پشاور: صوبہ خیبر پختونخوا میں بارشیں مسلسل جاری ہیں، جس کی وجہ سے گندم کی فصلیں بری طرح متاثر ہوئی ہیں۔

صوبائی دارالحکومت پشاور، مردان، چارسدہ، نوشہرہ، صوابی، ملاکنڈ اور دیگر اضلاع میں بارشوں کا سلسلہ جاری ہے۔ نہروں اور دریاؤں میں پانی کی سطح بھی ساتھ ساتھ بلند ہو رہی ہے۔

دریں اثنا بالائی اضلاع میں لینڈ سلائیڈنگ کے پیش نظر پی ڈی ایم اے نے ضلعی انتظامیہ کو بروقت اقدامات کرنے کی ہدایات جاری کر دی ہیں۔

واضح رہے کہ محکمہ موسمیات نے خیبر پختونخوا میں 29 اپریل تک وقفے وقفے سے بارشیں جاری رہنے کا امکان ظاہر کیا ہے۔

اپوزیشن لیڈر عمرایوب نے کہا ہے کہ پورے پاکستان میں ہمارے خلاف بے بنیاد مقدمات بنائے گئے۔

اسلام آباد جوڈیشل کمپلیکس میں میڈیا سے گفتگو میں عمرایوب نے کہا کہ پی ٹی آئی اپنی حق و سچ کی جدوجہد جاری رکھے گی۔

انھوں نے کہا کہ جوڈیشل کمپلیکس توڑ پوڑ ایک سوچی سمجھی سازش تھی، سی سی ٹی وی فوٹیج غائب کردی گئی۔

ان کا کہنا تھا کہ اگر فوٹیج سامنے آئے تو دودھ کا دودھ اور پانی کا پانی ہو جائے گا۔

وزیراعظم شہباز شریف آج سعودی عرب روانہ ہوں گے۔

دورہ سعودی عرب کے دوران شہباز شریف 28 سے 29 اپریل کو ریاض میں عالمی اقتصادی فورم میں شرکت کریں گے۔

وزیر اعظم کی سعودی ولی عہد محمد بن سلمان سے ملاقات بھی ہوگی۔ سرمایہ کاری اور ولی عہد کے دورہ پاکستان پر تبادلہ خیال ہوگا۔

شہباز شریف کی آئی ایم ایف کی سربراہ کرسٹالینا جارجیوا سے بھی ملاقات متوقع ہے، ملاقات میں نئی اقتصادی پیکیج پر تبادلہ خیال ہوگا۔

وزیراعظم کی بل گیٹس سے ملاقات کا بھی امکان ہے، وزیر خارجہ اسحاق ڈار اور دیگر حکام بھی ہمراہ ہوں گے۔

کراچی میں قانون نافذ کرنے والے ادارے اور پولیس نے مشترکہ کارروائی کرتے ہوئے ایرانی ڈیزل کے گودام پر چھاپہ مارا اور 2 کروڑ 50 لاکھ مالیت کا ڈیزل ضبط کرلیا۔

انٹیلی جنس بیسڈ آپریشن نارتھ ناظم آباد میں کیا گیا، اس دوران ایرانی ڈیزل کے گودام سے 30 ملین روپے کی اشیاء ضبط کرلی گئیں۔

سیکیورٹی ادارے اور پولیس کی کارروئی کے دوران 3 منی ٹرک اور 10 لوڈ پک اپ گاڑیاں بھی ضبط کی گئیں۔

محکمہ وائلڈ لائف پنجاب کی کاوش سے تھائی لینڈ سےغیر قانونی طور پر درآمد کیے گئے نایاب کچھوے تحویل میں لے لیے۔

محکمہ وائلڈ لائف کے مطابق کچھوے کی درآمد کرنا غیر قانونی ہے۔ وائلڈ لائف پنجاب کو 200 کچھوے تھائی لینڈ سے پاکستان لانےکی خفیہ اطلاع موصول ہوئی تھی۔

وائلڈ لائف نے کسٹم حکام کو نایاب کچھوے درآمد کرنے کی اطلاع دی۔ جس کے بعد 15 کاٹنز میں ڈبل پیکنگ میں چھپا کر لائے کچھوے پکڑے گئے۔

حکام نے بتایا کہ کچھووں کو 100 کی پیکنگ بنا کر علیحدہ علیحدہ چھپایا گیا تھا۔

درآمد کرنے والے شخص سید اعزاز احمد کو بھی لاہور ائیر پورٹ پر بلایا گیا۔

اسلام آباد: سینیٹر فیصل واوڈا نے کہا ہے کہ وزیر اعظم اپنے بھائی سے احتساب شروع کریں،عمران خان کچھ لوگوں کے بہکاوے میں تھے۔

بندوق کا ٹریگر ان سے چلوایا گیا۔ ایک نجی ٹی وی سے گفتگو میں انہوں نے کہا کہ اگر کوئی کسی کو تنقید کا نشانہ بنا رہا ہے تو ہر کسی کو جواب نہیں دیا جاتا، سوشل میڈیا پر منفی اور مثبت دونوں پہلو نمایاں ہیں۔ منفی افراد بڑے باپ کی بگڑی ہوئی اولاد ہیں یا پھر گھر داماد ہیں، ان کے پاس نوکریا ں نہیں ،اس لیے وہ اس قسم کے کاموں میں ملوث ہیں، دھرنوں سے ملکی سالمیت کو نقصان پہنچ رہا ہے تو اس کا حل ڈھونڈیں۔ چاہے پیار سے یا قانونی طور پر ڈھونڈیں، احتساب کا وہ دن بڑا قریب ہے جس میں سیاہ یا سفید نہیں دیکھا جائے گا۔

جب تک انصاف کا نظام ٹھیک نہیں ہو گا، ملک میں کچھ بھی بہتر نہیں ہو سکے گا، حکومت نے روٹی سستی کی۔ عدالت نے حکم امتناعی دے دیا کہ روٹی سستی نہیں مل سکتی، روٹی مہنگی کرنے پرسٹے نہیں دیاگیا تھا، ہم قانون بنانےوالے ہیں توعمل بھی ہم ہی کرائیں گے، عدالتی نظام کوٹھیک کرنے کی ضرورت ہے،2018 کے رجیم چینج کے بعد عمران خان کو دو ججوں کے فون آئے اور کیس واپس لینے کی یقین دہانی کرائی گئی۔ 9 مئی کواملاک جلانے پرقانون بدلنا پڑاتوبدلیں گے، میڈیا امین گنڈاپورکوبہت زیادہ اہمیت دے رہاہے،گنڈا پور کا دماغ ، زبان اور دل ایک دوسرے کا ساتھ نہیں دے رہے، عمران خان جیل میں ہیں اور ہرکوئی ان کی مقبولیت کافائدہ اٹھاناچاہتا ہے۔

پی ٹی آئی کے تمام رہنما دائیں بائیں سے رابطے میں ہیں،خدا کرے کہ وہ دن نہ آئے کہ انہیں سب کچھ سامنے لانا پڑے ۔کسی دن دماغ پھرا تو وہ سب کو بے نقاب کروں گا،بعض لوگ چاہتے ہیں کہ عمران خان جیل کے اندرہی رہیں اور ہم ان کی مقبولیت کا مزہ لیں،محسن نقوی قابل آدمی ہیں۔ انسان کچھ نہیں ہوتا کرسی ہوتی ہے جو آپ کو اختیار دیتی ہے، جب رانا ثناءاللہ جیل میں تھے اور میں وزیر تھا تو میں نے ان پر بوگس کیس کی مخالفت کی تھی۔ کہ وہ بوگس کیس ہے،فواد چودھری اور میں نے کابینہ میں مخالفت کی تھی ، عمران خان اس کیس پر پریشان تھے اور ہماری باتوں سے متفق تھے،راناثناءاللہ نے میراشکریہ بھی اداکیا۔

صدر آصف زرداری سے کئی ملاقاتیں ہوئی ہیں،وہ میرے بڑے ہیں، میرا کسی جماعت سے تعلق نہیں، میں نے تحریری طور پر لکھ کر دیا ہے کہ میں کسی پارٹی کا نہیں،آزاد سینیٹرہوں،اپنے حق میں دستبردارہونے والوں کا بھی شکرگزارہوں، ڈیڑھ دوسال میں کابینہ میں تبدیلیاں نظرآرہی ہیں، عارف حبیب نے کسی جماعت کی حمایت نہیں کی لیکن وہ ہمیشہ اچھے مشورے دیتے ہیں، 9مئی میں جوملوث ہے اس کی بخشش نہیں ہوسکتی۔ پارٹی کے لوگوں نے عمران خان کو مروایا ہے،وہ کچھ لوگوں کے بہکاوے میں تھے۔ بندوق کا ٹریگر خان صاحب سے چلوایا گیا۔

میں نے خان صاحب کو کہا تھا کہ آپ پر گولیاں چلیں گی اور یہی وجہ ہے کہ خان صاحب کو بعد میں اس بات کا احساس ہوا،آرمی چیف پاکستان اورعوام کی بات کرتے ہیں۔ جہاں عوام کو ضرورت ہوتی ہے فوج وہاں موجود ہوتی ہے۔ پاک افواج کی قربانیوں کامذاق ناقابل برداشت ہے۔ منفی پرپیگنڈا کے حوالے سے انہوں نے کہا کہ منفی پروپیگنڈا ماردھاڑ اورجلاؤگھیراؤکاہے۔