اسلام آباد: (ویب ڈیسک) وزیر دفاع خواجہ آصف نے کہا ہے کہ نومبر سیاسی طور پر فیصلہ کن ثابت ہو گا۔
وزیر دفاع خواجہ آصف نے پریس کانفرنس کرتے ہوئے کہا کہ ملک کی سیاست بڑے اہم موڑ پر آچکی ہے اور نومبر سیاسی طور پر فیصلہ کن ثابت ہو گا۔
لانگ مارچ پر تبصرہ کرتے ہوئے انہوں نے کہا کہ عمران خان کا قافلہ 10 سے 12 ہزار افراد سے شروع ہوا اور مریدکے میں عمران خان کے قافلے میں ڈھائی ہزار لوگ ہیں، اب اسلام آباد پہنچتے پہنچتے کیا حال ہو گا وہ اندازہ کر لیں۔
انہوں نے کہا کہ چند روز قبل عمران خان سیالکوٹ آیا تھا لیکن میں اس وقت یہاں نہیں تھا اور تمام تر حکومتی مشنری لگا کر کتنے لوگ جمع کرسکے سب کے سامنے ہے۔ عمران خان کا اصلی چہرہ سب سامنے آچکا ہے لیکن کچھ کو ابھی بھی غلط فہمی ہے تاہم وہ بھی آئندہ آنے والے دنوں میں دور ہو گی۔
خواجہ آصف نے کہا کہ وزیر اعظم نے کہا عمران خان نے آرمی چیف کے حوالے سے رابطہ کیا اور عمران خان نے پیغام بھیجا آرمی چیف کا فیصلہ ہم مل کے کرتے ہیں۔ آئین نے یہ فرض وزیر اعظم کو دیا ہے اور عمران خان کے ذہن میں کہاں سے آگیا کہ یہ سیاست کا حصہ ہے۔ یہ کہاں ہماری روایت ہے کہ سیاستدان مذاکرات کر کے آرمی چیف لگائیں؟ آرمی چیف کی تعینات سیاستدان مذاکرات کر کے کریں گے تو پھر کیا رہ جائے گا۔
انہوں نے کہا کہ اس ادارے نے 4 ماہ میں 77 شہادتیں دی ہیں اور آپ کا ساتھ نہ دیں تو آپ تنقید کرتے ہیں۔ عمران خان کون ہوتا ہے آرمی چیف کے معاملے میں مشورے دینے والا؟ عمران خان اس وقت اسمبلی رکن بھی نہیں ہے وہ نااہل ہو چکا ہے۔ عمران خان کہتا ہے مجھے نہیں معلوم تھا کہ نواز شریف اور آصف زرداری کرپٹ ہیں اور مجھے بتایا گیا تھا کہ یہ دونوں کرپٹ ہیں۔
وزیر دفاع نے کہا کہ پاکستان کے اجتماعی شعور کی توہین نہ کریں۔ اچھے دن آتے ہیں اور چلے جاتے ہیں، اللہ سے اچھے دنوں کی دعا کرنی چاہیئے۔ بتایا گیا کہ مذاکرات ہورہے ہیں لیکن کوئی مذاکرات نہیں ہو رہے۔
انہوں نے دعویٰ کیا کہ پی ٹی آئی کے بہت سے اراکین اسمبلی ہم سے رابطے کر رہے ہیں جو پی ٹی آئی کو چھوڑنے کے لیے تیار ہیں۔ وہ اگلے انتخابات کے حوالے ہم سے یقین دہانی چاہتے ہیں۔
خواجہ آصف نے کہا کہ پچھلے 2،3 روز سے ہندوستان میں جس طرح خوشیاں منائی جا رہی ہیں وہ سب نے دیکھا اور کسی بھی سیاسی رہنما نے بعض ایسی حدود ہیں جو پار نہیں کیں لیکن وہ عمران خان نے پار کیں۔ پچھلے 3 روز سے لگاتار انہوں نے پروپیگنڈہ کر کے بھارت کو موقع فراہم کیا ہے اور ہندوستان میں جشن منایا جا رہا ہے۔ ان کے ایک صاحب بھارتی چینل میں بھی بات کرنے پہنچ گئے۔
انہوں نے کہا کہ پاک فوج کا شمار دنیا کی بہترین افواج میں شمار ہوتا ہے اور ہماری انٹیلی جنس ایجنسی کا شمار دنیا کی بہترین ایجنسیز میں ہوتا ہے۔

لاہور: (ویب ڈیسک) گورنمنٹ آف پاکستان کی ٹوئٹر اکاونٹ سے کی گئی ٹویٹ پر سوشل میڈیا پر نئی بحث چھڑ گئی۔
گورنمنٹ آف پاکستان کی جانب سے سوشل میڈیا پلیٹ فارم ٹوئٹر پر ٹویٹ کی گئی ہے کہ سڑکیں اور ہائی ویز تجارتی سرگرمیوں کے لیے ہیں یہ مارچ کرنے کے لیے نہیں ہیں۔
ٹویٹ میں یہ بھی لکھا گیا ہے کہ یہ پیغام سب کی بھلائی کے لیے ہے۔ اچھے شہری بنیں۔ یہ ٹویٹ ایسے موقع پر کی گئی ہے جب پاکستان تحریک انصاف لاہور سے اسلام آباد کی جانب لانگ مارچ کر رہی ہے۔
سوشل میڈیا صارفین اس ٹویٹ پر اپنے اپنے انداز میں اظہار رائے کر رہے ہیں۔ بیشتر صارفین نے پی ڈی ایم کی جانب سے کیے گئے مارچ اور احتجاج کی تصاویر اور ویڈیو شیئر کرتے ہوئے اعتراض کیا ہے کہ پی ڈی ایم کی جانب سے بھی انہیں سڑکوں پر مارچ کیے گئے تھے۔
ایک سوشل میڈیا صارف نے ماضی میں ہونے والے مسلم لیگ ن کے مہنگائی مکاو مارچ کی تصویر شیئر کرتے ہوئے لکھا ہے کہ کیا یہ مارچ مریخ پر ہوا تھا؟
سوشل میڈیا یوزرز کا کہنا ہے کہ قوانین کتنی جلد تبدیل ہو جاتے ہیں۔
سوشل میڈیا پر صارفین نے یہ بھی مشورہ دیا ہے کہ گورنمنٹ آف پاکستان کی ٹوئنٹر اکاونٹ کا نام بدل کر گورنمنٹ آف پی ڈی ایم رکھ دینا چاہیے۔
واضح رہے کہ پی ٹی آئی کا لانگ مارچ آج گوجرانوالہ پہنچ کر رک جائے۔ لانگ مارچ کے شرکا جمعہ تک اسلام آباد پہنچیں گے۔

اسلام آباد: (ویب ڈیسک) قومی احتساب بیورو (نیب) نے بحریہ ٹاؤن القادر یونیورسٹی سوہاوہ کیلئے الاٹ شدہ زمین پر تحقیقات شروع کر دیں۔ زلفی بخاری کے ماتحت ڈائریکٹر کو طلب کر لیا گیا۔
نیب کی جانب سے جاری کردہ نوٹس کے مطابق نیب نے سابق وزیر اعظم عمران خان کے معاون خصوصی برائے سمندر پار پاکستانی سید زلفی بخاری کے ماتحت ڈائریکٹر خالد خان کو طلب کیا ہے۔
خالد خان القادر یونیورسٹی زمین کی منتقلی کے وقت سید زلفی بخاری کی جانب سے دستخط شدہ دستاویز میں بطور گواہ شامل تھے۔
نیب نے خالد خان کو تحقیقات کے لیے نیب دفتر راولپنڈی میں حاضر ہونے کا حکم دیا ہے۔

مریدکے : (ویب ڈیسک) چیئرمین پاکستان تحریک انصاف اور سابق وزیراعظم عمران خان نے کہا ہے کہ قوم امپورٹڈ حکومت کو نہیں مانتی، غلام اور ڈاکو ہم پر مسلط کئے گئے، میں آزاد آدمی ہوں، مر سکتا ہوں مگر غلامی نہیں کر سکتا۔
مریدکے میں پی ٹی آئی کے لانگ مارچ کے تیسرے روز شرکاء سے خطاب کرتے ہوئے سابق وزیراعظم عمران خان نے کہا کہ شہباز شریف آپ نے بیان دیا کہ میں نے آپ کو ایک پیغام بھجوایا ہے، میں آپ کے پاس پیغام کیوں بھجواؤں گا، شہباز شریف سن لیں میں بوٹ پالش کرنے والوں سے بات نہیں کرتا، میں نے ان سے بات کی جو شہباز شریف کو اشاروں پر چلاتے ہیں، جن سے بات کی ان کو کہا کہ ملک میں شفاف الیکشن کرائے جائیں۔
چیئرمین تحریک انصاف نے کہا کہ قانونی کی حکمرانی چاہتا ہوں، عوام کے حقوق کا تحفظ کیا جائے، میں نے نہ کسی کے پیر پکڑے اور نہ منتیں کیں،عوام کی طاقت سے وزیراعظم بنا، امریکا سے مدد مانگتا ہوں اور نہ ہی کسی اور سے، فوج بھی میری ہے اور ملک بھی میرا ہے، جب فوج پر تنقید کرتا ہوں تو وہ تعمیری ہوتی ہے۔
پی ٹی آئی کا لانگ مارچ آج تیسرے روز چیئرمین عمران خان کی قیادت میں مریدکے سے اپنی منزل کی جانب رواں دواں ہے، مارچ کا آج رات پڑاؤ گوجرانوالہ میں ہوگا۔
عمران خان کی گوجرانوالہ میں موجودگی کے دوران ممکنہ کشیدگی کا خدشہ ہے جبکہ گوجرانوالہ میں وفاقی زیر خرم دستگیر کی رہائش گاہ پر پولیس سکیورٹی تعینات کر دی گئی ہے۔

کراچی : (ویب ڈیسک) کراچی ائیرپورٹ سے جانے والی مختلف ائیرلائنز کی 7 پروازیں منسوخ ہو گئیں۔
ائیر پورٹ ذرائع کے مطابق لوڈ نہ ہونے اور تیکنیکی وجوہات کے باعث پروازیں منسوخ ہوئیں۔
ائیرپورٹ ذرائع کے مطابق جو پروازیں منسوخ ہوئیں ان میں صبح7 بجےکراچی سے اسلام آباد کی پروازپی ایف121، کراچی سے دبئی کی صبح7 بجےکی پرواز ای کے605 اور کراچی سے لاہور کی صبح 8 بجےکی پروازای آر520 شامل ہے۔اس کے علاوہ دوپہر 12 بجےکی کراچی سےاسلام آباداورپشاورکی پروازپی اے 602، دوپہرپونےایک بجےکی کراچی سے لاہورکی پرواز ای آر 522، کراچی سے گوادر کی پرواز پی کے 503 اور کراچی سے دبئی کی شام 6 بجے کی پرواز پی ا ے 110 منسوخ ہوگئیں۔