نے تفتیش تبدیل کر کے محمد انور سے تفتیش کرنے کا کہا تو میری بیٹی کے ایڈوکیٹ ہونے کی وجہ سے اثر وثوق کی بناءپر پھر سے ٹرخانہ شروع کر دیا۔ ڈی ایس پی کے پاس جا کر تفتیش تبدیل کروانے کی پاداش میں میرے بیوی بچوں نے ایک مرتبہ پھر مجھے شدید تشدد کا نشانہ بنایا جس پر میں نے جب رات گئے گھر سے بھاگنے کی کوشش کی تو دروازہ کھولنے کی آواز سن کر سب نے مجھے پکڑلیا اور دوبارہ تشدد کا نشانہ بناتے ہوئے میری مصنوعی ٹانگ اتار کر چھین لی اور دوسری ٹانگ سے باندھ کر چارپائی سے باندھ دیا۔ بعدازاں علی الصباح میرا بھائی محمد اشرف بادامی باغ پولیس کے ہمراہ میرے گھر آیا جنہوں نے مجھے وہاں سے بازیاب کروایا۔ متاثرہ شہری نے روز نامہ خبریں کی وساطت سے وزیر اعلی پنجاب، آئی جی پنجاب اور چیف جسٹس آف لاہور ہائی کورٹ سے حصول انصاف کی اپیل کی ہے۔

کراچی (وحید جمال) کراچی میں ایم کیوایم پاکستان اور پاکستان سرزمین پارٹی کی سیاسی کشیدگی اور ایک دوسری پارٹی کی قیادت پر الزامات سے کراچی کی سیاسی صورتحال کو غیر یقینی اور پیچیدہ بنادیا ہے۔ شہر قائد میں سیاست دان مسائل حل کرنے کے بجائے سیاسی بیانات سے کام لے رہے ہیں کراچی کے سیاسی حلقوں کے ذرائع کے مطابق ایم کیوایم پاکستان اور پاک سرزمین پاٰرٹی کے مابین سیاسی کشیدگی کی وجہ سے دونوں جماعتوں کے کارکنوں کے درمیان تصادم کا اندیشہ ہے کراچی میں امن و امان کی صورتحال خراب ہوسکتی ہے موجودہ صورتحال کو سامنے رکھتے ہوئے ایک نئی سیاسی جماعت کے قائم کرنے کی کوششیں شروع کردی گئی ہیں جو اپنی سیاست کا محور کراچی کے بنیادی مسائل ترجیحی بنیاد پر رکھے گی آئندہ چند دنوں میں ایم کیوایم پاکستان اور پاک سرزمین پارٹی کے کئی اہم رہنماﺅں کو منی لانڈرنگ کیس اور سانحہ بلدیہ ٹاﺅن فیکٹری کیس میں سخت مشکلات اور مسائل کا سامنا ہوگا جس سے ان کے سیاسی مستقبل کا بھی فیصلہ ہوجائے گا مصدقہ ذرائع کے مطابق نئی سیاسی پارٹی کے قیام میں سرفہرست سابق گورنر ڈاکٹر عشرت العباد خان ہیں جن کی اپنے طویل گونرر شپ کے دور میں کراچی کے مسائل پر خاصی مضبوط گرفت رہی ہے ان کی سیاسی و عوامی حلقوں سمیت تاجر برادری صنعت کاروں کے حلقوں میں بہت زیادہ اہمیت رہی ہے۔ دوسری جانب ایم کیوایم کے سابق چیئرمین سلیم شہزاد کی ایک دو روز میں کراچی آمد متوقع ہے۔ وہ لندن قیادت سے ناراض اور طویل عرصے سے خاموشی اختیار کئے ہوئے ہیں۔ ان کی کراچی آمد کو موجودہ سیاسی صورتحال میں سیاسی حلقے اہم قرار دے رہے ہیں۔ دبئی میں زیر حراست ایم کیوایم تنظیمی کمیٹی کے سابق انچارج حماد صدیقی کو پاکستان لانے کی کوششیں تیز کر دی گئی ہیں۔ جو سانحہ بلدیہ ٹاﺅن فیکٹری سمیت 12مئی کے ہائی پروفائل مقدمات کا اہم کردار ہے، اس میں وکیلوں کو زندہ جلانے کے مقدمات بھی شامل ہیں، حماد صدیقی نے ایم کیوایم اور پاکستان قیادت کے ملوث ہونے کے بعد ثبوت اور اعترافی بیانات دے دیئے ہیں۔ جس کی وجہ سے ایم کیوایم پاکستان اور پاک سرزمین کی قیادت سنگین پریشانیوں کا شکار نظر آتی ہے کراچی کی سیاست میں آنے والے چند دنوں میں اہم فیصلے متوقع ہیں۔