اسلام آباد: (ویب ڈیسک) وزیراعظم شہبازشریف نے پنجاب کے نگران سیٹ اپ اور امیدواروں کو ٹکٹیں دینے کے حوالے سے مشاورتی اجلاس طلب کرلیا۔
وزیراعظم شہبازشریف گزشتہ آٹھ روز سے لاہور میں قیام پذیر ہیں اور انہوں نے اب موجودہ موجودہ سیاسی صورتحال پر مشاورتی اجلاس طلب کر لیا ہے۔
اجلاس میں وزیراعظم کے بیٹے سلیمان شہباز بھی شرکت کریں گے، جب کہ وفاقی وزیر خواجہ سعد رفیق سمیت دیگر پارٹی رہنما بھی اجلاس کا حصہ ہوں گے۔
اجلاس میں ملکی سیاسی ومعاشی صورتحال پرتبادلہ خیال کیا جائے گا، جب کہ پنجاب کے نگران سیٹ اپ اورامیدواروں کو ٹکٹوں دینے کے حوالے سے بھی مشاورت ہو گی۔

کراچی : (ویب ڈیسک) امیر جماعت اسلامی حافظ نعیم الرحمن کا کہنا ہے کہ جماعت اسلامی کی اس وقت یہ پوزیشن ہے کہ ہم اپنا میئر بنائیں گے، کراچی شہر کی خدمت کیلئے تیار ہیں ۔
میئر کراچی کے معاملے پر بات چیت کے لیے جماعت اسلامی کے وفد نے پی ٹی آئی سیکرٹریٹ میں علی زیدی سمیت دیگر پارٹی رہنماؤں سے ملاقات کی۔
ملاقات کے بعد حافظ نعیم الرحمان نے علی زیدی کے ہمراہ میڈیا سے گفتگو کرتے ہوئے کہا کہ بڑی تعداد میں لوگوں نے ہمیں ووٹ دیا، حلقہ بندیوں پر ہمیں بھی تحفظات تھے، اگر جائز طریقے سے پیپلز پارٹی بھی جیتےتو ہمیں کیا اعتراض ہوسکتا ہے۔
حافظ نعیم الرحمان نے کہا کہ ہم سب کے مینڈیٹ کا احترام کریں گے لیکن اس کے لئے کم از کم جائز ہونا ضروری ہے ، اس شہر کے مینڈیٹ کا تحفظ کرنا سب سیاسی پارٹیوں کی ذمہ داری ہے، شہریوں کا فرض ہے ہمارا ساتھ دیں اور ہمارا فرض ہے شہریوں کے ڈالے گئے ایک ایک ووٹ کی حفاظت کریں۔
انہوں نے کہا کہ علی زیدی اور ان کی پوری ٹیم کا شکر ادا کرتا ہوں انہوں نے الیکشن کے بعد ہمارے لیے کلمہ خیر کہا اور ہمارے مینڈیٹ کو تسلیم کیا۔
اس موقع پر علی زیدی نے کہا کہ فارم 11 کے معاملے پر 4 رکنی مشترکہ کمیٹی بنانے پر اتفاق ہوا ہے، مشترکہ کمیٹی فارم 11 اور الیکشن سے متعلق دیگر معاملات کو دیکھے گی۔
ان کا کہنا تھا کہ کراچی میں جو بلدیاتی انتخابات کے نام پر جو ڈرامہ تھا سب نے دیکھا، الیکشن سے قبل ،الیکشن کے دوران اور بعد ہمارا آپس میں رابطہ تھا، زرداری مافیا نے جو ہم پر پلان اٹیک کروایا تھا حافظ نعیم بھائی نے اس کی مذمت کی۔
علی زیدی نے کہا کہ سیاست میں اختلاف رائے ہوتا ہے میری نظر میں اختلاف رائے برکت کا باعث ہوتا ہے، ہمارا جماعت اسلامی کے ساتھ بہت چیزوں میں اختلاف رائے رہا ہے، 4حلقوں کا رزلٹ تبدیل کیا گیا، ابھی 40کا خط لکھا ہوا ہے، اگلی بار وفاقی حکومت ہم بنائیں گے ، جو حالات ہیں ہم امید رکھتے ہیں وفاقی اور صوبائی حکومت بنائیں گے، ہم میئر کو اصل اختیارات دیں گے، ہم بتائیں گے میئر کے اختیارات ہوتے کیسے ہیں۔
میئرشپ کیلئے پیپلزپارٹی اور جماعت اسلامی رابطہ
اسی معاملے پر 19 جنوری کو سندھ کے وزیر سعید غنی کی قیادت میں پیپلز پارٹی کا وفد جماعتِ اسلامی کراچی کے دفتر ادارۂ نورِ حق میں حافظ نعیم الرحمٰن اور دیگر رہنماؤں سے ملاقات کر چکا ہے۔ ملاقات کے دوران بلدیاتی انتخابات اور میئر کراچی سمیت دیگر امور پر تبادلۂ خیال ہوا تھا۔

کراچی: (ویب ڈیسک) ہتک عزت کیس کی سماعت کے دوران پاکستان پیپلز پارٹی کے رہنما سعید غنی اور پاکستان تحریک انصاف کے رہنما حلیم عادل شیخ عدالت میں ایک دوسرے سے بغلگیر ہو گئے۔
سعید غنی کی جانب سے اپوزیشن لیڈر سندھ اسمبلی حلیم عادل شیخ کے خلاف ہتک عزت کیسز کی سماعت ایڈیشنل ڈسٹرکٹ اینڈ سیشن جج کی عدالت میں ہوئی، سعید غنی اور حلیم عادل شیخ اپنے اپنے وکلا کے ہمراہ عدالت میں پیش ہوئے۔
جج نے سعید غنی سے مکالمہ کرتے ہوئے پوچھا آپ نےحلیم عادل شیخ کےخلاف ہتک عزت کا کیس کیا ہے؟ کیا پیسے عزت سے بڑھ سکتے ہیں؟ آپس میں مل بیٹھ کر صلح کر لیں۔
سعید غنی کا کہنا تھا یہ معافی نامہ لکھ کر دیں تو کیس ختم کرنے کے لیے تیار ہوں، جس پر حلیم عادل شیخ کے وکیل نے کہا مل بیٹھ کر بات کے لیے تیار ہیں مگر معافی نامہ لکھ کر نہیں دیں گے۔
عدالت نے سعید غنی اور حلیم عادل کو ہدایت کی کہ دل بڑا کریں اور ایک دوسرے کو معاف کردیں، بعد ازاں سعید غنی نے کمرہ عدالت میں حلیم عادل شیخ کو گلے سے لگا لیا۔

کراچی : (ویب ڈیسک) کراچی کے میئر کے انتخاب کے معاملے پر پیپلزپارٹی نے ن لیگ سے رابطہ کیا ہے ۔
میئر کراچی کے انتخاب کیلئے پیپلزپارٹی نون لیگ کی حمایت حاصل کرنے کیلئے متحرک ہوگئی ، اس حوالے سے پیپلزپارٹی اور ن لیگ کے قائدین کی آج باضابطہ ملاقات ہوگی ، جس میں پیپلزپارٹی مسلم لیگ ن کی صوبائی قیادت سے میئر کراچی کے انتخاب کے لئے حمایت کرنے کی درخواست کرے گی۔
میئر کراچی کے انتخاب کے لئے پیپلزپارٹی اور ن لیگ میں اتحاد ہونے کے قوی امکان موجود ہیں ۔ بلدیاتی انتخابات میں مسلم لیگ ن نے 7 نشتوں پر کامیابی حاصل کی ہے ۔
اس سے قبل بلدیاتی انتخابات میں کامیابی کے بعد کراچی میں میئر بنانے کے سلسلے میں مذاکرات کیلئے پیپلز پارٹی کے وفد نے جماعت اسلامی سے بھی بات کی تھی ، پیپلز پارٹی کی جانب سے بلدیاتی انتخابات سمیت دیگر معاملات پر امیر جماعت اسلامی کراچی حافظ نعیم الرحمان کے ساتھ تبادلہ خیال کیا گیا اور ان کے تحفظات دور کرنے کی یقین دہانی بھی کروائی گئی۔

اسلام آباد: (ویب ڈیسک) الیکشن کمیشن آف پاکستان کو عام انتخابات کیلئے 18 ارب روپے موصول ہو گئے۔
ذرائع کے مطابق الیکشن کمیشن کو رقم پری الیکشن اخراجات کی مد میں فراہم کی گئی ہے، الیکشن کمیشن نے پنجاب اور خیبر پختونخوا انتخابات میں رقم استعمال کرنے کا فیصلہ کیا ہے۔
الیکشن کمیشن نے انتخابی اخراجات سے متعلق نیا تخمینہ بھجوانے کافیصلہ کیا ہے۔
ذرائع کا کہنا ہے کہ 2 اسمبلیوں میں الگ الیکشن کے باعث عام انتخابات پر اخراجات 10 ارب سے زائد بڑھ گئے، الیکشن کمیشن نے پہلے عام انتخابات پر47 ارب روپے کا تخمینہ بھجوایا تھا۔
ذرائع کا مزید کہنا ہے کہ 2 اسمبلیوں میں الگ انتخابات کے باعث اب اخراجات 57 ارب سے زائد ہو نگے۔

کراچی: (ویب ڈیسک) گورنر سندھ کامران ٹیسوری نے کہا ہے کہ کے الیکٹرک اپنا قبلہ درست کرے، کسی مافیا کو ہم برداشت نہیں کریں گے۔
گورنر سندھ نے چین کے قونصل جنرل کے ہمراہ پاک چائنا فرینڈ شپ پارک کا افتتاح کیا۔
اس موقع پر میڈیا سے گفتگو کرتے ہوئے کامران ٹیسوری کا کہنا تھا کراچی کو گرین اینڈ کلین بنانے کی پالیسی پر عمل پیرا ہیں، پارک کا مقصد دونوں ممالک کے درمیان دوستی کو مزید مستحکم کرنا ہے۔
ان کا کہنا تھا کراچی کے لوگ تفریح سے محروم ہو چکے تھے، شہر میں جہاں زمینوں پر قبضے تھے سب ختم کیے جا رہے ہیں، الہٰ دین پارک پر تجاوزات تھیں، واگزار کرا لیا گیا ہے، مافیاز کراچی سے اپنا بستر گول کر لیں۔
حالیہ بلدیاتی انتخابات سے متعلق پوچھے گئے سوال پر گورنر سندھ کا کہنا تھا بلدیاتی انتخابات میں ٹرن آؤٹ انتہائی کم رہا، جس طرح شہریوں کو پولنگ کے لیے نکلنا تھا وہ نہیں نکلے، بطور گورنر میرا سیاست میں کوئی کام نہیں ہے۔
انہوں نے مزید کہا کہ مافیا شہر قائد سے اپنا بستر گول کر لیں کیونکہ کراچی میں جہاں جہاں زمینوں پر قبضے ہیں سب ختم کرائے جا رہے ہیں۔
اس موقع پر چین کے قونصل جنرل کا کہنا تھا اس طرح کے منصوبے مستقبل میں کراچی کے لیے بہتر ثابت ہوں گے، پاکستان چین دوستی ایک مثالی دوستی ہے، ہماری دوستی مظبوط سے مظبوط تر ہوتی جا رہی ہے۔

راولپنڈی: (ویب ڈیسک) سربراہ پاکستان عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ سپیکر قومی اسمبلی نے تھوک کے بھاؤ استعفے منظور کر کے نیا سیاسی بحران پیدا کر دیا ہے۔
سماجی رابطے کی ویب سائٹ ٹوئٹر پر اپنے بیان میں شیخ رشید احمد کا کہنا تھا کہ حالات اتنے گھمبیر ہیں کہ اب سیاسی نہیں قومی سلامتی کا مسئلہ پیدا ہوگیا ہے، الیکشن کروانا ہوگا چوروں کو بھگانا ہوگا۔
سابق وزیر نے مزید کہا کہ پنجاب کے نگران وزیراعلیٰ کے لئے جو کھچڑی پکائی جا رہی ہے اور چلمن کے پیچھے جو گھناؤنا کھیل کھیلنے کی سازش ہو رہی ہے اس سے قوم آشنا ہے۔

حیدرآباد: (ویب ڈیسک) وزیر اطلاعات سندھ شرجیل انعام میمن کو سینے میں تکلیف کے باعث ہسپتال منتقل کر دیا گیا۔
وزیر اطلاعات شرجیل انعام میمن کو سینے میں تکلیف کے باعث نیشنل انسٹیٹیوٹ آف کارڈیو ویسکیولر ڈیزیزز (این آئی سی وی ڈی) حیدرآباد منتقل کیا گیا۔
ہسپتال ذرائع کے مطابق ہسپتال لانے پر شرجیل میمن کا طبی معائنہ کیا گیا تو معلوم ہوا کہ صوبائی وزیر کو دل کا دورہ پڑا ہے۔
ڈاکٹرز کا کہنا ہے کہ شرجیل انعام میمن کے دل کی 2 شریانیں بند تھیں، انجیو گرافی کے بعد انجیو پلاسٹی کر دی گئی ہے، 2 اسٹنٹ ڈالے گئے ہیں۔
ہسپتال انتظامیہ کا کہنا ہے کہ شرجیل میمن کی حالت اب پہلے سے بہتر ہے، انہیں 24 گھنٹوں بعد گھر منتقل کر دیا جائے گا۔

اسلام آباد: (ویب ڈیسک) پاکستان کی ساتویں مردم شماری پہلی مرتبہ کاغذ اور قلم کے استعمال کے بغیر جدید ٹیکنالوجی کے ساتھ ہوگی، ڈیجیٹل مردم شماری کے لئے ایک لاکھ 26 ہزار ٹیبلٹس عملے کو دے دیئے گئے، مردم شماری کا عمل یکم مارچ سے 30 اپریل تک مکمل کیا جائے گا۔
کس شہر اور صوبے کی کتنی آبادی، کتنے پڑھے لکھے اور کتنے ناخواندہ، کتنے بیروزگار، کتنے بے گھر اور کتنے وسائل درکار، اس سب کی گنتی کے لیے مردم شماری ہونا لازم لیکن مردم شماری کے عمل میں ہر بار کوئی رخنہ پڑتا اور التوا کا شکار ہوتی رہی، ساتویں مردم شماری بالآخر مارچ میں شروع ہوگی اور اس بار قلم کاغذ کے بجائے ٹیکنالوجی کا استعمال ہوگا ،ہر گھر کا ایک فرد اپنے موبائل فون نمبر سے پورے گھرانے کا اندراج کروائے گا، ادراہ شماریات کی ٹیم گھر گھر جا کر اس کی تصدیق کرے گی، ادارہ شماریات کاعملہ ٹیبلٹ میں ڈیٹا فیڈ کرے گا اور اس گھر کو جیو ٹیک کردیا جائے گا۔
مردم شماری کے اس عمل سے گھر، افراد خانہ اور علاقے کا ڈیٹا ادارے کے ڈیٹا بیس میں محفوظ ہو جائے گا، مردم شماری کے لئے ایک لاکھ 21 ہزار کا عملہ، ایک لاکھ 26 ہزار موبائل ٹیبلٹس کے ساتھ کام کرے گا، ڈیجٹیل مردم شماری کے لیے ایک لاکھ 26 ہزار موبائل ٹیبلٹس عملے کو دیئے جا چکے، مردم شماری کا عمل یکم مارچ سے 30 اپریل تک مکمل کیا جائے گا، ماہرین کہتے ہیں کہ عمومی سکونت کی مردم شماری ترقیاتی کاموں، منصوبہ بندی اور پالیسی سازی میں اہم کردار ادا کرسکے گی۔
ادارہ شماریات کا کہنا ہے کہ اس ڈیجیٹل مردم شماری میں صرف پاکستان میں موجود افراد کا ڈیٹا جمع کیا جائے گا جس کی کال سینٹر کے ذریعہ پڑتال بھی کی جائے گی جبکہ آئندہ ہونے والی 8 ویں مردم شماری ادارہ جاتی اور رجسٹرپر اندراج کے ذریعے کی جائے گی۔
2017 میں ہونے والی مردم شماری پر 17 ارب کے اخراجات آئے تھے، اس بار مردم شماری پر اخراجات کا تخمینہ 34 ارب روپے لگایا گیا ہے، اس بار مردم شماری میں اکنامک سروے کے ساتھ شفافیت اور اعتماد سازی کو یقینی بنانے کا بھی عزم کیا گیا ہے۔

اسلام آباد: (ویب ڈیسک) رہنما پاکستان تحریک انصاف اور سابق وفاقی وزیر خارجہ شاہ محمود قریشی نے کہا ہے کہ پی ڈی ایم کا مستقبل نوشتہ دیوار ہے، قوم کو انتخابات کا بے صبری سے انتظار ہے۔
سماجی رابطے کی ویب سائٹ پر اپنے بیان میں شاہ محمود قریشی نے کہا کہ یہ بوکھلاہٹ کا شکار ہیں، آج قومی اسمبلی سے سپیکر اور ڈپٹی سپیکر ہمارا سامنا کرنے سے پہلے ہی فرار ہوگئے۔
رہنما پی ٹی آئی کا کہنا تھا کہ عمران خان کے خوف نے امپورٹڈ حکومت کی نیندیں حرام کر دی ہیں۔

لاہور: (ویب ڈیسک) وزیراعلیٰ پنجاب چودھری پرویز الٰہی نے کہا ہے کہ احساس پروگرام کے ذریعے سیلاب متاثرین کی مدد آئندہ بھی جاری رہنی چاہیے، امید ہے احساس پروگرام اور سیلاب متاثرین کی بحالی جاری رہے گی۔
ایوان وزیراعلیٰ میں وزیراعلیٰ چودھری پرویز الٰہی سے پنجاب احساس پروگرام کی سربراہ ڈاکٹر ثانیہ نشتر نے ملاقات کی، ملاقات کے دوران ڈاکٹر ثانیہ نشتر نے مستحق خاندانوں کیلئے مالی معاونت کے احساس راشن پروگرام پر بریفنگ دی۔
ڈاکٹر ثانیہ نشتر نے سیلاب متاثرین کی بحالی و آباد کاری کے پروگرام پر پیش رفت سے بھی آگاہ کیا۔
اس موقع پر چودھری پرویز الٰہی کا کہنا تھا کہ سیلاب زدگان کی بحالی کیلئے مثالی کام کیا ہے، احساس پروگرام کی افادیت کے پیش نظر اسے کسی دور میں بند نہیں کیا گیا، امید ہے احساس پروگرام اور سیلاب متاثرین کی بحالی جاری رہے گی، احساس پروگرام کے ذریعے سیلاب متاثرین کی مدد آئندہ بھی جاری رہنی چاہیے۔
وزیراعلیٰ چودھری پرویزالہٰی نے مستحق افراد کی مدد کیلئے ڈاکٹر ثانیہ نشتر کی خدمات کو بھی سراہا۔