لندن: (ویب ڈیسک) بادشاہ چارلس سوئم کی 6 مئی کو تاج پوشی کیلئے دعوت نامے چھپ گئے، تاج پوشی کی تقریب میں 2 ہزار مہمانوں کو مدعو کیا جائے گا۔
شاہی محل کی جانب سے برطانوی بادشاہ کی تاج پوشی کے دعوت نامے کا آرٹ ورک جاری کر دیا گیا ہے، اینڈریو جیمیسن نے ڈیزائن کردہ ری سائیکل کارڈز پر پانی کے رنگوں کا خوبصورت استعمال کیا ہے، دعوت نامے میں برطانوی لوک داستانوں کی قدیم شخصیت سمیت پھولوں کو شامل کیا گیا ہے۔
بادشاہ چارلس کی تاج پوشی 6 مئی کو ویسٹ منسٹر ایبے میں ہوگی، یہ وہ جگہ ہے جہاں پچھلے ایک ہزار برس سے انگریزی اور برطانوی بادشاہوں کی تاج پوشی کی جاتی رہی ہے۔

ریاض : (ویب ڈیسک) سعودی عرب نے اسرائیلی فوج کی جانب سے مسجد اقصیٰ پر حملے، نمازیوں کو زخمی کرنے اور متعدد کو گرفتار کرنے کی مذمت کی ہے۔
سعودی عرب کے سرکاری خبر رساں ادارے کی رپورٹ کے مطابق وزارت خارجہ کی جانب سے جاری بیان میں سعودی عرب نے مسجد اقصیٰ کے احاطے میں اسرائیل کے نمازیوں پر حملے کی مذمت کرتے ہوئے اسے مسترد کیا ہے۔
بیان میں کہا گیا ہے کہ ایسا طرز عمل امن کی کوششوں کو نقصان پہنچانے کے ساتھ ساتھ قبضے کو ختم کرنے اور مسٔلہ فلسطین کے منصفانہ اور جامع حل تک پہنچنے کے لیے تمام کوششوں کی حمایت میں اس کے مضبوط موقف کی تصدیق کرتا ہے۔
یہ حملہ رمضان کے مقدس مہینے میں کیا گیا جو اسلام میں روحانیت اور عبادات کا اہم وقت ہے۔
بیان میں مزید کہا گیا ہے کہ اس طرح کے اقدامات مقدس مذہبی مقامات کے احترام کے حوالے سے بین الاقوامی اصولوں اور ضابطوں کی خلاف ورزی ہیں۔
فلسطینی گروپوں نے بھی نمازیوں پر اسرائیل کے حملوں کی مذمت کرتے ہوئے اسے جرم قرار دیا ہے ، علاوہ ازیں سعودی عرب کے ساتھ ساتھ اردن اور مصر نے بھی اس واقعے کی شدید الفاظ میں مذمت کی ہے۔
واضح رہے کہ اسرائیلی پولیس نے منگل اور بدھ کی درمیانی شب مقبوضہ بیت المقدس میں واقع مسلمانوں کے تیسرے مقدس ترین مقام مسجد اقصیٰ میں دھاوا بول کر درجنوں نمازیوں کو زخمی کر دیا ہے، جبکہ 350 سے زائد کو گرفتار بھی کرلیا۔

تہران : (ویب ڈیسک) ایران نے متحدہ عرب امارات کے لیے 8 سال بعد اپنا نیا سفیر مقرر کردیا۔
ایران نے سینئر سفارتکار رضا امیری کو سفیر نامزد کیا ہے جو 8 سال بعد متحدہ عرب امارات میں ایران کےسفیر کے طور پر تعینات ہوں گے۔
واضح رہےکہ ایران اورسعودی عرب نے اپنے سفارتی تعلقات بحال کرنے کا فیصلہ کیا ہے جس کے بعد سعودی فرماں روا شاہ سلمان نے ایرانی صدر کو سعودی عرب کے دورے کی دعوت بھی دی ہے۔
خیال رہے کہ 2016 میں، متحدہ عرب امارات نے ایران کے ساتھ اپنے تعلقات ختم کرلیے تھے ۔

نیودہلی : (ویب ڈیسک) بھارتی ہمالین ریاست سکم میں برفانی تودہ گرنے سے 7 افراد ہلاک ہوگئے۔
میڈیا رپورٹس کے مطابق بھارت کے شمال مشرق میں ریاست سکم کے ناتھولا ماؤنٹین پاس پر مقامی وقت کے مطابق 12:20 پر برفانی تودہ گرا۔
برفانی تودہ گرنے سے سیاحوں کی متعدد گاڑیاں برفانی تودے کی زد میں آگئیں، امدادی کارروائیوں کے دوران برفانی تودے تلے دبنے والے 20 افراد کو بچا لیا گیاہے اور مقامی ہسپتالوں میں منتقل کر دیا گیا۔
زندہ بچ جانے والے افراد میں سے 8 کی حالت تشویشناک بتائی جارہی ہے ، امدادی ٹیموں کی جانب سے تلاش اور بچاؤ کی کوششیں جاری ہیں کیونکہ برفانی تودے کے نیچے اب بھی زندہ بچ جانے کا امکان موجود ہے۔
بھارتی حکام کا کہنا ہے کہ اپریل میں اس علاقے میں برفانی تودہ گرنا غیر معمولی ہے جبکہ ایک روز پہلے تک یہاں غیر موسمی بارشیں بھی ہوتی رہی ہیں۔
گزشتہ دو سالوں کے دوران بھارتی ہمالیہ میں برفانی تودے گرنے کے واقعات میں کم از کم 120 افراد ہلاک ہو چکے ہیں۔
واضح رہے کہ چین کے ساتھ ملحقہ ہندوستان کی سرحد پر واقع یہ ماؤنٹین پاس اپنے مناظر کی وجہ سے مشہور سیاحتی مقامات میں سے ایک ہے۔

اسلام آباد: (ویب ڈیسک) ہندوتوا انتہا پسندوں نے مودی سرکار کی خاطر مسجد پر حملہ کر کے ایک اور سیاہ باب رقم کر دیا، بھارت میں اقلیتوں کا رہنا ہمیشہ سے محال رہا ہے، اب مودی کی بہیمانہ مسلم دشمنی نے بھارت کو جہنم بنا دیا ہے۔
ہندوتوا انتہا پسندوں نے جھارکھنڈ میں ہزاری باغ کی جامع مسجد پر دھاوا بول دیا، ہندو، مسلم اور ہندو، سکھ فسادات پہلے ہی پورے بھارت کو اپنی لپیٹ میں لے چکے ہیں، ہندوتوا انتہا پسندوں نے جامع مسجد کے دروازے کو توڑتے ہوئے مسلمانوں کے خلاف شدید نعرے بازی کی۔
مسلم دشمنی نے مودی سرکار کو اتنا اندھا کر دیا ہے کہ وہ مسلمانوں کے مقدسات اور ان کے بنیادی حقوق کو بھی فراموش کر رہی ہے، سوال یہ ہے کہ کیا اقوام متحدہ مودی کی اس بے حسی کا نوٹس لے گی؟، کیا مودی کے مسلمانوں اور سکھوں پر ظلم و زیادتی سے بھارت کے ٹکڑوں میں تقسیم ہونے کی راہ ہموار ہو رہی ہے؟۔

فلوریڈا : (ویب ڈیسک) امریکا کے سابق صدر ڈونلڈ ٹرمپ نے کہا ہے کہ مجھ پر بے بنیاد الزامات لگائے گئے ہیں اور میرے خلاف عدالتی کارروائی انتخابی عمل میں مداخلت ہے۔
غیر ملکی خبر رساں ادارے کے مطابق عدالت سے واپسی کے بعد فلوریڈا میں ایک ریلی کے دوران اپنے حامیوں سے خطاب کرتے ہوئے سابق امریکی صدر نے کہا کہ میرے خلاف جعلی کیس 2024 کے الیکشن کے سلسلے میں سامنے لایا گیا، میرا واحد جرم یہ ہے کہ میں نے اپنی قوم کا ان لوگوں سے بلا خوف و خطرہ دفاع کیا جو اسے تباہ کرنا چاہتے ہیں۔
ٹرمپ کا کہنا تھا کہ ساڑھے 7 کروڑ ووٹ لینے والے امریکی صدر پر فرد جرم عائد کی جا رہی ہے، میں نے کبھی نہیں سوچا تھا کہ امریکا میں ایسا ہو سکتا ہے ،ہمارا ملک جہنم میں جا رہا ہے، دنیا پہلے ہی بہت سی دوسری وجوہات کی بنا پر ہم پر ہنس رہی ہے۔
انہوں نے کہا کہ امریکا بدنظمی کا شکار ہوچکا ہے، معیشت تباہ ہو رہی ہے، افراط زر قابو سے باہر ہو رہا ہے، روس نے صدر بائیڈن کے دور اقتدار میں چین سے اور سعودی عرب نے ایران سے شراکت کر لی ہے، اگر وہ امریکا کے صدر ہوتے تو ایسا کبھی نہ ہوتا۔
انہوں نے فرد جرم عائد کرنے والے جج کو متعصب جبکہ نیویارک کے ڈسٹرکٹ اٹارنی کو مجرم قرار دیتے ہوئے کہا کہ جج ٹرمپ سے نفرت کرنے والا ہے اور ڈسٹرکٹ اٹارنی براگ کو مستعفی ہوناچاہیے ، ان کےخلاف کارروائی کی جانی چاہیے۔
یاد رہے کہ ڈونلڈ ٹرمپ پر 2016 کی انتخابی مہم کے فنڈز کا غلط استعمال اور بزنس ریکارڈز میں کرپشن کرنے کے الزامات پر فرد جرم عائد کی گئی ہے جس میں سے 34 الزامات کو سابق صدر نے مسترد کردیا ہے۔

یروشلم : (ویب ڈیسک) اسرائیلی پولیس نے مسجد الاقصیٰ کے احاطے میں درجنوں نمازیوں پر حملہ کردیا جس کے نتیجے میں متعدد افراد زخمی ہوئے ہیں۔
غیر ملکی خبر رساں ادارے کے مطابق عینی شاہدین نے بتایا کہ اسرائیلی پولیس نے آج طلوع آفتاب سے قبل مسجد الاقصیٰ میں نمازیوں پر حملہ کیا جس کے نتیجے میں 7 افراد زخمی ہوئے ہیں جبکہ اسرائیلی سپاہیوں کا کہنا تھا کہ یہ فسادات کا جواب ہے۔
فلسطینی ہلال احمر نے حملے کے نتیجے میں زخمیوں کی اطلاع دی لیکن یہ نہیں بتایا کہ کتنے لوگ زخمی ہوئے ہیں، اپنے ایک بیان میں فلسطینی ہلال احمر نے کہا کہ اسرائیلی فورسز ہمارے ڈاکٹروں کو الاقصیٰ پہنچنے سے روک رہی ہیں۔
ایک بزرگ خاتون نے خبر رساں ادارے کو بتایا کہ میں ایک کرسی پر بیٹھی قرآن کی تلاوت کر رہی تھی کہ یہودی پولیس اہلکاروں نے سٹن گرینیڈ پھینکنے شروع کر دیئے اور ان میں ایک میرے سینے پر بھی لگا، خاتون کو سانس لینے میں دشواری پیش آرہی تھی۔
فلسطینی گروپوں نے نمازیوں پر تازہ ترین حملوں کی مذمت کی اوراسے جرم قرار دیا ہے۔
اردن نے اسرائیل کی طرف سے کمپاؤنڈ پر پرتشدد طوفان کی مذمت کی جبکہ مصر کی وزارت خارجہ نے بھی الاقصیٰ کے عبادت گزاروں پر اسرائیل کی جانب سے حملے کی مذمت کرتے ہوئے اسے فوری طور پر روکنے کا مطالبہ کیا ہے۔
دوسری جانب حماس نے تازہ حملے کی مذمت کرتے ہوئے اسے بے مثال جرم قرار دیا اور مغربی کنارے میں فلسطینیوں سے مسجد اقصیٰ پہنچنے کی اپیل کی جس کے بعد فلسطینی خواتین اور بچوں سمیت شہریوں کی بڑی تعداد مسجد الاقصیٰ پہنچ گئی۔
فلسطینی مسجد الاقصیٰ کو ان چند قومی علامتوں میں سے ایک کے طور پر دیکھتے ہیں جن پر ان کا کنٹرول کا کچھ عنصر برقرار ہے، تاہم، وہ یہودی گروہوں کی طرف سے آہستہ آہستہ تجاوزات سے خوفزدہ ہیں جیسا کہ ہیبرون میں ابراہیمی مسجد میں ہوا ہے، جہاں 1967 کے بعد مسجد کا نصف حصہ عبادت گاہ میں تبدیل ہو گیا تھا۔
فلسطینی انتہائی دائیں بازو کی اسرائیلی تحریکوں سے بھی پریشان ہیں جو مسجد الاقصیٰ کے احاطے میں موجود اسلامی ڈھانچے کو منہدم کر کے ان کی جگہ یہودی مندر بنانا چاہتے ہیں۔