طورخم : (ویب ڈیسک) طورخم میں پہاڑی تودہ گرنے کے 5 روز بعد ریسکیو آپریشن مکمل کرلیا گیا۔طورخم میں ہونے والی لینڈ سلائیڈنگ کے ملبے سے 8 لاشیں اور 12 زخمی افراد نکال لیے گئے جب کہ ملبے سے 27 ٹرک اور کنٹینرز کو نکال کر ایک مشکل مشن کو مکمل کیا گیا۔
فوج، ایف سی ، 1122 اور سول انتظامیہ نے مل کر ریسکیو آپریشن مکمل کیا۔
متاثرہ افراد اور خاندانوں نے ریسکیو کوششوں پر پاک فوج سے اظہار تشکر کیا ہے۔

کندھ کوٹ : (ویب ڈیسک) کندھ کوٹ میں ڈاکو اوگاہی اسٹاپ پر انڈس ہائی وے سے 6 افراد کو اغوا کر کے کچے کی طرف فرار ہوگئے۔
پولیس کا دعویٰ ہے کہ کچے کے علاقے میں ڈاکوؤں کے ساتھ مقابلہ جاری ہے، جلد ہی مغویوں کو بازیاب کرا لیا جائے گا۔واضح رہے کہ گذشتہ روز بھی کندھ کوٹ میں لیسوڑو چیک پوسٹ پر ڈاکوؤں نے حملہ کردیا پولیس کے مطابق ڈاکوؤں نے پولیس اہلکاروں کو یرغمال بنایا اور ایک پولیس اہلکار کو اغوا کرلیا جبکہ ڈاکو 5 اہلکاروں سے اسلحہ لوٹ کر فرار ہوگئے تھے۔

لاہور : (ویب ڈیسک) پاکستان تحریک انصاف کے چیئرمین عمران خان نے کہا ہے ساڑھے تین سال حکومت میں رہا لیکن طاقت باجوہ کے پاس تھی، جنرل ریٹائرڈ باجوہ نے ہمیں انصاف قائم نہیں کرنے دیا۔
زمان پارک میں کارکنان سے خطاب کرتے ہوئے انہوں نے کہا کہ نامعلوم افراد آکر لوگوں کو اٹھاتے ہیں کوئی پوچھنے والا نہیں، ہمارے لوگوں کو پکڑ پکڑ کر جیلوں میں ڈالتے ہیں، جو کچھ علی امین کے ساتھ کیا گیا آزاد معاشروں میں یہ نہیں ہوتا۔
انہوں نے الزام لگایا کہ جو لوگ انہیں قتل کرنے کی کوشش کررہے ہیں وہ حکومت میں بیٹھے ہیں، سکیورٹی کی وجہ سے احتیاط کر رہا ہوں ورنہ آج عوام کے درمیان ہوتا۔

تونسہ شریف: (ویب ڈیسک) تونسہ شریف میں عید پر پکنک منانے جانے والے 4 افراد تالاب کے پانی میں ڈوب کرجاں بحق ہو گئے۔
ریسکیو حکام کے مطابق ریسکیو آپریشن کے دوران چاروں افراد کی لاشیں نکال لی گئی ہیں۔
دوسری جانب پشاور موٹر وے ٹول پلازہ کے قریب سوئمنگ پول میں ڈوب کر نوجوان جاں بحق ہو گیا۔
ریسکیو غوطہ خور ٹیم نے نوجوان کی لاش کو سوئمنگ پول سے نکال لیا۔

لاہور : (ویب ڈیسک) مسلم لیگ ن کی چیف آرگنائزر مریم نواز نے کہا ہے کہ جہاں فیصلے آئین وقانون نہیں بیگمات ،ساسوں کی پسندناپسند پر ہوں وہاں فتنہ اور انتشار ہوگا۔
اپنے بیان میں ان کا کہنا تھا کہ ایسے فیصلوں سے تعمیر و ترقی صرف خواب رہے گی،پہلے بھی کہا تھا یہ عدلیہ ہے جوائے لینڈ نہیں۔

لاہور : (ویب ڈیسک) پیپلز پارٹی کے رہنما نثار کھوڑو کا کہنا ہے کہ پیپلزپارٹی ملک بھر میں ایک دن پر انتخابات کرانے کیلئے 25 اپریل کواحتجاج کرے گی۔
ان کا کہنا تھا کہ پیپلزپارٹی منگل کے روز سندھ کے تمام ضلعی ہیڈکوارٹرز میں احتجاج ریکارڈ کرائے گی۔
ان کاکہنا تھا کہ سندھ کو ون ڈے پول کے علاوہ الگ الگ انتخابات کا فیصلہ قبول نہیں، الیکشن ایکٹ کی شق 69 کے تحت ملک بھر میں انتخابات ایک روز کروائے جائیں۔
نثار کھوڑو کا کہنا تھاکہ الگ الگ انتخابات ملک کو 2حصوں میں تقسیم کرنے کے مترداف ہوگا، کوئی عدالت عمران خان کے سازشی عزائم میں آلہ کار مت بنے۔
سندھ نے پاکستان بنایا اور اب ملک کو 2 حصوں میں تقسیم نہیں ہونے دے گی،انتخابات کرانا الیکشن کمیشن کا اختیار ہے، الیکشن کا فیصلہ الیکشن کمیشن کو کرنے دیا جائے،ان کا کہناتھا کہ الیکشن کمیشن کے اختیارات میں مداخلت انتخابات کو دھاندلی زدہ بنانے کی کوشش ہوگی۔

ڈیرہ اسماعیل خان: (ویب ڈیسک) ڈیرہ اسماعیل خان میں میڈیاسے گفتگو کرتے ہوئے مولانا فضل الرحمان نے کہاکہ پی ٹی آئی سے مذاکرات نہ کرنے کے موقف پر قائم ہیں۔
ان کا کہنا تھاکہ کیوں جھکیں اور کس کے سامنے جھکیں؟ انہوں نے کہا کہ میں اپنی پریس کانفرنس کی حرف بہ حرف گفتگو پر قائم ہوں۔
انہوں نے کہا کہ ہم اس وقت عمران خان سے مذاکرات کے فلسفے اور دلیل کو نہیں مانتے،ملک کو جس نے دیوالیہ کیا اس سے مذاکرات کس لئے کریں۔

ملتان : (ویب ڈیسک) ملتان آر پی او سہیل چودھری پولیس کی فائرنگ سے 2نوجوانوں کے جاں بحق ہونے کا نوٹس لے لیا۔
ان کا کہناتھا کہ مقدمہ درج کر کے ملزمان کی گرفتاری کیلئے چھاپے مارے جا رہے ہیں، آر پی او اپنے بیان میں جاں بحق ہونے والے نوجوانوں کے والدین سے تعزیت کا اظہار کیا۔
آر پی او کا کہنا تھا کہ یہ پولیس ملازمین کا ذاتی فعل تھا جس کا سخت حساب لیا جائے گا۔
دوسری جانب نگران وزیراعلیٰ محسن نقوی نے بھی ملتان فائرنگ واقعہ کا نوٹس لے لیاہے۔انہوں نے رپورٹ طلب کرتے ہوئے کہاکہ افسوسناک واقعہ کی مکمل تحقیقات کرکے ذمہ داروں کا تعین کیا جائے۔
نگران وزیراعلیٰ محسن نقوی نے ہر قیمت پر انصاف ہونے کا یقین دلایا او ر لواحقین سے تعزیت بھی کی۔

لاہور : (ویب ڈیسک) تحریک انصاف نے کل سے الیکشن مہم شروع کرنے کا اعلان کر دیا ہے۔
جنرل سیکرٹری تحریک انصاف اسد عمر نے اپنے ٹوئٹ میں کہا کہ کل سے انشاء اللہ پنجاب کے تمام حلقوں میں تحریک انصاف الیکشن مہم کا باقاعدہ آغاز کر دے گی۔
پی ٹی آئی رہنما کا کہنا تھا کہ یہ تیار ہوں نہ ہوں، ہم تیار ہیں۔

لاہور : (ویب ڈیسک) وزیراعظم شہباز شریف نے گزشتہ روز کوٹ لکھپت جیل کے دورے کے موقع پر کہا کہ مفاد عامہ کے علاوہ سوموٹو کا اور کوئی مقصد بن نہیں سکتا، آئین اور قانون اس کی اجازت نہیں دیتا۔
وزیراعظم نے قیدیوں سے ملاقات کے دوران ان کو دی جانے والی سہولیات سے متعلق سوالات کئے، انہوں نے جیل میں صفائی ستھرائی سمیت دیگر امور کا معائنہ کیا۔
انہوں نے جیل کے ہسپتال کا بھی وزٹ کا اور مختلف وارڈز میں جا کر مریضوں سے خیریت دریافت کی۔
وزیراعظم کو جیل سپرٹنڈنٹ نے بریفنگ کی جس کے دوران انہوں نے کہا کہ مجھے بتائیں جیل میں کن چیزوں کی ضرورت ہے۔
ان کا مزید کہنا تھا کہ مجھے پتہ ہے جیل میں عید گزارنے کے کیا معنی ہیں، میں اس جیل میں 6 ماہ رہا۔ اپنوں سے دوری کیا ہوتی ہے، مجھے اس کا احساس ہے۔
وزیراعظم نے جیل میں قید خواتین سے ان کے مسائل بھی سنے۔
وزیراعظم کاکہنا تھاکہ میں لوئر کورٹس اور اعلیٰ عدالتوں سے بھی التماس کرتا ہوں کہ ان کیسز میں آپ نے کتنے سوموٹو لئے، جیل خانہ جات سے آپ نے کبھی پوچھا کہ آپ کے پاس کتنے قیدی ہیں، سوموٹو کا بنیادی مقصد کسی ایک کا مفاد نہیں بلکہ مفاد عامہ ہونا چاہیے۔
وزیراعظم کاکہناتھا کہ مفاد عامہ کے علاوہ سوموٹو کا اور کوئی مقصد نہیں ہو سکتا، آئین اور قانون اس کی اجازت نہیں دیتا، جیلوں میں دورے پر آنے والے جوڈیشل آفیسرز اور حکومت کا فرض ہے کہ ان قیدیوں کی مددکی جائے۔