اسلام آباد: (ویب ڈیسک) پی ٹی آئی رہنما سینیٹر اعظم سواتی نے کہا ہےکہ میری جان نکال لیتے اس کی پروا نہیں تھی لیکن انہوں نے میری عزت پرہاتھ ڈالا جب کہ مجھے نامعلوم جگہ لے جاکر میری ویڈیو بنائی گئی۔
اسلام آباد میں پریس کانفرنس کے دوران اعظم سواتی نے وزیر داخلہ رانا ثنااللہ کو سرٹیفائیڈ مجرم اور جھوٹا قرار دیتے ہوئے کہا کہ یہ جو تم پاکستانی قوم کے سامنے بورہے ہو وہی کاٹو گے، میرے گھر سے تلاشی کے دوران قیمتی چیزیں لے گئے، تفتیشی افسر نے 2 دن بعد اپنی کسٹڈی میں مجھ سے دستخط کروایا۔انہوں نے کہا کہ میری جان نکال لیتے اس کی پروا نہیں تھی لیکن انہوں نے میری عزت پرہاتھ ڈالا، مجھے نامعلوم جگہ لے جاکر میری ویڈیو بنائی گئی۔
اعظم سواتی کا کہنا تھا کہ میرا کیس کھولنے پر چیف جسٹس کا شکریہ ادا کرتا ہوں، میری سی سی ٹی وی کیمرے کو عدالت عظمیٰ اپنی تحویل میں لے، اس کا فارنزک کرایا جائے تاکہ معلوم ہوسکے کہ کتنے بندے میرے گھر آئے۔
پی ٹی آئی رہنما نے مزید کہا کہ میرے آدھے کیس کی شہادت وہ سی سی ٹی وی کیمرا ہے لیکن سی سی ٹی وی کیمروں کے ساتھ بیک اپ بھی اٹھا کرلے گئے۔

گوجرانوالہ: (ویب ڈیسک) چیئرمین پاکستان تحریک انصاف (پی ٹی آئی) عمران خان نے الیکشن کمشنر کے خلاف ہرجانے کے لیے عدالت جانے کا اعلان کر دیا۔
چیئرمین پی ٹی آئی عمران خان نے لانگ مارچ کے شرکا سے خطاب کرتے ہوئے کہا کہ قوم اگر آزاد نہیں ہوتی تو اس کی عزت نہیں ہوتی اور پرواز کے لیے اللہ نے انسان کو پر دیئے ہیں۔
انہوں نے کہا کہ عدالتیں عوام کے بنیادی حقوق کی حفاظت کرتی ہیں لیکن عام آدمی کچہری میں رلتا ہے اور اس کی شنوائی نہیں ہوتی۔ عام آدمی کے بنیادی حقوق نہیں ہوتے کیونکہ وہ غلام ہوتے ہیں۔ حکومت کو اسکرپٹ باہر سے ملتا ہے اور حکومت کو اسکرپٹ دیا جاتا ہے کہ روس سے سستا تیل نہیں لینا۔
عمران خان نے کہا کہ ارشد شریف کو ملک چھوڑنا پڑا اور اسے شہید کر دیا گیا۔ مجھ پر درجنوں مقدما ت درج کیے گئے اور الیکشن کمشنر کے خلاف تو میں ہرجانے کے لیے عدالت جاؤں گا۔
انہوں نے دعویٰ کیا کہ نواز شریف کو ان کے حلقے میں ہرا دوں گا اور آصف زرداری کے پیچھے سندھ آ رہا ہوں۔ میں نواز شریف نہیں کہ ملک سے فرار ہو جاؤں جبکہ نواز شریف نے میڈیکل رپورٹس میں بھی دھاندلی کی اور باہر گئے لیکن میرا جینا مرنا پاکستان میں ہے۔
چیئرمین پی ٹی آئی نے کہا کہ لندن میں بھگوڑا نواز شریف اور آصف زرداری مل کر سازش کر رہے ہیں۔ آصف زرداری کا ولایتی بیٹا تو اردو انگریزی کی طرح بولتا ہے۔

اسلام آباد: (ویب ڈیسک) پاکستان تحریک انصاف (پی ٹی آئی) کے وائس چیئرمین شاہ محمود قریشی نے کہا ہے کہ مذاکرات سے انکار نہیں تاہم بے اختیار لوگوں سے مذاکرات نہیں کرنے۔ فواد چودھری نے کہا ہے کہ اگر لانگ مارچ میں کم لوگ ہیں تو آپ سیکیورٹی واپس کیوں نہیں لے لیتے ؟
سابق وزیر خارجہ اور پی ٹی آئی کے وائس چیئرمین شاہ محمود قریشی نے پریس کانفرنس کرتے ہوئے کہا کہ کوئی فیس سیونگ ایکسر سائز نہیں ہے، لوگ پیدل چل رہے ہیں اور تصادم ہمارا مقصد نہیں ہے بلکہ یہ سرکاری پراپیگنڈ ہے جو لوگوں کے ذہنوں میں ڈالا جارہا ہے، عمران خان صاحب نے پہلے بھی کہا کہ مذاکرات سے کبھی انکار نہیں کیا تاہم مذاکرات بے اختیار لوگوں سے تو نہیں کرنے۔
انہوں نے کہا کہ اگر ہمارا مقصد پورا ہو جاتا ہے تو بلاوجہ ملک کو اس کیفیت میں مبتلا نہیں رکھنا چاہتے۔ خان صاحب نے رات کہا کہ بھارتی میڈیا بلا وجہ شادیانے بجا رہا ہے تو میں اس کی نفی کرتا ہوں اور ہم کوئی ایسا قدم نہیں اٹھائیں گے جس سے ملک یا اداروں کو نقصان ہو۔
شاہ محمود قریشی نے کہا کہ چن دا قلعہ میں استقبال قابل دید تھا اور گوجرانوالہ میں دو تاریخی جلسے ہوئے۔ مسلم لیگ ن کو سمجھ جانا چاہیے اب جی ٹی روڈ وہ نہیں رہی اور ہمارے لانگ مارچ کو منفی رنگ دینے کے لیے منظم منصوبہ تیار کیا گیا ہے تاہم چار دن سے ہم لانگ مارچ میں ہیں کوئی ناخوشگوار واقعہ نہیں ہوا۔
انہوں نے کہا کہ ہمارے لانگ مارچ کے بارے میں کہا جارہا ہے کہ یہ خونی مارچ ہے۔ بدقسمتی سے گزشتہ دنوں افسوسناک حادثہ ہوا جس کا ہمیں دکھ ہے لیکن ہمارے مارچ نے ثابت کیا کہ ہم پر امن ہیں، اور پر امن رہیں گے اور اگر لانگ مارچ میں آگے کچھ ہوا تو ان کے زیراستعمال لوگ کریں گے۔ گزشتہ دنوں سے ایک بات ہو رہی ہے کہ ایک اور پریس کانفرنس آرہی ہے تو عمران خان کہہ چکے ہیں جو بھی پریس کانفرنس کرے گا خود کو نقصان پہنچائے گا۔
سابق وزیر خارجہ نے کہا کہ بڑے شہر میں داخلے سے قبل ہمیں بہتر کوریج دینے والے چینلز کو آف ائیر کر دیا جاتا ہے۔ ماضی میں بہت غلطیاں ہوئی ہیں اور ہمیں ان سے سیکھنا چاہیے۔ گوجرانوالہ میں عمران خان کے خلاف وال چاکنگ کی گئی لیکن آپ بیانیے کی جنگ ہار چکے ہیں۔
پی ٹی آئی رہنما فواد چودھری نے کہا کہ ہمارے کارواں میں لوگ بڑھتے جارہے ہیں اور ہم اسلام آباد کے لیے آگے بڑھتے جارہے ہیں۔ ہم ایک حادثے سے دوچار ہوچکے ہیں اس لیے آگے احتیاط کریں گے۔
انہوں نے کہا کہ گزشتہ روز نواز شریف کا بیان آیا کہ لانگ مارچ میں 2،3 ہزار لوگ ہیں لیکن حکومت نے 41 کروڑ روپے کے اضافی گرانٹ اسلام آباد کی سیکیورٹی کے لیے منظور کیے۔ حکمرانوں سے کہتا ہوں کہ کیا آپ کا سامنا ملک دشمنوں سے ہے؟ احتجاج، دھرنا اور لانگ مارچ ہمارا بنیادی حق ہے اور اگر آپ سمجھتے ہیں کہ لانگ مارچ میں کم لوگ ہیں تو آپ سیکیورٹی واپس کیوں نہیں لیتے؟
فواد چودھری نے کہا کہ شہباز شریف کو خود یقین نہیں کہ وہ وزیر اعظم ہیں اور گزشتہ روز حکمرانوں نے 4 پریس کانفرنسز کیں اور کہا کہ پی ٹی آئی فوج کے خلاف ہے جبکہ فاطمہ جناح کے خلاف بھی ایسی مہمات چلائی گئی تھیں جو آج پی ٹی آئی کے خلاف چلائی جا رہی ہے۔ الیکشن کمیشن نے عمران خان کو نااہل کیا اور اگلے ہی ہفتے کرم سے ضمنی انتخابات میں فتح ہوئی۔
انہوں نے کہا کہ 30 ہزار سے زیادہ لوگ اس وقت اسلام آباد میں موجود ہیں اور لانگ مارچ کو حادثے سے بچا کر اسلام آباد پہنچانا ضروری ہے۔ رانا ثنا اللہ اور مریم اورنگزیب کو خوف کس بات کا ہے اور ہم سب سے مخاطب ہو کر کہتے ہیں کہ فیصلہ عوام کو کرنے دیا جائے۔
سابق وفاقی وزیر نے کہا کہ ہمارا مطالبہ کوئی غیر آئینی اور غیر قانونی نہیں بلکہ شفاف انتخابات کا ہے اور انہیں عوام کے فیصلوں پر سر تسلیم خم کرنا پڑے گا جنہوں نے عمران خان کو تحریک عدم اعتماد سے نکالا انہیں فیصلے درست کرنا ہوں گے۔

اسلام آباد: (ویب ڈیسک) پاکستان پیپلزپارٹی کی رہنما اور سینیٹر شیری رحمان نے کہا ہے کہ عمران خان کا مارشل لاء لگانے کا بیان قابل مذمت ہے، جو سیاستدان 26 سال سیاسی جدوجہد کا دعویٰ کرتا ہے وہ یہ نہیں کہتا کہ مارشل لا لگانا ہے تو لگا دو۔
سماجی رابطے کی ویب سائٹ ٹویٹر پر اپنے پیغام میں شیری رحمان نے کہا کہ جمہوریت پسند سیاستدان اداروں کو مارشل لا لگانے پر نہیں اکساتا، عمران خان چاہتے ہیں ملک میں مارشل لا لگے، عمران خان چاہتے ہیں وہ اقتدار میں نہیں تو کوئی اور بھی نا ہو۔
شیری رحمان کا کہنا تھا کہ یہ جمہوری اور آئینی نہیں فاشسٹ سوچ کی نشانی ہے، ادارے کہ رہے ہیں ہم سیاست میں مداخلت نہیں کریں گے یہ کہتے ہیں مداخلت کرو اور مجھے اقتدار میں لاؤ، ان کا مقصد ہے ڈیل دو یا مارشل لا لگاؤ، کیا کوئی پارلیمانی اور آئینی جمہوریت میں یقین رکھنے والا سیاست دان اداروں سے غیر آئینی کام کرنے کا مطالبہ کرسکتا ہے؟
رہنما پیپلز پارٹی نے مزید کہا کہ عمران نیازی کی 26سال کی جدوجہد صرف چیرٹی کے نام پر پیسے کھانے میں گزری ہے، کون سا سیاست دان اداروں سے غیر آئینی مداخلت یا مارشل لا لگانے کا مطالبہ کرتا ہے؟۔

اسلام آباد: (ویب ڈیسک) پاکستان تحریک انصاف (پی ٹی آئی) کے رہنما شہباز گل کا نام ایگزٹ کنٹرول لسٹ (ای سی ایل) میں ڈال دیا گیا۔
ذرائع کے مطابق پی ٹی آئی کے چیئرمین عمران خان کے چیف آف اسٹاف شہباز گل کا نام کابینہ کی منظوری کے بعد ای سی ایل میں ڈالا گیا۔
شہباز گل کا نام اسلام آباد ضلعی انتظامیہ کی سفارش پر ای سی ایل میں ڈالا گیا۔